தமிழ்நாட்டில் 2026 ஆகஸ்ட் மாதத்திற்கான ஜிஎஸ்டி எனப்படும் சரக்கு மற்றும் சேவை வரி வசூல், கடந்த ஆண்டின் இதே காலகட்டத்துடன் ஒப்பிடும்போது 1.4 சதவீதம் சரிவடைந்துள்ளது. கடந்த 2025 ஆகஸ்ட் மாதத்தில் ரூ.10,329 கோடியாக இருந்த தமிழ்நாட்டின் ஜிஎஸ்டி வசூல், 2026 ஆகஸ்ட் மாதத்தில் ரூ.10,189 கோடியாகக் குறைந்துள்ளது. இதன் மூலம், தமிழ்நாட்டின் ஜிஎஸ்டி வசூல் ரூ.140 கோடி அளவுக்கு குறைந்துள்ளது.
தமிழ்நாட்டில் ஜிஎஸ்டி வசூல் சரிவைச் சந்தித்துள்ள அதே நேரத்தில், தேசிய அளவில் ஜிஎஸ்டி வருவாய் அதிகரித்துள்ளது. 2026 ஆகஸ்ட் மாதத்தில் இந்தியாவின் மொத்த ஜிஎஸ்டி வருவாய் சுமார் ரூ.1.99 லட்சம் கோடியை எட்டியுள்ளது. இது கடந்த ஆண்டின் இதே காலகட்டத்தைவிட 14.8 சதவீதம் அதிகமாகும்.
நாடு முழுவதும் ஜிஎஸ்டி வசூல் அதிகரித்துள்ள நிலையில், நாட்டின் முக்கிய உற்பத்தி மற்றும் சேவை மையங்களில் ஒன்றான தமிழ்நாட்டில் மட்டும் வசூல் சரிவைச் சந்தித்திருப்பது தற்போது கவனம் பெற்றுள்ளது.
இந்தியாவின் முன்னணி பொருளாதார மாநிலங்களான மகாராஷ்டிரா, கர்நாடகா, குஜராத் மற்றும் உத்தரப் பிரதேசம் ஆகிய மாநிலங்களிலும் ஆகஸ்ட் மாத ஜிஎஸ்டி வசூல் வளர்ச்சியைப் பதிவு செய்துள்ளது. மகாராஷ்டிராவில் ரூ.28,779 கோடி ஜிஎஸ்டி வசூலிக்கப்பட்டு, கடந்த ஆண்டை விட 8 சதவீதம் உயர்ந்துள்ளது.
கர்நாடகாவில் ரூ.14,148 கோடி வசூலாகி 13 சதவீதமும், குஜராத்தில் ரூ.12,047 கோடி வசூலாகி 15 சதவீதமும், உத்தரப் பிரதேசத்தில் ரூ.9,092 கோடி வசூலாகி 19 சதவீதமும் வளர்ச்சி பதிவாகியுள்ளது. அண்டை மாநிலமான தெலங்கானாவிலும் ஜிஎஸ்டி வசூல் 16 சதவீதம் அதிகரித்துள்ளது.
முக்கிய மாநிலங்கள் அனைத்தும் ஜிஎஸ்டி வசூலில் வளர்ச்சியைப் பதிவு செய்துள்ள நிலையில், தமிழ்நாடு மட்டும் சரிவைச் சந்தித்திருப்பது பொருளாதார மற்றும் அரசியல் வட்டாரங்களில் பல்வேறு கேள்விகளை எழுப்பியுள்ளது. மாநிலத்தின் சொந்த வரி வருவாயில் ஜிஎஸ்டி முக்கியப் பங்கு வகிக்கும் நிலையில், இந்த சரிவு தொடர்ந்து நீடித்தால் மாநிலத்தின் நிதி நிலைமையில் தாக்கம் ஏற்படக்கூடும் எனவும் கருத்துகள் முன்வைக்கப்பட்டுள்ளன.
இதுதொடர்பாக முன்னாள் தொழில்துறை அமைச்சர் டி.ஆர்.பி. ராஜா தமிழக அரசை விமர்சித்து கருத்து தெரிவித்துள்ளார். நம்மோடு போட்டியிடும் முக்கிய மாநிலங்கள் அனைத்தும் வலுவான வளர்ச்சியைப் பதிவு செய்யும்போது, தமிழ்நாட்டின் ஜிஎஸ்டி வசூல் மட்டும் ஒரு சதவீதத்திற்கும் அதிகமாகக் குறைந்திருப்பதை சாதாரணமாகக் கடந்து செல்ல முடியாது என்று அவர் தெரிவித்துள்ளார்.
