ராமநாதபுரம் மாவட்டத்தில், ஆன்லைன் மோசடியில் சுருட்டப்பட்ட பணத்தை பல்வேறு ஏடிஎம் கார்டுகள் மூலம் எடுத்து, அதனை கிரிப்டோகரன்சியாக மாற்றி முதலீடு செய்ய முயன்ற நான்கு பேரை சைபர் கிரைம் போலீசார் கைது செய்துள்ளனர். வங்கி கணக்குகளை கமிஷன் அடிப்படையில் வாங்கி மோசடிக்குப் பயன்படுத்திய இந்த மெகா மோசடி சம்பவம், பொதுமக்களிடையே பெரும் அதிர்ச்சியை ஏற்படுத்தியுள்ளது.
நாட்டில் ஆன்லைன் மோசடிகள் நாளுக்கு நாள் அதிகரித்து வருகின்றன. சமூக வலைதளங்கள், போலி முதலீட்டு திட்டங்கள், வங்கி அதிகாரிகள் போல பேசி தகவல்களைப் பெறுதல், போலி இணைப்புகள் உள்ளிட்ட பல்வேறு வழிகளில் இணையத்தின் பின்னணியில் செயல்படும் மோசடி கும்பல்கள், பொதுமக்களின் சேமிப்பு பணத்தை அபகரித்து வருகின்றன.
இவ்வாறு மோசடி செய்யப்பட்ட பணத்தை நேரடியாகத் தங்களது வங்கி கணக்குகளில் பெறாமல், காவல்துறையின் கண்காணிப்பில் சிக்காமல் இருக்க பல்வேறு புதிய யுக்திகளை இந்த கும்பல்கள் பயன்படுத்தி வருகின்றன. அதில் முக்கியமான ஒன்றாக, வங்கி கணக்குகளை கமிஷன் அடிப்படையில் வாடகைக்கு வாங்கும் முறை தற்போது அதிகரித்து வருகிறது.
“அமைச்சரை விமர்சிப்பது அவதூறு ஆகாது! – சைபர் கிரைம் போலீஸுக்கு உயர் நீதிமன்றம் ‘நச்’ கேள்வி!”
இதன்படி, வங்கியில் செயல்பாட்டில் இல்லாத அல்லது மிகக் குறைந்த பரிவர்த்தனைகள் மட்டுமே நடைபெறும் கணக்குகளை வைத்திருக்கும் நபர்களைத் தேடி, அவர்களிடம் கமிஷன் வழங்குவதாகக் கூறி, அந்த வங்கி கணக்குகள் மற்றும் அதனுடன் தொடர்புடைய ஏடிஎம் கார்டுகளைப் பெற்றுக் கொள்கின்றனர்.
பின்னர், சமூக வலைதளங்கள் மற்றும் இணையதளங்கள் மூலம் பல்வேறு நபர்களை ஏமாற்றி பெறப்படும் பணத்தை, இந்த வங்கி கணக்குகளுக்கே வரவழைக்கின்றனர். தாங்கள் ஏமாற்றப்பட்டதை அறியாத பொதுமக்கள், மோசடிக்காரர்கள் கூறிய கணக்குகளுக்கு பணத்தை அனுப்பிவிடுகின்றனர்.
அதன்பிறகு, பல்வேறு ஏடிஎம் கார்டுகளைப் பயன்படுத்தி அந்தப் பணத்தை வெவ்வேறு இடங்களில் இருந்து எடுத்து, அதை கிரிப்டோகரன்சியாக மாற்றி வெளிநாடுகள் உள்ளிட்ட இடங்களுக்கு அனுப்பி விடுகின்றனர். இதனால், உண்மையான மோசடிக்காரர்களை அடையாளம் காண்பது காவல்துறைக்கு சவாலாக மாறுகிறது.
இந்தச் சம்பவங்களில், கமிஷனுக்காக தங்களது வங்கி கணக்குகளை பயன்படுத்த அனுமதித்த நபர்களே இறுதியில் காவல்துறையின் விசாரணையில் சிக்குகின்றனர். ஆனால், உண்மையான மோசடி கும்பல் பணத்துடன் தலைமறைவாகி விடுகிறது.
இதுபோன்ற மோசடிகளைத் தடுக்கும் நோக்கில் தமிழ்நாடு சைபர் கிரைம் போலீசார் தீவிர கண்காணிப்பில் ஈடுபட்டு வருகின்றனர். அந்த வகையில், ராமநாதபுரம் மாவட்டத்தில் சிலர் பல்வேறு ஏடிஎம் மையங்கள் மூலம் மோசடி பணத்தை எடுத்து, அதை கிரிப்டோகரன்சியாக மாற்றும் நடவடிக்கையில் ஈடுபட்டு வருவதாக சைபர் கிரைம் போலீசாருக்கு ரகசிய தகவல் கிடைத்தது.
