தமிழ்நாட்டில் டாஸ்மாக் (TASMAC) மதுபானச் சில்லறை விற்பனைக் கடைகள் மற்றும் அவற்றுடன் இணைந்த பார்களை முறைப்படுத்தவும், மதுபான விற்பனையில் நடைபெறும் முறைகேடுகள், கூடுதல் கட்டண வசூல் உள்ளிட்டவற்றைத் தடுக்கவும் தமிழக அரசு புதிய கடுமையான விதிமுறைகளை அமல்படுத்தியுள்ளது. இதற்காக, கடந்த 2003-ஆம் ஆண்டு கொண்டுவரப்பட்ட விதிகளில் திருத்தங்கள் மேற்கொண்டு, புதிய அரசாணையை அரசு வெளியிட்டுள்ளது.
பொது சுகாதாரம், சமூகப் பாதுகாப்பு மற்றும் மதுபான விற்பனையில் வெளிப்படைத்தன்மையை உறுதிப்படுத்தும் நோக்கில் இந்தப் புதிய கட்டுப்பாடுகள் கொண்டுவரப்பட்டுள்ளன.
அதிகாரிகளுக்கு திடீர் ஆய்வு நடத்த அதிகாரம்
புதிய விதிகளின்படி, கலால் துறையில் பிரிவு ஆய்வாளர் அல்லது அதற்கு மேற்பட்ட பதவியில் உள்ள அதிகாரிகள் மற்றும் மாவட்ட ஆட்சியரால் அங்கீகரிக்கப்பட்ட வருவாய்த் துறை வட்டாட்சியர் நிலையில் உள்ள அதிகாரிகள், எந்த நேரத்திலும் டாஸ்மாக் கடைகள் மற்றும் பார்களில் திடீர் ஆய்வு நடத்தலாம்.
அப்போது, கடைகளில் உள்ள மதுபானங்களின் இருப்பு, விற்பனைக் கணக்குகள் மற்றும் பணப் பரிவர்த்தனைகளைச் சரிபார்க்கவும், மதுபான மாதிரிகளைச் சேகரித்து வேதியியல் ஆய்வகப் பரிசோதனைக்கு அனுப்பவும் அவர்களுக்கு அதிகாரம் வழங்கப்பட்டுள்ளது.
மேலும், ஒவ்வொரு டாஸ்மாக் கடையிலும், அதனுடன் இணைந்த ஒவ்வொரு பாரிலும் கட்டாயமாக ஆய்வுப் பதிவேடு (Inspection Book) பராமரிக்கப்பட வேண்டும். ஆய்வு மேற்கொள்ளும் அதிகாரிகள் அதில் தங்களது ஆய்வு விவரங்களைப் பதிவு செய்ய வேண்டும்.
விற்பனை மற்றும் இருப்புக் கணக்குகள் மின்னணு முறையில் பராமரிப்பு
டாஸ்மாக் கடைகளில் தினசரி மதுபான விற்பனை, இருப்பு மற்றும் பணப் பரிவர்த்தனை தொடர்பான கணக்குகளை இனி மின்னணு முறையில் மட்டுமே பராமரிக்க வேண்டும் என உத்தரவிடப்பட்டுள்ளது.
இதற்காக, மதுபான விற்பனை ரசீது (Sales Bill), தினசரி இருப்பு அறிக்கை (Daily Stock Report), தினசரி விற்பனைப் பரிவர்த்தனை அறிக்கை (Daily Sale Transaction Report) மற்றும் உரிமங்கள் (Licences) ஆகியவற்றுக்கான பழைய படிவங்கள் மாற்றப்பட்டு, புதிய வடிவிலான படிவங்கள் அறிமுகப்படுத்தப்பட்டுள்ளன.
