தவெக தலைவர் ஜோசப் விஜய் முதலமைச்சராகப் பொறுப்பேற்றது முதலே கோட்டையில் அதிரடி காட்டி வருகிறார். தற்போது தனது முதல் பிரதான மாவட்டச் சுற்றுப்பயணமாக கரூரைத் தேர்வு செய்துள்ளார்.
விஜயின் கரூர் பிளான்
2026 சட்டமன்றத் தேர்தலுக்கு முந்தைய பிரச்சாரத்தின் போது, கரூரில் நடைபெற்ற தவெக கூட்டத்தில் எதிர்பாராத விதமாக ஏற்பட்ட கூட்ட நெரிசலில் சிக்கி 41 பேர் உயிரிழந்த துயரச் சம்பவம் ஒட்டுமொத்த தமிழகத்தையும் உலுக்கியது. அப்போது எதிர்க்கட்சிகள் இந்தச் சம்பவத்தை வைத்து விஜய் மீது கடுமையான விமர்சனங்களை முன்வைத்தன. சட்டமன்றத்தில் கூட, “சம்பவ இடத்தில் இருந்து விஜய் தப்பியோடிவிட்டார்” என்று எதிர்க்கட்சிகள் குற்றம் சாட்டியபோது, அதற்கு விஜய் உணர்வுப்பூர்வமாகப் பதிலடி கொடுத்திருந்தார்.
தற்போது ஆட்சியைப் பிடித்து முதலமைச்சராக அமர்ந்திருக்கும் நிலையில், தனக்கு அரசியல் ரீதியாகப் பெரும் சவாலாகவும் மனவேதனையாகவும் இருந்த அதே கரூரில் இருந்தே தனது மக்கள் நலத்திட்டப் பயணத்தைத் தொடங்க விஜய் முடிவெடுத்துள்ளார்.
கரூரில் ‘மாஸ்டர் பிளான்’
முதலமைச்சரின் இந்த கரூர் விசிட் சாதாரணமான ஒன்றாக இருக்கப்போவதில்லை என்கிறார்கள். பல்வேறு அதிரடித் திட்டங்களுடன் அவர் களம் இறங்கவுள்ளதாக தவெக தலைமை வட்டாரங்கள் கூறுகின்றன. தேர்தல் நேரத்தில் கரூரில் உயிரிழந்த 41 பேரின் குடும்பங்களுக்கு ஏற்கனவே அரசு மற்றும் கட்சிச் சார்பாக இழப்பீடுகள் அறிவிக்கப்பட்டிருந்த நிலையில், தற்போது முதலமைச்சரே நேரில் சென்று பாதிக்கப்பட்ட குடும்பங்களைச் சந்தித்து ஆறுதல் கூறவுள்ளார். அந்தக் குடும்பங்களின் வாழ்வாதாரத்தை மேம்படுத்தும் வகையில் கூடுதல் அரசு நலத்திட்ட உதவிகளையும் அவர் வழங்கவுள்ளார்.
2026 தேர்தலில் தவெக தனித்து களம் கண்டு ஆட்சியைப் பிடித்திருந்தாலும், கொங்கு மண்டலமான கரூர், கோவை, நாமக்கல் பகுதிகளில் கட்சியின் அடித்தளத்தை மேலும் வலுவாக்க வேண்டிய தேவை உள்ளது. மூத்த அரசியல்வாதியான கே.ஏ.செங்கோட்டையன் தவெக-வில் இணைந்த பிறகு, கட்சியின் நிர்வாகக் குளறுபடிகள் சரிசெய்யப்பட்டுள்ள நிலையில், கரூரில் ஒரு பிரம்மாண்ட அரசு விழாவை நடத்தத் திட்டமிடப்பட்டுள்ளது.
அரசியல் அனல்
“சினிமா சூட்டிங் செட்டில் இருந்து நேராக வந்து முதலமைச்சராகிவிட்டார்” என்று விமர்சிப்பவர்களின் வாயை அடைக்கும் வகையில், கரூரில் மிக பிரம்மாண்டமான முறையில் அரசு நிர்வாகச் செயல்பாடுகளைத் தொடங்கி வைக்கிறார் முதல்வர் விஜய். முதலமைச்சர் விஜய்யின் வருகையை ஒட்டி கரூர் மாவட்டமே தற்போது தவெக தொண்டர்களால் விழாக்கோலம் பூண்டுள்ளது.மாவட்ட எல்லை முதல் விழா மேடை வரை முதலமைச்சருக்குத் தமிழக பாரம்பரிய முறைப்படி ‘மாஸ்’ வரவேற்பு அளிக்க தவெக தொண்டர்களும், ரசிகர்களும் காத்திருக்கின்றனர்.
தேர்தல் நேரத்தில் கரூரை வைத்தே விஜய்யை வீழ்த்த நினைத்த எதிர்க்கட்சிகளுக்கு, அதே கரூரில் முதலமைச்சராக மாஸ் என்ட்ரி கொடுத்துப் பதிலடி கொடுப்பதே தொண்டர்களின் தற்போதைய கொண்டாட்டத்திற்குக் காரணம். மக்களின் அரசாங்கமாக இந்த ‘விஜய் சர்க்கார்’ செயல்படும் என சட்டமன்றத்தில் உறுதியளித்த முதலமைச்சர், தனது கரூர் பிளான் மூலமாக அதனைச் செயலில் காட்டத் தொடங்கியுள்ளார் என்பதில் மாற்றுக் கருத்து இல்லை.