ஐந்து நாடுகளுக்கான தனது சுற்றுப்பயணத்தின் ஐந்தாவது, இறுதி கட்டமாக ரோம் நகரில் உள்ள பிரதமர் மோடி, இன்று இத்தாலியப் பிரதமர் ஜியோர்ஜியா மெலோனியுடனான தனது சந்திப்பின் படங்களைப் பகிர்ந்துகொண்டார்.
இரு தலைவர்களும் ஒரே காரில் பயணிப்பதும், வரலாற்றுச் சிறப்புமிக்க கொலோசியம் இடத்தைப் பார்வையிடுவதும், இரவு உணவின்போது பேச்சுவார்த்தை நடத்துவதும் அந்தப் படங்களில் உள்ளன.
எக்ஸ் சமூக ஊடகத் தளத்தில் அந்தப் படங்களைப் பகிர்ந்த மோடி, “ரோமில் வந்திறங்கியதும், பிரதமர் மெலோனியை இரவு உணவின்போது சந்திக்கும் வாய்ப்பு கிடைத்தது. அதைத் தொடர்ந்து வரலாற்றுச் சிறப்புமிக்க கொலோசியம் இடத்தையும் பார்வையிட்டோம். பரந்த அளவிலான பல்வேறு விஷயங்கள் குறித்து நாங்கள் கருத்துக்களைப் பரிமாறிக்கொண்டோம். இந்தியா-இத்தாலி நட்புறவை மேலும் வலுப்படுத்துவது குறித்த தொடரவிருக்கும், இன்று நடைபெறவுள்ள எங்கள் பேச்சுவார்த்தையை ஆவலுடன் எதிர்பார்க்கிறேன்” எனக்கூறியுள்ளார்.
பிரதமர் மோடியுடன் தான் எடுத்துக்கொண்ட செல்ஃபி புகைப்படத்தை ‘எக்ஸ் தளத்தில் பதிவிட்ட மெலோனி, “ரோமிற்கு நல்வரவு, என் நண்பரே!” என்று கூறியுள்ளார். இத்தாலியப் பிரதமர், இத்தாலி -இந்தியா ஆகிய இரு நாடுகளின் தேசியக் கொடிகளைச் சித்தரிக்கும் இரண்டு ‘எமோஜிகளையும்’ அப்பதிவில் இணைத்திருந்தார்.
ரோம் நகரின் மையப்பகுதியில், இரவு வானத்தின் பின்னணியில் ஒளிரும் இத்தாலியின் வரலாற்றுச் சிறப்புமிக்க கொலோசியம் என்றும் அழைக்கப்படும் பண்டைய ரோமானிய அரங்கம் முன்பாக, இரு தலைவர்களும் நின்றுகொண்டிருக்கும் புகைப்படத்தையும் மெலோனி பகிர்ந்துகொண்டார்.
ஜி7 உச்சிமாநாட்டின் போது, பிரதமர் மோடியுடன் தான் எடுத்துக்கொண்ட ஒரு செல்ஃபி புகைப்படத்தையும், ஒரு சிறிய வீடியோவையும் மெலோனி சமூக ஊடகங்களில் பதிவிட்டிருந்தார். அதில் இரு தலைவர்களும் கேமராவைப் பார்த்துப் புன்னகைத்துக்கொண்டே கையசைப்பது போன்ற காட்சிகள் இடம்பெற்றிருந்தன. அந்த வீடியோவில், “மெலோடி குழுவின் வாழ்த்துகள்!” என்று மெலோனி கூறுவது கேட்க முடிந்தது.
கடந்த ஆண்டு இரு தலைவர்களுக்கும் இடையே நடைபெற்ற இருதரப்பு சந்திப்பைத் தொடர்ந்து, மெலோடி என்ற சொல் இணையத்தில் வெகுவாகப் பரவியது. சமூக ஊடகப் பயனர்கள் இருவரின் பெயர்களையும் இணைத்து ஒரு பிரபலமான ஹேஷ்டேக்கை உருவாக்கினர். எக்ஸ் தளத்தில் அந்தப் பதிவைப் பகிர்ந்த மெலோனி, “வணக்கம் நண்பர்களே, #Melodi-யிடமிருந்து,” என்று குறிப்பிட்டிருந்தார். பின்னர் அந்தப் பதிவிற்குப் பதிலளித்த பிரதமர் மோடி, “இந்தியா-இத்தாலி நட்பு நீடுழி வாழ்க!” என்று கூறினார்.
இந்தியா-இத்தாலி உறவுகள் புதிய உத்வேகத்துடன் வளர்ந்து வரும் ஒரு காலகட்டத்தில் இந்தப் பயணம் அமைந்துள்ளது; இரு நாடுகளும் முக்கியத் துறைகளில் ஒத்துழைப்பை ஆழப்படுத்தும் நோக்கத்துடன் உருவாக்கப்பட்ட ‘கூட்டு உத்திசார் செயல் திட்டம் 2025-2029’-ஐ முன்னெடுத்துச் செல்கின்றன.