தனியார் பள்ளிகளுக்கு அங்கீகாரம் பெற்றுத் தருவதாகக் கூறி லஞ்சம் பெற்றதாகப் பதிவு செய்யப்பட்ட வழக்கில் கைது செய்யப்பட்டுள்ள திமுக முன்னாள் அமைச்சர் அன்பில் மகேஷ் பொய்யாமொழி, சென்னை புழல் மத்திய சிறையில் அடைக்கப்பட்டுள்ளார். அவருக்கு முதல் வகுப்பு கைதிகளுக்கான அறை ஒதுக்கப்பட்டுள்ள போதிலும், அங்கு ஏசி வசதி இல்லாதது, கொசுத் தொல்லை, உணவு மற்றும் மருந்து தொடர்பான பிரச்சினைகள் காரணமாக அவர் சிரமங்களைச் சந்தித்து வருவதாகத் தகவல்கள் வெளியாகியுள்ளன.
சிறையில் அடைக்கப்பட்டு மூன்று முதல் நான்கு நாட்கள் ஆன நிலையில், இன்று அன்பில் மகேஷ் ஊழல் தடுப்பு வழக்குகளுக்கான சிறப்பு நீதிமன்றத்தில் ஆஜரானார். அப்போது, தனக்கு வீட்டு உணவு வழங்க உத்தரவிடக் கோரி அவரது தரப்பில் மனு தாக்கல் செய்யப்பட்டது.
இதற்கிடையே, அவரை ஐந்து நாட்கள் காவலில் எடுத்து விசாரிக்க அனுமதி கோரி காவல்துறை தரப்பிலும் மனு தாக்கல் செய்யப்பட்டுள்ளது. இந்த இரு மனுக்கள் மீதான விசாரணையும் சிறப்பு நீதிமன்ற நீதிபதி சத்தியநாராயணா முன்னிலையில் நடைபெற்று வருகிறது.
சிறையில் உணவு, மருந்து தொடர்பாக புகார்
விசாரணையின்போது அன்பில் மகேஷ் தரப்பு வழக்கறிஞர்கள், சிறையில் அவருக்கு வழங்கப்படும் உணவு, மருந்துகள் மற்றும் அடிப்படை வசதிகள் குறித்து நீதிமன்றத்தில் விரிவாக எடுத்துரைத்தனர்.
அப்போது, சிறையில் வழங்கப்படும் சப்பாத்தியைத் தன்னால் சாப்பிட முடியவில்லை என்றும், உணவு முறையாக இல்லாததால் இரண்டு முதல் நான்கு கிலோ வரை உடல் எடை குறைந்துள்ளதாகவும் அன்பில் மகேஷ் தரப்பில் தெரிவிக்கப்பட்டது. ஏற்கெனவே கணையம் தொடர்பான உடல்நலப் பிரச்சினை இருப்பதால், மருத்துவரின் பரிந்துரைப்படி எண்ணெய் இல்லாத உணவு வழங்கப்பட வேண்டும் என்றும் கோரிக்கை வைக்கப்பட்டது.
மேலும், தனக்குத் தேவையான மருந்துகள் முறையாக வழங்கப்படவில்லை என்றும், இரவு நேரங்களில் அறையில் விளக்குகள் எரிந்து கொண்டிருப்பதால் தூங்க முடியவில்லை என்றும் அவரது தரப்பில் நீதிமன்றத்தில் தெரிவிக்கப்பட்டது. ஏசி வசதி இல்லாததுடன் கொசுத் தொல்லையும் இருப்பதால் இரவில் தூக்கமின்றி அவதிப்படுவதாகவும் கூறப்பட்டது.
