இந்திய விண்வெளி ஆராய்ச்சி நிறுவனமான **இஸ்ரோ (ISRO)**வில் இருந்து கடந்த சில மாதங்களாக 100 முதல் 120-க்கும் மேற்பட்ட விஞ்ஞானிகள் மற்றும் தொழில்நுட்ப வல்லுநர்கள் அடுத்தடுத்து ராஜினாமா செய்திருப்பது, இந்திய விண்வெளித் துறையில் பெரும் கவனத்தை ஈர்த்துள்ளது.
குறிப்பாக, ககன்யான், சந்திரயான்-3 உள்ளிட்ட தேசிய முக்கியத்துவம் வாய்ந்த திட்டங்களில் முக்கியப் பங்காற்றிய மூத்த விஞ்ஞானிகள் பலரும் வெளியேறியிருப்பது, இஸ்ரோவுக்கு புதிய சவாலாக உருவெடுத்துள்ளது.
இந்தியாவில் கடந்த சில ஆண்டுகளாக விண்வெளித் துறையில் தனியார் நிறுவனங்களின் வளர்ச்சி வேகமடைந்துள்ளது. தற்போது 400-க்கும் மேற்பட்ட விண்வெளி ஸ்டார்ட்-அப் நிறுவனங்கள், செயற்கைக்கோள், ராக்கெட் மற்றும் விண்வெளி தொழில்நுட்பத் துறைகளில் செயல்பட்டு வருகின்றன.
பிக்ஸெல் (Pixxel), துருவா ஸ்பேஸ் (Dhruva Space), அக்னிகுல் காஸ்மோஸ் (Agnikul Cosmos), ஸ்கைரூட் ஏரோஸ்பேஸ் (Skyroot Aerospace) உள்ளிட்ட நிறுவனங்கள், அதிக சம்பளம், பங்கு உரிமை (Stocks), சிறந்த தலைமைப் பொறுப்புகள் மற்றும் முடிவெடுக்கும் சுதந்திரம் போன்ற சலுகைகளை வழங்கி அனுபவமிக்க இஸ்ரோ விஞ்ஞானிகளை ஈர்த்து வருவதாக கூறப்படுகிறது.
இதற்கு மேலும் ஊக்கமளிக்கும் வகையில், இஸ்ரோவின் முன்னாள் தலைவர் எஸ். சோம்நாத், சென்னையைச் சேர்ந்த அக்னிகுல் காஸ்மோஸ் நிறுவனத்தின் இயக்குநர் குழுவில் இணைந்ததும், பல விஞ்ஞானிகளுக்கு தனியார் துறைக்குச் செல்லும் ஆர்வத்தை ஏற்படுத்தியதாகக் கூறப்படுகிறது.
இஸ்ரோவில் பணியாற்றிய சில விஞ்ஞானிகள், முக்கிய நிர்வாக மற்றும் தொழில்நுட்ப முடிவுகள் அனைத்தும் தலைவரின் அலுவலகத்தை மையமாகக் கொண்டு எடுக்கப்படுவதால், செயல்பாட்டு சுதந்திரம் குறைந்து, திட்ட அனுமதிகளில் தாமதம் ஏற்படுவதாகவும் கருத்து தெரிவித்துள்ளதாக தகவல்கள் வெளியாகியுள்ளன.
மேலும், ககன்யான் G-1 சோதனை, SSLV-L1 உள்ளிட்ட முக்கிய திட்டங்கள் திட்டமிட்ட காலத்தை விட தாமதமானதும், PSLV ராக்கெட் தொடர்பான சில பின்னடைவுகளும் விஞ்ஞானிகளிடையே மன அழுத்தத்தை ஏற்படுத்தியதாக கூறப்படுகிறது.
பெங்களூருவில் உள்ள யு.ஆர். ராவ் செயற்கைக்கோள் மையத்தில் இருந்து சுமார் 80 விஞ்ஞானிகளும், திருவனந்தபுரத்தில் உள்ள விக்ரம் சாராபாய் விண்வெளி மையத்தில் இருந்து 20-க்கும் மேற்பட்ட விஞ்ஞானிகளும் சமீபத்தில் வெளியேறியுள்ளதாக தகவல்கள் தெரிவிக்கின்றன.
இந்த பட்டியலில், ஸ்பாடெக்ஸ் (SpaDeX) திட்ட இயக்குநரும், சந்திரயான்-3 நிலவில் தரையிறங்கும் நடவடிக்கையை கண்காணித்த திட்ட மேலாளருமான ஆதித்யா ரல்லபள்ளி, எல்விஎம்-3 (LVM3) திட்ட இயக்குநர் விக்டர் ஜோசப் உள்ளிட்ட அனுபவமிக்க விஞ்ஞானிகளும் இடம்பெற்றுள்ளதாக கூறப்படுகிறது.
இந்த திடீர் திறமைப் பற்றாக்குறையைத் தொடர்ந்து, மத்திய விண்வெளித் துறை புதிய நிர்வாக உத்தரவை வெளியிட்டுள்ளது.
