திருச்சி தென்னூர் மின்வாரிய அலுவலகத்தில் லஞ்ச ஒழிப்புத்துறையினர் நடத்திய அதிரடி சோதனையில், சுமார் 13 லட்சம் ரூபாய் அளவிலான லஞ்சப் பணப் பரிவர்த்தனைகள் தொடர்பான தகவல்கள் கண்டறியப்பட்டுள்ளதாகத் தெரிவிக்கப்பட்டுள்ளது.
புதிய மின் இணைப்பு வழங்குவது, இருமுனை மின்சார இணைப்பை மும்முனை இணைப்பாக மாற்றுவது உள்ளிட்ட சேவைகளுக்காக பொதுமக்களிடம் GPay, PhonePe உள்ளிட்ட ஆன்லைன் வழிகளில் லஞ்சம் பெறப்படுவதாக எழுந்த புகாரின் அடிப்படையில் இந்தச் சோதனை நடைபெற்றது.
டிஎஸ்பி மணிகண்டன் தலைமையிலான லஞ்ச ஒழிப்புத்துறை போலீசார் மேற்கொண்ட சோதனையில், ஆன்லைன் வழியாக மட்டும் 12.05 லட்சம் ரூபாய் மதிப்பிலான சந்தேகத்திற்குரிய பரிவர்த்தனைகள் கண்டறியப்பட்டதாகக் கூறப்படுகிறது.
மேலும், கணக்கில் வராத 75 ஆயிரம் ரூபாய் ரொக்கமும், நேரடியாகப் பெறப்பட்டதாகக் கூறப்படும் ஒரு லட்சம் ரூபாய் லஞ்சப் பணமும் பறிமுதல் செய்யப்பட்டுள்ளதாகத் தகவல்கள் தெரிவிக்கின்றன. இதுதொடர்பாக மின்வாரிய அதிகாரிகள் மற்றும் ஊழியர்களிடம் விசாரணை நடைபெற்று வருகிறது.
திருச்சி சோதனையைத் தொடர்ந்து, தமிழகம் முழுவதும் பல்வேறு அரசு அலுவலகங்களிலும் லஞ்ச ஒழிப்புத்துறையினர் ஒரே நேரத்தில் அதிரடி சோதனையில் ஈடுபட்டுள்ளனர். வட்டாட்சியர் அலுவலகங்கள், சார்பதிவாளர் அலுவலகங்கள், ஊராட்சி ஒன்றிய அலுவலகங்கள் மற்றும் மின்வாரிய அலுவலகங்கள் உள்ளிட்ட பல்வேறு இடங்களில் இந்தச் சோதனைகள் நடைபெற்றதாகத் தெரிவிக்கப்பட்டுள்ளது.
இதுவரை நடைபெற்ற சோதனைகளில் கணக்கில் வராத 1.18 கோடி ரூபாய்க்கும் அதிகமான பணம் கண்டறியப்பட்டுள்ளதாகக் கூறப்படுகிறது. இதில் 28.25 லட்சம் ரூபாய் ரொக்கமாகவும், 89.89 லட்சம் ரூபாய் GPay, PhonePe உள்ளிட்ட UPI பரிவர்த்தனைகள் மூலமாகவும் பெறப்பட்டதாகக் கூறப்படும் பணப் பரிவர்த்தனைகளாக உள்ளன.
சென்னை கிண்டி மின்வாரிய அலுவலகத்திலும் லஞ்ச ஒழிப்புத்துறையினர் சோதனை நடத்தியுள்ளனர். புதிய மின் இணைப்பு மற்றும் இருமுனை இணைப்பை மும்முனை இணைப்பாக மாற்ற விண்ணப்பிக்கும் நுகர்வோர்களைக் குறிவைத்து லஞ்சப் பணம் பெறப்பட்டதாகக் கூறப்படுகிறது.
பொதுமக்கள் நேரடியாகப் பணம் கொடுக்கத் தயங்கியதால், இடைத்தரகர்கள் மூலமாகவும், அதிகாரிகளுக்கு நெருக்கமானவர்களின் GPay, PhonePe கணக்குகள் மூலமாகவும் பணம் கைமாறியதாக விசாரணையில் தெரியவந்துள்ளதாகத் தகவல்கள் தெரிவிக்கின்றன.
அதிகாரிகள் தங்களது சொந்த வங்கிக் கணக்குகளைப் பயன்படுத்தாமல், அலுவலகங்களுக்கு அருகில் உள்ள டீக்கடைக்காரர்கள், ஜெராக்ஸ் கடை உரிமையாளர்கள் மற்றும் இடைத்தரகர்களின் டிஜிட்டல் கணக்குகளைப் பயன்படுத்தியதாகவும் கூறப்படுகிறது.
