சட்டமன்றத்தில் நாற்காலிச் சண்டை..! ஆந்திராவில் தொழிற்சாலை வேட்டை..! ஏமாறுகிறதா தமிழக இளைஞர் கூட்டம்? 

தமிழ்நாட்டிற்கு வரவேண்டிய தொழில் முதலீடுகள் அண்டை மாநிலமான ஆந்திரப் பிரதேசத்திற்குச் செல்வது குறித்து இந்திய தொழில்முனைவோர் கூட்டமைப்பின் (AIE) தேசிய தலைவர் கே.இ. ரகுநாதன் கவலை தெரிவித்துள்ளார்.

தமிழ்நாட்டில் முதலீடு செய்யத் திட்டமிட்டிருந்த நிறுவனங்களை ஆந்திர அரசு தீவிரமாக அணுகி, வேகமான அனுமதிகள், சிறந்த சலுகைகள் மற்றும் தேவையான உள்கட்டமைப்பு வசதிகளை வழங்கி முதலீடுகளை ஈர்த்து வருவதாக அவர் சுட்டிக்காட்டியுள்ளார்.

ஆந்திரப் பிரதேச அரசு, இந்தியத் தொழிலகக் கூட்டமைப்பு (CII) மற்றும் ஆந்திரப் பிரதேச பொருளாதார மேம்பாட்டு வாரியம் (EDB) ஆகியவற்றுடன் இணைந்து தமிழகத் தொழில்முனைவோரை குறிவைத்து முதலீட்டு ஈர்ப்பு நடவடிக்கைகளை மேற்கொண்டு வருவதாகவும் ரகுநாதன் தெரிவித்துள்ளார்.

கடந்த சில வாரங்களாக ஆந்திர மாநில தொழில்துறை அமைச்சர் நாரா லோகேஷ் சென்னை மற்றும் கோயம்புத்தூர் உள்ளிட்ட பகுதிகளுக்குச் சென்று தமிழகத் தொழில்முனைவோர்களை ஆந்திராவில் முதலீடு செய்யுமாறு நேரடியாக அழைப்பு விடுத்து வருவதாகவும் அவர் குறிப்பிட்டுள்ளார்.

தொழில்முனைவோர்களுக்குத் தேவையான வசதிகளை ஏற்படுத்தித் தருவது, விரைவான அனுமதிகளை வழங்குவது, விமான நிலையம் உள்ளிட்ட போக்குவரத்து உள்கட்டமைப்புகளை மேம்படுத்துவது போன்றவற்றை ஆந்திர அரசு முதலீட்டாளர்களிடம் தொடர்ந்து எடுத்துரைத்து வருவதாகவும், இது தமிழகத்தில் உள்ள முதலீடுகளை ஈர்ப்பதற்கான ஒருங்கிணைந்த முயற்சியாக இருப்பதாகவும் ரகுநாதன் தெரிவித்துள்ளார்.

கடந்த மே முதல் ஆகஸ்ட் மாதம் வரையிலான காலகட்டத்தில் தமிழ்நாட்டைத் தாண்டி ஆந்திரப் பிரதேசம் ஈர்த்துள்ள சில முக்கிய முதலீடுகளையும் அவர் பட்டியலிட்டுள்ளார். உலகின் மிகப் பழமையான மோட்டார் சைக்கிள் பிராண்டுகளில் ஒன்றான ராயல் என்பீல்டு, 1901-ஆம் ஆண்டுக்குப் பிறகு முதன்முறையாக தமிழ்நாட்டிற்கு வெளியே உற்பத்தியை விரிவுபடுத்த முடிவு செய்து, ஆந்திரப் பிரதேசத்தின் திருப்பதி மாவட்டம் சத்தியவேடு பகுதியில் புதிய உற்பத்தி ஆலையை அமைக்க ஒப்பந்தம் மேற்கொண்டுள்ளது.

தென் கொரியாவைச் சேர்ந்த ஹ்வாசியுங் நிறுவனமும் தமிழ்நாட்டின் தூத்துக்குடியில் ₹1,720 கோடி முதலீட்டில் அமைக்கத் திட்டமிட்டிருந்த காலணி உற்பத்தி ஆலையை ஆந்திரப் பிரதேசத்தின் குப்பம் பகுதிக்கு மாற்றியுள்ளது. அதேபோல், விசாகப்பட்டினத்தில் ₹31,387 கோடி மதிப்பீட்டில் 512 மெகாவாட் திறன் கொண்ட பசுமை ஒருங்கிணைந்த செயற்கை நுண்ணறிவு தரவு மையத்தை அமைக்க ‘AM AI Factory (Vizag)’ நிறுவனத்தின் திட்டத்திற்கும் ஆந்திர அரசு ஒப்புதல் அளித்துள்ளது.

