தென்னிந்தியத் திரையுலகில் சார்மிலா பிறப்பால் தமிழராக இருந்தாலும், மலையாளத் திரையுலகமே அவருக்குப் பரவலான அங்கீகாரத்தைப் பெற்றுத் தந்தது.
சிவாஜி கணேசன் நடித்த ‘நல்லதொரு குடும்பம்’ (1979) திரைப்படத்தில் குழந்தை நட்சத்திரமாகத் தனது பயணத்தைத் தொடங்கிய அவர், பின்னர் ‘ஓயிலாட்டம்’ (1991) என்ற தமிழ்த் திரைப்படத்தின் மூலம் கதாநாயகியாக அறிமுகமானார்.
மலையாளத் திரையுலகில் அவர் நுழைந்தது ஒரு திருப்புமுனையாக அமைந்தது. 1991-ல், சிபி மலயிலின் ‘தனம்’, பத்ரனின் ‘அங்கிள் பன்’ ஆகிய படங்களில் மோகன்லாலுக்கு ஜோடியாக சார்மிலா நடித்தார். அதே ஆண்டில் பரதனின் ‘கேளி’ திரைப்படத்தில் ஜெயராமுடன் இணைந்து கதாநாயகியாகவும் நடித்தார். இப்படங்களில் அவர் வெளிப்படுத்திய நடிப்புத் திறன், மலையாளத் திரையுலக ரசிகர்களிடையே அவருக்கு ஒரு இடத்தைப் பெற்றுத் தந்தது.
அதன்பிறகு சார்மிலா தமிழ், தெலுங்கு மற்றும் மலையாளத் திரைப்படங்களில் தொடர்ந்து பணியாற்றினார். இருப்பினும், அவரது சினிமா வாழ்க்கை சிறப்பாகச் சென்றுகொண்டிருந்த அதே வேளையில், அவரது தனிப்பட்ட வாழ்க்கை பல கடினமான கட்டங்களைக் கடக்க வேண்டியிருந்தது. தனது உறவுகள், திருமணங்கள் குறித்து அவர் முன்பே வெளிப்படையாகப் பேசியுள்ளார். ஒருமுறை காதல் உறவுகள் தனது வாழ்க்கையில் எதிர்மறையான தாக்கத்தை ஏற்படுத்தியதாகக் கூறியிருனந்தார்.
பாபு ஆண்டனியுடனான சார்மிலாவின் உறவு நடிகர் பாபு ஆண்டனி முக்கிய கதாபாத்திரத்தில் நடித்த ‘கடல்’ (1994) திரைப்படத்தில் பணிபுரிந்தபோது சார்மிலா அவரைச் சந்தித்தார். பின்னர் ‘ராஜதானி’ மற்றும் ‘கம்போளம்’ போன்ற படங்களில் இருவரும் இணைந்து நடித்தனர். மொத்தம் ஆறு படங்களில் இணைந்து பணியாற்றிய அவர்களுக்கு இடையே, காலப்போக்கில் காதல் மலர்ந்ததாக சார்மிலா குறிப்பிட்டார்.
அந்த உறவு குறித்துப் பேசிய சார்மிலா, “பாபு ஒருமுறை அமெரிக்கா சென்றார். அதன்பின் திரும்பவே இல்லை. அதற்குக் காரணம் அவருடைய சகோதரர் என்று நான் நினைக்கிறேன். பாபு ஒரு கெட்ட மனிதர் என்று நான் இப்போதும் நினைக்கவில்லை. அவர்தான் எனது முதல் காதல். அப்போது எனக்கு வயது 19. ஆனால் அந்த உறவு கைகூடாத நிலையில், நான் மணிக்கட்டை அறுத்து தற்கொலைக்கு முயன்றேன். இருப்பினும், என் அம்மா என்னைக் காப்பாற்றினார்.”
அவர்கள் நெருக்கமாக இருந்த காலகட்டத்தில் நடந்த பல சம்பவங்களையும் சார்மிலா நினைவு கூர்ந்தார். குட்டிக்கானம் பகுதியில் படப்பிடிப்பு நடந்தபோது தனது அறையில் இருந்த கீசர் பழுதானது. “பாபு தனது அறையில் ஒரு வாளியில் சுடுநீரை நிரப்பி அதை என் அறைக்குக் கொண்டு வந்தார். ஆனால் இதைப் பார்த்த என் தந்தை கடும் கோபமடைந்து, அந்த வாளியை கீழே தட்டிவிட்டார்.”
