இது அரசியல் விமர்சனம் அல்ல. ஒரே ரத்தம்… ஒரே குடும்பம்… மேடையில் மோதிக்கொண்ட பகிரங்க யுத்தம்!
கடந்த வியாழக்கிழமை. சென்னை – மாதவரம். லட்சிய ஜனநாயக கட்சியின் மனித உரிமைகள் அணி நிர்வாகிகள் அறிமுகக் கூட்டம், நலத்திட்ட உதவிகள் வழங்கும் விழா. ஆயிரத்துக்கும் மேற்பட்டோர் கூடியிருந்த அரங்கில், மைக்கைப் பிடித்தார் புதுச்சேரி காமராஜர் நகர் எம்.எல்.ஏ., LJK தலைவர் ஜோஸ் சார்லஸ் மார்ட்டின்.
பேச்சின் ஒரு வரி, தமிழக அரசியலையே அதிர வைத்திருக்கிறது. “சிறு துறைமுகங்கள் அமைச்சர் எல்லா பிரச்னைகளுக்கும் வாய் திறப்பார். ஆனால் அவருடைய துறையான சிறு துறைமுகத்தில் இருந்தே போதைப்பொருள் கடத்தப்பட்டிருக்கிறது. அதில் மட்டும் ஒரு சிறிய விளக்கம்கூட கொடுப்பதில்லை. ஏன் இந்த மௌனம்?”
குறிவைக்கப்பட்டது யார் தெரியுமா? தமிழக பொதுப்பணி மற்றும் சிறு துறைமுகங்கள் துறை அமைச்சர், தவெக-வின் தேர்தல் வியூக நாயகன் ஆதவ் அர்ஜுனா. உறவு என்ன தெரியுமா? சொந்த மைத்துனர்கள்! லாட்டரி அதிபர் சாண்டியாகோ மார்ட்டினின் மூத்த மகன் ஜோஸ்; மருமகன் ஆதவ்!
மாதவரத்தில் ஜோஸ் பேசியது என்ன? வெறும் போதைப்பொருள் குற்றச்சாட்டோடு அவர் நிற்கவில்லை. தவெக ஆட்சியை நேருக்கு நேர் தாக்கினார்.
“தவெக ஆட்சிக்கு வரும்போது எல்லோருக்கும் ஒரு சந்தோஷம் இருந்தது. திராவிடக் கட்சிகளிடம் இருந்து விடுபட்டு மிகப்பெரிய அரசியல் மாற்றம் வரும் என நினைத்தோம். ஆனால், பழைய தவறுகளும் அதே சிக்கல்களுமே மீண்டும் தலைதூக்குகின்றன.”
“காணாமல் போகும் குழந்தைகள் பாலியல் துன்புறுத்தலுக்கு ஆளாக்கப்பட்டு படுகொலை செய்யப்படுகிறார்கள். மாநிலத்தில் போதைப்பொருள் கலாச்சாரம் அதிகரித்து வருகிறது. அதிலும் தவெக-வில் இருக்கும் நபர்கள்தான் முன்னோடியாக இருக்கிறார்கள்.”
“சிறையிலிருந்தே கைதிகள் தப்பிச் செல்லும் அளவுக்கு சட்டம் ஒழுங்கு சீர்குலைந்துள்ளது. பெண்கள், குழந்தைகள் வீதிகளில் பயத்துடன்தான் நடக்க வேண்டியிருக்கிறது.”
இப்படி அடுக்கடுக்காக குற்றச்சாட்டுகளை அடுக்கியவர், இறுதியில் தனது கட்சியின் கொள்கையைச் சொல்லி முடித்தார்: “ஒரு தலைவருக்கு தொலைநோக்குப் பார்வை வேண்டும். ஒவ்வொரு தனிமனிதனின் வளர்ச்சியை உறுதிப்படுத்துவதே LJK-வின் கொள்கை.”
கூட்டத்தில் LJK மாநில பொதுச்செயலாளர் நெல்லை ஜீவா, மனித உரிமைகள் அணி மாநிலச் செயலாளர் டாக்டர் ஆர்.ராஜ்குமார் உட்பட நிர்வாகிகள் உடனிருந்தனர்.
பின்னணியில் எரியும் நெருப்பு: நாகை 135 கிலோ! ஜோஸின் பேச்சு வெறும் வாய்ச்சவடால் அல்ல என்பதற்கு, கடந்த சில நாட்களாக தமிழகத்தை உலுக்கும் ஒரு சம்பவம் பின்னணியில் இருக்கிறது.
