நடிகரும், தமிழக முதல்வருமான விஜயின் மகன் ஜேசன் சஞ்சய், இயக்குநராக தனது திரைப்பயணத்தை ‘சிக்மா’ திரைப்படத்தின் மூலம் தொடங்கியுள்ள நிலையில், தனது குடும்பத்தினர் அளித்த ஆதரவு குறித்து மனம் திறந்து பேசியுள்ளார்.
லைகா புரொடக்ஷன்ஸ் தயாரிப்பில், நடிகர் சந்தீப் கிஷன் கதாநாயகனாக நடிக்கும் ‘சிக்மா’ திரைப்படத்தின் மூலம் ஜேசன் சஞ்சய் இயக்குநராக அறிமுகமாகிறார்.
இதுகுறித்து அவர் கூறியதாவது:
“நான் சினிமாவுக்குள் வருவது குறித்து என் அப்பா விஜய், அம்மா சங்கீதா, என் தங்கை மற்றும் நண்பர்களிடம் முதலில் பேசினேன். அவர்கள் அனைவரும் மிகவும் நேர்மறையாகப் பதிலளித்து, முழு ஆதரவையும் அளித்தனர். அவர்கள் அனைவரும் எனக்கு ‘கிரீன் சிக்னல்’ கொடுத்த அந்த தருணத்தில்தான், என் மீது அவர்கள் வைத்திருந்த நம்பிக்கையின் ஆழத்தை உணர்ந்தேன்.” என்றார்.
சினிமா பின்னணி கொண்ட குடும்பத்தில் பிறந்ததால், சிறுவயதிலிருந்தே படப்பிடிப்பு தளங்களுக்குச் செல்லும் வாய்ப்பு ஜேசன் சஞ்சய்க்கு கிடைத்தது. பல திரைப்படங்களின் பிரீமியர் காட்சிகளிலும் அவர் கலந்து கொண்டுள்ளார். திரைப்படங்களைப் பார்ப்பதே அவரது மிகப்பெரிய பொழுதுபோக்காக இருந்ததாகவும், உலக சினிமாக்களை ஆர்வத்துடன் பார்த்து ரசித்ததாகவும் தெரிவித்துள்ளார்.
“அமைச்சரை விமர்சிப்பது அவதூறு ஆகாது! – சைபர் கிரைம் போலீஸுக்கு உயர் நீதிமன்றம் ‘நச்’ கேள்வி!”
பின்னர் கனடாவில் திரைப்படத் தயாரிப்பு (Filmmaking) தொடர்பாக படித்த அவர், அங்கு ஒரு குறும்படத்தையும் இயக்கியுள்ளார்.
ஜேசன் சஞ்சய்க்கு 20 வயதாக இருந்தபோது, இயக்குநர் அல்போன்ஸ் புத்திரன் அவருக்கு ஒரு கதையைக் கூறி, நடிகராக அறிமுகமாக அழைத்துள்ளார். ஆனால் அப்போது அவர் மாணவராக இருந்ததாலும், நடிப்பில் முழுமையாக கவனம் செலுத்தத் தயாராக இல்லாததாலும், அந்த வாய்ப்பை மரியாதையுடன் மறுத்துவிட்டதாக தெரிவித்துள்ளார்.
தற்போது அவர் இயக்கி வரும் ‘சிக்மா’, வழக்கமான காதல் கதையாக இல்லாமல், ஒரு கேங் மேற்கொள்ளும் சாகச கொள்ளை (Adventurous Heist) பின்னணியில் உருவாகும் விறுவிறுப்பான திரில்லர் திரைப்படமாக உருவாகி வருகிறது.
இந்தப் படத்தில் சந்தீப் கிஷன் மற்றும் ஃபரியா அப்துல்லா ஆகியோர் முக்கிய கதாபாத்திரங்களில் நடித்துள்ளனர் “படப்பிடிப்பு தளத்தில் இயக்குநராக நடிகர்களுக்கு காட்சிகளை நடித்துக் காட்டும் போது, எனக்குள் இருக்கும் நடிகனை உணர்கிறேன். ஆனால் அந்த நடிகன் ‘சிக்மா’ திரைப்படம் வெளியான பிறகுதான் வெளியில் வருவான்.” என்று தெரிவித்துள்ளார்.
ஈரான் போர் கொடுத்த சவுக்கடி..! அம்பலமான இந்தியாவின் பலவீனம்..! அலர்ட் ஆன பிரதமர் மோடி..!
இதன் மூலம், எதிர்காலத்தில் நடிகராகவும் அவர் அறிமுகமாகும் வாய்ப்பு இருப்பதை மறைமுகமாக சுட்டிக்காட்டியுள்ளார்.
தற்போது இரண்டு முதல் மூன்று வலுவான கதைக்களங்களை மனதில் வைத்திருப்பதாகவும், ‘சிக்மா’ திரைப்படம் வெளியான பிறகு அவற்றை முழுமையான திரைக்கதைகளாக உருவாக்கும் பணியைத் தொடங்கவுள்ளதாகவும் தெரிவித்துள்ளார்.
‘சிக்மா’ படத்தின் படப்பிடிப்பு தொடங்கியபோது, முன்னணி நடிகர்களான விஜய் சேதுபதி மற்றும் சூரி நேரில் வந்து ஜேசன் சஞ்சய்க்கு வாழ்த்து தெரிவித்தனர்.