தகவல் தொழில்நுட்பத் துறையிலும் ஆந்திர அரசு முதலீடுகளை ஈர்க்கும் நடவடிக்கைகளை தீவிரப்படுத்தியுள்ளது. நிலங்களை மிகக் குறைந்த குத்தகை விலையில் வழங்கும் திட்டத்தின் கீழ், காக்னிசன்ட் நிறுவனம் விசாகப்பட்டினத்தில் ₹1,582.98 கோடி முதலீட்டில் சுமார் 8,000 வேலைவாய்ப்புகளை உருவாக்கும் திட்டத்தைத் தொடங்கியுள்ளது. டிசிஎஸ் நிறுவனமும் ஆந்திராவின் தகவல் தொழில்நுட்ப விரிவாக்க நடவடிக்கைகளில் இணைந்துள்ளது.

ஆகஸ்ட் மாதத்தில் நடைபெற்ற ஆந்திர மாநில முதலீட்டு ஊக்குவிப்பு வாரியத்தின் 20-வது கூட்டத்தில், பசுமை ஆற்றல், பாதுகாப்புத் துறை, விண்வெளித் துறை, லித்தியம் பேட்டரிகள் மற்றும் ரோபோட்டிக்ஸ் உள்ளிட்ட துறைகளில் ₹2.08 லட்சம் கோடி மதிப்பிலான 25 முக்கிய திட்டங்களுக்கு ஒப்புதல் வழங்கப்பட்டுள்ளதாகவும் ரகுநாதன் தெரிவித்துள்ளார். மேலும், ரிலையன்ஸ் நிறுவனத்தின் ₹56,300 கோடி மதிப்பிலான சோலார் பேட்டரி திட்டத்திற்கும் ஆந்திரப் பிரதேச அரசுடன் முதலீட்டு ஒப்பந்தம் இறுதி செய்யப்பட்டுள்ளதாகக் கூறப்படுகிறது.

தூத்துக்குடியில் ₹15,000 கோடி முதலீட்டில் அமையவிருந்த உலகத் தரம் வாய்ந்த மெகா கப்பல் கட்டும் திட்டமும் ஆந்திரப் பிரதேசத்திற்கு மாற்றப்பட்டுள்ளதாகத் தெரிவிக்கப்படுகிறது. ஆந்திராவில் இந்தத் திட்டம் சுமார் ₹29,000 கோடி மதிப்பிலான முதலீட்டுடன் செயல்படுத்தப்பட உள்ளதாகவும், இதன் மூலம் தமிழ்நாட்டிற்கு கிடைக்கவிருந்த சுமார் 45,000 வேலைவாய்ப்புகள் பாதிக்கப்படும் நிலை ஏற்பட்டுள்ளதாகவும் கூறப்படுகிறது.

இதுபோல, ஓசூரில் வரவிருந்த சில பாதுகாப்புத் துறை சார்ந்த திட்டங்களும் ஆந்திராவை நோக்கிச் சென்றுள்ளதாகவும், புட்டபர்த்தியில் ₹1,500 கோடி மதிப்பிலான அக்னேயாஸ்த்ரா எனர்ஜெடிக்ஸ் திட்டம் அமைய உள்ளதாகவும் குறிப்பிடப்படுகிறது. தமிழகத்தில் ஏற்கெனவே புரிந்துணர்வு ஒப்பந்தம் மேற்கொண்டிருந்த சில நிறுவனங்களையும் ஆந்திர அரசு அணுகி வருவதாகவும் ரகுநாதன் தெரிவித்துள்ளார்.

இதற்கு உதாரணமாக, தமிழகத்தில் புரிந்துணர்வு ஒப்பந்தம் மேற்கொண்டிருந்த ஏரோஸ்பேஸ் துறையைச் சேர்ந்த ஒரு நிறுவனத்திற்கு திருப்பதி அருகே சுமார் 300 ஏக்கர் நிலம், ஏக்கருக்கு சுமார் ₹5 லட்சம் என்ற அளவில் வழங்கப்பட்டு, ₹700 கோடி முதலீட்டை ஈர்க்கும் நடவடிக்கை மேற்கொள்ளப்பட்டுள்ளதாக அவர் தெரிவித்துள்ளார்.

ஆந்திரப் பிரதேசத்தில் முதலமைச்சர் சந்திரபாபு நாயுடு மற்றும் தொழில்துறை அமைச்சர் நாரா லோகேஷ் தலைமையிலான அரசு, ‘Speed of Doing Business’ என்ற அணுகுமுறையுடன் ஒற்றைச் சாளர முறையை தீவிரமாகச் செயல்படுத்தி வருவதாகவும் ரகுநாதன் கூறியுள்ளார். முதலீட்டாளர்களுக்கான அனுமதிகளை விரைவாக வழங்குவதுடன், நிலம் மற்றும் உள்கட்டமைப்பு வசதிகளை ஏற்படுத்திக் கொடுப்பதிலும் ஆந்திர அரசு கவனம் செலுத்தி வருவதாக அவர் தெரிவித்துள்ளார்.

