“விஜய் அண்ணன் இல்லாத சினிமா ஏமாற்றம் தான்.. ஆனா..” – மேடையில் ஓப்பனாக பேசிய சூரி!

கோவையில் தனது புதிய திரைப்படமான ‘மண்டாட்டி’ படத்தின் விளம்பரப் பணிகளின்போது செய்தியாளர்களைச் சந்தித்த நடிகர் சூரி, சினிமாவில் நடிகர் விஜய் இல்லாதது ஒரு பெரிய ஏமாற்றம் என்றும், அந்த இடத்தை யாராலும் நிரப்ப முடியாது என்றும் தெரிவித்துள்ளார். மேலும், விஜய்யுடனான தனது படப்பிடிப்பு அனுபவங்கள், தற்போதைய அரசியல் சூழல், மீனவர்களின் வாழ்க்கை மற்றும் தனது ஆரம்பகால சினிமா அனுபவங்கள் குறித்தும் பல்வேறு தகவல்களைப் பகிர்ந்து கொண்டுள்ளார்.

விஜய் சினிமா துறையில் இல்லாதது தனக்கு மிகப்பெரிய ஏமாற்றம் என்றும், சினிமாவில் அவர் விட்டுச் சென்ற இடத்தை யாராலும் நிரப்ப முடியாது என்றும் சூரி தெரிவித்துள்ளார். அதேநேரத்தில், விஜய் செட்டில் ஒரு குழந்தையைப் போல நகைச்சுவைக்கு சிரிப்பார் என்றும் தனது பழைய நினைவுகளைப் பகிர்ந்து கொண்டுள்ளார்.

2014-ம் ஆண்டு வெளியான ‘ஜில்லா’ திரைப்படத்தின் படப்பிடிப்பின்போது நடைபெற்ற ஒரு சம்பவத்தையும் சூரி நினைவுகூர்ந்துள்ளார். ஒரு காட்சியில் தனது ரியாக்ஷனைப் பார்த்த விஜய்யால் சிரிப்பைக் கட்டுப்படுத்த முடியாமல், ஷாட்டின் பாதியிலேயே அங்கிருந்து ஓடிவிட்டதாகவும், பின்னர் தன்னிடம் மன்னிப்பு கேட்டுவிட்டு மீண்டும் சிரிப்பை அடக்க முயன்றதாகவும் சூரி தெரிவித்துள்ளார்.

விஜய் அரசியலுக்கு வந்த பிறகு, மக்கள் மற்றும் குழந்தைகள் மத்தியில் அரசியல் விழிப்புணர்வு அதிகரித்துள்ளதாகவும் சூரி குறிப்பிட்டுள்ளார். முன்பெல்லாம் இல்லாத வகையில், தற்போது சிறு குழந்தைகள் கூட காலை முதல் மாலை வரை சட்டப்பேரவையில் என்ன நடக்கிறது என்பதை கவனித்து வருவதாகவும், எம்.எல்.ஏ.க்களை அடையாளம் கண்டு அரசியல் குறித்து பேசுவது ஆரோக்கியமான மாற்றம் என்றும் அவர் தெரிவித்துள்ளார்.

தனது அடுத்த திரைப்படமான ‘மண்டாட்டி’ படத்தில் மீனவராக நடித்திருப்பது தனக்குக் கிடைத்த பாக்கியம் என்றும் சூரி தெரிவித்துள்ளார். நாம் கடைகளில் மீன் வாங்கும்போது விலையைப் பற்றி பேரம் பேசுகிறோம்; ஆனால், மீனவர்கள் தங்களது உயிருக்கு எந்த உத்தரவாதமும் இல்லாமல் கடலுக்குள் சென்று மீன்பிடித்து வருகிறார்கள் என்ற உண்மையை இந்தப் படத்தில் நடித்த பிறகுதான் உணர்ந்ததாகவும் அவர் உருக்கமாகத் தெரிவித்துள்ளார்.

செப்டம்பர் 10-ம் தேதி வெளியாகவுள்ள ‘மண்டாட்டி’ திரைப்படம், கடலோரத் தமிழ்நாட்டில் பாரம்பரியமாக நடத்தப்படும் பாய்மரப் படகுப் போட்டிகள் மற்றும் மீனவர்களின் வாழ்வியலை மையமாகக் கொண்டது என்றும் சூரி தெரிவித்துள்ளார்.

இதனிடையே, தனது ஆரம்பகால சினிமா வாழ்க்கையில் தனக்கு நேர்ந்த அதிர்ச்சிகரமான சம்பவம் குறித்தும் சூரி மனம் திறந்து பேசியுள்ளார். சினிமாவில் துணை நடிகராக நுழைந்த ஆரம்பகட்டத்தில், முன்னணி நகைச்சுவை நடிகர் மற்றும் முன்னணி கதாநாயகன் நடித்த பெரிய திரைப்படத்தில் நடிக்கும் வாய்ப்பு தனக்குக் கிடைத்ததாக அவர் கூறியுள்ளார். அந்த வாய்ப்புதான் தனது வாழ்க்கையின் திருப்புமுனையாக அமையும் என நம்பியதாகவும் தெரிவித்துள்ளார்.

ஆனால், தான் நடித்த காட்சியை மானிட்டரில் பார்த்த பிறகு, இயக்குநரும் அந்தப் படத்தின் கதாநாயகனும் தனியாகப் பேசிக்கொண்டதாகவும், அதன்பின்னர் தன்னை திடீரென அந்தப் படத்திலிருந்து நீக்கியதாகவும் சூரி தெரிவித்துள்ளார். பின்னர், சினிமா பின்னணி அல்லது செல்வாக்கு கொண்ட மற்றொரு நடிகரை அந்தக் கதாபாத்திரத்தில் உடனடியாக நடிக்க வைத்ததாகவும் அவர் கூறியுள்ளார்.

தான் அணிந்திருந்த சட்டையைக் கழற்றி அந்தப் புதிய நடிகரிடம் கொடுக்குமாறு படக்குழுவினர் கேட்டதாகவும், தனது சட்டை பறிக்கப்பட்டு காஸ்ட்யூம் வண்டியில் வீசப்பட்டதாகவும் சூரி வேதனையுடன் தெரிவித்துள்ளார். பின்னர் இடுப்பில் துண்டைக் கட்டிக்கொண்டு தனது சொந்த ஆடைகளைத் தேடி அலைந்ததாகவும், அந்தச் சம்பவம் தனக்கு மிகுந்த அவமானத்தையும் கடுமையான மன உளைச்சலையும் ஏற்படுத்தியதாகவும் அவர் கண்கலங்கிப் பேசியுள்ளார்.

சினிமாவில் இதுபோன்ற பல அவமானங்களையும் போராட்டங்களையும் கடந்து வந்துதான் இன்று ஒரு கதாநாயகனாக சாதித்திருப்பதாக சூரியின் பேச்சு ரசிகர்களிடையே நெகிழ்ச்சியை ஏற்படுத்தியுள்ளது.

‘மண்டாட்டி’ திரைப்படத்தைத் தொடர்ந்து, ‘இன்று நேற்று நாளை’ மற்றும் ‘அயலான்’ ஆகிய படங்களை இயக்கிய ஆர்.ரவிகுமார் இயக்கத்தில் சூரி நடிக்கும் அடுத்த திரைப்படம் குறித்தும் அதிகாரப்பூர்வமாக அறிவிக்கப்பட்டுள்ளது. இந்தப் படத்தின் படப்பிடிப்பு செப்டம்பர் இறுதியில் தொடங்கவுள்ளதாக தெரிவிக்கப்பட்டுள்ளது.