தருமபுரி மாவட்டமே இன்று பதற்றத்தில் உறைந்து கிடக்கிறது. காரணம், ஒன்றல்ல… இரண்டு சீட்டு நிறுவனங்களின் அடுத்தடுத்த கவிழ்ப்பு!
நல்லம்பள்ளி. விவசாயம் பொய்த்துப்போன விரக்தி ஒருபுறம்… பிழைப்பு தேடி பெங்களூருக்கு கூலி வேலைக்கு ஓடும் இளைஞர் பட்டாளம் மறுபுறம்… இந்த வெற்றிடத்துக்குள்தான் மிகச் சரியாக நுழைந்தது அந்த மந்திரக்குரல்…
“மாசம் 5,000 கட்டுங்க… 2 வருஷத்துல 2 லட்சம் அள்ளுங்க!”
முழங்கியது ‘ரத்னா’ சிட்பண்ட் சாம்ராஜ்யம்!
இனிப்பு தடவிய வலை!
ஆரம்பத்தில் எல்லாமே இனிப்பாகத்தான் இருந்தது. சொன்ன தேதியில் பணம் வந்தது. சிரித்த முகத்தோடு ரசீது கொடுத்தார்கள். ஊரே நம்பியது. ‘தெரிஞ்ச முகம்தானே… பக்கத்துத் தெரு ஏஜெண்டுதானே…’ என்று சிலர் ரசீதுகூட வாங்காமல் லட்சம் லட்சமாக அள்ளிக் கொடுத்தார்கள்.
அதன்பிறகுதான் திரைக்கதை மாறியது.
முதலில் “சர்வர் பிரச்னை” என்றார்கள். பிறகு “ஆடிட்டிங் நடக்கிறது” என்றார்கள். கடைசியில்…? கண்ணாடி முகப்புடன் பிரம்மாண்டமாக நின்ற ‘RATHINAA BUSINESS PARK’ கட்டடத்தின் ஷட்டர் மட்டும் இறக்கப்பட்டுக் கிடந்தது. பதில் சொல்ல ஆளில்லை!
“என் மகள் கல்யாணத்துக்காக 3 வருஷமா கட்டினேன் சார்… இப்போ ஆபீஸ் பூட்டிக் கிடக்கு!” – நல்லம்பள்ளி தாய் ஒருவரின் இந்த ஒற்றைக் குரல், இன்று நூற்றுக்கணக்கான குடும்பங்களின் ஓலமாக மாறி நிற்கிறது.
அதிரடி கைது!
போச்சம்பள்ளியில் சீட்(டிங்) புள்ளி!
பணம் போட்டவர்கள் இரவோடு இரவாக அலுவலகத்தை முற்றுகையிட… அந்த வீடியோக்கள் சமூக வலைதளங்களில் தீயாய்ப் பரவ… களத்தில் இறங்கியது காக்கிச்சட்டை. அதியமான்கோட்டை காவல் நிலையம் (B2) முன்பு வெள்ளை நிற ஜீப்புகள் வரிசை கட்டின.
தலைமறைவாக ஓடிக்கொண்டிருந்த ‘ரத்னா சீட்ஸ்’ அதிபர் ஹரிகிருஷ்ணன், அக்டோபர் 25, 2026 (நேற்று) போச்சம்பள்ளி அருகே அதிரடியாக அமுக்கப்பட்டார்!
ரியல் எஸ்டேட் ஒரு பக்கம், சிட்பண்ட் இன்னொரு பக்கம் என இரட்டைக் குதிரை சவாரி செய்தவர் மீது, சுமார் ₹100 கோடிக்கும் மேல் மோசடி எனப் புகார்கள் குவிகின்றன. தருமபுரி, பாலக்கோடு, அரூர், மொரப்பூர், பென்னாகரம், காரிமங்கலம், கிருஷ்ணகிரி, ஓசூர், காவேரிப்பட்டினம் என 9 இடங்களில் கிளைகளைப் பரப்பி வலை விரித்திருக்கிறது இந்த நெட்வொர்க்.
இப்போது அவர் சிறையில். வழக்கு பொருளாதாரக் குற்றப்பிரிவு (EOW) கைக்கு மாறும் நிலையில் உள்ளது.
