நெல்லை கவின் ஆணவக் கொலை வழக்கில் முக்கிய திருப்பமாக, முதன்மைக் குற்றவாளியான சுர்ஜித்தின் பெற்றோர் மீதான குற்றப்பத்திரிகையை நீதிமன்றம் ரத்து செய்துள்ளது. இதற்கு எதிர்ப்பு தெரிவித்து, கவினின் பெற்றோர் தங்களது வீட்டின் முன்பு திடீர் காத்திருப்புப் போராட்டத்தைத் தொடங்கியுள்ளனர்.
கவினின் பெற்றோருக்கு உரிய விளக்கமும், நீதியும் கிடைக்கும் வரை போராட்டத்தைக் கைவிடப் போவதில்லை என்று அவர்கள் தெரிவித்துள்ளனர்.
இந்த வழக்கில் சி.பி.சி.ஐ.டி. போலீஸார் நீதிமன்றத்தில் 800 பக்கங்கள் கொண்ட குற்றப்பத்திரிகையைத் தாக்கல் செய்திருந்தனர். அதில், கவினின் காதலுக்கு சுர்ஜித்தின் பெற்றோரான காவல் சார்பு ஆய்வாளர்கள் சரவணன் மற்றும் கிருஷ்ணகுமாரி, கடந்த 2016-17ஆம் ஆண்டிலிருந்தே கடுமையான எதிர்ப்பு தெரிவித்து வந்ததாகக் குறிப்பிடப்பட்டிருந்தது.
2025 ஜூலை 27ஆம் தேதி கவின் கொலை செய்யப்பட்ட பிறகு, சுர்ஜித் தனது தந்தை சரவணனுக்குத் தகவல் தெரிவித்ததாக சி.பி.சி.ஐ.டி. குற்றப்பத்திரிகையில் கூறப்பட்டுள்ளது. இதையடுத்து, சரவணனும் கிருஷ்ணகுமாரியும் சுர்ஜித்தை ஒரு கல்லூரி அருகே சந்தித்ததாகவும், அப்போது அவரது ரத்தக்கறை படிந்த ஆடைகள் மற்றும் செல்போனை அழிக்கவும், இருசக்கர வாகனத்தின் நம்பர் பிளேட்டை அகற்றவும் அறிவுறுத்தியதாகவும் குற்றப்பத்திரிகையில் தெரிவிக்கப்பட்டிருந்தது.
மேலும், சரவணன் காவல்துறையிடம் தவறான தகவல்களை அளித்து வழக்கைத் திசைதிருப்ப முயன்றதாகவும் சி.பி.சி.ஐ.டி. தரப்பில் குற்றம்சாட்டப்பட்டிருந்தது.
கொலைக்குப் பிறகு சுர்ஜித்தும் அவரது போலீஸ் பெற்றோரும் ஒரே மொபைல் டவர் லொகேஷன் வரம்பிற்குள் இருந்ததாகவும் சி.பி.சி.ஐ.டி. தனது குற்றப்பத்திரிகையில் குறிப்பிட்டிருந்தது. ஆனால், வெறும் டவர் லொகேஷன் தரவை மட்டும் வைத்து அவர்கள் நேரில் சந்தித்து சதித்திட்டம் தீட்டியதாக உறுதிப்படுத்த முடியாது என்று உயர் நீதிமன்ற மதுரைக் கிளை தெரிவித்துள்ளது.
அதேபோல், சுர்ஜித்தின் தந்தை சரவணன், 2018-19ஆம் ஆண்டிலேயே கவினைத் தொடர்புகொண்டு தனது மகளுடனான காதலைக் கைவிடுமாறு எச்சரித்ததாக போலீஸ் தரப்பில் கூறப்பட்டது. ஆனால், கொலை நடைபெறுவதற்கு பல ஆண்டுகளுக்கு முன்பு நடந்த அந்த எச்சரிக்கை அழைப்பை தற்போதைய கொலைச் சதிக்கான நேரடி ஆதாரமாகக் கருத முடியாது என்று நீதிமன்றம் தெளிவுபடுத்தியுள்ளது.
சுர்ஜித்தின் பெற்றோர் கொலை நடந்த இடத்தில் இல்லை என்றும், கொலைக்கான முன்கூட்டிய சதியிலோ அல்லது திட்டமிடுதலிலோ அவர்கள் ஈடுபட்டதற்குப் போதிய முகாந்திரம் இல்லை என்றும் நீதிபதி விஜயகுமார் தலைமையிலான அமர்வு தெரிவித்துள்ளது. இதன் அடிப்படையில், சுர்ஜித்தின் பெற்றோர் மீதான குற்றப்பத்திரிகையை நீதிமன்றம் ரத்து செய்துள்ளது.
இதனிடையே, வழக்கில் மற்றொரு முக்கியக் குற்றவாளியாகக் குறிப்பிடப்படும் சுர்ஜித்தின் உறவினர் ஜெயபால் தாக்கல் செய்த மனுவை நீதிமன்றம் தள்ளுபடி செய்துள்ளது.
