ஜீ குழும நிறுவனர் சுபாஷ் சந்திரா தொடர்புடைய ரூ.22,006 கோடி கடன் விவகாரத்தில், அவர் ரூ.6.5 கோடி மட்டும் செலுத்தினால் போதும் என தேசிய நிறுவன சட்டத் தீர்ப்பாயமான என்.சி.எல்.டி. வழங்கிய உத்தரவுக்கு தற்போது இடைக்காலத் தடை விதிக்கப்பட்டுள்ளது. கடன் வழங்கிய வங்கிகள் தரப்பில் செய்யப்பட்ட மேல்முறையீட்டைத் தொடர்ந்து, இந்தத் தடையுத்தரவு பிறப்பிக்கப்பட்டுள்ளது.
ஜீ குழும நிறுவனர் சுபாஷ் சந்திரா, தனது எஸ்செல் மற்றும் ஜீ குழும நிறுவனங்கள் பெற்ற கடன்களுக்கு தனிப்பட்ட உத்தரவாததாரராக கையெழுத்திட்டிருந்தார். அந்த நிறுவனங்கள் நிதி நெருக்கடியில் சிக்கியதைத் தொடர்ந்து, அவருக்கு எதிராக கடன் வழங்கிய வங்கிகள் தேசிய நிறுவன சட்டத் தீர்ப்பாயத்தில் திவால் நடவடிக்கைகளைத் தொடங்கின.
இந்த வழக்கை விசாரித்த என்.சி.எல்.டி.யின் மூன்று பேர் கொண்ட அமர்வு, மொத்தம் ரூ.22,006 கோடி கடன் தொடர்பாக சுபாஷ் சந்திராவின் தனிப்பட்ட சொத்துகளில் இருந்து ரூ.6.5 கோடி மட்டும் செலுத்தினால் போதும் என்ற தீர்வுத் திட்டத்துக்கு ஒப்புதல் அளித்திருந்தது. இதன் மூலம் மொத்தக் கடனில் சுமார் 99.97 சதவீதம் அளவுக்கு Haircut வழங்கப்படுவதாகக் கூறப்பட்டது.
எனினும், இந்த உத்தரவுக்கு எல்.ஐ.சி. ஹவுசிங் பைனான்ஸ், ஹெச்.டி.எஃப்.சி. வங்கி உள்ளிட்ட கடன் வழங்கிய நிறுவனங்கள் கடும் எதிர்ப்பு தெரிவித்தன. கடன் வழங்கிய வங்கிகளின் முறையான அனுமதியின்றியும், விதிமுறைகளை மீறியும் இந்தத் தீர்வுத் திட்டம் ஏற்கப்பட்டுள்ளதாகக் கூறி, அவை மேல்முறையீடு செய்தன.
இந்த மேல்முறையீட்டு மனுவை விசாரித்த தேசிய நிறுவன சட்ட மேல்முறையீட்டுத் தீர்ப்பாயமான என்.சி.எல்.ஏ.டி.யின் ஐந்து பேர் கொண்ட அமர்வு, என்.சி.எல்.டி.யின் மூன்று பேர் கொண்ட அமர்வு வழங்கிய உத்தரவுக்கு தற்போது இடைக்காலத் தடை விதித்துள்ளது. இதனால், ரூ.22,000 கோடிக்கும் அதிகமான இந்தக் கடன் விவகாரம் மீண்டும் தீவிர விசாரணைக்கு உள்ளாகியுள்ளது.
இந்த வழக்கில், என்.சி.எல்.டி.யில் தீர்வுத் திட்டம் தொடர்பாக உறுப்பினர்களிடையே ஒருமித்த கருத்து ஏற்படவில்லை என்றும் கூறப்படுகிறது. நீதிபதி அசோக் குமார் பரத்வாஜ், இந்தத் திட்டத்துக்கு ஒப்புதல் அளித்த நிலையில், எதிர்ப்பு தெரிவிக்கும் வங்கிகள் தனியாக சட்ட நடவடிக்கை மேற்கொள்ளலாம் எனக் குறிப்பிட்டதாகத் தெரிவிக்கப்பட்டுள்ளது. மற்றொரு உறுப்பினரான ரீனா சின்ஹா பூரி, இந்தத் திட்டத்தை முற்றிலும் நிராகரித்தார்.
இதையடுத்து, இந்த விவகாரம் மூன்றாவது உறுப்பினரான நிலேஷ் சர்மாவிடம் சென்றது. அவர் தீர்வுத் திட்டத்துக்கு ஆதரவாகத் தீர்ப்பளித்ததைத் தொடர்ந்து, பெரும்பான்மை அடிப்படையில் அந்தத் திட்டம் அமலுக்கு வந்தது. இதற்கு எதிராகவே கடன் வழங்கிய வங்கிகள் மேல்முறையீடு செய்த நிலையில், தற்போது அந்த உத்தரவுக்கு இடைக்காலத் தடை விதிக்கப்பட்டுள்ளது.