ரத்னா அதிர்வு அடங்கும் முன்… அடுத்த பூகம்பம்!
‘கயல் பெனிபிட் சிட்ஸ் (பி) லிட்’!
அதே டைலர், அதே வாடகை என்பதைப் போல… அதே ஸ்கிரிப்ட், அதே கதறல். “சீட்டு எடுத்த பணம் கைக்கு வரல… கேட்டா பதில் இல்ல!”
ஆத்திரமடைந்த மக்கள் நேற்று இரவு கயல் அலுவலகத்தையும் முற்றுகையிட, அந்தக் காட்சிகள் சமூக வலைதளங்களில் தீயாய்ப் பரவின. போலீஸ் விரைந்து வந்து சமாதானம் பேசியது.
இதற்கிடையில் இன்று காலை கயல் தரப்பிலிருந்து ஒரு ‘விளக்க கார்டு’ பறக்கிறது: “மக்களின் பணம் எங்களுக்குத் தேவையில்லை. விரைவில் தருகிறோம்.”
பாதிக்கப்பட்டவர்களோ, “இது வெறும் கண்துடைப்பு! எங்களுக்கு எழுத்துப்பூர்வ உத்தரவாதம் வேண்டும்!” எனச் சீறுகிறார்கள்.
ரத்னா அதிபர் சிறையில் இருக்க, கயல் நிறுவனத்தின் நிர்வாக இயக்குநர் டாக்டர் இ.வெ. அறிவழகன், இயக்குநர் பௌன்ராஜ் மணிகண்டன் ஆகியோர் தலைமறைவாகிவிட்டனர்!
போலீஸ் வலைவீசித் தேடத் தொடங்கியிருப்பதாகக் கூறப்படுகிறது.
ஆட்சியரின் எச்சரிக்கை!
இது தருமபுரிக்கு முதல் முறையல்ல என்கிறது வரலாறு. ஏற்கனவே Perfect Visions Chits, DNC Chits மீது EOW சோதனை நடந்த பூமி இது. அதனால்தான் அக்டோபர் 15, 2026 அன்றே மாவட்ட ஆட்சியர் வே.சரவணன் அலறியிருக்கிறார்: “2 ஆண்டில் பணம் இரட்டிப்பு என்றால் உஷார்! ரசீது இல்லாமல் ரொக்கம் கேட்டால் டேஞ்சர்!” என்று
வழக்கறிஞர் மகேஷ்வரன் சொல்வதுதான் மைய முடிச்சு: “தெரிஞ்ச முகம், பக்கத்து வீட்டு ஏஜெண்ட் என்று நம்பித்தான் பணத்தைக் கொடுக்கிறார்கள். அந்த நம்பிக்கைதான் இவர்களின் மூலதனம்!”
இப்போது கயல் நிறுவனத்தால் பாதிக்கப்பட்டவர்கள் ஒன்றிணைந்து ஆட்சியரிடம் மனு கொடுக்கத் திட்டமிட்டுள்ளனர். போலீஸ் தரப்போ, “புகார் வந்தால் EOW-க்கு மாற்றுவோம்” என்கிறது.
நல்லம்பள்ளியில் பற்றிய தீ, தருமபுரி நகருக்கும் பரவிவிட்டது. ரத்னாவைத் தொடர்ந்து கயல்… “அடுத்தது நம்ம நிறுவனம்கூட இப்படி இருக்கலாமோ?” என்ற அச்சத்தில் உறைந்து கிடக்கிறார்கள் தருமபுரி சுற்றுவட்டார மக்கள்.
விழிப்புணர்வு குறிப்பு: ரிசர்வ் வங்கி (RBI) அல்லது அரசிடம் பதிவு செய்யப்படாத, அதிக வட்டி தருவதாகக் கூறும் சீட்டு நிறுவனங்களில் பொதுமக்கள் தங்கள் பணத்தை முதலீடு செய்ய வேண்டாம் எனப் பொருளாதாரக் குற்றப்பிரிவு போலீஸார் தொடர்ந்து எச்சரித்து வருகின்றனர்.
• தொடரும்…