கொலைக்குப் பிறகு சுர்ஜித் பயன்படுத்திய ஆயுதங்களை மறைக்க ஜெயபால் உதவியதாக சி.பி.சி.ஐ.டி. தரப்பில் ஆதாரங்கள் சமர்ப்பிக்கப்பட்டுள்ளன. மேலும், சுர்ஜித் தனது ரத்தக்கறை படிந்த ஆடைகள், செல்போன் மற்றும் இருசக்கர வாகனத்தின் நம்பர் பிளேட்டை ஜெயபாலுக்குச் சொந்தமான குவாரி வளாகத்தில் வைத்து அழித்ததாகவும் சி.பி.சி.ஐ.டி. தெரிவித்துள்ளது. இதன் காரணமாக ஜெயபால் மீதான விசாரணை தொடர்ந்து நடைபெற உள்ளது.
இந்த வழக்கில் சி.பி.சி.ஐ.டி. போலீஸார் சிசிடிவி காட்சிகள், தடய அறிவியல் சான்றுகள் உள்ளிட்ட பல்வேறு ஆதாரங்களைச் சேகரித்துள்ளனர். கவினின் காதலி மற்றும் பெற்றோர் உள்ளிட்ட 83 சாட்சிகளின் வாக்குமூலங்களும் 800 பக்கங்கள் கொண்ட குற்றப்பத்திரிகையில் இடம்பெற்றிருந்தன.
இந்நிலையில், சுர்ஜித்தின் பெற்றோர் மீதான குற்றப்பத்திரிகை ரத்து செய்யப்பட்டிருப்பது தங்களுக்கு அதிர்ச்சியளிப்பதாக கவினின் தாய் தமிழ்செல்வி தெரிவித்துள்ளார்.
ஊடகங்களுக்கு அளித்த பேட்டியில், தனது கண் முன்னாலேயே தனது மகன் வெட்டிக் கொல்லப்பட்டதாகவும், அப்போது சுர்ஜித் சாதிய வார்த்தைகளைப் பேசியதாகவும் தமிழ்செல்வி தெரிவித்துள்ளார். மேலும், சுர்ஜித் தனது பெற்றோர் கவினின் மரணத்துக்காகக் காத்திருப்பதாகவும், அவர் இறந்தால்தான் அவர்களுக்கு நிம்மதி கிடைக்கும் என்று கூறியதாகவும் தமிழ்செல்வி குற்றம்சாட்டியுள்ளார்.
குற்றம் சாட்டப்பட்டவர்கள் காவல்துறை அதிகாரிகளாக இருப்பதால், முழுமையான விசாரணை தொடங்குவதற்கு முன்பே அவர்களுக்கு எதிரான குற்றப்பத்திரிகை ரத்து செய்யப்பட்டிருப்பது தங்களை அதிர்ச்சியடையச் செய்துள்ளதாகவும் அவர் தெரிவித்துள்ளார்.
“இனி ஒரு கவின் இதுபோல பலியாகக் கூடாது. சி.பி.சி.ஐ.டி. மேலும் ஆதாரங்களைச் சேகரிக்க நீதிமன்றம் வாய்ப்பளித்திருக்க வேண்டும்” என்றும் தமிழ்செல்வி கண்ணீருடன் தெரிவித்துள்ளார்.
இந்த விவகாரம் தொடர்பாக விடுதலைச் சிறுத்தைகள் கட்சித் தலைவர் தொல். திருமாவளவனும் கருத்து தெரிவித்துள்ளார். விசாரணை முழுமையாகத் தொடங்குவதற்கு முன்பே நீதிமன்றம் இத்தகைய உத்தரவைப் பிறப்பித்திருப்பது தவறான முன்மாதிரியாகிவிடும் என்று அவர் கூறியுள்ளார்.
மேலும், தமிழக அரசு இந்தத் தீர்ப்பை எதிர்த்து உடனடியாக உச்ச நீதிமன்றத்தில் மேல்முறையீடு செய்ய வேண்டும் என்றும், வழக்கில் மேல்விசாரணைக்கு உத்தரவிட வேண்டும் என்றும் திருமாவளவன் வலியுறுத்தியுள்ளார்.
ஒருபுறம் சுர்ஜித்தின் பெற்றோர் மீதான குற்றப்பத்திரிகை ரத்து செய்யப்பட்டுள்ள நிலையில், மறுபுறம் ஜெயபால் மீதான விசாரணை தொடரும் நிலை ஏற்பட்டுள்ளது. இதனால், கவின் கொலை வழக்கில் அடுத்தகட்ட சட்ட நடவடிக்கைகள் மற்றும் விசாரணையின் போக்கு முக்கியத்துவம் பெற்றுள்ளது.
நீதிமன்றத் தீர்ப்புக்கு எதிர்ப்பு தெரிவித்தும், தங்களுக்கு உரிய விளக்கமும் நீதியும் கிடைக்க வேண்டும் என்றும் வலியுறுத்தி, கவினின் பெற்றோர் தங்களது வீட்டின் முன்பு தொடர்ந்து காத்திருப்புப் போராட்டத்தில் ஈடுபட்டு வருகின்றனர்.