குழந்தைகளுக்கான பாராசிட்டமால் சிரப்பில் 95 சதவீதம் ஆல்கஹால் கலக்கப்படுவதாக சமூக வலைத்தளங்களில் பரவி வந்த தகவல் முற்றிலும் தவறானது என்றும், அது மக்களிடையே தேவையற்ற அச்சத்தை ஏற்படுத்தும் ஆதாரமற்ற வதந்தி என்றும் தமிழக சுகாதாரத்துறை அதிகாரப்பூர்வமாக விளக்கம் அளித்துள்ளது.
சமீபத்தில், சமூக வலைத்தளங்களிலும், யூடியூப் தளத்திலும் வெளியான ஒரு வீடியோவில், அரசு மருத்துவமனைகளில் குழந்தைகளுக்கு காய்ச்சலுக்காக வழங்கப்படும் பாராசிட்டமால் சிரப்பில் 95 சதவீதம் ஆல்கஹால் இருப்பதாகவும், அது விதிமுறைகளை மீறி தயாரிக்கப்படுவதாகவும் குற்றச்சாட்டு முன்வைக்கப்பட்டது. இந்த தகவல் சமூக வலைத்தளங்களில் வேகமாக பரவியதால் பெற்றோர்கள் மத்தியில் குழப்பமும் அச்சமும் ஏற்பட்டது.
இதையும் படியுங்க:- யாருக்குத் துணையாகப் போகிறார் தினகரன்..? எடப்பாடியின் மாஸ்டர் ஸ்ட்ரோக்..!
இந்த விவகாரம் பெரும் சர்ச்சையை ஏற்படுத்திய நிலையில், தமிழக சுகாதாரத்துறை விரிவான விளக்கத்தை வெளியிட்டுள்ளது.
சுகாதாரத்துறை அதிகாரிகள் கூறுகையில், பாராசிட்டமால் போன்ற மருந்துகள் தண்ணீரில் எளிதில் கரையக்கூடியவை அல்ல. அதனால் அவற்றை திரவ வடிவில் தயாரிக்க, மிகக் குறைந்த அளவில் ஆல்கஹால் கரைப்பானாக (Solvent) பயன்படுத்தப்படுவது உலகம் முழுவதும் மருத்துவத் துறையில் பின்பற்றப்படும் வழக்கமான நடைமுறையாகும் என்று தெரிவித்துள்ளனர்.
மேலும், மருந்தில் ஆல்கஹால் சேர்க்கப்படுவது மருத்துவ விதிமுறைகளுக்கு உட்பட்ட பாதுகாப்பான அளவிலேயே இருக்கும் என்றும் அவர்கள் விளக்கம் அளித்துள்ளனர்.
இதையும் படியுங்க:- சவரன் தங்கமே ₹90 தானா?! 10 ரூபாயில் ‘ராஜ வாழ்க்கை’ வாழ்ந்த 1960-ன் மிரட்டல் உண்மைகள்!
ஒரு 60 மில்லிலிட்டர் (60 ml) பாராசிட்டமால் சிரப் பாட்டிலில் அதிகபட்சமாக 10 சதவீதம், அதாவது 6 மில்லிலிட்டர் அளவில்தான் ஆல்கஹால் பயன்படுத்தப்படும். மீதமுள்ள 54 மில்லிலிட்டர் பகுதி மருந்தின் செயற்பாட்டு மூலப்பொருட்கள் மற்றும் பிற பாதுகாப்பான கலவைகளைக் கொண்டதாக இருக்கும் என்று அதிகாரிகள் தெரிவித்துள்ளனர்.
சமூக வலைத்தளங்களில் பரவிய தகவலில் குறிப்பிடப்பட்டுள்ள “95% Alcohol” என்பது மருந்தில் உள்ள ஆல்கஹாலின் அளவைக் குறிக்கவில்லை என்றும், மருந்து தயாரிப்பில் பயன்படுத்தப்படும் ஆல்கஹாலின் தூய்மைத் தன்மையை (Purity அல்லது Strength) மட்டுமே குறிக்கிறது என்றும் சுகாதாரத்துறை தெளிவுபடுத்தியுள்ளது.
