தமிழக அரசியலில் நேற்றைய எதிரிகள் இன்றைய நண்பர்கள் என்பது மீண்டும் ஒருமுறை மெய்ப்பிக்கப்பட்டுள்ளது. தேர்தல்களத்தில் கனலாகத் தெறித்த மோதல்கள், தற்போது ஆழ்வார்பேட்டை இல்லத்தில் அரவணைப்புகளாக மாறியுள்ளன.
தேர்தலுக்கு முன்பாக “திமுக ஒரு தீய சக்தி”, “குடும்ப அரசியல் ஒழிய வேண்டும்” என மேடைகளில் முழங்கிய தவெக தலைவர் விஜய் இன்று தமிழக முதல்வராகி மு.க. ஸ்டாலினை சந்தித்து வாழ்த்துப் பெற்றுள்ளார். இது வெறும் மரியாதை நிமித்தமான சந்திப்பா? அல்லது அரசியல் சமரசமா? என்ற கேள்வி எழுந்துள்ளது.
பழைய பகை
கடந்த 2026 தேர்தல் பிரசாரத்தின் போது, விஜயின் பேச்சுகள் திமுக கோட்டையை அதிரவைத்தன. “ஊழல் திமிங்கலங்களை வேட்டையாடுவோம்”, “ஒரு குடும்பத்தின் பிடியில் இருந்து தமிழகத்தை மீட்போம்” என அவர் விட்ட சவால்கள், ஸ்டாலின் தலைமையிலான திமுக அரசுக்கு நேரடிப் போர்ப் பிரகடனமாக அமைந்தது. பதிலுக்கு திமுக தரப்பிலிருந்தும் “சினிமா வேறு, அரசியல் வேறு” என காட்டமான விமர்சனங்கள் முன்வைக்கப்பட்டன.
வாசலில் கட்டியணைத்த உதயநிதி
தலைமைச் செயலகத்தில் இருந்து ஆழ்வார்பேட்டை இல்லத்திற்கு வந்த முதலமைச்சர் விஜயை, வாசலுக்கே வந்து அமைச்சர் உதயநிதி ஸ்டாலின் கட்டியணைத்து வரவேற்றது சமூக வலைதளங்களில் வைரலாகி வருகிறது. “திரைப்படத் துறையில் நண்பர்களாக இருந்தவர்கள், அரசியலில் பரம எதிரிகளாக மாறி விட்டனர்” என்று கூறப்பட்டு வந்த நிலையில் இந்த ‘கட்டிப்பிடி வைத்தியம்’ ஒரு புதிய அரசியல் நாகரிகத்தைத் தொடங்கி வைத்துள்ளது.
முதிர்ச்சியா? ராஜதந்திரமா?
தேர்தல் தோல்விக்குப் பிறகு ஒரு கனிவான பெரியண்ணன் மனநிலையில், முதல்வர் விஜய்க்கு சால்வை அணிவித்து வாழ்த்து தெரிவித்தார் திமுக தலைவர் ஸ்டாலின். ஆட்சியைப் பறிகொடுத்தாலும், ஜனநாயக ரீதியாக ஒரு புதிய தலைவரை அங்கீகரிப்பதன் மூலம் தனது அரசியல் முதிர்ச்சியை அவர் காட்டியுள்ளார். அதே சமயம், வரும் காலங்களில் ஆக்கப்பூர்வமான எதிர்க்கட்சியாக திமுக செயல்படும் என்பதையும் இந்தச் சந்திப்பு மறைமுகமாக உணர்த்துகிறது.
நிர்வாக சவால்கள்
வாழ்த்துக்கள் ஒருபுறம் இருந்தாலும், முந்தைய திமுக அரசு மீது விஜய் சுமத்திய ஊழல் புகார்கள், குறிப்பாக செந்தில் பாலாஜி மீதான சிபிஐ விசாரணை போன்ற விவகாரங்களில் புதிய முதலமைச்சர் என்ன நிலைப்பாடு எடுக்கப் போகிறார் என்பதே பலரின் எதிர்பார்ப்பு.