தமிழ்நாட்டிற்கெனத் தமிழை முதன்மைப்படுத்தி தனிக் கொடி உருவாக்க வேண்டும் என்றும், அதற்காகச் சட்டம் இயற்றப்பட வேண்டும் என்றும் தமிழக பொதுப்பணி மற்றும் விளையாட்டுத் துறை அமைச்சர் ஆதவ் அர்ஜுனா வலியுறுத்தியுள்ளார். நவம்பர் 1ஆம் தேதி சென்னை எழும்பூர் அரசு அருங்காட்சியகத்தில் நடைபெற்ற தமிழ்நாடு நாள் விழாவில் அவர் பேசிய இந்தக் கருத்து, தற்போது அரசியல் வட்டாரத்தில் பெரும் விவாதத்தை ஏற்படுத்தியுள்ளது.
இந்தியாவில் உள்ள சில மாநிலங்களைப் போல, தமிழின் பெருமையையும் அடையாளத்தையும் போற்றும் வகையில் தமிழ்நாட்டிற்கெனத் தனிக் கொடி உருவாக்கப்பட வேண்டும் என ஆதவ் அர்ஜுனா தெரிவித்துள்ளார். இதற்காகச் சட்டம் இயற்றி, அந்தக் கொடியை முதன்முறையாக முதலமைச்சர் சி. ஜோசப் விஜய் ஏற்ற வேண்டும் என்றும் அவர் கோரிக்கை விடுத்துள்ளார்.
ஆண்டுதோறும் ஜூலை 18 மற்றும் நவம்பர் 1 ஆகிய தமிழ்நாடு நாள் தொடர்பான முக்கியத் தேதிகளில் முதலமைச்சர் மாநிலக் கொடியை ஏற்றுவதுடன், ஒவ்வொரு வீட்டிலும் அந்தக் கொடி ஏற்றப்பட வேண்டும் என்றும் குறிப்பிட்டுள்ளார். மேலும், சுதந்திர தினம் மற்றும் குடியரசு தினத்தைப் போல ஜூலை 18, நவம்பர் 1 ஆகிய இரு நாட்களுக்கும் அரசு விடுமுறை அறிவிக்க வேண்டும் என்றும் வலியுறுத்தியுள்ளார்.
குறிப்பாக, தமிழ்நாட்டிற்கான கொடி வெறும் மாநில அடையாளமாக மட்டும் இல்லாமல், தேசியக் கொடிக்கு இணையான அந்தஸ்தைக் கொண்டதாக இருக்க வேண்டும் என்று ஆதவ் அர்ஜுனா தனது உரையில் குறிப்பிட்டதாகக் கூறப்படுகிறது. இந்தக் கருத்துதான் தற்போது அரசியல் சர்ச்சைக்கு முக்கியக் காரணமாக அமைந்துள்ளது.
ஆதவ் அர்ஜுனாவின் கோரிக்கைக்குப் பாஜக கடும் எதிர்ப்பு தெரிவித்துள்ளது. பாஜக மாநிலத் தலைவர் வினோஜ் பி. செல்வம் உள்ளிட்ட அக்கட்சியின் முக்கிய நிர்வாகிகள், மாநிலத்திற்குத் தனிக் கொடி வேண்டும் என்ற கோரிக்கை பிரிவினைவாத எண்ணத்தை வளர்க்கும் வகையில் இருப்பதாகக் குற்றம்சாட்டியுள்ளனர்.
இந்தியத் தேசியக் கொடியே நாட்டின் ஒருமைப்பாட்டின் அடையாளம் என்றும், தேசியக் கொடியின் கீழ் தமிழர்களின் மொழி மற்றும் பண்பாட்டு அடையாளம் எந்த வகையிலும் குறைந்துவிடாது என்றும் அவர்கள் தெரிவித்துள்ளனர்.