ஈரான் போர் கொடுத்த சவுக்கடி..! அம்பலமான இந்தியாவின் பலவீனம்..! அலர்ட் ஆன பிரதமர் மோடி..!
இதையடுத்து, மாவட்ட காவல் கண்காணிப்பாளர் சந்தீஷின் உத்தரவின்பேரில், ராமநாதபுரம் சைபர் கிரைம் போலீசார் பாரதிநகர் பகுதியில் தீவிர கண்காணிப்பில் ஈடுபட்டனர். அப்போது, அங்குள்ள ஒரு ஏடிஎம் மையத்தில் இரண்டு பேர் பல்வேறு ஏடிஎம் கார்டுகளை பயன்படுத்தி மாறி மாறி அதிகளவில் பணம் எடுப்பதை போலீசார் கவனித்தனர்.
உடனடியாக அவர்களை மடக்கிப் பிடித்து விசாரணை நடத்தியபோது, அவர்கள் வண்ணிக்குடி பகுதியைச் சேர்ந்த சதீஷ் மற்றும் ஷபீர் கான் என்பது தெரியவந்தது. அவர்களிடமிருந்து ஒரு செல்போன், 11 ஏடிஎம் கார்டுகள் மற்றும் ரூ.2 லட்சம் ரொக்கப் பணத்தை போலீசார் பறிமுதல் செய்தனர்.
தொடர்ந்து நடத்தப்பட்ட விசாரணையில், இந்த மோசடி வலையமைப்பில் மேலும் இருவர் தொடர்புடையவர்கள் என்பது தெரியவந்தது. அவர்கள் அளித்த தகவலின் அடிப்படையில், கபிலன் மற்றும் சசிகுமார் ஆகிய இருவரையும் சைபர் கிரைம் போலீசார் கைது செய்தனர்.
கைது செய்யப்பட்ட நால்வரிடமிருந்து நான்கு வங்கி கணக்குப் புத்தகங்கள், மடிக்கணினி, ஏராளமான ஏடிஎம் கார்டுகள், சிம் கார்டுகள் உள்ளிட்ட முக்கிய ஆதாரங்களை போலீசார் பறிமுதல் செய்துள்ளனர்.
முதற்கட்ட விசாரணையில், ஆன்லைன் மோசடியில் கிடைத்த பணத்தை பல்வேறு வங்கி கணக்குகள் வழியாகப் பெற்று, ஏடிஎம்கள் மூலம் ரொக்கமாக எடுத்து, பின்னர் கிரிப்டோகரன்சியாக மாற்றி பரிவர்த்தனை செய்யும் பணியில் இந்த கும்பல் ஈடுபட்டு வந்தது தெரியவந்துள்ளதாக போலீசார் தெரிவித்துள்ளனர்.
மேலும், இவர்களுடன் தொடர்புடையவர்கள் வேறு மாவட்டங்கள் அல்லது மாநிலங்களில் உள்ளனரா, எத்தனை வங்கி கணக்குகள் பயன்படுத்தப்பட்டுள்ளன, எவ்வளவு தொகை மோசடி செய்யப்பட்டிருக்கிறது, கிரிப்டோ பரிவர்த்தனைகள் மூலம் பணம் எங்கு அனுப்பப்பட்டுள்ளது என்பது உள்ளிட்ட பல்வேறு கோணங்களில் போலீசார் தீவிர விசாரணை மேற்கொண்டு வருகின்றனர்.
கைது செய்யப்பட்ட சதீஷ், ஷபீர் கான், கபிலன் மற்றும் சசிகுமார் ஆகியோர் ராமநாதபுரம் நீதிமன்றத்தில் ஆஜர்படுத்தப்பட்டு, நீதிமன்ற உத்தரவின் பேரில் சிறையில் அடைக்கப்பட்டனர்.
ஆன்லைன் மோசடிகளில் இருந்து பொதுமக்கள் எச்சரிக்கையாக இருக்க வேண்டும் என்றும், எந்தக் காரணத்திற்காகவும் தங்களது வங்கி கணக்கு, ஏடிஎம் கார்டு, காசோலைப் புத்தகம் அல்லது வங்கி விவரங்களை மற்றவர்களிடம் கமிஷனுக்காக வழங்கக் கூடாது என்றும் சைபர் கிரைம் போலீசார் மீண்டும் வலியுறுத்தியுள்ளனர்.