தேனி மாவட்டம், பண்ணைப்புரம் பேரூராட்சிக்கு உட்பட்ட கரியணம்பட்டி கிராமத்தில் உள்ள அரசு தொடக்கப்பள்ளி வளாகத்தில், தேசியக் கொடிக் கம்பத்தில் மதுபாட்டில் கட்டித் தொங்கவிடப்பட்ட சம்பவம் பெரும் பரபரப்பையும் அதிர்ச்சியையும் ஏற்படுத்தியுள்ளது.
தீபாவளிப் பண்டிகையை முன்னிட்டு தொடர் விடுமுறை அளிக்கப்பட்டிருந்ததால் பள்ளி மூடப்பட்டிருந்தது. இதனைப் பயன்படுத்திக் கொண்ட மர்ம நபர்கள் சிலர், நள்ளிரவில் பள்ளியின் பாதுகாப்பு வேலியைத் தாண்டி வளாகத்திற்குள் அத்துமீறி நுழைந்துள்ளனர். பின்னர், பள்ளி வளாகத்தில் அமர்ந்து மது அருந்திய அவர்கள், காலி மதுபாட்டில் ஒன்றை தேசியக் கொடியேற்றும் கொடிக்கம்பத்தின் கயிற்றில் கட்டித் தொங்கவிட்டுச் சென்றுள்ளனர்.
மேலும், தேசியக் கொடியை ஏற்றுவது போன்று கயிற்றை இழுத்து, மதுபாட்டிலை கொடிக்கம்பத்தின் உச்சிக்கே கொண்டு சென்று கட்டியுள்ளனர். காலையில் பள்ளிக்கு வந்த ஆசிரியர்களும், இதைக் கண்ட ஊர்மக்களும் அதிர்ச்சியடைந்தனர்.
தேசியக் கொடி ஏற்றப்படும் இடத்தில் மதுபாட்டிலைக் கட்டித் தொங்கவிட்ட சம்பவம் அப்பகுதி மக்களிடையே கடும் அதிருப்தியையும் கண்டனத்தையும் ஏற்படுத்தியுள்ளது. இதையடுத்து, உடனடியாகக் காவல் துறைக்குத் தகவல் தெரிவிக்கப்பட்டது.
தகவலறிந்து சம்பவ இடத்திற்கு விரைந்து வந்த கோம்பை காவல் நிலையப் போலீசார், கொடிக்கம்பத்தில் தொங்கவிடப்பட்டிருந்த மதுபாட்டிலை அகற்றினர். தொடர்ந்து, தேசியக் கொடியையும் தேசியச் சின்னங்களையும் அவமதிக்கும் வகையில் செயல்பட்ட மர்ம நபர்களைக் கண்டறிய வழக்குப் பதிவு செய்து விசாரணையைத் தீவிரப்படுத்தியுள்ளனர்.
மேலும், கரியணம்பட்டி மற்றும் பண்ணைப்புரம் பகுதிகளில் உள்ள முக்கியச் சாலைகள், கடைகள் உள்ளிட்ட இடங்களில் பொருத்தப்பட்டுள்ள சிசிடிவி கேமரா காட்சிகளை போலீசார் ஆய்வு செய்து வருகின்றனர். தீபாவளி பண்டிகை இரவு மற்றும் நள்ளிரவு நேரங்களில் பள்ளி வளாகத்தைச் சுற்றியுள்ள பகுதிகளில் சந்தேகத்திற்கிடமாகச் சென்ற நபர்களைக் கண்டறிந்து, அவர்களைப் பிடிக்கத் தீவிர தேடுதல் வேட்டையில் ஈடுபட்டுள்ளனர்.
இதற்கிடையே, சம்பவம் நடைபெற்ற கரியணம்பட்டி அரசு தொடக்கப்பள்ளி, 50 ஆண்டுகளுக்கும் மேலாக அப்பகுதியைச் சேர்ந்த ஏழை, எளிய மாணவ, மாணவியருக்குக் கல்வி வழங்கி வரும் பாரம்பரியமிக்க கல்வி நிறுவனமாகும். இத்தகைய சிறப்புமிக்க பள்ளி வளாகத்தில் சமூக விரோதச் செயல்கள் அரங்கேறியிருப்பது கிராம மக்களிடையே பெரும் கவலையை ஏற்படுத்தியுள்ளது.
குறிப்பாக, தமிழக அரசின் பெருந்தலைவர் காமராசர் காலை உணவுத் திட்டப் பதாகை மற்றும் பள்ளியின் அடையாளச் சின்னம் அமைந்துள்ள பகுதிக்கு மிக அருகிலேயே தேசியக் கொடிக்கம்பம் உள்ளது. குழந்தைகள் கல்வி கற்கும், உணவு அருந்தும் பள்ளி வளாகத்தில் இத்தகைய அத்துமீறல் நடைபெற்றிருப்பது பெற்றோர்கள் மற்றும் பொதுமக்களிடையே கடும் அதிருப்தியை ஏற்படுத்தியுள்ளது.
இந்தச் சம்பவம் சமூக வலைதளங்களில் பரவியதைத் தொடர்ந்து, இது வெறும் மதுபோதையில் செய்யப்பட்ட அத்துமீறல் மட்டுமல்ல; நாட்டின் இறையாண்மையையும் தேசியக் கொடியின் மாண்பையும் வேண்டுமென்றே அவமதிக்கும் செயலாக இருக்கலாம் எனப் பலரும் கண்டனம் தெரிவித்து வருகின்றனர். சம்பந்தப்பட்ட நபர்களைக் கண்டறிந்து, அவர்கள் மீது தேசியப் பாதுகாப்புச் சட்டத்தின் (NSA) கீழ் நடவடிக்கை எடுக்க வேண்டும் என்றும் பொதுமக்களில் சிலர் வலியுறுத்தி வருகின்றனர்.
பள்ளி வளாகத்திற்குள் அத்துமீறி நுழைந்து, தேசியக் கொடிக்கம்பத்தில் மதுபாட்டிலைக் கட்டித் தொங்கவிட்டுச் சென்ற மர்ம நபர்கள் யார்? எதற்காக இந்தச் செயலில் ஈடுபட்டனர்? என்பது குறித்து கோம்பை காவல் நிலையப் போலீசார் தீவிர விசாரணை மேற்கொண்டு வருகின்றனர். குற்றத்தில் ஈடுபட்டவர்களைக் கண்டறிந்து உரிய நடவடிக்கை எடுக்க வேண்டும் என்பதே அப்பகுதி மக்களின் எதிர்பார்ப்பாக உள்ளது.