விற்பனையின் ஒவ்வொரு பரிவர்த்தனையும் முறையாகக் கணினியில் பதிவு செய்யப்படுவதுடன், வாடிக்கையாளர்களுக்குக் கணினியால் உருவாக்கப்பட்ட ரசீதுகள் வழங்கப்பட வேண்டும்.
மேலும், விற்பனை முறைகேடுகளைத் தடுக்கும் வகையில், கடை ஊழியர்கள் தங்களது தனிப்பட்ட QR குறியீடுகளைப் பயன்படுத்துவதற்கும் தடை விதிக்கப்பட்டுள்ளது.
ரூ.1,000-க்கு மேல் டிஜிட்டல் பணப்பரிவர்த்தனை கட்டாயம்
கூடுதல் கட்டணம் வசூலித்தல் உள்ளிட்ட முறைகேடுகளைத் தடுக்கும் வகையில், டிஜிட்டல் பணப்பரிவர்த்தனைக்குப் புதிய நடைமுறை அறிமுகப்படுத்தப்பட்டுள்ளது.
அதன்படி, 2026 நவம்பர் 1-ஆம் தேதி முதல் ரூ.1,000-க்கு மேல் மதுபானம் வாங்கும்போது UPI, கிரெடிட் கார்டு, டெபிட் கார்டு உள்ளிட்ட டிஜிட்டல் பணப்பரிவர்த்தனைகள் கட்டாயமாக்கப்பட்டுள்ளன.
அடுத்தகட்டமாக, 2027 ஜனவரி 1-ஆம் தேதி முதல் ரூ.500-க்கு மேல் மதுபானம் வாங்கினாலும் டிஜிட்டல் முறையில் பணம் செலுத்துவது கட்டாயமாக்கப்பட உள்ளது.
21 வயதுக்குக் குறைவானவர்களுக்கு மதுபானம் விற்பனை செய்யத் தடை
வயது குறைந்தவர்களுக்கு மதுபானம் விற்பனை செய்வதைத் தடுக்கும் வகையில் கடுமையான விதிகள் கொண்டுவரப்பட்டுள்ளன.
அதன்படி, 21 வயதை நிறைவு செய்யாத நபர்களுக்கு எந்தக் காரணத்தைக் கொண்டும் மதுபானம் விற்பனை செய்யக் கூடாது.
வாடிக்கையாளரின் வயது குறித்து சந்தேகம் ஏற்பட்டால், ஆதார் அட்டை உள்ளிட்ட அரசு அல்லது உள்ளாட்சி அமைப்புகளால் வழங்கப்பட்ட அங்கீகரிக்கப்பட்ட அடையாள ஆவணங்களைக் கேட்டு வயதைச் சரிபார்க்கலாம்.
மேலும், 21 வயதுக்குக் குறைவானவர்கள் பார்களுக்குள் நுழையவோ, அங்கு அமர்ந்து மது அருந்தவோ அனுமதி இல்லை. அதேபோல், டாஸ்மாக் கடைகள் மற்றும் பார்களில் 21 வயதுக்குக் குறைவானவர்களைப் பணியில் அமர்த்தவும் தடை விதிக்கப்பட்டுள்ளது.
பார்கள் அமைப்பதற்குப் புதிய கட்டுப்பாடுகள்
பார்கள் அமைப்பதற்கும் புதிய விதிமுறைகள் வகுக்கப்பட்டுள்ளன.
அதன்படி, மாநகராட்சி மற்றும் நகராட்சிப் பகுதிகளில் உள்ள வழிபாட்டுத் தலங்கள் மற்றும் கல்வி நிறுவனங்களில் இருந்து 50 மீட்டர் தொலைவிற்குள்ளும், இதர பகுதிகளில் 100 மீட்டர் தொலைவிற்குள்ளும் பார்கள் அமைக்கத் தடை விதிக்கப்பட்டுள்ளது. இருப்பினும், வணிக மற்றும் தொழில்துறைப் பகுதிகளுக்கு இந்தக் கட்டுப்பாட்டில் இருந்து விலக்கு அளிக்கப்பட்டுள்ளது.
