ரஷ்யாவில் நாடாளுமன்றத் தேர்தல்கள் நடைபெற்று வரும் நிலையில், உக்ரைன் இராணுவம் ஒரே இரவில் 1,600-க்கும் மேற்பட்ட ட்ரோன்களை ஏவியுள்ளது. இந்த ட்ரோன் தாக்குதல்களில் பெரும்பாலானவை தலைநகர் மாஸ்கோ மீது நடத்தப்பட்டன. உக்ரைன் ரஷ்யாவைத் தாக்கிய இந்த நிகழ்வு, கிரெம்ளினின் நாடாளுமன்றத் தேர்தல்களின் மூன்றாவது, இறுதி நாளில் நடைபெற்றுள்ளது. மாஸ்கோவின் மேயர் இந்த ட்ரோன் தாக்குதல்களை, ரஷ்யத் தலைநகர் மீது இதுவரை நடத்தப்பட்டதிலேயே “மிகப்பெரிய” தாக்குதல் என்று கூறியுள்ளார். அவர், “இது ஒரு எண்ணெய் சுத்திகரிப்பு நிலையத்தையும் ஒரு குடியிருப்பு கட்டிடத்தையும் சேதப்படுத்தியது” என்றும் கூறியுள்ளார்.
மாஸ்கோ ஆளுநர் ஆண்ட்ரி வோரோபியோ இது குறித்து, ”இந்தத் தாக்குதல்கள் மாஸ்கோவின் சுற்றுவட்டாரப் பகுதிகளில் நடத்தப்பட்டன. இதில் இருவர் கொல்லப்பட்டனர். 20 பேர் காயமடைந்தனர். உயிரிழந்த இருவரில் 74 வயது ஆண், 44 வயது பெண் ஆகியோர் அடங்குவர். தற்போது, இந்தத் தாக்குதல் குறித்து உக்ரைன் தரப்பிலிருந்து உடனடியாக எந்த அறிக்கையும் வெளியாகவில்லை.
ரஷ்யாவில் சமீபத்தில் நடந்த நாடாளுமன்றத் தேர்தல்கள், அதிபர் விளாடிமிர் புடின், அவரது அரசாங்கத்தின் முழுமையான கட்டுப்பாட்டில் இருந்தன. அவர்களின் கொள்கைகளை எதிர்க்க யாரும் இல்லை. இந்தத் தேர்தல்கள் உக்ரேனியப் போருக்கு மத்தியில் நடைபெற்றதால், இது நாட்டின் முதல் ‘போர்க்காலத் தேர்தல்’ என்று அழைக்கப்படுகிறது.
நான்கு ஆண்டுகளுக்கு முன்பு ரஷ்யாவின் தாக்குதலுக்குப் பிறகு, உக்ரைன் இராணுவ ட்ரோன் தொழில்நுட்பத்தில் உலகத் தலைவராக உருவெடுத்துள்ளது. ரஷ்யாவின் உட்பகுதிகளில் தாக்குதல்களைத் தொடுக்க, அது ஏவுகணைகளையும் உள்நாட்டில் தயாரிக்கப்பட்ட நீண்ட தூர ட்ரோன்களையும் பயன்படுத்துகிறது. அதன் ட்ரோன் தொழில்நுட்பம் உலகெங்கிலும் உள்ள அரசாங்கங்களையும் பாதுகாப்பு உற்பத்தியாளர்களையும் பாதித்துள்ளது.
போரின் விளைவுகள் குறித்து ரஷ்ய மக்களுக்கு விழிப்புணர்வை ஏற்படுத்துவதும், ரஷ்ய அதிபர் விளாடிமிர் புடினை ஒரு சமாதான உடன்படிக்கைக்கு வர அழுத்தம் கொடுப்பதுமே உக்ரைனின் நோக்கமாகும். தாக்குதல்களை நிறுத்த விரும்புவதாக புடின் இதுவரை எந்த அறிகுறியையும் காட்டவில்லை.
கிழக்கு, தெற்கு உக்ரைனில் நேரடித் தரைவழிச் சண்டை குறைந்துள்ளது. போர்க்களத்தில் அதிக எண்ணிக்கையிலான ட்ரோன்கள், தரை ரோபோக்கள் நிலைநிறுத்தப்பட்டதே இதற்கு முக்கியக் காரணம். இவை வீரர்களின் எந்தவொரு நகர்வையும் உடனடியாகக் கண்டறிந்து தாக்கக்கூடியவை. இது நேருக்கு நேர் சண்டையைக் குறைக்கிறது. மாறாக, ரஷ்யாவும், உக்ரைனும் ஒன்றுக்கொன்று எதிரான தொலைதூர வான்வழி, ஏவுகணைத் தாக்குதல்களை அதிகரித்து வருகின்றன.