தமிழ்நாட்டில் தொழில் முதலீடுகளை ஈர்க்கும் ‘கைடன்ஸ் தமிழ்நாடு’ அமைப்பில் பணியாற்றிய சில உயர் அதிகாரிகளையும் ஆந்திராவின் முதலீட்டு மேம்பாட்டு வாரியம் தங்கள் பக்கம் அழைத்து வருவதாக தகவல்கள் வெளியாகியுள்ளன. இதன் மூலம் முதலீடுகளை ஈர்ப்பதுடன், முதலீட்டு நிர்வாக அனுபவம் கொண்ட அதிகாரிகளையும் ஆந்திரா பயன்படுத்திக் கொள்வதாகக் கூறப்படுகிறது.

முதலீடுகள் திடீரென வேறு மாநிலங்களுக்கு மாறுவதற்குப் பின்னால் நிர்வாக ரீதியான காரணங்களும் இருப்பதாக நிபுணர்கள் தெரிவிக்கின்றனர். குறிப்பாக, தூத்துக்குடியில் அமையவிருந்த மசகான் டாக் கப்பல் கட்டும் திட்டம் நிலம் ஒதுக்கீடு மற்றும் உள்கட்டமைப்பு ஒப்புதல்களில் ஏற்பட்ட தாமதம் காரணமாக ஆந்திரப் பிரதேசத்திற்கு மாற்றப்பட்டதாகக் கூறப்படுகிறது. அதேபோல், ஹ்வாசியுங் நிறுவனத்துக்கு குப்பம் பகுதியில் உள்கட்டமைப்பு மற்றும் தேவையான சலுகைகள் வேகமாக வழங்கப்பட்டதால் அந்த நிறுவனம் தனது திட்டத்தை ஆந்திராவுக்கு மாற்றியதாகவும் கூறப்படுகிறது.

இந்த நிலையில், தமிழ்நாடு அரசு புதிய புரிந்துணர்வு ஒப்பந்தங்களை அறிவிப்பதோடு மட்டும் நின்றுவிடாமல், ஏற்கெனவே ஒப்புக்கொள்ளப்பட்ட முதலீட்டுத் திட்டங்களை விரைவாகச் செயல்படுத்துவதிலும் கவனம் செலுத்த வேண்டும் என்று கே.இ. ரகுநாதன் வலியுறுத்தியுள்ளார். முதலீட்டாளர்களை ஈர்ப்பது மட்டுமல்லாமல், ஏற்கெனவே தமிழகத்தில் உள்ள தொழில்களைத் தக்கவைத்துக் கொள்வதற்கான நடவடிக்கைகளும் அவசியம் என்றும் அவர் தெரிவித்துள்ளார்.

தமிழகத்தில் வரவேண்டிய முதலீடுகள் தொடர்ந்து அண்டை மாநிலங்களுக்கு மாறினால், எதிர்காலத்தில் தொழில் வளர்ச்சி மற்றும் வேலைவாய்ப்புகளில் பாதிப்பு ஏற்படக்கூடும் என்ற கவலையும் தொழில் முனைவோர் மத்தியில் எழுந்துள்ளது.

குறிப்பாக, கடந்த ஆகஸ்ட் மாதத்துடன் ஒப்பிடும்போது நடப்பு ஆகஸ்ட் மாதத்தில் தமிழகத்தின் ஜிஎஸ்டி வசூல் 1 சதவீதம் குறைந்துள்ளதாகவும், அதே நேரத்தில் சில அண்டை மாநிலங்களில் 12 முதல் 16 சதவீதம் வரை வளர்ச்சி பதிவாகியுள்ளதாகவும் சுட்டிக்காட்டப்படுகிறது.

இதனால், முதலீடுகளை ஈர்ப்பது, தொழில்களைத் தக்கவைப்பது, அனுமதிகளை விரைவுபடுத்துவது மற்றும் தொழில்துறைக்குத் தேவையான உள்கட்டமைப்புகளை மேம்படுத்துவது ஆகியவை தமிழக அரசின் முக்கிய முன்னுரிமைகளாக இருக்க வேண்டும் என்ற கோரிக்கை வலுத்துள்ளது.

தமிழ்நாட்டின் தொழில் வளர்ச்சிக்கும் எதிர்கால வேலைவாய்ப்புகளுக்கும் இது முக்கியமான சவாலாக மாறியுள்ள நிலையில், இந்த விவகாரத்தை அரசு தீவிரமாகக் கையாள வேண்டிய சூழல் ஏற்பட்டுள்ளதாக தொழில் முனைவோர் தரப்பில் வலியுறுத்தப்பட்டுள்ளது.