இதுதொடர்பாக வாதிட்ட வழக்கறிஞர்கள், “அஜ்மல் கசாபுக்குக்கூட வீட்டு உணவு வழங்கப்பட்டது. ஆனால், முன்னாள் அமைச்சரான எனக்கு அதைவிட மோசமான முறையில் உணவு வழங்கப்படுகிறது. நிரூபிக்கப்படாத குற்றச்சாட்டுகளின் அடிப்படையில் கைது செய்யப்பட்டுள்ள என்னை மனிதாபிமானத்துடன் நடத்த வேண்டும். எனக்கு ஏற்கெனவே உடல்நலப் பிரச்சினைகள் உள்ளன. நான் தப்பிச் செல்ல முயற்சிக்க மாட்டேன். எனது அதிகாரத்தைப் பயன்படுத்தி தப்பிக்கவும் முயற்சி செய்யவில்லை. முத்துக்குமாரைத் தப்பிக்க வைக்க முயன்றதாகக் கூறியே என் மீது வழக்குத் தொடரப்பட்டுள்ளது” எனத் தெரிவித்தனர்.
மேலும், போலீஸ் காவல் கோரி காவல்துறை மனு தாக்கல் செய்துள்ள நிலையில், உச்சநீதிமன்றம் வகுத்துள்ள வழிகாட்டுதல்கள் மற்றும் விதிமுறைகளைப் பின்பற்றியே போலீஸ் காவல் வழங்குவது குறித்து முடிவெடுக்க வேண்டும் என்றும் அன்பில் மகேஷ் தரப்பு வலியுறுத்தியது.
வீட்டு உணவு வழங்குவது குறித்து காவல்துறை விளக்கம்
இதற்குப் பதிலளித்த காவல்துறை தரப்பு, அன்பில் மகேஷுக்கு வீட்டு உணவு வழங்குவது தொடர்பாக ஆய்வு செய்து முடிவெடுக்க வேண்டியிருப்பதால் அதற்குக் கால அவகாசம் தேவை எனக் கோரியது. அதேபோல், அவருக்குத் தேவையான மருத்துவ உதவிகளையும் மருந்துகளையும் வழங்க உரிய நடவடிக்கை எடுக்கப்படும் என அரசு தரப்பில் தெரிவிக்கப்பட்டது.
இதற்கு எதிர்ப்பு தெரிவித்த அன்பில் மகேஷ் தரப்பு வழக்கறிஞர்கள், வீட்டு உணவு வழங்குவதற்குக்கூட கால அவகாசம் கோருவது ஏன் என்றும், இந்த வழக்கு விசாரணையிலும் சிறை நிர்வாகத்தின் நடவடிக்கைகளிலும் மனிதாபிமானம் கடைப்பிடிக்கப்படவில்லை என்றும் வாதிட்டனர். தனக்கு மட்டுமின்றி, சிறையில் உள்ள மற்ற கைதிகளுக்கும் மனிதநேயத்துடன் உரிய வசதிகள் வழங்கப்பட வேண்டும் என்றும் வலியுறுத்தினர்.
நீதிபதி இன்று முக்கிய உத்தரவு பிறப்பிக்க வாய்ப்பு
அன்பில் மகேஷுக்கு சிறையில் வழங்கப்படும் உணவின் தரம், சப்பாத்தி உள்ளிட்ட உணவு வகைகள், மருந்துகள், அறையில் எரியவிடப்படும் விளக்குகள், தூக்கமின்மை மற்றும் மருத்துவ வசதிகள் எனப் பல்வேறு அம்சங்கள் குறித்து அவரது தரப்பில் நீதிமன்றத்தில் எடுத்துரைக்கப்பட்டுள்ளன.
வீட்டு உணவு வழங்குவது தொடர்பாகவும், அவரை போலீஸ் காவலில் எடுத்து விசாரிக்க அனுமதி கோரிய மனு தொடர்பாகவும் இரு தரப்பு வாதங்கள் முன்வைக்கப்பட்டுள்ளன. மருத்துவ உதவிகள் மற்றும் மருந்துகள் வழங்க நடவடிக்கை எடுக்கப்படும் என அரசு தரப்பில் உறுதியளிக்கப்பட்டுள்ளது.
இந்நிலையில், வீட்டு உணவு வழங்குவது மற்றும் போலீஸ் காவல் கோரிக்கை ஆகிய இரு மனுக்கள் மீதும் சிறப்பு நீதிமன்ற நீதிபதி சத்தியநாராயணா இன்று பிற்பகலுக்குள் முக்கிய உத்தரவுகளைப் பிறப்பிப்பார் என எதிர்பார்க்கப்படுகிறது.