பெங்களூரு கோடிஹள்ளி பகுதியில், ஏற்கனவே திருமணமாகி விவாகரத்து பெற்றதை மறைத்து காதலித்த இளைஞரிடமிருந்து விலகிய சட்டக் கல்லூரி மாணவி, அவரது தம்பியால் பட்டப்பகலில் கத்தியால் குத்திக் கொலை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது. இந்த வழக்கில் அண்ணன், தம்பி இருவரையும் போலீசார் கைது செய்து தீவிர விசாரணை நடத்தி வருகின்றனர்.
போலீஸ் விசாரணையில் வெளியான தகவலின்படி, பெங்களூரு கோடிஹள்ளி பகுதியைச் சேர்ந்த அம்ரிதா (22), நான்காம் ஆண்டு சட்டக் கல்லூரி மாணவி. குடும்பச் சூழ்நிலை காரணமாக படிப்புடன் சேர்த்து, பிரபல பீட்சா நிறுவனத்தில் பகுதி நேர வேலையும் செய்து வந்துள்ளார்.
அதே பகுதியைச் சேர்ந்த தனுஷ் என்பவருடன் கடந்த நான்கு ஆண்டுகளாக காதலித்து வந்ததாக கூறப்படுகிறது. ஆனால், தனுஷுக்கு ஏற்கனவே திருமணமாகி, பின்னர் விவாகரத்து பெற்றதுடன், மூன்று வயது பெண் குழந்தையும் இருப்பதை அவர் அம்ரிதாவிடம் மறைத்திருந்ததாக போலீசார் தெரிவித்துள்ளனர்.
சுமார் இரண்டு மாதங்களுக்கு முன்பு இந்த உண்மை அம்ரிதாவுக்கு தெரியவந்தது. இதனால் கடும் அதிர்ச்சியடைந்த அவர், தனுஷுடனான காதல் உறவை முற்றிலுமாக முறித்துக் கொண்டு, அவரிடமிருந்து விலகியுள்ளார்.
இதையடுத்து, காதல் முறிவால் ஆத்திரமடைந்த தனுஷ், தனது தம்பி சூர்யாவிடம் அம்ரிதாவை பழிவாங்குமாறு கூறியதாக போலீசார் சந்தேகிக்கின்றனர்.
தாக்குதல் நடைபெறுவதற்கு முன்பு, தனுஷ் மற்றும் சூர்யா ஆகியோர் அம்ரிதாவின் சகோதரர் தேஜஸை தொலைபேசியில் தொடர்புகொண்டு, “எங்கள் வாழ்க்கையோடு விளையாடிய அம்ரிதாவுக்கு ஒரு நல்ல பாடம் புகட்டுவோம்” என மிரட்டல் விடுத்ததாகவும் விசாரணையில் தெரியவந்துள்ளது.
அதனைத் தொடர்ந்து, கடந்த ஜூலை 13-ஆம் தேதி மாலை சுமார் 4.30 மணியளவில், சூர்யா அம்ரிதாவின் வீட்டிற்குச் சென்றுள்ளார். அங்கு முதலில் அவரது தாயாருடன் கடுமையான வாக்குவாதத்தில் ஈடுபட்டுள்ளார்.
பின்னர், தான் மறைத்து வைத்திருந்த கத்தியை எடுத்து, அம்ரிதாவின் முதுகு மற்றும் உடலின் பல்வேறு பகுதிகளில் சரமாரியாக குத்தியதாக போலீசார் தெரிவித்துள்ளனர்.
ரத்த வெள்ளத்தில் சரிந்த அம்ரிதாவை அக்கம் பக்கத்தினர் மீட்டு மருத்துவமனைக்கு கொண்டு சென்றனர். அங்கு தீவிர சிகிச்சைப் பிரிவில் அனுமதிக்கப்பட்ட அவர், 48 மணி நேரம் உயிருக்கு போராடிய நிலையில் சிகிச்சை பலனின்றி உயிரிழந்தார்.
இந்த சம்பவம் குறித்து ஜீவன்பீமாநகர் போலீசார் கொலை வழக்குப் பதிவு செய்து, சம்பவ இடத்திலேயே பொதுமக்களால் பிடிக்கப்பட்ட சூர்யாவையும், பின்னர் அவரது அண்ணன் தனுஷையும் கைது செய்தனர்.
விசாரணையில், கைதான இருவரும் புதிய விளக்கம் ஒன்றை அளித்துள்ளனர். அம்ரிதாவின் குடும்பத்தினர் தங்களிடம் பணம் கடன் வாங்கி திருப்பிச் செலுத்தவில்லை என்றும், அந்த பணத் தகராறில்தான் இந்தச் சம்பவம் நடந்ததாகவும் கூறி, போலீசாரின் விசாரணையை திசைதிருப்ப முயன்றதாக தகவல்கள் வெளியாகியுள்ளன. எனினும், இந்தக் கூற்றின் உண்மைத்தன்மை குறித்தும் போலீசார் தொடர்ந்து விசாரணை மேற்கொண்டு வருகின்றனர்.
மேலும், தனுஷ் ரிச்மண்ட் ரோட்டில் உள்ள ஒரு விளக்கு விற்பனை நிலையத்தில் பணியாற்றி வந்ததும், சூர்யா மருத்துவ உபகரணங்கள் விற்பனை நிறுவனத்தில் மருத்துவ பிரதிநிதியாக பணியாற்றி வந்ததும் தெரியவந்துள்ளது.
இந்தச் சம்பவத்தில் நெகிழ்ச்சியூட்டும் வகையில், தங்களது மகளை இழந்த துயரத்திலும், அம்ரிதாவின் பெற்றோர் அவரது கண்களை தானமாக வழங்க முடிவு செய்துள்ளனர். இந்த மனிதநேய செயல் பலரது பாராட்டைப் பெற்றுள்ளது.
மூன்று ஆண்டுகளுக்கு முன்பு ஒரு ஆன்மீக நிகழ்ச்சியில் இரு குடும்பங்களுக்கும் அறிமுகம் ஏற்பட்டதன் மூலம் இந்தக் காதல் தொடங்கியதாகவும், பின்னர் திருமணமான உண்மையை மறைத்தது தெரியவந்ததால் ஏற்பட்ட உறவு முறிவே இந்த கொடூர சம்பவத்துக்கு காரணமாகியுள்ளதாகவும் போலீசார் தெரிவித்துள்ளனர்.
திருமணமான உண்மையை மறைத்து காதலித்த இளைஞரிடமிருந்து விலகிய சட்டக் கல்லூரி மாணவி, அதற்காக பட்டப்பகலில் கத்தியால் குத்திக் கொலை செய்யப்பட்ட இந்தச் சம்பவம், பெங்களூருவில் பெரும் அதிர்ச்சியையும் பரபரப்பையும் ஏற்படுத்தியுள்ளது. போலீசார் தொடர்ந்து தீவிர விசாரணை மேற்கொண்டு வருகின்றனர்.