மற்றொரு நாள் வானிலை மோசமடைவதைக் கவனித்த பாபு, அவளையும் மற்றவர்களையும் தனது காரில் அழைத்துச் செல்வதாகக் கூறினார். அவருடன் ஒரே காரில் பயணம் செய்ய அவளது தந்தை அனுமதிக்கவில்லை. “பின்னர், நாங்கள் ஒரு உட்புறப் பகுதியில் படப்பிடிப்பில் இருந்தபோது வானம் மேகமூட்டமாக மாறத் தொடங்கியது. எனது கார் வருவதற்குத் தாமதமாவதைக் கண்ட பாபு, எங்களை அவரது காரிலேயே அழைத்துச் செல்வதாக முன்வந்தார்.
ஆனால், அவருடன் ஒரே காரில் செல்ல என் தந்தை என்னை அனுமதிக்கவில்லை. அப்போது பாபு தனது காரிலிருந்து இறங்கி வந்து, எங்களை அதில் ஏறிக்கொள்ளுமாறு கூறினார். இவையெல்லாம் பாபு ஆண்டனியுடன் என்னை நெருக்கமாக்கின. எனக்காக அவர் இவ்வளவு சிரமங்களை மேற்கொண்டது என் மனதைத் தொட்டது” என்று சார்மிலா கூறினார்.
தந்தையின் கண்டிப்பான அணுகுமுறை சார்மிலா கூறும்போது, அவரது தந்தையின் கண்டிப்பான அணுகுமுறைதான், இறுதியில் பாபு ஆண்டனியுடனான அவரது உறவுக்குக் காரணமாக அமைந்தது. “என் தந்தை விஷயங்களை அன்புடன் விளக்கியிருந்தால், நான் அந்த உறவில் சிக்கியிருக்க மாட்டேன். அதற்குப் பதிலாக, அவர் என்னைப் பாதுகாக்கவே முயன்றார். ஒரு மகளாக நான் முற்றிலும் தோல்வியடைந்துவிட்டேன். என் தந்தை கொண்டு வந்த திருமண வரனுக்கு நான் சம்மதித்திருந்தால், எனக்கு இந்த நிலை ஏற்பட்டிருக்காது,” என்று கூறினார்.
இருப்பினும், சர்மிளாவுடன் காதல் உறவு கொண்டிருந்ததாகக் கூறப்படுவதை பாபு ஆண்டனி மறுத்துள்ளார்.
‘ஜேபி ஜங்ஷன்’ நிகழ்ச்சியின் ஒரு பகுதியில் அவர் பேசுகையில், “நான் வாழ்நாள் முழுவதும் திருமணம் செய்துகொள்ளாமல் இருக்கவே விரும்பினேன். ஆனால் நான் ஒரு கல்லூரி மாணவியைத்தான் காதலித்தேன். நடிகையை அல்ல. பல பெண்கள் என்னைக் காதலிப்பதாகக் கூறியிருக்கிறார்கள். ஆனால் என்னுடனான உறவு குறித்து ஒரு நடிகை முன்வைக்கும் குற்றச்சாட்டுகள் பற்றி எனக்கு எதுவும் தெரியாது,” என்று கூறினார்.
திரைக்கதை எழுத்தாளர் கலூர் டென்னிஸும் ‘கிரஹலட்சுமி’ இதழில் சார்மிலாவின் இந்த உறவு குறித்து எழுதியுள்ளார்.
‘கம்போலம்’ படக் காலத்தை நினைவுகூர்ந்து அவர் எழுதியதில், “‘கம்போலம்’ படப்பிடிப்பின் போதுதான் சார்மிலாவுக்குள் காதல் மலர்ந்தது. அதன் போக்குகளை நான் நன்கு புரிந்துகொண்டேன். அந்தப் பாதை ஆபத்தானது என்று உணர்ந்தபோது, நான் ஒரு நல்ல ஆலோசகராகச் செயல்பட முயன்றேன். ஆனால் காதலோ சார்மிலாவை வலுவாக ஆட்கொண்டிருந்தது. அதன் விளைவாக, என்னைப் பார்த்தாலே அவர் விலகிச் செல்லத் தொடங்கினார். காலப்போக்கில் சார்மிலாவின் காதல் தோல்வியடைந்தது. அதனால் அவர் கடுமையான மன உளைச்சலுக்கு ஆளானார்.”
