தமிழக அரசியல் களம் 2026 சட்டமன்றத் தேர்தல் முடிவுகளுக்குப் பிறகு அதிரடியான பல திருப்பங்களைக் கண்டு வருகிறது. அந்த வகையில், இந்திய கம்யூனிஸ்ட் கட்சியின்தேசியக் குழு உறுப்பினரும், அக்கட்சியின் முன்னாள் மாநிலத் துணைச் செயலாளருமான மூத்த இடதுசாரித் தலைவர் சி. மகேந்திரன், திரையுலகில் இருந்து அரசியலுக்கு வந்து ஆட்சியைப் பிடித்துள்ள நடிகர் விஜய்யின் தவெக-வில் இணைந்துள்ளார்.
நெருக்கடி நிலை காலம் தொட்டு பல தசாப்தங்களாக இடதுசாரி இயக்கத்தில் தீவிரமாகப் பணியாற்றியவர் சி. மகேந்திரன். சிறந்த பேச்சாளராகவும், இடதுசாரி சிந்தனையாளராகவும், ஆர். நல்லகண்ணு போன்ற மூத்த தலைவர்களின் வழிகாட்டுதலில் வளர்ந்தவராகவும் அறியப்படும் இவரது இந்த முடிவு கம்யூனிஸ்ட் வட்டாரங்களுக்கு அதிர்ச்சியை ஏற்படுத்தியுள்ளது.
தவெக கட்சித் தொடங்கி ஆட்சிக் கட்டிலில் அமர்ந்திருக்கும் நிலையில், கொள்கை ரீதியாகவும் நிர்வாக ரீதியாகவும் கட்சியை வலுப்படுத்த பல்வேறு கட்சிகளின் மூத்த தலைவர்களை விஜய் தொடர்ந்து ஈர்த்து வருகிறார். அதன் ஒரு பகுதியாகவே, தவெக-வின் இடதுசாரி மற்றும் சமூக நீதிப் பார்வையை இன்னும் ஆழப்படுத்த சி. மகேந்திரன் போன்ற பழுத்த அரசியல்வாதியின் வருகை பயன்படுத்தப்படலாம் என்று கருதப்படுகிறது.
அதிமுகவில் இருந்து முன்னணி முன்னாள் அமைச்சர்கள், எம்.எல்.ஏ-க்கள் தவெக-வை நோக்கி நகர்ந்து வரும் வேளையில், இப்போது பாரம்பரியமிக்க இடதுசாரி இயக்கத்தின் மூத்த தலைவரும் தவெக-வில் இணைந்திருப்பது அக்கட்சியின் வளர்ந்து வரும் அரசியல் செல்வாக்கைக் காட்டுகிறது.
மாநில சுயாட்சி மற்றும் சமூக நீதி போன்ற கோட்பாடுகளைத் தவெக முன்னிறுத்தி வரும் வேளையில், சி. மகேந்திரனின் அரசியல் அனுபவமும், கொள்கை ரீதியான அணுகுமுறையும் தவெக-விற்குப் புதிய பலத்தைச் சேர்க்கும் என அரசியல் விமர்சகர்கள் கருதுகின்றனர். திராவிட மற்றும் இடதுசாரி இயக்கங்களின் மூத்த முகங்கள் தவெக-விற்கு மாறுவது வரும் இடைத்தேர்தல்களிலும், தமிழகத்தின் எதிர்கால அரசியல் கூட்டணிகளிலும் பெரும் தாக்கத்தை ஏற்படுத்தும் என எதிர்பார்க்கப்படுகிறது.