இந்த விவகாரம் தொடர்பாக சுபாஷ் சந்திரா தரப்பில் முக்கிய விளக்கம் அளிக்கப்பட்டுள்ளது. தான் எந்த வங்கியிடமும் தனிப்பட்ட முறையில் ரூ.22,000 கோடி கடன் வாங்கவில்லை என்றும், தனது எஸ்செல் மற்றும் ஜீ குழும நிறுவனங்கள் பெற்ற கடன்களுக்கு தனிநபர் உத்தரவாததாரராக மட்டுமே கையெழுத்திட்டதாகவும் அவர் தரப்பு தெரிவித்துள்ளது.
மேலும், தன்னை எதிர்த்து இந்த வழக்கில் செயல்படும் வங்கிகளின் உண்மையான கோரிக்கைத் தொகை ரூ.3,992 கோடி மட்டுமே என்றும் சுபாஷ் சந்திரா தரப்பு வாதிடுகிறது. இதனால், ரூ.22,006 கோடி என்ற மொத்தத் தொகை எவ்வாறு கணக்கிடப்பட்டது என்பது தொடர்பாகவும் விவாதம் எழுந்துள்ளது.
இதற்கிடையே, 2018-ஆம் ஆண்டு சமர்ப்பிக்கப்பட்ட சான்றிதழின்படி சுபாஷ் சந்திராவின் தனிப்பட்ட சொத்து மதிப்பு ரூ.40,562 கோடியாக இருந்ததாகக் கூறப்படுகிறது. ஆனால், தற்போதைய திவால் நடவடிக்கையின்போது அவரது தனிப்பட்ட சொத்துக்களின் மதிப்பு வெறும் ரூ.31.79 கோடி மட்டுமே என மதிப்பிடப்பட்டுள்ளதாகத் தெரிவிக்கப்பட்டுள்ளது.
இதனால், இவ்வளவு பெரிய அளவில் இருந்ததாகக் கூறப்படும் தனிப்பட்ட சொத்துக்கள் எங்கே சென்றன என்ற கேள்வியை ஹெச்.டி.எஃப்.சி. உள்ளிட்ட வங்கிகள் எழுப்பியுள்ளன. இதில் முறைகேடு ஏதேனும் நடைபெற்றுள்ளதா என்பதைக் கண்டறிய தடயவியல் தணிக்கை எனப்படும் Forensic Audit நடத்த வேண்டும் என்றும் வங்கிகள் கோரியுள்ளன.
அரசுத் தரப்பு வட்டாரங்களின்படி, “99.97 சதவீத கடன் தள்ளுபடி” என்ற தகவல் பொதுமக்களிடையே தவறான புரிதலை ஏற்படுத்தியுள்ளதாகக் கூறப்படுகிறது. ரூ.6.5 கோடி என்பது சுபாஷ் சந்திராவின் தனிப்பட்ட சொத்துகளில் இருந்து பெறப்படும் தொகை மட்டுமே என்றும், கடன் பெற்ற அசல் நிறுவனங்கள் மற்றும் அவற்றின் சொத்துக்கள் மீது வங்கிகள் தொடர்ந்து சட்டப்பூர்வ நடவடிக்கை மேற்கொண்டு கடனை மீட்க முடியும் என்றும் தெரிவிக்கப்பட்டுள்ளது.
இருப்பினும், ரூ.22,006 கோடி என்ற மொத்தத் தொகையுடன் ஒப்பிடும்போது ரூ.6.5 கோடி என்பது மிகவும் குறைவான தொகையாகும். கணக்கீட்டின்படி, ரூ.6.5 கோடி என்பது மொத்தத் தொகையில் சுமார் 0.03 சதவீதம் மட்டுமே. அதாவது, வங்கிகளுக்குக் கிடைக்க வேண்டிய ஒவ்வொரு ரூ.100-க்கும் சுமார் 3 பைசா மட்டுமே கிடைக்கும் நிலையில், மீதமுள்ள தொகைக்கு மிகப்பெரிய Haircut வழங்கப்படுவதாகப் பொருள் கொள்ளப்பட்டது.
எல்.ஐ.சி. ஹவுசிங் பைனான்ஸ் நிறுவனத்துக்குச் சேர வேண்டிய அசல் தொகை மட்டும் ரூ.1,322 கோடி எனக் கூறப்படுகிறது. ஆனால், ரூ.6.5 கோடி அடிப்படையிலான தீர்வுத் திட்டம் அமல்படுத்தப்பட்டிருந்தால், எல்.ஐ.சி. ஹவுசிங் பைனான்ஸுக்கு கிடைக்கவிருந்த தொகை வெறும் ரூ.38 லட்சம் மட்டுமே எனத் தெரிவிக்கப்பட்டுள்ளது. இதனால்தான் எல்.ஐ.சி. உள்ளிட்ட கடன் வழங்கிய நிறுவனங்கள் இந்தத் தீர்வுத் திட்டத்துக்கு எதிராக நீதிமன்றத்தை நாடியதாகக் கூறப்படுகிறது.
