நீலகிரி மாவட்டம் உதகை அருகே, பட்டா பெயர் மாற்றம் செய்வதற்காக ரூ.1.25 லட்சம் லஞ்சம் பெற்றதாக எழுந்த புகாரில் பெண் கிராம நிர்வாக அலுவலர் (VAO) மற்றும் அவருக்கு உடந்தையாகச் செயல்பட்ட தனியார் வங்கி ஊழியர் ஆகிய இருவரையும் லஞ்ச ஒழிப்புத்துறை போலீசார் கைது செய்துள்ளனர். இந்தச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.
நீலகிரி மாவட்டம், குந்தா தாலுகாவிற்கு உட்பட்ட எடக்காடு நடுஹட்டி பகுதியைச் சேர்ந்தவர் வசந்த். இவரது தந்தை தனக்குச் சொந்தமான 3.5 சென்ட் நிலத்தை வசந்திற்கு தானப் பத்திரம் மூலம் வழங்கியுள்ளார். இதையடுத்து, அந்த நிலத்திற்கான பட்டாவைத் தனது பெயருக்கு மாற்றம் செய்வதற்காக வசந்த் ஆன்லைன் மூலம் விண்ணப்பித்துள்ளார்.
இந்த விண்ணப்பம் தொடர்பாக பிக்கட்டி-I பகுதி கிராம நிர்வாக அலுவலர் உமா பிரியாவை (28) வசந்த் அணுகியுள்ளார். அப்போது, பட்டா பெயர் மாற்றம் செய்து தருவதற்கு உமா பிரியா ரூ.1.25 லட்சம் லஞ்சம் கேட்டதாகக் கூறப்படுகிறது. மேலும், அந்தத் தொகையில் ஒரு ரூபாய்கூடக் குறைக்க முடியாது என அவர் திட்டவட்டமாகத் தெரிவித்ததாகவும் புகாரில் குறிப்பிடப்பட்டுள்ளது.
அரசு அதிகாரிக்கு லஞ்சம் கொடுக்க விரும்பாத வசந்த், இதுகுறித்து நீலகிரி மாவட்ட லஞ்ச ஒழிப்புத்துறையில் புகார் அளித்துள்ளார். புகாரின் அடிப்படையில், லஞ்ச ஒழிப்புத்துறை டிஎஸ்பி தட்சிணாமூர்த்தி தலைமையிலான போலீசார் நடவடிக்கையில் இறங்கினர்.
இதையடுத்து, போலீசாரின் அறிவுறுத்தலின்படி, ரசாயனம் தடவப்பட்ட ரூபாய் நோட்டுகளுடன் வசந்த் உமா பிரியாவைச் சந்திக்கச் சென்றுள்ளார். அப்போது, உமா பிரியா பணி நிமித்தமாக நியூ அட்டுபாயில் பகுதியில் இருந்ததாகக் கூறப்படுகிறது. இதனால், பணத்தைத் தன்னிடம் நேரடியாக வழங்காமல் மஞ்சூரில் உள்ள தனியார் வங்கி ஊழியர் ஒருவரிடம் கொடுக்குமாறு அவர் வசந்திடம் தெரிவித்துள்ளார்.
இதன்படி, வசந்த் ரசாயனம் தடவப்பட்ட ரூபாய் நோட்டுகளை அந்த வங்கி ஊழியரிடம் கொடுத்துள்ளார். அப்போது, அங்கு ஏற்கெனவே மறைந்திருந்த லஞ்ச ஒழிப்புத்துறை போலீசார், பணத்தைப் பெற்ற வங்கி ஊழியரைக் கையும் களவுமாகப் பிடித்தனர்.
தொடர்ந்து அவரிடம் நடத்தப்பட்ட விசாரணையில், அவர் கிராம நிர்வாக அலுவலர் உமா பிரியாவுக்கு இடைத்தரகராகச் செயல்பட்டது தெரியவந்ததாகக் கூறப்படுகிறது. இதையடுத்து, வங்கி ஊழியருக்கு பணம் வழங்கப்பட்டதைத் தொடர்ந்து, லஞ்ச ஒழிப்புப் போலீசார் உமா பிரியாவையும் சுற்றிவளைத்துக் கைது செய்தனர்.
தன்னிடம் நேரடியாகப் பணத்தைப் பெறாமல், தனியார் வங்கி ஊழியர் மூலம் லஞ்சத் தொகையைப் பெற உமா பிரியா திட்டமிட்டிருந்ததாக விசாரணையில் தெரியவந்துள்ளது. வெறும் 3.5 சென்ட் நிலத்திற்கான பட்டா பெயர் மாற்றத்துக்கு ரூ.1.25 லட்சம் லஞ்சம் கேட்டதாக எழுந்த புகாரும், இடைத்தரகர் மூலம் பணத்தைப் பெற முயன்ற சம்பவமும் அப்பகுதியில் அதிர்ச்சியை ஏற்படுத்தியுள்ளது.
இதனைத் தொடர்ந்து, கைது செய்யப்பட்ட கிராம நிர்வாக அலுவலர் உமா பிரியா மற்றும் அவருக்கு உடந்தையாகச் செயல்பட்ட தனியார் வங்கி ஊழியர் ஆகிய இருவரையும் போலீசார் கோவை ஊழல் தடுப்பு நீதிமன்றத்தில் ஆஜர்படுத்தி சிறையில் அடைத்தனர்.
பட்டா பெயர் மாற்றம் செய்வதற்காக லஞ்சம் கேட்டதாகப் பெண் கிராம நிர்வாக அலுவலர் கைது செய்யப்பட்டுள்ள சம்பவம் நீலகிரி மாவட்ட அரசு அலுவலக வட்டாரங்களில் பெரும் பரபரப்பை ஏற்படுத்தியுள்ளது.