பாபு ஆண்டனியுடனான பிரிவுக்குப் பிறகு, அக்காலத்தில் திரைப்படத் துறையில் உதவி இயக்குநராகப் பணியாற்றி வந்த கிஷோர் சத்யாவின் நட்பு சார்மிலாவுக்குக் கிடைத்தது. இறுதியில் இருவரும் திருமணம் செய்துகொண்டனர். தங்கள் உறவு மலர்ந்த அந்த காலகட்டத்தில் தான் மிகவும் கடினமான சூழலில் இருந்ததாக சார்மிலா கூறியுள்ளார்.
அவர் கூறுகையில், “நான் மனச்சோர்வில் இருந்தபோது, கிஷோர் என்னிடம் அன்புடன் பேசினார். விரைவில் நாங்கள் நெருக்கமானோம்,” என்று தெரிவித்தார்.
திருமணமான காலகட்டத்தில் சார்மிலாவுக்குப் பல நடிப்பு வாய்ப்புகள் வந்துகொண்டிருந்தன. இருப்பினும், திருமணத்திற்குப் பிறகு திரைப்படங்களில் நடிப்பதை நிறுத்திவிடுமாறு கிஷோர் கேட்டுக்கொண்டதாக அவர் கூறினார்.
தனது கணவர் அந்தப் படத்தில் நடிப்பதற்கு ஒப்புக்கொள்ளமாட்டார் என்று கருதி, ‘சேது’ (1999) படத்தில் விக்ரமுக்கு ஜோடியாக நடிக்கும் வாய்ப்பை மறுத்ததையும் அவர் நினைவுகூர்ந்தார். “திரைப்படங்களில் எனக்கு ஏராளமான நடிப்பு வாய்ப்புகள் வந்துகொண்டிருந்த சமயத்தில் நாங்கள் திருமணம் செய்துகொண்டோம். திருமணத்திற்குப் பிறகு நான் நடிப்பதை நிறுத்த வேண்டும் என்று கிஷோர் விரும்பினார். இதற்கிடையில், அவர் ஷார்ஜாவுக்குச் சென்றார். விக்ரமுக்கு ஜோடியாக ‘சேது’ (1999) படத்தில் நடிக்கும் வாய்ப்பு வந்தபோது, கிஷோர் அதை விரும்பமாட்டார் என்று நினைத்து நான் அதை மறுத்துவிட்டேன். நான்கு ஆண்டுகள் அவர் அங்கேயும் நான் இங்கேயும் வசித்தோம். பின்னர், ஒரு நிகழ்ச்சிக்காக துபாய் சென்றிருந்தபோது அவரைச் சந்தித்தேன். அப்போது, நம் உறவைத் தொடர்வதில் தனக்கு விருப்பமில்லை என்று அவர் என்னிடம் கூறினார்,” என்று சார்மிலா நினைவுகூர்ந்தார்.
தங்கள் திருமணம் ரகசியமாக நடத்தப்பட்டதாகவும், அதில் குடும்ப உறுப்பினர்கள் மட்டுமே கலந்துகொண்டதாகவும் அவர் கூறினார். இறுதியில், அந்தத் தம்பதியினர் பரஸ்பர சம்மதத்துடன் விவாகரத்து செய்துகொண்டனர்.
“எங்கள் திருமணத்தை ரகசியமாக வைத்திருக்க அவர் விரும்பினார். குடும்ப உறுப்பினர்கள் மட்டுமே கலந்துகொண்ட பதிவுத் திருமணம் அது. என் மீதான ஈர்ப்பினால் அல்லாமல், எனது பிரபலத்தைக் கருத்தில் கொண்டே கிஷோர் என்னைத் திருமணம் செய்துகொண்டார் என்பதையும், என் மீது அவருக்கு உண்மையான விருப்பம் இல்லை என்பதையும் உணர்ந்த பிறகு நாங்கள் பரஸ்பர சம்மதத்துடன் விவாகரத்து செய்துகொண்டோம்,” என்று அவர் கூறினார்.
