தமிழக அரசியலில் பெரும் பரபரப்பை ஏற்படுத்தியுள்ள ₹30 கோடி குதிரை பேரப் புகார் தொடர்பாக, அதிமுக நிர்வாகியும் மதுரை மாநகராட்சியின் முன்னாள் துணை மேயருமான பி.எம். மன்னனை மதுரை மத்திய குற்றப்பிரிவு (CCB) போலீசார் கைது செய்துள்ளனர்.
தமிழக வெற்றிக் கழகத்தின் (தவெக) மதுரை மத்திய தொகுதி சட்டமன்ற உறுப்பினர் மாதர் பதுருதீன் என்ற முஸ்தபாவிடம், ஆளுங்கட்சியான தவெக அரசுக்கு எதிராக நம்பிக்கை வாக்கெடுப்பில் வாக்களிக்கக் கோடிக்கணக்கில் பணம் தருவதாகப் பேரம் பேசப்பட்டதாக எழுந்த புகாரின் அடிப்படையில் இந்த நடவடிக்கை எடுக்கப்பட்டுள்ளது.
தவெக ஆட்சியைக் கவிழ்க்கும் நோக்கில், நம்பிக்கை வாக்கெடுப்பின்போது அரசுக்கு எதிராக வாக்களிக்க வேண்டும் என்று கூறி, முஸ்தபாவிடம் மொத்தம் ₹30 கோடி தருவதாக பி.எம். மன்னன் பேரம் பேசியதாகக் குற்றம் சாட்டப்பட்டுள்ளது.
இதில் முதற்கட்டமாக ₹15 கோடியும், வாக்கெடுப்பில் அரசுக்கு எதிராக வாக்களித்த பிறகு மீதமுள்ள ₹15 கோடியும் வழங்கப்படும் என்று உறுதியளிக்கப்பட்டதாகப் புகாரில் தெரிவிக்கப்பட்டுள்ளது. இந்தப் புகாரை முஸ்தபாவின் உதவியாளர் கனிராஜா மூலம் காவல்துறையிடம் அளித்ததாகக் கூறப்படுகிறது.
இதையடுத்து, மதுரை மத்திய குற்றப்பிரிவு போலீசார் ஊழல் தடுப்புச் சட்டம் (Prevention of Corruption Act) மற்றும் குற்றச் சதி தொடர்பான பாரதிய நியாய சன்ஹிதா (BNS) பிரிவு 61(2) ஆகியவற்றின் கீழ் வழக்குப்பதிவு செய்து விசாரணையைத் தொடங்கினர்.
நவம்பர் 6ஆம் தேதி வெள்ளிக்கிழமை அதிகாலையில், மதுரை ஆரப்பாளையம் பகுதியில் உள்ள பி.எம். மன்னனின் இல்லத்திற்குச் சென்ற போலீசார் அவரை விசாரணைக்காக அழைத்துச் சென்றனர். சுமார் நான்கு மணி நேரத்திற்கும் மேலாக நடைபெற்ற தீவிர விசாரணைக்குப் பிறகு அவர் அதிகாரப்பூர்வமாகக் கைது செய்யப்பட்டார்.
இந்தப் புகாரில் முக்கிய ஆதாரங்களாகத் தொலைபேசி உரையாடல்கள் மற்றும் ஆடியோ பதிவுகள் சமர்ப்பிக்கப்பட்டுள்ளதாகக் கூறப்படுகிறது. முஸ்தபா மற்றும் அவரது உதவியாளர் கனிராஜா ஆகியோர், மன்னன் தரப்பிலிருந்து தங்களை அணுகியபோதே உஷாராகி, பேரம் பேசப்பட்டதாகக் கூறப்படும் உரையாடல்கள் மற்றும் சந்திப்புகள் தொடர்பான விவரங்களை ஆடியோ, வீடியோ ஆதாரங்களாக டிஜிட்டல் முறையில் பதிவு செய்ததாகத் தகவல்கள் வெளியாகியுள்ளன. இந்த ஆதாரங்களே மன்னன் கைது செய்யப்படுவதற்கு முக்கியக் காரணமாக அமைந்ததாக அரசியல் வட்டாரங்களில் பேசப்படுகிறது.