பொதுமக்கள் அந்தக் கணக்குகளுக்கு பணத்தை அனுப்பிய பின்னர், இடைத்தரகர்கள் கமிஷனை எடுத்துக்கொண்டு மீதமுள்ள தொகையை அதிகாரிகளிடம் ரொக்கமாக ஒப்படைத்ததாகவும் விசாரணையில் தெரியவந்துள்ளதாகக் கூறப்படுகிறது.
மேலும், திருச்சி தென்னூர் மற்றும் சென்னை நங்கநல்லூர் மின்வாரிய அலுவலகங்களில் குறிப்பிட்ட சேவைகளுக்கு மறைமுகமாக ஒரு ‘ரேட் கார்டு’ வைத்திருந்ததாகவும் தகவல்கள் வெளியாகியுள்ளன. வீடுகளுக்கும் வணிக நிறுவனங்களுக்கும் வெவ்வேறு தொகைகள் நிர்ணயிக்கப்பட்டதாகவும், மின் மீட்டர் மாற்றம் போன்ற சேவைகளுக்கும் நிர்ணயிக்கப்பட்ட கட்டணத்தைத் தாண்டி கூடுதல் தொகை வசூலிக்கப்பட்டதாகவும் கூறப்படுகிறது.
சென்னை கிண்டியில் உள்ள தலைமை மின் ஆய்வாளர் அலுவலகத்திலும் சோதனை நடைபெற்றுள்ளது. அங்கு ஒரே நாளில் 31.52 லட்சம் ரூபாய் மதிப்பிலான சந்தேகத்திற்குரிய GPay பரிவர்த்தனைகள் கண்டறியப்பட்டதாகத் தெரிவிக்கப்பட்டுள்ளது.
இதேபோல், கள்ளக்குறிச்சி வட்டார வளர்ச்சி அலுவலகத்தில் நடைபெற்ற சோதனையிலும் ரொக்கம் மற்றும் டிஜிட்டல் பரிவர்த்தனைகள் தொடர்பான தகவல்கள் கண்டறியப்பட்டதாகக் கூறப்படுகிறது. பல்லாவரம் மற்றும் ராயபுரம் சார்பதிவாளர் அலுவலகங்களிலும் கணக்கில் வராத ரொக்கப் பணம் தொடர்பான சோதனைகள் நடைபெற்றுள்ளன.
சென்னை நங்கநல்லூர் மின்வாரிய அலுவலகத்தில் நடைபெற்ற சோதனையின்போது, உதவி கோட்டப் பொறியாளர் மற்றும் ஒரு ஊழியரிடம் முறையே 59 ஆயிரம் ரூபாய் மற்றும் 10 ஆயிரம் ரூபாய் ரொக்கம் இருந்ததாக ‘தி டைம்ஸ் ஆஃப் இந்தியா’ செய்தி வெளியிட்டுள்ளது. அந்தப் பணத்திற்கான முறையான கணக்கு காட்டப்படவில்லை எனக் கூறப்படும் நிலையில், சம்பந்தப்பட்டவர்கள் மீது துறை ரீதியான நடவடிக்கை எடுக்க பரிந்துரைக்கப்பட்டுள்ளதாகத் தகவல்கள் தெரிவிக்கின்றன.
இதனிடையே, லஞ்சப் புகார்களை பொதுமக்கள் எளிதாகத் தெரிவிக்கும் வகையில் 9498180936 என்ற வாட்ஸ்அப் எண் அறிமுகப்படுத்தப்பட்டுள்ளதாகவும், 1800-425-1555 என்ற கட்டணமில்லா தொலைபேசி எண்ணும் செயல்பாட்டில் உள்ளதாகவும் தெரிவிக்கப்பட்டுள்ளது. அரசு அலுவலகங்களில் லஞ்ச ஒழிப்புத்துறையின் புகார் எண்கள் அடங்கிய அறிவிப்புப் பலகைகளை பொதுமக்களின் பார்வையில் வைக்கவும் உத்தரவிடப்பட்டுள்ளது.
இந்நிலையில், இனிவரும் காலங்களில் ரொக்கப் பணத்தை மட்டும் கண்காணிக்காமல், அரசு ஊழியர்களின் மொபைல் போன்கள், வங்கிக் கணக்குகள் மற்றும் UPI பரிவர்த்தனை வரலாறுகளையும் ஆய்வு செய்து டிஜிட்டல் முறையில் நடைபெறும் லஞ்சப் பரிவர்த்தனைகளை கண்டறியும் நடவடிக்கைகளை லஞ்ச ஒழிப்புத்துறையினர் தீவிரப்படுத்தியுள்ளனர்.
தமிழகம் முழுவதும் நடைபெற்ற இந்த அதிரடி சோதனைகளில் மேலும் பல முக்கிய தகவல்கள் வெளியாகும் என எதிர்பார்க்கப்படும் நிலையில், தொடர்புடைய அதிகாரிகள் மற்றும் இடைத்தரகர்களிடம் விசாரணை தொடர்ந்து நடைபெற்று வருகிறது.