சிறுவயதிலிருந்தே உலக சினிமாக்களைப் பார்ப்பது ஜேசன் சஞ்சயின் முக்கிய பொழுதுபோக்காக இருந்துள்ளது. திரைப்படத்தைப் பார்த்துவிட்டு, அதைப் பார்க்காத தனது நண்பர்களிடம் ஆர்வத்துடன் கதையைச் சொல்லும் பழக்கம் இருந்ததாகவும், அந்த அனுபவம்தான் தன்னை ஒரு நல்ல கதை சொல்லியாகவும், இயக்குநராகவும் உருவாக்கியதாகவும் அவர் நெகிழ்ச்சியுடன் பகிர்ந்துள்ளார்.
‘சிக்மா’ திரைப்படத்தின் முதல் பாடலான ‘சிக்மா ஸ்டைல்’ கடந்த ஜூன் மாதம் வெளியிடப்பட்டது. அந்தப் பாடலில் ஜேசன் சஞ்சய் சிறிய கேமியோ தோற்றத்தில் நடனமாடியிருந்தார். இதுகுறித்து அவர் விளக்கமளிக்கையில்,
“நான் நடிகனாக வேண்டும் என்பதற்காக அந்தப் பாடலில் தோன்றவில்லை. அது படத்திற்கு வெளியே உருவாக்கப்பட்ட ஒரு விளம்பரப் பாடல் என்பதால், நண்பர்களுடன் இணைந்து சும்மா ஒரு மகிழ்ச்சிக்காக மட்டுமே அதில் கலந்துகொண்டேன்.” என்றார்.
கனடாவில் திரைப்படத் தயாரிப்பு படித்துக் கொண்டிருந்தபோது, 120 பக்கங்கள் கொண்ட முழுநீள திரைக்கதையையும் ஜேசன் சஞ்சய் எழுதியுள்ளார். ஆனால், அப்போது அதை முழுநீள திரைப்படமாக உருவாக்க இயலாததால், அந்தக் கதையின் ஒரு பகுதியை மட்டும் 20 நிமிடக் குறும்படமாக இயக்கியதாக தெரிவித்துள்ளார்.
இந்தியா திரும்பிய பிறகு, தனது மாமா சஞ்சீவ் மூலமாக லைகா நிறுவனத்தின் தயாரிப்பு மேலாளர் தமிழ் குமரனைச் சந்தித்துள்ளார். தயாரிப்பாளரிடம் கதை சொல்லும் அனுபவத்தைப் பெற வேண்டும் என்ற எண்ணத்திலேயே அவர் சென்றதாக கூறியுள்ளார்.
ஆனால், ஜேசன் சஞ்சய் கூறிய கதை தமிழ் குமரனுக்கு மிகவும் பிடித்துப் போனதால், பின்னர் லைகா நிறுவனத்தின் தலைவர் சுபாஸ்கரனைச் சந்தித்து கதை சொல்லும் வாய்ப்பு கிடைத்தது. கதையைக் கேட்டவுடன் சுபாஸ்கரன் அந்தத் திரைப்படத்தைத் தயாரிக்க உடனடியாக சம்மதித்ததாக தகவல் வெளியாகியுள்ளது.
பொதுவாக சினிமா வாரிசுகள் தங்களது முதல் திரைப்படமாக காதல் கதைகளைத் தேர்வு செய்வார்கள் என்ற எதிர்பார்ப்பு திரையுலகில் இருந்தது. ஆனால், ஜேசன் சஞ்சய் அதற்கு மாறாக, தமிழ் சினிமாவில் அரிதாக உருவாகும் சாகச கொள்ளை (Adventurous Heist) வகை திரில்லர் கதையைத் தனது முதல் திரைப்படமாகத் தேர்வு செய்துள்ளார்.
இது ஒரு தனிநபரை மையமாகக் கொண்ட கதை அல்ல. ஒரு குழு இணைந்து மேற்கொள்ளும் சாகசப் பயணத்தை மையமாகக் கொண்ட விறுவிறுப்பான திரைக்கதையாக ‘சிக்மா’ உருவாகி வருகிறது.
இதுகுறித்து நடிகர் சந்தீப் கிஷன் அளித்துள்ள பாராட்டில்,
“ஜேசன் சஞ்சய் நினைத்திருந்தால், இந்திய சினிமாவிலேயே மிகப் பெரிய அறிமுகத்துடன் ஹீரோவாக களம் இறங்கி, வசூலில் சாதனை படைத்திருக்க முடியும். ஆனால், அவர் அந்த வழியைத் தேர்ந்தெடுக்காமல், தனக்கென ஒரு புதிய பாதையை உருவாக்கி இயக்குநராக அறிமுகமாகியிருப்பது எங்களை மிகவும் வியக்க வைத்துள்ளது.” என்று தெரிவித்துள்ளார்.
இவ்வாறு, குடும்பத்தின் முழு ஆதரவுடன், தனக்கென ஒரு புதிய அடையாளத்தை உருவாக்கும் நோக்கில் இயக்குநராக தனது பயணத்தைத் தொடங்கியுள்ள ஜேசன் சஞ்சய், ‘சிக்மா’ திரைப்படத்தின் மூலம் தமிழ் திரையுலகில் புதிய அத்தியாயத்தைத் தொடங்கியுள்ளார்.