சென்னை எண்ணூர் பகுதியில், திருமணத்திற்கு முன்பாகப் பிறந்த பச்சிளம் பெண் குழந்தையைக் கழுத்தை நெரித்தும், சுவற்றில் அடித்தும் கொலை செய்ததாக 18 வயது இளம் பெண் கைது செய்யப்பட்டுள்ளார். மேலும், அவரைக் கர்ப்பமாக்கிய காதலன் மீதும் போக்சோ சட்டத்தின் கீழ் வழக்குப் பதிவு செய்யப்பட்டு கைது செய்யப்பட்டுள்ளார். இந்தச் சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.
சென்னை எண்ணூர் பகுதியைச் சேர்ந்த 18 வயது கோகிலா என்பவர், அதே பகுதியைச் சேர்ந்த லாரி ஓட்டுநரான சந்தோஷ் என்பவருடன் கடந்த நான்கு ஆண்டுகளுக்கும் மேலாகக் காதலில் இருந்து வந்ததாகக் கூறப்படுகிறது. இருவருக்கும் இடையே ஏற்பட்ட நெருங்கிய உறவின் காரணமாக கோகிலா கர்ப்பமடைந்துள்ளார்.
இதற்கிடையே, அவர் கர்ப்பமானதை அறிந்த சந்தோஷ், அவரைத் திருமணம் செய்ய மறுத்ததுடன், சில மாதங்களுக்கு முன்பு வேறொரு பெண்ணையும் திருமணம் செய்துகொண்டதாகக் கூறப்படுகிறது.
இதனால், கோகிலா தனது கர்ப்பத்தைப் பற்றிய விவரத்தை குடும்பத்தினரிடம் இருந்து மறைத்து வந்துள்ளார். குடும்பத்தினருக்குக் கர்ப்பம் குறித்துத் தெரியவந்திருந்தபோதிலும், அவமானம் காரணமாக யாரும் அவருடன் மருத்துவமனைக்குச் செல்லவில்லை எனக் கூறப்படுகிறது. இதனால், அவர் தனியாக மருத்துவமனைக்குச் செல்ல முடிவு செய்துள்ளார்.
இந்நிலையில், திருவொற்றியூரில் உள்ள தனியார் மருத்துவமனைக்குச் சென்ற கோகிலா, தனக்கு வயிற்றுப்போக்கு இருப்பதாகக் கூறி மருத்துவமனை கழிவறைக்குள் சென்றுள்ளார். அங்கு சுமார் இரண்டு மணி நேரத்திற்கும் மேலாக இருந்த அவர், யாருக்கும் தெரியாமல் பெண் குழந்தையைப் பெற்றெடுத்துள்ளார்.
குழந்தை பிறந்ததும், அதை யாருக்கும் தெரியாமல் மறைப்பதற்காகக் கழிவறைக் கோப்பைக்குள் திணித்து, தண்ணீர் ஊற்றி வெளியேற்ற முயன்றதாகக் கூறப்படுகிறது. ஆனால், அந்த முயற்சி பலனளிக்காததால், குழந்தையின் கழுத்தை நெரித்தும், சுவற்றில் பலமாக மோதியும் கொலை செய்ததாக விசாரணையில் தெரியவந்துள்ளது.
இதற்கிடையே, நீண்ட நேரமாகியும் கழிவறைக் கதவு திறக்கப்படாததால் சந்தேகமடைந்த மருத்துவமனை ஊழியர்கள், கதவைத் தட்டியுள்ளனர். பின்னர் உள்ளே சென்று பார்த்தபோது, பச்சிளம் பெண் குழந்தை சடலமாகக் கிடந்ததைக் கண்டு அதிர்ச்சியடைந்தனர். உடனடியாக காவல்துறையினருக்குத் தகவல் தெரிவித்தனர்.
தகவலறிந்து சம்பவ இடத்திற்கு விரைந்த எண்ணூர் மற்றும் திருவொற்றியூர் காவல்துறையினர், குழந்தையின் உடலை மீட்டு விசாரணை மேற்கொண்டனர். அப்போது, குழந்தையைப் பெற்றெடுத்த கோகிலா மீதே சந்தேகம் எழுந்தது.
முதற்கட்ட விசாரணையின்போது, குழந்தை பிறக்கும்போதே பேச்சு மூச்சின்றி இறந்துவிட்டதாகக் கூறி, காவல்துறையினரையும் மருத்துவர்களையும் நம்ப வைக்க கோகிலா முயன்றதாகத் தெரிகிறது. இதையடுத்து, குழந்தையின் உடல் உடற்கூறாய்வுக்கு அனுப்பி வைக்கப்பட்டது.
உடற்கூறாய்வு அறிக்கையில், குழந்தை உயிருடன் பிறந்தது என்பதும், அதன் கழுத்து நெரிக்கப்பட்டு, தலையில் பலத்த காயம் ஏற்படுத்தப்பட்டதன் காரணமாக உயிரிழந்தது என்பதும் தெரியவந்ததாகக் கூறப்படுகிறது. இதையடுத்து, காவல்துறையினர் நடத்திய தீவிர விசாரணையில், குழந்தையைக் கொலை செய்ததை கோகிலா ஒப்புக்கொண்டதாகத் தகவல் வெளியாகியுள்ளது.
இதனைத் தொடர்ந்து, குழந்தையைக் கொலை செய்த குற்றச்சாட்டின் பேரில் 18 வயது கோகிலாவைக் காவல்துறையினர் கைது செய்தனர். மேலும், கோகிலாவின் காதலனான சந்தோஷ் மீது காவல்துறையினர் தீவிர விசாரணை மேற்கொண்டனர்.
கோகிலா கர்ப்பமடைந்தபோது சிறுமியாக இருந்திருக்கலாம் என்ற அடிப்படையில், சந்தோஷ் மீது போக்சோ சட்டத்தின் கீழ் வழக்குப் பதிவு செய்யப்பட்டு அவரும் கைது செய்யப்பட்டுள்ளதாகக் கூறப்படுகிறது.
தற்போது குழந்தையைக் கொலை செய்ததாகக் குற்றம் சாட்டப்பட்ட கோகிலா மற்றும் போக்சோ சட்டத்தின் கீழ் கைது செய்யப்பட்ட சந்தோஷ் ஆகிய இருவரும் காவல்துறையினரின் சட்ட நடவடிக்கைக்கு உட்படுத்தப்பட்டுள்ளனர். திருமணத்திற்கு முன்பாகக் கர்ப்பமான விவகாரத்தை மறைக்க முயன்றதில், பச்சிளம் குழந்தை உயிரிழந்த சம்பவம் அப்பகுதி மக்களிடையே பெரும் சோகத்தையும் அதிர்ச்சியையும் ஏற்படுத்தியுள்ளது.