நாகை மாவட்டத்தில் தவெக நிர்வாகி பூபாலன் என்பவருக்குச் சொந்தமான வீட்டில் மத்திய வருவாய் புலனாய்வு இயக்குநரக (DRI) அதிகாரிகள் சோதனை நடத்தி, சுமார் ரூ.100 கோடி மதிப்பிலான 135 கிலோ மெத்தபெட்டமைன் போதைப்பொருளைப் பறிமுதல் செய்தனர். நாகை கடற்பகுதியில் இருந்து இலங்கைக்கு கடத்தி, நடுக்கடலில் கைமாற்றி வெளிநாடுகளுக்கு அனுப்பும் நெட்வொர்க் இது என்கிறது விசாரணை வட்டாரம்.
இதை வைத்துத்தான் திமுக சட்டத்துறை இணைச் செயலாளர் ஐ.பரந்தாமன், “போதைப்பொருள் கடத்தலில் ஆதவ் அர்ஜுனாவுக்குத் தொடர்பு? சிறு துறைமுகங்கள் துறை அமைச்சர் என்ற முறையில் அவர் ஏன் வாய் திறக்கவில்லை? முதல்வர் விஜய் ஏன் மௌனம் காக்கிறார்?” என்று சரமாரி கேள்வி எழுப்பியுள்ளார்.
இன்னொரு பக்கம், 258 கோடி ரூபாய் போதைப்பொருள் கடத்தல் வழக்கில் மூளையாகச் செயல்பட்டதாக அமலாக்கத்துறை குறிப்பிட்ட ஜான் பிரிட்டோ, அமைச்சர் ஆதவ் அர்ஜுனாவின் உறவினர் என்று முன்னாள் முதல்வர் மு.க.ஸ்டாலின் எக்ஸ் தளத்தில் பதிவிட, அதை மறுத்து ஆதவ் தரப்பு ரூ.1 கோடி மானநஷ்ட வழக்கு தொடர்ந்திருக்கிறது. அந்த வழக்கைத் தள்ளுபடி செய்யக் கோரி ஸ்டாலின் தரப்பு ஐகோர்ட்டில் பதில் மனு தாக்கல் செய்துள்ளது.
ஜோஸ் ஏன் தாக்குகிறார்? மூன்று கோணங்கள்! 1. குடும்ப யுத்தம்: ஒரே குடும்பம்… மூன்று கட்சி… இரண்டு மாநிலம்! ஆதவ் தவெக-வில், ஜோஸ் பாஜக கூட்டணியில் LJK-வில். சொத்து, அதிகாரப் போட்டியின் வெளிப்பாடா இந்த மோதல்?
2. ‘ஸ்லீப்பர் செல்’ அரசியல்: ஏற்கனவே ஜோஸ், “ஆதவ் அர்ஜுனா திமுக-வின் ஸ்லீப்பர் செல்; விஜய் அவரைத் தவிர்க்க வேண்டும்” என்று வெளிப்படையாக எச்சரித்திருக்கிறார். தவெக-வின் ‘தூய்மை’ பிம்பத்தின் மைய முகமான ஆதவ் மீது போதைக்கறை பூசுவது, அந்த பிம்பத்தை உடைக்கும் யுக்தி என்கிறார்கள் விமர்சகர்கள்.
3. ஆதாரம் எங்கே?: ‘சொந்தப் படகில் கடத்தல் முயற்சி’ என்பது NDPS சட்டத்தின் கீழ் தூக்குத்தண்டனை வரை செல்லக்கூடிய பயங்கர குற்றச்சாட்டு.
ஒரு சிட்டிங் எம்.எல்.ஏ. இதை மேடையில் சொல்கிறார் என்றால், FIR எங்கே? படகு பறிமுதல் செய்யப்பட்டதா? DRI அறிக்கையில் ஆதவ் பெயர் இருக்கிறதா? இதுவரை எந்த அதிகாரப்பூர்வ ஆதாரமும் வெளிவரவில்லை. ஆதவ் தரப்பிலும் அதிகாரப்பூர்வ மறுப்பு வரவில்லை.
அடுத்து என்ன? மாதவரம் மேடை இதோடு முடியப்போவதில்லை. ஜோஸ் தனது குற்றச்சாட்டுக்கு ஆதாரத்துடன் காவல்துறையில் புகார் கொடுப்பாரா? ஆதவ் மானநஷ்ட வழக்கில் இறங்குவாரா? மத்திய – மாநில அரசுகள் சிறு துறைமுகங்கள் வழியாக நடக்கும் கடத்தல் குறித்து வெள்ளை அறிக்கை தருமா?
உண்மை என்ன என்பதை காலம்தான் சொல்ல வேண்டும். ஆனால் ஒன்று மட்டும் நிதர்சனம்… தமிழக அரசியலில் ‘போதைப்பொருள்’ என்ற ஆயுதம் மீண்டும் எடுக்கப்பட்டுவிட்டது. அதுவும் மாமன்-மச்சான் யுத்தத்தில்!