பாலிவுட் நடிகையும் அரசியல்வாதியுமான கங்கனா ரணாவத், பாரம்பரிய ஆடைகள், கலாச்சாரம் மற்றும் மேற்கத்திய உடை கலாச்சாரம் குறித்து பல்வேறு சந்தர்ப்பங்களில் பொது மேடைகளிலும் சமூக வலைத்தளங்களிலும் கருத்துகளைப் பகிர்ந்து வந்துள்ளார். அவரது கருத்துகள் பலமுறை சமூக வலைத்தளங்களில் விவாதத்தையும் சர்ச்சையையும் ஏற்படுத்தியுள்ளன.
இதற்கு பதிலாக, கலாச்சாரம் என்பது ஒருவர் அணியும் ஆடையில் மட்டும் அடங்கிவிடுவதில்லை என்றும், அது அவர்களின் சிந்தனை, உணர்வு மற்றும் சக மனிதர்களை மதிக்கும் பண்பிலும் வெளிப்படுகிறது என்றும் பலர் கருத்து தெரிவித்து வருகின்றனர்.
இந்நிலையில், நகை நிறுவனமான GIVA, ரக்ஷா பந்தன் பண்டிகையை முன்னிட்டு வெளியிட்ட விளம்பரத்தில் நடிகை கிருத்தி சனோன் நடித்திருந்தார். அந்த விளம்பரத்தில், இந்தோ-வெஸ்டர்ன் பாணியிலான பிராலெட் ஸ்டைல் மேலாடை மற்றும் ஸ்கர்ட் அணிந்த கிருத்தி சனோன் தனது சகோதரருக்கு ராக்கி கட்டுவது போன்ற காட்சிகள் இடம்பெற்றிருந்தன. பாரம்பரிய பண்டிகைக்கு இந்த ஆடை பொருத்தமானதல்ல என்று சமூக வலைத்தளங்களில் ஒரு தரப்பினர் விமர்சிக்கத் தொடங்கினர்.
இந்த விளம்பரத்தை கடுமையாக விமர்சித்த கங்கனா ரணாவத், தனது இன்ஸ்டாகிராம் பக்கத்தில், “இன்றைய பெண்களுக்கு காக்டெய்ல் உடைகள், லெஹங்கா, ஜீன்ஸ், புடவை என பல்வேறு ஆடைகள் உள்ளன. அப்படி இருக்கும்போது, ஒருவர் தனது சகோதரருக்கு பிகினி அல்லது உள்ளாடை போன்ற ஆடைகளை அணிந்து கொண்டு ஏன் ராக்கி கட்ட வேண்டும்?” என்று கேள்வி எழுப்பினார். மேலும், இந்த விளம்பரப் பிரச்சாரம் வேண்டுமென்றே சர்ச்சையை ஏற்படுத்தும் வகையில் வடிவமைக்கப்பட்டுள்ளதாகவும் அவர் விமர்சித்தார்.
கங்கனாவின் இந்த விமர்சனத்துக்கு பதிலளிக்கும் வகையில், கிருத்தி சனோன் தனது இன்ஸ்டாகிராம் பக்கத்தில் நீண்ட அறிக்கை ஒன்றை வெளியிட்டார். அதில், “கலாச்சாரம் என்பது இதயத்திலும் உணர்விலும் இருக்கிறது; ஆடையின் நெக்லைனில் இல்லை” என்று அவர் குறிப்பிட்டார்.
மேலும், “மற்றொரு பெண் என்ன ஆடை அணிய வேண்டும் என்பதில் இவ்வளவு அக்கறை காட்டுவதை நிறுத்திவிட்டு, தயவுசெய்து சிந்தனையில் முன்னேறுங்கள். ராக்கி கட்டுவது நான்; இதில் எனக்கு எந்தப் பிரச்சினையும் இல்லாதபோது, உங்களுக்கு ஏன் பிரச்சினை?” என்றும் கிருத்தி சனோன் கேள்வி எழுப்பினார். பண்டிகைகளின் சாராம்சம் உடைகளில் இல்லை என்றும், பாரம்பரியத்திற்கு நாம் அளிக்கும் அர்த்தத்திலும் அதனுடன் தொடர்புடைய அன்பான உணர்விலும் உள்ளது என்றும் அவர் தனது பதிவில் தெரிவித்தார்.
இந்த விவகாரம் பெரும் சர்ச்சையாக மாறியதைத் தொடர்ந்து, GIVA நிறுவனம் பாரம்பரியத்தின் மீது தங்களுக்கு மிகுந்த மரியாதை இருப்பதாகக் கூறி, சர்ச்சைக்குரிய அந்த விளம்பரத்தை சமூக வலைத்தளங்களில் இருந்து அதிகாரப்பூர்வமாக வாபஸ் பெற்றது.
இதற்கிடையே, கங்கனா ரணாவத்தின் கருத்துக்கு காங்கிரஸ் உள்ளிட்ட எதிர்க்கட்சிகளைச் சேர்ந்த சில அரசியல் பிரமுகர்களும் எதிர்ப்பு தெரிவித்துள்ளனர். கங்கனா ரணாவத் தானே தனது திரைப்படங்களில் பல்வேறு நவீன ஆடைகளை அணிந்திருப்பதாகவும், அதனால் மற்ற பெண்களின் ஆடைத் தேர்வு குறித்து அவருக்கு அறிவுரை வழங்கும் உரிமை இல்லை என்றும் அவர்கள் விமர்சித்துள்ளனர். பெண்களின் ஆடைத் தேர்வை விமர்சிப்பது பிற்போக்குத்தனமான அணுகுமுறை என்றும் சமூக வலைத்தளங்களில் விவாதங்கள் நடைபெற்று வருகின்றன.