மேலும், பார்கள் டாஸ்மாக் மதுபான விற்பனைக் கடையை ஒட்டியோ அல்லது அந்தக் கடையில் இருந்து 100 மீட்டர் தொலைவிற்குள்ளோ மட்டுமே அமைக்கப்பட வேண்டும்.
ஹோட்டல் வளாகங்களுக்குள் பார்கள் அமைக்கவும் தடை விதிக்கப்பட்டுள்ளது.
பழங்குடியினர் மேம்பாட்டுத் திட்டம் மற்றும் மலைப்பகுதி மேம்பாட்டுத் திட்டங்களின் கீழ் வரும் பகுதிகளிலும் பார்கள் அமைக்க அனுமதி இல்லை. குறிப்பாக, வேலூர், சேலம், நாமக்கல், திண்டுக்கல், திருநெல்வேலி மற்றும் கன்னியாகுமரி ஆகிய மாவட்டங்களின் மலைப் பகுதிகளில் இந்தத் தடை பொருந்தும் என அரசாணையில் குறிப்பிடப்பட்டுள்ளது. எனினும், வணிக மற்றும் தொழில்துறைப் பகுதிகளுக்கான விலக்குகள் புதிய விதிகளின்படி பொருந்தும்.
ஒவ்வொரு பாரும் குறைந்தபட்சம் 20 சதுர மீட்டர் தரைத்தளப் பரப்பளவைக் கொண்டிருக்க வேண்டும். மேலும், பார்களில் பாதுகாப்பான குடிநீர் மற்றும் கை கழுவுவதற்கான வசதிகள் கட்டாயம் ஏற்படுத்தப்பட வேண்டும்.
கடைகள் மற்றும் பார்கள் செயல்படும் நேரம்
டாஸ்மாக் கடைகள் மற்றும் அவற்றுடன் இணைந்த பார்கள் தினமும் நண்பகல் 12 மணி முதல் இரவு 10 மணி வரை மட்டுமே செயல்பட அனுமதி வழங்கப்பட்டுள்ளது.
இரவு 10 மணிக்குப் பிறகு பார்களில் யாரும் தங்கியிருக்கவோ, மது அருந்தவோ அனுமதிக்கப்பட மாட்டார்கள்.
மேலும், முக்கிய தேசிய மற்றும் சமூக விழா நாள்களிலும், மாவட்ட ஆட்சியர் உத்தரவிடும் குறிப்பிட்ட நாள்களிலும் டாஸ்மாக் கடைகள் மற்றும் பார்கள் கட்டாயமாக மூடப்பட வேண்டும்.
எட்டு முக்கிய நாள்களில் கட்டாய விடுமுறை
புதிய விதிகளின்படி, மாவட்ட ஆட்சியர்கள் அறிவிக்கும் கூடுதல் விடுமுறை நாள்களைத் தவிர்த்து, கீழ்க்கண்ட எட்டு முக்கிய நாள்களில் தமிழகம் முழுவதும் உள்ள அனைத்து டாஸ்மாக் கடைகளும், பார்களும் கட்டாயமாக மூடப்பட்டிருக்க வேண்டும்.
- திருவள்ளுவர் தினம்
- குடியரசு தினம்
- மகாவீர் ஜெயந்தி
- வள்ளலார் நினைவு நாள்
- மே தினம்
- சுதந்திர தினம்
- நபிகள் நாயகம் பிறந்தநாள்
- காந்தி ஜெயந்தி
விலைப்பட்டியல் மற்றும் எச்சரிக்கைப் பலகைகள் கட்டாயம்
டாஸ்மாக் கடைகளில் மதுபானங்களின் விலைப்பட்டியல் வாடிக்கையாளர்களுக்குத் தெளிவாகத் தெரியும் வகையில் வைக்கப்பட வேண்டும்.
