தமிழக அரசியலில் ‘வாரிசு அரசியல்’ என்பது எப்போதும் விவாதப் பொருளாகவே இருந்து வருகிறது. இந்நிலையில், அதிமுக பொதுச்செயலாளர் எடப்பாடி பழனிசாமி, தனது குடும்பத்தில் இருந்து யாரும் அரசியலுக்கு வரமாட்டார்கள் என்பதைத் திட்டவட்டமாக அறிவித்துள்ளார்.
தனது மகன் மிதுன் குமார் குறித்து எழுப்பப்பட்ட கேள்விகளுக்குப் பதிலளித்த இபிஎஸ், “எனது மகன் மிதுன் அரசியலில் ஈடுபடமாட்டார் என்பதைத் திட்டவட்டமாகக் கூறுகிறேன்” என்று மிகத் தெளிவாக விளக்கியுள்ளார். அவர் கட்சியில் எந்தவொரு பொறுப்பிலோ அல்லது அதிகாரமிக்க பதவியிலோ இல்லை என்பதைச் சுட்டிக்காட்டிய பழனிசாமி, “அவர் அதிமுகவின் ஒரு சாதாரண உறுப்பினர் மட்டுமே; கட்சியில் எந்தப் பதவியையும் வகிக்கவில்லை” என்று கூறியுள்ளார்.
தமிழகத்தின் பிரதான எதிர்க்கட்சியான அதிமுக, ஆளுங்கட்சியான திமுகவின் வாரிசு அரசியலைத் தொடர்ந்து கடுமையாக விமர்சித்து வருகிறது. உதயநிதி ஸ்டாலினின் அரசியல் வளர்ச்சி, அவருக்கு அமைச்சர், துணை முதலமைச்சர் போன்ற பதவிகள் வழங்கப்பட்டதை அதிமுக மிகத்தீவிரமாக எதிர்த்து பிரசாரம் செய்து வருகிறது. இத்தகையச் சூழலில், எடப்பாடி பழனிசாமியின் இந்த அறிவிப்பு அவரது அரசியல் நிலைப்பாட்டிற்கு மேலும் வலுசேர்ப்பதாக அமைந்துள்ளது. மாற்றுத் தரப்பினரின் வாரிசு அரசியல் விமர்சனங்களுக்கு முற்றுப்புள்ளியாகவும் அமைந்துள்ளது.