அதாவது, 95 சதவீத தூய்மையுள்ள ஆல்கஹாலை மிகக் குறைந்த அளவில் மட்டுமே மருந்துடன் கலந்து பயன்படுத்துகின்றனர். இதனை தவறாகப் புரிந்துகொண்டு, மருந்தில் 95 சதவீதம் ஆல்கஹால் இருப்பதாக கூறுவது முற்றிலும் தவறான விளக்கம் என்று அதிகாரிகள் தெரிவித்துள்ளனர்.
இதையும் படியுங்க:- சி.விஜயபாஸ்கருக்கு பேரிடியை இறக்கிய செய்தி..! உயர் நீதிமன்றம் அதிரடி..!
மேலும், குழந்தைகளுக்காக தயாரிக்கப்படும் பாராசிட்டமால் சிரப்புகள் அனைத்தும் இந்திய மருந்து கட்டுப்பாட்டு விதிமுறைகளின்படி, கடுமையான தரப் பரிசோதனைகளுக்குப் பிறகே தயாரிக்கப்பட்டு மருத்துவமனைகளுக்கு விநியோகிக்கப்படுகின்றன என்றும் சுகாதாரத்துறை தெரிவித்துள்ளது.
மத்திய சுகாதார அமைச்சகத்தின் நடைமுறைகளின்படி, 12 சதவீதத்திற்கும் அதிகமான ஆல்கஹால் கொண்ட எந்தவொரு வாய்வழி திரவ மருந்தையும் (Oral Formulation) மருத்துவரின் பரிந்துரைச் சீட்டு இல்லாமல் மருந்தகங்களில் விற்பனை செய்ய அனுமதி இல்லை என்பதையும் அதிகாரிகள் நினைவூட்டியுள்ளனர்.
குழந்தைகளின் உடல்நலம் தொடர்பான விஷயங்களில் போதிய மருத்துவ அறிவு இல்லாமல் சமூக வலைத்தளங்களில் தவறான தகவல்களைப் பரப்புவது பொதுமக்களிடையே தேவையற்ற அச்சத்தை ஏற்படுத்தும் என்றும், குறிப்பாக யூடியூப் உள்ளிட்ட சமூக ஊடகங்களில் செயல்படும் உள்ளடக்க உருவாக்குநர்கள் (Content Creators) உண்மைத் தகவல்களை உறுதி செய்த பிறகே கருத்துகளை வெளியிட வேண்டும் என்றும் சுகாதாரத்துறை வேண்டுகோள் விடுத்துள்ளது.
மேலும், அரசு மருத்துவமனைகளில் வழங்கப்படும் மருந்துகளின் தரம் குறித்து ஆதாரமற்ற குற்றச்சாட்டுகளை முன்வைத்து, பொதுமக்களை தவறாக வழிநடத்தும் வகையில் தகவல்களைப் பரப்புவோர் மீது சட்டப்படி நடவடிக்கை எடுக்கப்படும் என்றும் சுகாதாரத்துறை எச்சரித்துள்ளது.
இதையும் படியுங்க:- அவர் CM இல்ல.. என் தம்பி!” – ஓடிவந்து முதலமைச்சர் காரை மறித்த ‘வேலு அம்மா’ டி.கே. கலா! நெகிழவைக்கும் பின்னணி!
அரசு மருத்துவமனைகளில் வழங்கப்படும் அனைத்து மருந்துகளும் தரநிலைகள் மற்றும் பாதுகாப்பு வழிகாட்டுதல்களை முழுமையாகப் பின்பற்றி தயாரிக்கப்பட்டு, பொதுமக்களின் நலனை கருத்தில் கொண்டு மட்டுமே மருத்துவமனைகளுக்கு விநியோகிக்கப்படுகின்றன என்றும் சுகாதாரத்துறை மீண்டும் உறுதியளித்துள்ளது.
எனவே, குழந்தைகளின் உடல்நலம் தொடர்பான தகவல்களை சமூக வலைத்தளங்களில் பார்ப்பதற்குப் பதிலாக, மருத்துவர்கள் மற்றும் சுகாதாரத்துறை வெளியிடும் அதிகாரப்பூர்வ விளக்கங்களையே பொதுமக்கள் நம்ப வேண்டும் என்றும் மருத்துவ நிபுணர்கள் வலியுறுத்தியுள்ளனர்.