கோடி ரூபாய்க்கும் மேல் மோசடி செய்ததாகக் கூறப்படும் வழக்கில் தலைமறைவாக உள்ள திமுக நிர்வாகி முத்துக்குமாருக்கு மத்திய குற்றப்பிரிவு போலீசார் லுக் அவுட் நோட்டீஸ் பிறப்பித்துள்ளனர். வெளிநாட்டிற்குத் தப்பிச் செல்வதைத் தடுக்கும் வகையில் இந்த நடவடிக்கை எடுக்கப்பட்டுள்ள நிலையில், அவரை கைது செய்ய போலீசார் தீவிர தேடுதல் வேட்டையில் ஈடுபட்டுள்ளனர்.
சென்னை சாலிகிராமத்தை மையமாகக் கொண்டு செயல்பட்டதாகக் கூறப்படும் பதிவு செய்யப்படாத “தமிழ்நாடு தனியார் பள்ளிகள் சங்கம்” மூலம், தனியார் பள்ளிகளுக்கு நிரந்தர அங்கீகாரம், தரம் உயர்த்துதல், DTCP மற்றும் CMDA உள்ளிட்ட சட்டப்பூர்வ அனுமதிகளைப் பெற்றுத் தருவதாகக் கூறி தமிழகம் முழுவதும் உள்ள பள்ளிகளிடம் பணம் வசூலிக்கப்பட்டதாக புகார் அளிக்கப்பட்டுள்ளது.
ஆரம்பத்தில் சில பள்ளிகள் மட்டுமே புகார் அளித்திருந்த நிலையில், தற்போது பாதிக்கப்பட்ட பள்ளிகளின் எண்ணிக்கை 177 ஆக உயர்ந்துள்ளது. இந்த 177 பள்ளிகளிடம் இருந்து மட்டும் 17 கோடியே 36 லட்சம் ரூபாய்க்கும் மேல் மோசடி செய்யப்பட்டுள்ளதாக போலீசார் தெரிவித்துள்ளனர். ஒட்டுமொத்த மோசடியின் மதிப்பு 100 கோடி ரூபாயைத் தாண்டும் எனக் கூறப்படுகிறது.
தமிழ்நாடு தனியார் பள்ளிகள் கூட்டமைப்பின் செயலாளர் டி.சி. இளங்கோவன் அளித்த புகாரின் அடிப்படையில் இந்த வழக்கு பதிவு செய்யப்பட்டது. ஆளுங்கட்சியினருடன் தங்களுக்கு இருக்கும் நெருக்கத்தைப் பயன்படுத்தி பள்ளிகளுக்கு தேவையான அங்கீகாரங்களையும் அனுமதிகளையும் பெற்றுத் தருவதாகக் கூறி மோசடி செய்ததாக குற்றச்சாட்டு எழுந்துள்ளது.
மேலும், இந்த மோசடி குறித்து வெளியில் தெரிவித்தால் விபரீத விளைவுகளைச் சந்திக்க நேரிடும் எனக் கூறி பள்ளி நிர்வாகங்களை மிரட்டியதாகவும் புகார் கூறப்பட்டுள்ளது. இதனால், அங்கீகாரங்கள் ரத்து செய்யப்பட்டுவிடும் என்ற அச்சத்தில் பல பள்ளி நிர்வாகங்கள் லட்சக்கணக்கிலும், கோடிக்கணக்கிலும் பணம் கொடுத்து ஏமாந்ததாகவும் தெரிவிக்கப்பட்டுள்ளது.
இந்த வழக்கின் முதல் குற்றவாளியாகக் கருதப்படும் பி.டி. அரசகுமார் கடந்த ஜூன் மாதம் கைது செய்யப்பட்டார். அவர் திமுக செய்தித் தொடர்பு குழுவின் துணைத் தலைவராகவும் இருந்துள்ளார். அரசியல் வட்டாரத்தில் அறிமுகமானவரான அரசகுமார், ஆரம்பத்தில் திமுகவில் இருந்த நிலையில் பின்னர் பாஜகவில் இணைந்து மாநிலத் துணைத் தலைவர் பொறுப்பையும் வகித்துள்ளார்.
அதன்பின்னர் சில ஆண்டுகளுக்கு முன்பு மீண்டும் திமுகவில் இணைந்து முக்கியப் புள்ளியாக வலம் வந்ததாகத் தெரிவிக்கப்பட்டுள்ளது. இந்த அரசியல் தொடர்புகளையும் செல்வாக்கையும் பயன்படுத்தியே மிகப்பெரிய அளவில் மோசடி நடைபெற்றதாக குற்றச்சாட்டு எழுந்துள்ளது.
அரசகுமார் கைது செய்யப்பட்டதைத் தொடர்ந்து, அவரது உறவினர்கள் உள்ளிட்ட மேலும் இருவர் கைது செய்யப்பட்டுள்ளனர். மோசடிப் பணம் கைமாறுவதற்குப் பயன்படுத்தப்பட்டதாகக் கூறப்படும் குற்றவாளிகளின் 60-க்கும் மேற்பட்ட வங்கி கணக்குகளை மத்திய குற்றப்பிரிவு போலீசார் முடக்கியுள்ளனர்.