இந்த ரூ.22,000 கோடி கடன் விவகாரத்தின் பின்னணி, 2021-2022 காலகட்டத்தில் இந்தியாபுல்ஸ் ஹவுசிங் பைனான்ஸ் நிறுவனம் ‘விவேக் இன்ஃப்ரா’ என்ற நிறுவனத்துக்கு வழங்கியதாகக் கூறப்படும் ரூ.170 கோடி கடனுடன் தொடர்புடையதாகத் தெரிவிக்கப்பட்டுள்ளது. அந்தக் கடனுக்கு சுபாஷ் சந்திரா தனிப்பட்ட உத்தரவாதம் அளித்திருந்ததாகவும், பின்னர் அவரது பல்வேறு நிறுவனங்களுடன் தொடர்புடைய கடன்கள் சேர்ந்து ரூ.22,006 கோடி அளவுக்கு இந்த விவகாரம் விரிவடைந்ததாகவும் கூறப்படுகிறது.
இந்தச் செய்தி வெளியானதைத் தொடர்ந்து, லண்டனில் உள்ள தொழிலதிபர் விஜய் மல்லையாவும் சமூக வலைத்தளத்தில் கருத்து தெரிவித்ததாகக் கூறப்படுகிறது. வங்கிகள் தன்னிடமிருந்து அசல் தொகையைவிட இரண்டு மடங்கு அதிகமாக மீட்டுள்ளதாகவும், ஆனால் இங்கு 99.97 சதவீத கடன் தள்ளுபடி வழங்கப்பட்டுள்ளதாகவும் அவர் கிண்டலாக விமர்சித்ததாகத் தெரிவிக்கப்பட்டுள்ளது.
இந்த விவகாரம் குறித்து காங்கிரஸ் மூத்த தலைவர் ஜெய்ராம் ரமேஷும் கடுமையாக விமர்சித்துள்ளார். இது வங்கிகளுக்குச் செய்யப்பட்ட சாதாரண ‘Haircut’ அல்ல என்றும், வங்கிகளின் தலையையே முழுமையாக மொட்டையடித்ததற்கு சமம் என்றும் அவர் விமர்சித்ததாகக் கூறப்படுகிறது.
இந்த விவகாரம் சமூக வலைத்தளங்களிலும் பெரும் விவாதத்தை ஏற்படுத்தியுள்ளது. “நாங்கள் வாங்கிய ரூ.50 லட்சம் வீட்டுக் கடனுக்கு ஒரு மாதம் EMI செலுத்தவில்லை என்றால்கூட, வங்கிகள் வீட்டை ஜப்தி செய்ய நடவடிக்கை எடுக்கின்றன. ஆனால், கோடிக்கணக்கான ரூபாய் கடன் பெற்றவர்களுக்கு மட்டும் இவ்வளவு பெரிய சலுகையா?” என பொதுமக்கள் கேள்வி எழுப்பி வருகின்றனர். இதுதொடர்பாக பல்வேறு மீம்ஸ்களும் சமூக வலைத்தளங்களில் பரவி வருகின்றன.
தற்போது என்.சி.எல்.டி.யின் மூன்று பேர் கொண்ட அமர்வு வழங்கிய ரூ.6.5 கோடி தீர்வுத் திட்டத்துக்கு என்.சி.எல்.ஏ.டி.யின் ஐந்து பேர் கொண்ட அமர்வு இடைக்காலத் தடை விதித்துள்ளதால், அந்தத் திட்டம் உடனடியாக அமலுக்கு வருவதில் தடை ஏற்பட்டுள்ளது. இதனால், சுபாஷ் சந்திராவின் உள்நாட்டு மற்றும் வெளிநாட்டு சொத்துக்கள், அவரது தனிப்பட்ட உத்தரவாதம், நிறுவனங்களின் கடன் பொறுப்புகள் உள்ளிட்ட பல்வேறு அம்சங்கள் மீண்டும் தீவிரமாக ஆராயப்படும் சூழல் உருவாகியுள்ளது.
ரூ.22,006 கோடி கடன் விவகாரத்தில் சுபாஷ் சந்திரா ரூ.6.5 கோடி மட்டும் செலுத்தும் வகையில் என்.சி.எல்.டி. வழங்கிய தீர்வுத் திட்டத்துக்கு தற்போது இடைக்காலத் தடை விதிக்கப்பட்டுள்ளதால், இந்த வழக்கு மீண்டும் பரபரப்பான கட்டத்தை எட்டியுள்ளது.