மேலும், இந்த நிலை தொடர்ந்தால் பற்றாக்குறையாகும் பணத்தை தமிழக அரசு எங்கிருந்து கொண்டு வரப்போகிறது என்றும் டி.ஆர்.பி. ராஜா கேள்வி எழுப்பியுள்ளார். இதற்காக அரசு மேலும் கடன் வாங்கப் போகிறதா அல்லது வேறு வரிகளை உயர்த்தப் போகிறதா என்றும் அவர் கேள்வி எழுப்பியுள்ளார். ஜிஎஸ்டி வசூலில் ஏற்பட்டுள்ள சரிவு கட்டுப்படுத்த முடியாத சரிவாக மாறுவதற்கு முன்பாகவே அரசு விழித்துக்கொள்ள வேண்டும் என்றும் அவர் வலியுறுத்தியுள்ளார்.
இதேபோல், முன்னாள் நிதியமைச்சர் தங்கம் தென்னரசுவும் தமிழ்நாட்டின் ஜிஎஸ்டி வசூல் சரிவு குறித்து கேள்வி எழுப்பியுள்ளார். ஜிஎஸ்டி வரி வசூலில் ஏற்பட்டுள்ள சரிவு, தமிழ்நாட்டின் நிதி நிர்வாகத்திற்கு முக்கியமான எச்சரிக்கை என்றும், இந்த சரிவுக்கான காரணம் என்ன என்பதை அரசு விளக்க வேண்டும் என்றும் அவர் தெரிவித்துள்ளார்.
மேலும், ஜிஎஸ்டி வசூல் சரிவைச் சரிசெய்ய தமிழக அரசு எடுக்கப்போகும் நடவடிக்கை என்ன என்றும், அடுத்தடுத்த மாதங்களில் வருவாய் வளர்ச்சியை உறுதி செய்ய அரசு வைத்திருக்கும் திட்டம் என்ன என்றும் தங்கம் தென்னரசு கேள்வி எழுப்பியுள்ளார். இதுகுறித்து தமிழக அரசு தெளிவான பதிலையும் செயல்திட்டத்தையும் அளிக்க வேண்டும் என்றும் அவர் வலியுறுத்தியுள்ளார்.
இதனிடையே, இந்தியாவின் மொத்த ஜிஎஸ்டி வசூல் அதிகரித்ததற்கான காரணங்கள் குறித்தும் பொருளாதார நிபுணர்கள் ஆய்வு செய்து வருகின்றனர். மத்திய நிதி அமைச்சகத்தின் தரவுகளின்படி, உள்நாட்டுப் பரிவர்த்தனைகள் மூலம் கிடைக்கும் ஜிஎஸ்டி வசூல் சுமார் 9.3 சதவீதம் வளர்ந்துள்ள நிலையில், வெளிநாட்டு இறக்குமதிகள் மீதான ஜிஎஸ்டி வசூல் சுமார் 29 சதவீதம் அதிகரித்துள்ளதாகக் கூறப்படுகிறது. இதனால், இந்தியாவின் ஒட்டுமொத்த ஜிஎஸ்டி வளர்ச்சியில் இறக்குமதி சார்ந்த வரி வசூலும் முக்கியப் பங்கு வகித்துள்ளதாக பொருளாதார நிபுணர்கள் சுட்டிக்காட்டுகின்றனர்.
இந்த ஆகஸ்ட் மாதத்தில் ஜிஎஸ்டி வசூலைத் தொடர்ந்து, வணிகர்களுக்கு வழங்கப்படும் ரீஃபண்ட் எனப்படும் வரித் திருப்பித் தொகையும் கவனம் பெற்றுள்ளது. 2026 ஆகஸ்ட் மாதத்தில் வழங்கப்பட்ட ஒட்டுமொத்த ஜிஎஸ்டி ரீஃபண்ட் தொகை, கடந்த ஆண்டின் இதே காலகட்டத்துடன் ஒப்பிடும்போது சுமார் 68 சதவீதம் அதிகரித்துள்ளதாக கூறப்படுகிறது. உள்நாட்டு பரிவர்த்தனைகளுக்கான ரீஃபண்ட் மட்டும் சுமார் 72.6 சதவீதம் அதிகரித்துள்ளதாகவும் தகவல்கள் தெரிவிக்கின்றன.