மேலும், சமர்ப்பிக்கப்பட்டுள்ள ஆடியோ பதிவுகளின் உண்மைத்தன்மை, அதில் இடம்பெற்றுள்ள குரல்கள் யாருடையவை, உரையாடல்களில் வேறு யாருக்கெல்லாம் தொடர்பு உள்ளது, இந்தப் பேரத்தின் பின்னணியில் வேறு அரசியல் நபர்கள் செயல்பட்டார்களா என்பன குறித்து போலீசார் தீவிரமாக விசாரித்து வருகின்றனர். குறிப்பாக, முஸ்தபாவின் உதவியாளர் கனிராஜாவிடமும் விசாரணை நடத்தப்பட்டு வருகிறது. இந்த வழக்கில் டிஜிட்டல் ஆதாரங்கள் மற்றும் பணப் பரிவர்த்தனைகள் தொடர்பான விவரங்கள் முக்கியத்துவம் பெற்றுள்ளன.
கைது செய்யப்பட்டுள்ள பி.எம். மன்னன் மதுரையின் முக்கிய அரசியல் பிரமுகர்களில் ஒருவராவார். இவர் 2006 முதல் 2011ஆம் ஆண்டு வரையிலான காலகட்டத்தில் திமுக சார்பில் மதுரை மாநகராட்சியின் துணை மேயராகப் பதவி வகித்தவர். முன்னாள் மத்திய அமைச்சர் மு.க. அழகிரியின் மிக நெருங்கிய ஆதரவாளராகவும், அவரது வலது கரமாகவும் அரசியல் வட்டாரத்தில் அறியப்பட்டவர். அழகிரி திமுகவில் செல்வாக்குடன் இருந்த காலகட்டத்தில் மதுரையில் முக்கிய அரசியல் பொறுப்புகளை வகித்த மன்னன், அழகிரி அரசியலில் இருந்து ஒதுங்கிய பின்னர் சில காலம் அமைதியாக இருந்தார். இதையடுத்து, 2026 சட்டமன்றத் தேர்தலுக்கு முன்னதாக அதிமுகவில் இணைந்தார் என்பது குறிப்பிடத்தக்கது.
பி.எம். மன்னன் கைது செய்யப்பட்டதற்கு அதிமுக பொதுச்செயலாளர் எடப்பாடி பழனிசாமி கடும் கண்டனம் தெரிவித்துள்ளார். தவெக அரசு அரசியல் பழிவாங்கும் நோக்கில் காவல்துறையைப் பயன்படுத்தி பொய் வழக்குப் பதிவு செய்துள்ளதாக அவர் குற்றம் சாட்டியுள்ளார். மன்னன் மீதான கைது நடவடிக்கையை முழுக்க முழுக்க தவெக அரசின் ஏவல்துறையால் மேற்கொள்ளப்பட்ட நடவடிக்கை என்றும் விமர்சித்துள்ளார்.
மேலும், தவெக தலைவர் விஜய்யின் பனையூர் அலுவலகத்தைச் சுட்டிக்காட்டி, “தலைமைச் செயலகமா அல்லது பனையூரின் கிளை அலுவலகமா?” என்று கேள்வி எழுப்பி எடப்பாடி பழனிசாமி கடுமையாகச் சாடியுள்ளார். தற்போதைய தவெக ஆட்சியில் கீழ்மாடியில் அதிமுக சட்டமன்ற உறுப்பினர்களை ராஜினாமா செய்ய வைப்பதும், மேல்மாடியில் அவர்களைத் தவெகவில் இணைப்பதும் என ‘ரிவர்ஸ் குதிரை பேரம்’ நடைபெறுவதாகவும் அவர் விமர்சித்துள்ளார். அவரது இந்தக் குற்றச்சாட்டு அரசியல் வட்டாரத்தில் மேலும் விவாதத்தை ஏற்படுத்தியுள்ளது.