அதன்படி, ககன்யான் உள்ளிட்ட தேசிய முக்கியத்துவம் வாய்ந்த திட்டங்களில் பணியாற்றும் குரூப்-ஏ விஞ்ஞானிகள் மற்றும் தொழில்நுட்ப அதிகாரிகளின் ராஜினாமா அல்லது விருப்ப ஓய்வு (VRS) விண்ணப்பங்களை, இனி அந்தந்த இஸ்ரோ மைய இயக்குநர்கள் நேரடியாக ஏற்கக் கூடாது என்று அறிவுறுத்தப்பட்டுள்ளது.
அனைத்து விண்ணப்பங்களும், இறுதி ஒப்புதலுக்காக டெல்லியில் உள்ள விண்வெளித் துறை (Department of Space) தலைமையகத்திற்கு அனுப்பப்பட வேண்டும் என்றும், முக்கிய தேசிய திட்டங்கள் நிறைவடையும் வரை அவற்றை மிகுந்த கவனத்துடன் பரிசீலிக்க வேண்டும் என்றும் சுற்றறிக்கையில் தெரிவிக்கப்பட்டுள்ளது.
2020-ஆம் ஆண்டு அறிமுகப்படுத்தப்பட்ட நிர்வாகச் சீர்திருத்தத்தின்படி, இஸ்ரோ மைய இயக்குநர்களுக்கே இந்த அதிகாரம் வழங்கப்பட்டிருந்தது. ஆனால், தற்போது தொடர்ந்து நடைபெறும் ராஜினாமாக்களைத் தொடர்ந்து, அந்த அதிகாரம் திரும்பப் பெறப்பட்டுள்ளதாக கூறப்படுகிறது.
இதுகுறித்து விளக்கம் அளித்துள்ள விண்வெளித் துறைக்கான மத்திய இணை அமைச்சர் டாக்டர் ஜிதேந்திர சிங், இந்த ராஜினாமாக்களில் எந்தவிதமான சர்ச்சையும் இல்லை என்றும், இது நிர்வாக ரீதியான நடவடிக்கை மட்டுமே என்றும் தெரிவித்துள்ளார்.
மேலும், “சிலர் வெளியேறுகிறார்கள், புதியவர்கள் இணைகிறார்கள்; இது இயல்பான ஒரு செயல்முறை. ஆனால், தேசிய முக்கியத்துவம் வாய்ந்த திட்டங்கள் எந்த வகையிலும் பாதிக்கப்படக் கூடாது என்பதற்காகவே இந்த நடைமுறை மாற்றம் மேற்கொள்ளப்பட்டுள்ளது” என்றும் அவர் விளக்கம் அளித்துள்ளார்.
தற்போது இஸ்ரோவில் மொத்தமாக 14,600-க்கும் மேற்பட்ட ஊழியர்கள் பணியாற்றி வருகின்றனர். 100 முதல் 120 விஞ்ஞானிகள் வெளியேறியிருப்பது சதவீத அடிப்படையில் மிகக் குறைவாக இருந்தாலும், அவர்கள் முக்கிய திட்டங்களை வழிநடத்திய அனுபவமிக்க அதிகாரிகள் என்பதால், அதன் தாக்கம் குறிப்பிடத்தக்கதாகக் கருதப்படுகிறது.
இந்த திறமைப் பற்றாக்குறையை ஈடுகட்டும் வகையில், இஸ்ரோ தனது அதிகாரப்பூர்வ ISRO Careers தளத்தின் மூலம் 1,050-க்கும் மேற்பட்ட அறிவியல், தொழில்நுட்ப மற்றும் நிர்வாகப் பணியிடங்களை நிரப்புவதற்கான ஆட்சேர்ப்பு நடவடிக்கைகளை தீவிரப்படுத்தியுள்ளது.
2020-ஆம் ஆண்டு இந்திய அரசு விண்வெளித் துறையை தனியார் முதலீடுகளுக்கு திறந்துவைத்ததும், 2023-ஆம் ஆண்டு இந்திய விண்வெளிக் கொள்கையை அறிவித்ததும், தனியார் விண்வெளித் துறையின் வளர்ச்சிக்கு முக்கிய திருப்புமுனையாக அமைந்தது.
தற்போது இந்தியாவில் செயல்பட்டு வரும் 400-க்கும் மேற்பட்ட விண்வெளி ஸ்டார்ட்-அப் நிறுவனங்கள், சுமார் 500 மில்லியன் அமெரிக்க டாலர், அதாவது ரூ.4,100 கோடிக்கும் மேற்பட்ட முதலீடுகளை ஈர்த்துள்ளன. இதில் மட்டும் 2025-ஆம் ஆண்டில் சுமார் 150 மில்லியன் டாலர் முதலீடு கிடைத்துள்ளதாக தகவல்கள் தெரிவிக்கின்றன.
இந்தப் பெரும் முதலீடுகளின் பின்னணியில், அனுபவமிக்க இஸ்ரோ விஞ்ஞானிகளை அதிக ஊதியம், பங்குகள் மற்றும் உயர்மட்ட பொறுப்புகள் வழங்கி தனியார் நிறுவனங்கள் தங்களுடன் இணைத்துக் கொண்டு வருவதாகவும், இதுவே இஸ்ரோவில் இருந்து தொடர்ச்சியாக விஞ்ஞானிகள் வெளியேறுவதற்கான முக்கிய காரணமாகக் கருதப்படுவதாகவும் தகவல்கள் வெளியாகியுள்ளன.