வரி விதிப்பு முறையில் உள்ள சில முரண்பாடுகள், குறிப்பாக ‘Inverted Duty Structure’ காரணமாக வணிகர்களுக்கு அதிகளவில் வரித் தொகை திருப்பி வழங்க வேண்டிய நிலை ஏற்பட்டிருக்கலாம் என்றும் சில வரி ஆய்வாளர்கள் கருத்து தெரிவித்துள்ளனர். இதுவும் சில மாநிலங்களின் நிகர வரி வருவாயில் தாக்கத்தை ஏற்படுத்தியிருக்கலாம் என்ற கருத்தும் முன்வைக்கப்படுகிறது.
இதனிடையே, தமிழ்நாட்டின் வருவாய் நிலையை மேம்படுத்தவும், மாநிலத்தின் நிதித் தற்சார்பை வலுப்படுத்தவும் அரசு ஏற்கனவே பல்வேறு நடவடிக்கைகளை மேற்கொண்டு வருகிறது. இந்தியத் திட்டக்குழுவின் முன்னாள் துணைத் தலைவர் மாண்டேகு சிங் அலுவாலியா தலைமையில் ‘வருவாய் மேம்பாட்டுக் குழு’ அமைத்து, மாநிலத்தின் வருவாய் வாய்ப்புகள் குறித்து தமிழக அரசு ஆலோசனைகளைப் பெற்று வருவது குறிப்பிடத்தக்கது.
மேலும், மாநிலத்தின் வரி வருவாய், செலவினங்கள் மற்றும் நிதி நிலைத்தன்மையை மேம்படுத்துவதற்கான வழிமுறைகள் குறித்தும் ஆலோசனைகள் நடைபெற்று வருவதாக கூறப்படுகிறது. இதனால், தற்போதைய ஜிஎஸ்டி வசூல் சரிவைத் தாண்டி, எதிர்காலத்தில் மாநிலத்தின் சொந்த வரி வருவாயை அதிகரிப்பதற்கான நடவடிக்கைகளும் முக்கியத்துவம் பெற்றுள்ளன.
இதற்கிடையே, ஆகஸ்ட் மாத ஜிஎஸ்டி வசூல் தரவுகளில் அசாம் மாநிலத்தின் வளர்ச்சியும் கவனம் பெற்றுள்ளது. அசாமில் ஜிஎஸ்டி வசூல் சுமார் 162 சதவீதம் அதிகரித்துள்ளதாக தகவல்கள் தெரிவிக்கின்றன. எதிர்பாராத அளவில் பதிவான இந்த உயர்வும் பொருளாதார வட்டாரங்களில் கவனம் பெற்றுள்ளது.
ஒருபுறம் இந்தியாவின் மொத்த ஜிஎஸ்டி வசூல் அதிகரித்துள்ள நிலையில், மறுபுறம் தமிழ்நாட்டின் ஜிஎஸ்டி வசூல் ரூ.140 கோடி அளவுக்கு குறைந்திருப்பது மாநிலத்தின் வருவாய் நிர்வாகம் குறித்த கேள்விகளை எழுப்பியுள்ளது. இந்த சரிவு தற்காலிகமானதா அல்லது அடுத்தடுத்த மாதங்களிலும் தொடருமா என்பதும் முக்கியத்துவம் பெற்றுள்ளது.
தமிழ்நாட்டின் ஜிஎஸ்டி வசூல் சரிவுக்கான காரணம் என்ன, இதனைச் சரிசெய்ய தமிழக அரசு எடுக்கப்போகும் நடவடிக்கைகள் என்ன, வரும் மாதங்களில் மாநிலத்தின் சொந்த வரி வருவாய் எந்த அளவுக்கு அதிகரிக்கும் என்பதற்கான பதில்கள் அடுத்தடுத்த மாதங்களின் வருவாய் புள்ளிவிவரங்கள் வெளியாகும்போது தெரியவரும். தற்போதைய நிலையில், தமிழ்நாட்டின் ஜிஎஸ்டி வசூல் சரிவு அரசியல் மற்றும் பொருளாதார ரீதியாக தொடர்ந்து விவாதப் பொருளாகியுள்ளது.