பாகிஸ்தானின் முன்னாள் பிரதமர் இம்ரான் கானின் உடல் நலம் குறித்த நிச்சயமற்ற நிலை நீடிக்கும் சூழலில், அவர் “சிறையில் இறந்திருக்கலாம்” என்று பாகிஸ்தான் பத்திரிகையாளர் ஒருவர் அதிர்ச்சியூட்டும் ஆனால் உறுதிப்படுத்தப்படாத தகவலை வெளியிட்டுள்ளார்.
பாகிஸ்தான் தெஹ்ரீக்-ஏ-இன்சாஃப் கட்சியின் தலைவரான கான் இறந்துவிட்டதாகப் பல மாதங்களுக்கு முன்பே வதந்திகள் பரவின. அவரைச் சந்திக்கத் தங்கள் குடும்பத்தினருக்கு அனுமதி மறுக்கப்படுவதாக அவரது குடும்பத்தினர் பலரும் குற்றம் சாட்டியிருந்தனர்.
தற்போது அமெரிக்காவில் வசிக்கும் வஜாஹத் சயீத் கான், முன்னாள் பிரதமரின் நலம் குறித்து ஒரு பரபரப்பான தகவலைத் தெரிவித்துள்ளார். ஒரு பேட்டியில், “இம்ரான் கான் இப்போது உயிருடன் இல்லை என்று ராணுவத்தைச் சேர்ந்த மூன்று மூத்த அதிகாரிகள் தன்னிடம் கூறினர்” என்று அவர் குறிப்பிட்டார்.
இம்ரான் கான் இறந்திருக்கலாம்
பாகிஸ்தான் பத்திரிகையாளர் வஜாஹத் எஸ்.கான் கூறுகையில், சிறையில் உள்ள முன்னாள் பிரதமர் இம்ரான் கான் உயிருடன் இருக்க வாய்ப்பில்லை என்று மூன்று ராணுவ அதிகாரிகளாவது என்னிடம் கூறினர். இதனால்தான் நீண்ட காலமாக அவர் பொதுவெளியில் தோன்றவில்லை. சிறைவாசத்தின்போது ராணுவத்டினர் அவரைக் கொன்றுவிட்டார்களா?” ஆனாலும், சம்பந்தப்பட்ட அந்தத் தகவல் மூலங்களால் இந்தத் தகவலைத் தனிப்பட்ட முறையில் உறுதிப்படுத்த முடியவில்லை. அதிகாரப்பூர்வமற்ற வழிகள் மூலமே அவர்கள் இதைக் கேள்விப்பட்டனர் என்றும் அவர் குறிப்பிட்டுள்ளார்.
இம்ரான் கானின் உடல்நலம் குறித்த கவலைகள்
73 வயதான கிரிக்கெட் வீரரும், அரசியல்வாதியுமான இம்ரான் கான், பல வழக்குகள் காரணமாக 2023 முதல் அதியால சிறையில் அடைக்கப்பட்டுள்ளார். தனது குடும்பத்தினரைச் சந்திப்பதில் இருந்து அதிகாரிகள் அவரைத் தடுப்பதாக அவரது கட்சியான பாகிஸ்தான் தெஹ்ரீக்-ஏ-இன்சாஃப் தொடர்ந்து குற்றம் சாட்டி வருகிறது. கண் தொடர்பான பாதிப்பு உள்ளிட்ட அவரது உடல்நலப் பிரச்சினைகளுக்குப் போதுமான மருத்துவச் சிகிச்சை அளிக்கப்படவில்லை என்றும் அவர்கள் கூறுகின்றனர்.
செவ்வாய்க்கிழமை இம்ரான் கானின் உடல்நலம் குறித்த கவலைகள் அதிகரித்த நிலையில், முன்னாள் பிரதமரைச் சந்திக்கத் தங்கள் குடும்பத்தினருக்கும் கட்சி சகாக்களுக்கும் அனுமதி மறுக்கப்படுவதாக அவர்கள் தெரிவித்தனர்.
கைபர் பக்துன்க்வா மாகாண முதலமைச்சரும் பிடிஐ கட்சி தலைவருமான சோஹைல் அஃப்ரிடி, “இருபது லட்சத்திற்கும் அதிகமான மக்கள் வீதிகளில் இறங்கிப் போராடத் தயாராக உள்ளனர்” என்று கூறினார். பாகிஸ்தான் அரசாங்கத்தைக் குறிவைத்து, “அந்நாட்டு இளைஞர்களிடையே நிலவும் கோபத்தைக் கட்டுப்படுத்த முடியாத நிலை ஏற்படலாம்” என்று அவர் எச்சரித்தார்.
“நாங்கள் இம்ரான் கானின் உடல்நல விவகாரத்தை அரசியலாக்குவதில்லை. அதேவேளையில், எவ்விதச் சலுகையையும் பெறுவதற்காக இம்ரான் கான் தனது உடல்நலப் பிரச்சினையை ஒருபோதும் முன்வைத்ததில்லை” என்று அஃப்ரிடி கூறியிருந்தார்.
இம்ரான் கானைச் சந்திக்க அவரது குடும்பத்தினருக்கும் கட்சி சகாக்களுக்கும் அனுமதி மறுக்கப்பட்டால், செப்டம்பர் 27-ஆம் தேதி இஸ்லாமாபாத்தை நோக்கி நடத்தப்படவுள்ள பேரணிக்கு முன்னதாகவே போராட்டங்கள் நடத்தப்படும் என்று எச்சரித்துள்ள பிடிஐ கட்சி, அந்தப் பேரணியையும் அறிவித்துள்ளது.
இம்ரான் கானின் நீண்டகால சிறைவாசம், அவரது உடல்நலம் குறித்த கவலைகள் காரணமாக, பாகிஸ்தான் அரசாங்கம் உள்நாட்டிலும் வெளிநாடுகளிலும் கடும் அழுத்தத்திற்கு உள்ளாகியுள்ளது. அமெரிக்காவின் இரு கட்சிகளைச் சேர்ந்த 13 நாடாளுமன்ற உறுப்பினர்கள், அமெரிக்க வெளியுறவுத்துறை அமைச்சர் மார்கோ ரூபியோவுக்குக் கடிதம் ஒன்றை எழுதியுள்ளனர். அதில், இம்ரான் கான் மற்றும் அவரது மனைவி புஷ்ரா பிபி ஆகியோரின் சிறைவாசம் தொடர்பான சூழல் குறித்து பாகிஸ்தானிடம் நேரடியாகப் பேசுமாறு அவர்கள் வலியுறுத்தியுள்ளனர்.
முன்னாள் பிரதமர் இம்ரான் கானின் நீண்டகாலத் தனிமைச் சிறைவாசம், அவரது நல்வாழ்வு குறித்த கவலைகள் தொடர்பாக ஐக்கிய நாடுகள் சபையின் சிறப்புப் பிரதிநிதி தெரிவித்த கருத்துக்களை அந்தக் கடிதம் சுட்டிக்காட்டியுள்ளது.