பள்ளிக்கல்வித்துறைக்கு மதுரை ஐகோர்ட் வைத்த அதிரடி செக்! “இனிமே ஆன்லைன்லதான் பாடமா?”

அரசுப் பள்ளிகளில் ஆன்லைன் வகுப்புகள்: சாத்தியக்கூறுகளைப் பரிசீலிக்க உயர் நீதிமன்றம் உத்தரவு

ஆசிரியர்கள் பற்றாக்குறை மற்றும் மாற்றுப் பணி காரணமாக அரசுப் பள்ளிகளில் வகுப்புகள் பாதிக்கப்படுவதைத் தவிர்க்கும் வகையில், ஆசிரியர்கள் காணொலி வாயிலாக ஆன்லைன் வகுப்புகளை நடத்துவதற்கான சாத்தியக்கூறுகளைப் பரிசீலிக்க தமிழக அரசுக்கு சென்னை உயர் நீதிமன்ற மதுரை கிளை உத்தரவிட்டுள்ளது.

ஆசிரியர்கள் மாற்றுப் பணியில் இருக்கும் காலங்களில், அவர்கள் வாரத்தில் சில நாட்கள் மட்டுமே நேரடியாக பள்ளிக்கு வர முடிவதால், மாணவர்களின் கல்வி பாதிக்கப்படாமல் இருப்பதற்காக இணையவழிக் கல்விக்குத் தேவையான உள்கட்டமைப்பை ஏற்படுத்துவது குறித்து அரசு பரிசீலிக்க வேண்டும் என நீதிமன்றம் தெரிவித்துள்ளது.

ராமநாதபுரம் மாவட்டம் சாயல்குடியில் உள்ள அரசு பெண்கள் மேல்நிலைப் பள்ளிக்கு தேவையான உள்கட்டமைப்பு வசதிகள், கூடுதல் வகுப்பறைகள் மற்றும் அடிப்படை வசதிகளை ஏற்படுத்தித் தர வேண்டும் என்றும், காலிப் பணியிடங்களை நிரப்ப வேண்டும் என்றும் கோரி விக்ரமன் என்பவர் பொதுநல வழக்கு தொடர்ந்திருந்தார்.

அதேபோல், ராமநாதபுரம் மாவட்டம் சிக்கல் அரசு மேல்நிலைப் பள்ளியில் பொருளாதாரம், வணிகவியல் மற்றும் கணக்குப்பதிவியல் உள்ளிட்ட முக்கியப் பாடங்களைக் கற்பிக்க போதிய தகுதியான ஆசிரியர்கள் இல்லை எனக் கூறி, மதுரையைச் சேர்ந்த வழக்கறிஞர் மணிபாரதியும் பொதுநல மனு தாக்கல் செய்திருந்தார்.

இந்த வழக்குகள் நீதிபதிகள் சிவி கார்த்திகேயன் மற்றும் ஆர். சக்திவேல் ஆகியோர் அடங்கிய அமர்வு முன்பு விசாரணைக்கு வந்தன.

விசாரணையின்போது, அரசுப் பள்ளிகளில் ஆசிரியர்கள் பற்றாக்குறை மற்றும் ஆசிரியர்கள் மாற்றுப் பணியில் நியமிக்கப்படுவதால், வகுப்புகள் தொடர்ந்து நடைபெறுவதில் இடையூறு ஏற்படுவது குறித்து நீதிமன்றத்தின் கவனத்திற்கு வந்தது.

சில ஆசிரியர்கள் பிற பணிகளுக்காக அல்லது தற்காலிகமாக மாற்றுப் பணிக்கு அனுப்பப்படுவதால், அவர்கள் வாரத்தில் ஒன்று அல்லது இரண்டு நாட்கள் மட்டுமே பள்ளிக்கு நேரடியாக வர முடிகிறது. இதனால், சில பள்ளிகளில் மாணவர்களுக்கு பாடம் நடத்த ஆசிரியர்கள் இல்லாத நிலை ஏற்படுவதாக நீதிமன்றம் சுட்டிக்காட்டியது.