இந்த விளம்பரத்தில் கிருத்தி சனோனின் ஆடை மட்டுமின்றி, மற்றொரு காட்சியும் சர்ச்சையை ஏற்படுத்தியது. விளம்பரத்தின் ஒரு பகுதியில் அவரது செல்லப்பிராணி நாய் குரைக்கும் காட்சியும், அதற்கு கிருத்தி சனோன் அன்புடன் ராக்கி கட்டுவது போன்ற காட்சியும் இடம்பெற்றிருந்தது. இதற்கு ஒரு தரப்பினர், “பாரம்பரியத்தில் எப்போது இருந்து நாய்க்கு ராக்கி கட்டத் தொடங்கினார்கள்?” என்று கேள்வி எழுப்பி, இதுவும் விளம்பர யுக்திதான் என விமர்சித்தனர்.
கங்கனா, கிருத்தி சனோனின் ஆடை குறித்து கடுமையாக விமர்சித்ததைத் தொடர்ந்து, நெட்டிசன்களும் கங்கனாவின் பழைய புகைப்படங்களைத் தேடி எடுத்து சமூக வலைத்தளங்களில் பகிரத் தொடங்கினர். சில ஆண்டுகளுக்கு முன்பு தனது அலுவலகத் திறப்பு விழாவின்போது கங்கனா அணிந்திருந்த கவர்ச்சியான ஆடை தொடர்பான புகைப்படங்களையும் அவர்கள் தற்போது வைரலாக்கி வருகின்றனர்.
அப்போது அந்த ஆடை குறித்து எழுந்த விமர்சனங்களுக்கு பதிலளித்த கங்கனா, “ஆடைகளைத் தாண்டி நமது கலாச்சாரத்தை மதிக்க வேண்டும்; இதுதான் சனாதன தர்ம கலாச்சாரம்” என்று பதிவிட்டிருந்ததாக நெட்டிசன்கள் சுட்டிக்காட்டுகின்றனர்.
இதனை தற்போது கங்கனாவின் விமர்சனத்துடன் ஒப்பிட்டு, “அன்று நீங்கள் அணிந்தால் அது சனாதன தர்மம்; இன்று கிருத்தி சனோன் அணிந்தால் அது பிகினியா?” என்று கேள்வி எழுப்பி, கங்கனா இரட்டை நிலைப்பாட்டை கடைப்பிடிப்பதாக சிலர் விமர்சித்து வருகின்றனர்.
இதனால், இந்த விவகாரம் பெண்களின் ஆடைத் தேர்வு மற்றும் கலாச்சாரம் குறித்த மிகப்பெரிய சமூக விவாதமாக மாறியுள்ளது. குறிப்பாக, பண்டிகை காலங்களில் ஆண்கள் வேட்டி அணிந்து, மேலாடையின்றி அல்லது குறைந்த அளவிலான ஆடைகளுடன் பொதுவெளியில் இருப்பதை கலாச்சார சீரழிவாக பலரும் பார்ப்பதில்லை என்றும், பெண்களின் ஆடை மட்டுமே ஏன் தொடர்ந்து கலாச்சாரத்துடன் இணைக்கப்படுகிறது என்றும் பெண் ஆர்வலர்கள் சிலர் கேள்வி எழுப்பியுள்ளனர்.
“பெண்களின் உடல் மட்டும்தான் எப்போதும் இந்த நாட்டின் கலாச்சாரத்தையும் மதத்தையும் சுமக்கும் பாதுகாவலனா?” என்ற கேள்வியும் இந்த விளம்பர சர்ச்சை மூலம் தேசிய அளவில் விவாதப் பொருளாகியுள்ளது.
இதனிடையே, GIVA நிறுவனம் விளம்பரத்தை வாபஸ் பெற்றதுடன், தனது இன்ஸ்டாகிராம் பக்கத்தில் பொதுமக்கள் கருத்து தெரிவிக்கும் ‘கமெண்ட்’ வசதியையும் முடக்கியுள்ளது. இதனை கவனித்த சில ஊடகங்கள், விளம்பரத்தில் நடித்தது கிருத்தி சனோனாக இருந்தாலும், நெட்டிசன்களின் எதிர்ப்பால் கங்கனாவின் விமர்சனத்திற்கே இறுதியில் வெற்றி கிடைத்துள்ளதாகக் கூறி நகைச்சுவையாக விமர்சித்து வருகின்றன.
இவ்வாறு, ரக்ஷா பந்தன் விளம்பரத்தில் தொடங்கிய ஆடை சர்ச்சை, தற்போது கலாச்சாரம், பெண்களின் ஆடை சுதந்திரம், தனிநபர் உரிமை மற்றும் அரசியல் விமர்சனம் என பல்வேறு தளங்களில் விவாதத்தை ஏற்படுத்தியுள்ளது.