மேலும், இந்தியா நிர்வாக வசதிக்காக மாநிலங்களாகப் பிரிக்கப்பட்ட நாடு என்பதையும், அமெரிக்கா போன்ற நாடுகளின் வரலாற்றையும் ஒப்பிட்டுப் பார்க்க வேண்டும் என்றும் விமர்சனங்கள் எழுந்துள்ளன. அமெரிக்காவில் மாநிலங்களுக்குத் தனிக் கொடிகள் இருப்பதைப் போல இந்தியாவிலும் இருக்க வேண்டும் என்று கோருவதற்கு முன்பு, இரு நாடுகளின் உருவாக்கம் மற்றும் நிர்வாகப் பின்னணியைப் புரிந்துகொள்ள வேண்டும் என ஆதவ் அர்ஜுனாவுக்கு எதிராக விமர்சனங்கள் முன்வைக்கப்பட்டுள்ளன.
தமிழ்நாட்டிற்குத் தனிக் கொடி வேண்டும் என்ற கோரிக்கை முன்வைக்கப்படுவது இது முதல் முறையல்ல. 1970-களிலேயே அப்போதைய முதலமைச்சர் மு. கருணாநிதி தமிழ்நாட்டிற்கெனத் தனி மாநிலக் கொடி வேண்டும் என்ற கோரிக்கையை முன்வைத்திருந்தார்.
இருப்பினும், இந்திய அரசியலமைப்பில் மாநிலங்களுக்கெனத் தனிக் கொடி குறித்துத் தெளிவான ஏற்பாடுகள் இல்லை என்று மத்திய உள்துறை அமைச்சகம் 2018ஆம் ஆண்டு நாடாளுமன்றத்தில் தெரிவித்திருந்தது.
மேலும், இந்தியக் கொடி விதிமுறைகளின்படி தேசியக் கொடிக்கு இணையாகவோ அதற்கு மேலான அந்தஸ்திலோ மற்றொரு கொடியைப் பறக்கவிடுவதில் சட்டரீதியான கட்டுப்பாடுகள் இருப்பதாகவும் சுட்டிக்காட்டப்படுகிறது.
தனிக் கொடி விவகாரம் மட்டுமின்றி, தமிழ்மொழியின் முக்கியத்துவம் குறித்தும் ஆதவ் அர்ஜுனா பல்வேறு கருத்துகளை முன்வைத்துள்ளார். தமிழகத்தில் சிபிஎஸ்இ உள்ளிட்ட அனைத்துப் பள்ளிகளிலும் ஒன்றாம் வகுப்பு முதல் எட்டாம் வகுப்பு வரை தமிழைக் கட்டாயப் பாடமாக்கச் சட்டம் இயற்ற வேண்டும் என்று வலியுறுத்தியுள்ளார்.
ஆங்கில வழியில் படித்தால் மட்டுமே வேலைவாய்ப்பு கிடைக்கும் என்ற தவறான எண்ணத்தை மாற்ற வேண்டும் என்றும், வணிக ரீதியாக ஆங்கிலம் தேவைப்பட்டாலும் தமிழகத்தில் பிறக்கும் ஒவ்வொரு குழந்தையும் கட்டாயம் தமிழைக் கற்க வேண்டும் என்றும் தெரிவித்துள்ளார். தமிழ் மொழி பள்ளிகளில் விருப்பப் பாடமாக இருக்கக் கூடாது; கட்டாயப் பாடமாக இருக்க வேண்டும் என்றும் கூறியுள்ளார்.
சீனா, பிரான்ஸ், ஜப்பான் உள்ளிட்ட நாடுகளை உதாரணமாகக் குறிப்பிட்ட அவர், அந்நாட்டு மக்கள் தங்களது தாய்மொழிக்கு முக்கியத்துவம் அளிப்பதையும், தங்களது மொழிப் பெருமையை விட்டுக்கொடுக்காமல் இருப்பதையும் சுட்டிக்காட்டியுள்ளார். தமிழகத்திலும் ஆங்கிலம் பேசுவதைப் பெருமையாகக் கருதும் மனநிலை மாற வேண்டும் என்றும் வலியுறுத்தியுள்ளார்.
மேலும், தமிழக எல்லைப் போராட்டங்களிலும் மொழிப் பெருமையைப் பாதுகாப்பதிலும் பங்காற்றிய ம.பொ. சிவஞானம், ஜீவா, விநாயகம் உள்ளிட்ட வரலாற்றுத் தலைவர்கள் மற்றும் தியாகிகளின் வாழ்க்கை வரலாற்றை மாணவர்கள் பாடப்புத்தகங்கள் வாயிலாகக் கட்டாயம் படிக்கும் வகையில் சட்டம் இயற்ற வேண்டும் என்றும் கோரிக்கை விடுத்துள்ளார்.