குறிப்பாக, சிக்கல் அரசு மேல்நிலைப் பள்ளியில் வணிகவியல் பிரிவில் போதிய ஆசிரியர்கள் இல்லாததால், பிளஸ் 1 படிக்கும் மாணவர்களை வேறு பள்ளிகளுக்கு மாறிச் செல்லுமாறு கட்டாயப்படுத்தியதாகவும் நீதிமன்றத்தின் கவனத்திற்கு கொண்டு வரப்பட்டது. மாணவர்களை வேறு பள்ளிகளுக்குச் செல்லுமாறு வற்புறுத்தக் கூடாது என்றும் நீதிபதிகள் உத்தரவிட்டனர்.

இதனைத் தொடர்ந்து, ஆசிரியர்கள் நேரில் பள்ளிக்கு வர முடியாத சூழ்நிலையில், அவர்கள் இருக்கும் இடத்திலிருந்தே காணொலி வாயிலாக மாணவர்களுக்கு வகுப்புகளை நடத்த முடியுமா என்றும், அதற்குத் தேவையான தொழில்நுட்ப உள்கட்டமைப்பை அரசு ஏன் உருவாக்கக் கூடாது என்றும் நீதிபதிகள் கேள்வி எழுப்பினர்.

மேலும், வகுப்புகள் தொடர்ந்து நடைபெறுவதை உறுதி செய்யும் வகையில், ஆசிரியர்கள் மாற்றுப் பணியில் இருந்தபடியே காணொலி வாயிலாக வகுப்புகளை நடத்துவது உள்ளிட்ட பிற மாற்று வழிமுறைகளையும் ஆராயலாம் என நீதிமன்றம் தெரிவித்துள்ளது.

ஆசிரியர்கள் காணொலி வாயிலாக வகுப்புகளை நடத்துவது நடைமுறைக்கு சாத்தியமானதா என்பதை பள்ளிக்கல்வித் துறை இயக்குநர் விரிவாகப் பரிசீலித்து, அதற்கான சாத்தியக்கூறு அறிக்கையை சமர்ப்பிக்க வேண்டும் என்றும் நீதிமன்றம் உத்தரவிட்டுள்ளது.

இது தொடர்பான தமிழக அரசின் கருத்துகளை செப்டம்பர் 17-ம் தேதி நீதிமன்றத்தில் சமர்ப்பிக்கவும் உத்தரவிடப்பட்டுள்ளது.

இதனிடையே, இந்த உத்தரவு தொடர்பான செய்தி சமூக வலைத்தளங்களில் வெளியாகியுள்ள நிலையில், அரசுப் பள்ளிகளில் ஏற்கனவே ஏற்படுத்தப்பட்டுள்ள ஸ்மார்ட் வகுப்பறை வசதிகள் முறையாகப் பயன்படுத்தப்படுகிறதா என்ற கேள்வியையும், கிராமப்புற மாணவர்களுக்கு ஆன்லைன் வகுப்புகள் தடையின்றி சென்றடையும் அளவுக்கு போதிய இணைய வசதி உள்ளதா என்ற கேள்வியையும் நெட்டிசன்கள் எழுப்பி வருகின்றனர்.

ஆசிரியர்கள் பற்றாக்குறை மற்றும் மாற்றுப் பணி காரணமாக ஏற்படும் கல்வி பாதிப்பைத் தவிர்க்க, ஆன்லைன் வகுப்புகள் உள்ளிட்ட மாற்று வழிமுறைகளை அரசு ஆராய வேண்டும் என்ற உயர் நீதிமன்றத்தின் உத்தரவு, அரசுப் பள்ளி மாணவர்களின் கல்வி தொடர்ச்சியை உறுதி செய்வதில் முக்கியத்துவம் வாய்ந்ததாக பார்க்கப்படுகிறது.