இதுதொடர்பாக 244 சாட்சிகளிடம் விசாரணையும் நடத்தப்பட்டுள்ளது. மேலும், முடக்கப்பட்ட வங்கி கணக்குகளை ஆய்வு செய்து மோசடிப் பணம் எங்கு சென்றது என்பது குறித்தும் போலீசார் விசாரணை மேற்கொண்டு வருகின்றனர்.
இந்த வழக்கில் முக்கிய நபராகக் கருதப்படும் திமுக நிர்வாகியும், தமிழ்நாடு தனியார் பள்ளிகள் சங்கத்தின் பொருளாளருமான முத்துக்குமார், போலீஸ் விசாரணைக்கு தொடர்ந்து ஆஜராகாமல் தலைமறைவாக இருந்து வருகிறார். அவர் வெளிநாட்டிற்கு தப்பிச் செல்ல வாய்ப்புள்ளதாகக் கருதிய போலீசார், விமான நிலையங்கள் வழியாக அவர் நாட்டை விட்டு வெளியேறுவதைத் தடுக்கும் வகையில் லுக் அவுட் நோட்டீஸ் பிறப்பித்துள்ளனர்.
முத்துக்குமார் போலீசாரால் தேடப்பட்டு வரும் நிலையில், தன்னை கைது செய்ய போலீசார் நடவடிக்கை எடுத்து வருவதால் சென்னை உயர் நீதிமன்றத்தில் முன்ஜாமீன் கோரி மனுத் தாக்கல் செய்துள்ளார். இந்த மனு நீதிபதி வி. லட்சுமிநாராயணன் முன்னிலையில் விசாரணைக்கு வந்தபோது, காவல்துறை தரப்பில் வழக்கு தொடர்பான விரிவான அறிக்கையைத் தாக்கல் செய்ய அவகாசம் கோரப்பட்டது. இதனை ஏற்றுக்கொண்ட நீதிபதி, வழக்கு விசாரணையைத் தள்ளிவைத்துள்ளார்.
இதனிடையே, முத்துக்குமார் ஒரு முன்னாள் திமுக எம்.எல்.ஏ. என்றும் தெரிவிக்கப்பட்டுள்ளது. போலீசார் அவரைத் தீவிரமாகத் தேடி வரும் நிலையில், கைது நடவடிக்கையில் இருந்து தப்புவதற்காகவே அவர் உயர் நீதிமன்றத்தை நாடி முன்ஜாமீன் பெற முயற்சித்து வருவதாகக் கூறப்படுகிறது.
சென்னை சாலிகிராமத்தை மையமாகக் கொண்டு இந்த மோசடி நடைபெற்றதாகக் கூறப்பட்டாலும், போலீசாரின் விசாரணையில் சேலம், ஈரோடு, கோவை உள்ளிட்ட கொங்கு மற்றும் மேற்கு மாவட்டங்களில் உள்ள தனியார் பள்ளி நிர்வாகிகளே அதிக அளவில் ஏமாற்றப்பட்டு, கோடிக்கணக்கான ரூபாயை இழந்துள்ளதாகத் தெரியவந்துள்ளது.
மேலும், மோசடிப் பணம் சென்றதாகக் கூறப்படும் வங்கி கணக்குகளை ஆய்வு செய்தபோது, பள்ளிக் கல்வித்துறையைச் சேர்ந்த சில உயர் அதிகாரிகளுக்கும் இந்த விவகாரத்தில் தொடர்பு இருக்கிறதா என்பது குறித்தும் போலீசார் விசாரணை நடத்தி வருகின்றனர். இதனால், மோசடியில் ஈடுபட்டதாகக் கூறப்படும் புரோக்கர்கள் மட்டுமின்றி, லஞ்சம் பெற்றதாக சந்தேகிக்கப்படும் அரசு அதிகாரிகளிடமும் விசாரணை தீவிரப்படுத்தப்படலாம் எனத் தகவல்கள் வெளியாகியுள்ளன.
இந்நிலையில், இந்த மோசடி நெட்வொர்க்கில் தொடர்புடையதாகக் கூறப்படும் மற்ற நபர்களையும், அவர்களது சொத்துகளையும் கண்டறிந்து முடக்குவதற்கான நடவடிக்கைகளையும் மத்திய குற்றப்பிரிவு போலீசார் மேற்கொண்டு வருகின்றனர். 100 கோடி ரூபாய்க்கும் மேல் மோசடி செய்யப்பட்டதாகக் கூறப்படும் இந்த வழக்கில் முக்கிய நபராகக் கருதப்படும் முத்துக்குமாருக்கு லுக் அவுட் நோட்டீஸ் பிறப்பிக்கப்பட்டுள்ளதால், அவரை விரைவில் கைது செய்வதற்கான நடவடிக்கைகள் தீவிரமடைந்துள்ளன.