மேலும், கடைகளில் தமிழில் பெயர்ப்பலகை இடம்பெற வேண்டும். அதோடு, தமிழ் மற்றும் ஆங்கிலம் ஆகிய இரு மொழிகளிலும் கீழ்க்கண்ட எச்சரிக்கை வாசகங்கள் கட்டாயமாக இடம்பெற வேண்டும்.
- “மது அருந்துதல் உடல் நலத்திற்கு கேடானது.”
- “பாதுகாப்பாக இருங்கள் – மது அருந்திவிட்டு வாகனம் ஓட்டாதீர்.”
பார்களைத் தனியாருக்கு டெண்டர் விட புதிய நடைமுறை
டாஸ்மாக் நிறுவனத்தின் கீழ் செயல்படும் பார்களைத் தனியாருக்கு ஒப்பந்த அடிப்படையில் டெண்டர் மூலம் வழங்குவதற்கும் புதிய விதிகள் வகுக்கப்பட்டுள்ளன.
இதன்படி, பார்களுக்கான டெண்டரில் நிர்ணயிக்கப்படும் குறைந்தபட்ச ஏலத் தொகை (Upset Price) அல்லது சதவீதத்தை, மதுவிலக்கு மற்றும் ஆயத்தீர்வை ஆணையரின் முன் அனுமதியுடன் டாஸ்மாக் நிறுவனத்தின் நிர்வாகக் குழு (TASMAC Board) இறுதி செய்யும்.
பார் நடத்துபவர்களிடம் இருந்து வசூலிக்கப்படும் டெண்டர் தொகையை, அதற்கு அடுத்த மாதம் 25-ஆம் தேதிக்குள் அரசு கணக்கில் செலுத்த வேண்டும். இதில், டாஸ்மாக் நிறுவனம் 1 சதவீதத் தொகையை முகமை கமிஷனாக (Agency Commission) வைத்துக்கொள்ள அனுமதி வழங்கப்பட்டுள்ளது.
இந்தப் புதிய டெண்டர் நடைமுறைகள் முழுமையாக அமலுக்கு வரும் இடைப்பட்ட காலத்தைக் கருத்தில் கொண்டு, தமிழகம் முழுவதும் உள்ள பார்களின் தற்போதைய உரிமங்களை டாஸ்மாக் நிர்வாகம் மேலும் இரண்டு மாதங்களுக்கு நீட்டித்துள்ளது.
விதிகளை மீறினால் கடும் நடவடிக்கை
டாஸ்மாக் கடைகள் மற்றும் பார்களில் நடைபெறும் முறைகேடுகளைக் கட்டுப்படுத்தவும், மதுபான விற்பனையில் வெளிப்படைத்தன்மையை உறுதிப்படுத்தவும் தமிழக அரசு இந்தப் புதிய விதிமுறைகளை அறிமுகப்படுத்தியுள்ளது.
அதிகாரிகளின் திடீர் ஆய்வு, மின்னணு விற்பனைக் கணக்குகள், டிஜிட்டல் பணப்பரிவர்த்தனை, வயது வரம்பு கட்டுப்பாடு, பார்கள் அமைப்பதற்கான புதிய நிபந்தனைகள் உள்ளிட்ட பல்வேறு நடவடிக்கைகள் மூலம் டாஸ்மாக் விற்பனை நடைமுறையை ஒழுங்குபடுத்த அரசு திட்டமிட்டுள்ளது.
இந்த விதிமுறைகளை மீறிச் செயல்படும் டாஸ்மாக் கடைகள் மற்றும் பார் உரிமையாளர்கள், ஊழியர்கள் மீது உரிய சட்ட நடவடிக்கைகள் எடுக்கப்படும் என தமிழக அரசு எச்சரித்துள்ளது.
“தமிழக அரசு வெளியிட்ட அதிகாரப்பூர்வ அரசிதழ் (Gazette) நகல்”