சார்மிலாவின் இரண்டாவது திருமணம் பின்னர், தனது சகோதரியின் நண்பரான ராஜேஷ் என்ற மென்பொருள் பொறியாளரை சார்மிலா திருமணம் செய்துகொண்டார். அவர் சார்மிலாவை விட எட்டு வயது இளையவர். அந்தத் திருமணமும் இறுதியில் விவாகரத்தில் முடிந்தது.
“நான் ஒரு கிறிஸ்தவப் பெண்; எங்கள் மகனுக்காக நான் இந்து மதத்திற்கு மாற வேண்டும் என்று ராஜேஷ் விரும்பினார். ஆனால், பல பிரார்த்தனைகளுக்குப் பிறகே என் மகன் பிறந்ததால், அவன் கிறிஸ்தவ மதத்தைப் பின்பற்ற வேண்டும் என்று நான் விரும்பினேன். சட்டப்படி நாங்கள் இப்போது விவாகரத்து செய்துவிட்டோம், ஆனாலும் அவருடன் தொடர்பில் இருக்கிறேன். நீதிமன்ற நடவடிக்கைகளின்போது, என் மகன் என்னுடன் இருக்க விரும்புவதாகக் கூறினான்; ராஜேஷ் அவ்வப்போது வந்து மகனைச் சந்தித்துச் செல்கிறார்,” என்று அவர் மேலும் கூறினார்.
தனது தனிப்பட்ட வாழ்க்கையைத் திரும்பிப் பார்க்கையில், முந்தைய அனுபவங்கள் இருந்தபோதிலும் மீண்டும் மீண்டும் காதல் உறவுகளில் ஈடுபட்டதை சார்மிலா ஒப்புக்கொண்டார்.
“என் வாழ்க்கையின் அனைத்துக் கட்டங்களிலும் நான் காதல் உறவுகளில் இருந்திருக்கிறேன். என் அனுபவங்களிலிருந்து பாடங்களைக் கற்றுக்கொள்வதில் நான் தவறிவிட்டேன்,” என்று அவர் கூறினார்.
2024-ல் ‘ஜஸ்டிஸ் ஹேமா கமிட்டி’ அறிக்கை வெளியானதைத் தொடர்ந்து, மலையாளத் திரையுலகில் தனக்கு ஏற்பட்ட அனுபவங்கள் குறித்தும் சார்மிலா பேசினார்.
திரையுலகில் பலரிடமிருந்து தவறான நடத்தைகளை எதிர்கொண்டதாகக் கூறிய அவர், 28 பேர் தன்னிடம் தவறாக நடந்துகொண்டதாகக் குற்றம் சாட்டினார்.
“‘அர்ஜுனன் பிள்ளையும் அஞ்சு மக்களும்’ படத்தின் இணைத் தயாரிப்பாளர்களில் ஒருவரான எம்.பி. மோகனன் மற்றும் அவரது நண்பர்கள் தன்னைத் தவறாக அணுகி பாலியல் ரீதியாகத் துன்புறுத்த முயன்றதாக” சார்மிலா குற்றம் சாட்டினார். இயக்குநர் ஹரிஹரன் தன்னை ‘ஒத்துழைப்பு’ தருவேனா என்று கேட்டதாகவும், அந்த உரையாடல் நடிகர் விஷ்ணுவிடம் தெரிவிக்கப்பட்டதாகவும் அவர் குற்றம் சாட்டினார்.
“இயக்குநர் ஹரிஹரன் நான் ‘ஒத்துழைப்பு’ தருவேனா என்று கேட்டார். இதை அவர் நடிகர் விஷ்ணுவிடம் கேட்டார். அதற்கு நான் தயாராக இல்லை என்று கூறிய பிறகு, விஷ்ணுவும் நானும் அந்தப் படத்திலிருந்து நீக்கப்பட்டோம்,” என்று அவர் தெரிவித்தார்.
சார்மிலா தனது திரைப்பயணத்தின் உச்சக்கட்டத்தில் இருந்ததைப் போல இப்போது படங்களில் தீவிரமாகச் செயல்படுவதில்லை என்றாலும், அவ்வப்போது சில படங்களில் தோன்றுகிறார். கடந்த காலங்களில் அவர் பல தொலைக்காட்சி நிகழ்ச்சிகளிலும் பங்கேற்றுள்ளார்.