சென்னை துறைமுகம் மற்றும் தலைமைச் செயலகம் அருகே ஏற்பட்டுள்ள அடர்ந்த புகைமூட்டம் காரணமாக அப்பகுதியில் பரபரப்பு நிலவி வருகிறது. புகைமூட்டம் ஏற்பட்டுள்ள இடத்திற்கு மிக அருகில் தலைமைச் செயலகம் உள்ளிட்ட பல முக்கிய அரசு அலுவலகங்கள் மற்றும் கட்டிடங்கள் அமைந்துள்ளதால், அதிகாரிகள் நிலைமையை தீவிரமாக கண்காணித்து வருகின்றனர்.
புகையின் தாக்கம் அதிகரித்துள்ள நிலையில், முதற்கட்டமாக அந்த பகுதியை பாதுகாப்பாக மாற்றும் பணிகளில் அதிகாரிகள் ஈடுபட்டுள்ளனர். புகை பரவுவதை கட்டுப்படுத்தவும், அதன் மூல காரணத்தை கண்டறியவும் நடவடிக்கைகள் மேற்கொள்ளப்பட்டு வருகின்றன.
புகையில் கார்பன் மற்றும் ரசாயனக் கலவைகள் அதிகமாக இருப்பதாக சந்தேகிக்கப்படுவதால், அப்பகுதியில் பணியாற்றுபவர்களும் பொதுமக்களும் சுவாசிப்பதில் சிரமம் அடைந்து வருகின்றனர். இதனால் பலர் முகக்கவசம் அணிந்தும், சிலர் கைக்குட்டைகளை முகத்தை மூடும் வகையில் பயன்படுத்துகின்றனர்.
புகையின் அடர்த்தி தொடர்ந்து அதிகரித்து வருவதால், நிலைமை இன்னும் முழுமையாக கட்டுக்குள் வரவில்லை என்று அதிகாரிகள் தெரிவித்துள்ளனர். புகை வெளியேறும் இடத்தை கண்டறிந்து அதை முழுமையாக தடுக்க வேண்டும் என்பதே தற்போது மேற்கொள்ளப்படும் முதன்மை நடவடிக்கையாக உள்ளது.
தீயணைப்புத் துறையினர், காவல்துறையினர் மற்றும் பிற அவசரகால மீட்புப் படையினர் சம்பவ இடத்தில் தீவிரமாக பணியாற்றி வருகின்றனர். மேலும் உதவிகள் தேவைப்படுகிறதா என்பதையும் அதிகாரிகள் தொடர்ந்து ஆய்வு செய்து வருகின்றனர்.
இந்த புகை எங்கிருந்து வெளியேறுகிறது, துறைமுகப் பகுதியில் சேமித்து வைக்கப்பட்டிருந்த பொருட்களிலிருந்தா அல்லது வேறு ஏதேனும் ரசாயனப் பொருட்களிலிருந்தா என்ற கேள்விகள் எழுந்துள்ளன. குறிப்பாக, சல்பர் டைஆக்சைடு போன்ற ரசாயன வாயுக்களாக இருக்கக்கூடும் என்ற சந்தேகமும் நிலவி வருகிறது.
தலைமைச் செயலகத்தின் புதிய 10-வது நுழைவாயில் அருகே புகை முதலில் கண்டறியப்பட்டதாக தெரிவித்தனர். தகவல் கிடைத்த உடனே தீயணைப்பு வாகனங்கள் சம்பவ இடத்திற்கு விரைந்து சென்று கட்டுப்பாட்டு நடவடிக்கைகளை தொடங்கியதாகவும் கூறினர்.
மேலும், துறைமுகப் பகுதியில் சேமித்து வைக்கப்பட்டிருந்த சல்பர் அல்லது பிற ரசாயனப் பொருட்களிலிருந்து இந்த புகை வெளியேறியிருக்கலாம் என்ற கோணத்திலும் விசாரணை நடைபெற்று வருகிறது. அங்கு சேமித்து வைக்கப்பட்ட சரக்கா அல்லது கப்பலிலிருந்து இறக்கி வைக்கப்பட்ட பொருளா என்பது குறித்தும் அதிகாரிகள் ஆய்வு செய்து வருகின்றனர்.
இந்த சம்பவத்தின் காரணம் குறித்து முழுமையான தகவல்கள் இன்னும் வெளியாகாத நிலையில், தீயணைப்புத் துறை மற்றும் தொடர்புடைய அதிகாரிகள் தொடர்ந்து விசாரணை மேற்கொண்டு வருகின்றனர்.