இதற்கிடையே, அதே தமிழ்நாடு நாள் விழாவில் பங்கேற்ற பள்ளிக் கல்வித்துறை அமைச்சர் ராஜ்மோகன், தமிழ்நாட்டிற்குத் தனிக் கொடி அறிமுகப்படுத்துவது குறித்து அரசு பரிசீலிக்கும் என்று தெரிவித்துள்ளார். கர்நாடகா, ஆந்திரப் பிரதேசம் உள்ளிட்ட மாநிலங்களைப் பின்பற்றி இதுதொடர்பாக நடவடிக்கை எடுக்க முடியுமா என்பது குறித்து ஆலோசிக்கப்படும் என்றும் அவர் கூறியுள்ளார்.
நவம்பர் 1ஆம் தேதியைத் தமிழ்நாடு நாளாக அதிகாரப்பூர்வமாக அறிவித்ததைத் தொடர்ந்து, அடுத்தகட்டமாக மாநிலக் கொடி குறித்தும் எதிர்காலத்தில் நடவடிக்கைகள் மேற்கொள்ளப்படலாம் என்றும் குறிப்பிட்டுள்ளார்.
ஆதவ் அர்ஜுனாவின் கருத்துகளுக்கு எதிர்ப்பு தெரிவித்துள்ள பாஜக மாநிலத் தலைவர் வினோஜ் பி. செல்வம், மேலும் சில கேள்விகளையும் எழுப்பியுள்ளார். கோவில்களில் தமிழுக்கு முக்கியத்துவம் அளிக்க வேண்டும் என்று வலியுறுத்தும் அதே ஆர்வத்தை தேவாலயங்களிலும் மசூதிகளிலும் தமிழ் இடம்பெற வேண்டும் என்று கோருவதிலும் காட்டுவார்களா என்றும் கேள்வி எழுப்பியுள்ளார்.
மேலும், ஒரு கொடியை வடிவமைப்பது எளிது; ஆனால் மக்களின் எதிர்காலத்தை உருவாக்குவதுதான் கடினம் என்று குறிப்பிட்ட அவர், தமிழ் வழியில் படித்த மாணவர்களுக்கான வேலைவாய்ப்பு மற்றும் இளைஞர்களுக்கான தொழில்நுட்ப வசதிகளை மேம்படுத்த என்ன திட்டம் வைத்திருக்கிறார்கள் என்பதை காலக்கெடுவுடன் அறிவிக்க வேண்டும் என்றும் சவால் விடுத்துள்ளார்.
இதற்கிடையே, வேலைவாய்ப்பு, கட்டமைப்பு வசதிகள், சட்டம் ஒழுங்கு போன்ற முக்கியப் பிரச்சினைகளில் கவனம் செலுத்தாமல், கொடி போன்ற உணர்வுப்பூர்வமான விவகாரங்களை முன்வைத்து அரசியல் செய்வதாகவும் சமூக வலைத்தளங்களில் விமர்சனங்கள் எழுந்துள்ளன.
ஆதவ் அர்ஜுனாவின் பேச்சு சமூக வலைத்தளங்களில் வெளியானதைத் தொடர்ந்து, தமிழக நெட்டிசன்களும் பல்வேறு கருத்துகளைப் பகிர்ந்து வருகின்றனர். ஏற்கெனவே தமிழக வெற்றிக் கழகத்திற்குச் சிவப்பு மற்றும் மஞ்சள் நிறங்களில் கொடி இருக்கும் நிலையில், தமிழ்நாட்டிற்கெனத் தனிக் கொடி உருவாக்கப்பட்டால் அதிலும் இதே நிறங்கள் இடம்பெறுமா என்று கேலி கலந்த கருத்துகளையும் மீம்ஸ்களையும் பகிர்ந்து வருகின்றனர். இதனால் மாநிலக் கொடி விவகாரம் அரசியல் மற்றும் சமூக வலைத்தளங்களில் தொடர்ந்து விவாதப் பொருளாகியுள்ளது.