மறுபுறம், இந்தக் குதிரை பேரப் புகார் தமிழக அரசியலில் புதிய பதற்றத்தை உருவாக்கியுள்ளது. 2026 சட்டமன்றத் தேர்தலில் வெற்றி பெற்று விஜய் தலைமையிலான தவெக ஆட்சியைப் பிடித்துள்ள நிலையில், எதிர்க்கட்சிகள் ஆளுங்கட்சியின் சட்டமன்ற உறுப்பினர்களைத் தங்கள் பக்கம் இழுத்து ஆட்சியைக் கவிழ்க்க முயற்சி செய்கின்றனவா என்ற கேள்வியும் எழுந்துள்ளது.
ஆட்சிக்கு எதிராக நம்பிக்கை வாக்கெடுப்பு நடைபெறும் சூழல் உருவானால், சட்டமன்ற உறுப்பினர்களின் ஆதரவைப் பெறுவதற்காகப் பணப் பேரம் பேசப்பட்டதா என்ற கோணத்திலும் இந்த விவகாரம் கவனம் பெற்றுள்ளது.
தங்களை அணுகியதாகக் கூறப்படும் பேரம் தொடர்பான தகவல்களை முஸ்தபா தரப்பினர் முன்கூட்டியே பதிவு செய்து ஆதாரங்களுடன் காவல்துறையிடம் அளித்ததாகக் கூறப்படும் நிலையில், தவெக அரசு உடனடியாகக் காவல்துறை நடவடிக்கையில் இறங்கியிருப்பது அரசியல் வட்டாரத்தில் பல்வேறு விவாதங்களை ஏற்படுத்தியுள்ளது. இருப்பினும், எடப்பாடி பழனிசாமி இந்த வழக்கை அரசியல் பழிவாங்கும் நடவடிக்கை என்று குற்றம் சாட்டியுள்ளதால், ஆளுங்கட்சி மற்றும் எதிர்க்கட்சி இடையே இந்த விவகாரம் நேரடி மோதலாக மாறியுள்ளது.
தற்போது கைது செய்யப்பட்டுள்ள பி.எம். மன்னனை நீதிமன்றத்தில் ஆஜர்படுத்தி, அடுத்தகட்ட சட்ட நடவடிக்கைகளை மேற்கொள்ள மதுரை மத்திய குற்றப்பிரிவு போலீசார் தயாராகி வருகின்றனர். இந்தப் பேரத்தின் பின்னணியில் வேறு யாருக்கெல்லாம் தொடர்பு உள்ளது, உண்மையில் ₹30 கோடி பணப் பேரம் பேசப்பட்டதா, சமர்ப்பிக்கப்பட்டுள்ள ஆடியோ மற்றும் வீடியோ ஆதாரங்கள் நம்பகமானவையா, இதன் பின்னணியில் அரசியல் சதி உள்ளதா என்பன உள்ளிட்ட பல்வேறு கேள்விகளுக்கு விசாரணையின் மூலமே விடை கிடைக்கும்.
ஒருகாலத்தில் திமுகவின் முக்கிய அரசியல் புள்ளியாகவும், மு.க. அழகிரியின் நெருங்கிய ஆதரவாளராகவும் இருந்த ஒருவர், தற்போது அதிமுக நிர்வாகியாக இருந்து தவெக சட்டமன்ற உறுப்பினரிடம் குதிரை பேரம் பேசியதாகக் கூறப்படும் புகாரில் கைது செய்யப்பட்டிருப்பது தமிழக அரசியலில் பெரும் பரபரப்பை ஏற்படுத்தியுள்ளது. இந்த வழக்கின் விசாரணை அடுத்தகட்டமாக எந்த அரசியல் புள்ளிகளை நோக்கிச் செல்லும், இதன் பின்னணியில் உள்ள உண்மைகள் என்ன என்பது தமிழக அரசியல் வட்டாரத்தில் உன்னிப்பாகக் கவனிக்கப்பட்டு வருகிறது.