பிரபல சின்னத்திரை மற்றும் வெள்ளித்திரை நடிகையான லதா ராவ் (Latha Rao) சமீபத்தில் வெளியிட்ட உருக்கமான வீடியோ ஒன்று சமூக வலைத்தளங்களில் வைரலாகி வருகிறது. தீபாவளி நாளன்று தனது பயணத்தின்போது டாக்ஸி ஓட்டுநர் ஒருவருடன் நிகழ்ந்த நெகிழ்ச்சியான சம்பவத்தை அந்த வீடியோவில் அவர் பகிர்ந்துள்ளார். பண்டிகைக் காலத்திலும் குடும்பச் சூழ்நிலையையும் பொருட்படுத்தாமல் உழைக்கும் ஓட்டுநர்களின் வாழ்க்கை, கணவன் – மனைவி இடையேயான அன்பு மற்றும் மனிதநேயம் குறித்து அவர் பேசியிருப்பது பலரையும் நெகிழ்ச்சியடையச் செய்துள்ளது.
இதுகுறித்து லதா ராவ் தனது வீடியோவில் கூறியதாவது:
“தீபாவளி அன்று என்னைக் கண்கலங்க வைத்த ஒரு சம்பவத்தை உங்களுடன் பகிர்ந்துகொள்ள வேண்டும் என்று தோன்றியது. அன்று மாலை நான் ஒரு கேப் வாகனத்தில் பயணம் செய்தேன். வாகனத்தில் ஏறியதும் ஓட்டுநர் சிரித்த முகத்துடன், ‘குட் ஈவினிங் மேடம், ஹேப்பி தீபாவளி’ என்று வாழ்த்தினார்.
தொடர்ந்து, ‘சீட் பெல்ட் அணிந்துகொள்ளுங்கள் மேடம்’ என்று பணிவுடன் கேட்டுக்கொண்டார். மேலும், ‘உங்களுக்குத் தேவையான பொருட்கள் அனைத்தையும் எடுத்துக்கொண்டீர்களா என்று ஒருமுறை சரிபார்த்துக்கொள்ளுங்கள். நான் வாகனத்தை எடுக்கட்டுமா?’ என்றும் கேட்டுவிட்டுப் பயணத்தைத் தொடங்கினார்.
ஆரம்பத்தில் அந்த ஓட்டுநரின் பணிவான அணுகுமுறை எனக்கு ஆச்சரியமாக இருந்தது. சிறிது நேரம் சென்றதும் அவருக்கு அடிக்கடி தொலைபேசி அழைப்புகள் வந்துகொண்டிருந்தன. அப்போது என்னிடம் அனுமதி கேட்ட அவர், ‘மேடம், ஒரு வீடியோ கால் பேசிக்கொள்ளலாமா?’ என்று கேட்டார். நானும் பேசிக்கொள்ளுங்கள் என்று கூறினேன். ஆனால், வாகனத்தை ஓட்டிக்கொண்டே பேசாமல் சாலையோரம் பாதுகாப்பாக நிறுத்திவிட்டு வீடியோ காலில் பேசினார்.
அப்போது, ‘ஹாய் அம்மு, சாப்பிட்டாயா? டேப்லெட்டுகள் எல்லாம் ஒழுங்காகப் போட்டாயா? முகம் ஏன் வாடியிருக்கிறது? சரியாகத் தூங்கவில்லையா? குழந்தை உன்னை மிகவும் சிரமப்படுத்துகிறாளா? மாமா இன்று சீக்கிரமாகப் பணியை முடித்துவிட்டு வந்துவிடுகிறேன். வந்ததும் குழந்தையைப் பார்த்துக்கொள்கிறேன். நீ நிம்மதியாகத் தூங்கு. வரும்போது உனக்குப் புதிய ஆடை வாங்கிக்கொண்டு வருகிறேன்’ என்று அன்புடன் பேசிக்கொண்டிருந்தார்.
அவர் தனது மனைவியிடம்தான் பேசுகிறார் என்பதைப் புரிந்துகொண்டேன். ஆனால், மறுமுனையில் இருந்து எந்தப் பதிலும் வராததால் எனக்குச் சந்தேகம் ஏற்பட்டது. உடனே திரும்பி கைப்பேசித் திரையைப் பார்த்தபோது அதிர்ச்சியடைந்தேன்.
மறுமுனையில் இருந்த பெண்ணின் கையில் ஐ.வி. திரவம் செலுத்துவதற்கான குழாய் பொருத்தப்பட்டிருந்தது. அவர் ஆக்சிஜன் முகக்கவசம் அணிந்தபடி ஒரே இடத்தில் பார்வையைச் செலுத்திக்கொண்டிருந்தார். அவரது உடல்நிலை மிகவும் பாதிக்கப்பட்டிருப்பது தெரிந்தது.
இதையடுத்து, ‘என்ன ஆனது?’ என்று அந்த ஓட்டுநரிடம் கேட்டேன். அதற்கு அவர், ‘மேடம், எனது மனைவிக்குக் குழந்தைப் பிறப்பின்போது ஏதோ பிரச்சினை ஏற்பட்டது. கடந்த நான்கு மாதங்களாக அவர் கோமா நிலையில் இருந்தார்.
இப்போதுதான் கொஞ்சம் கொஞ்சமாகக் குணமடைந்து வருகிறார். குழந்தை பிறந்ததுகூட அவருக்குத் தெரியாது. இன்னும் அவருக்குப் பேச்சு வரவில்லை. நான் பேசுவதைச் சில நேரங்களில் தலையசைத்துக் கேட்பார். அதனால், அவரிடம் தொடர்ந்து பேசிக்கொண்டிருக்க வேண்டும். இதற்காக அவ்வப்போது எனது அம்மாவிடம் அவருடன் பேசச் சொல்லி அழைப்பேன்.
பகல் முழுவதும் கேப் ஓட்டுவேன். இரவு முழுவதும் மனைவியுடன் மருத்துவமனையில் இருப்பேன். குழந்தையையும் நான்தான் பார்த்துக்கொள்கிறேன்’ என்று கூறினார்.
அப்போது, ‘நீங்கள் எப்போது தூங்குவீர்கள்?’ என்று கேட்டேன். அதற்கு, ‘மருத்துவமனையில் அவருக்குச் சிகிச்சைக்காகத் திரவங்கள் செலுத்தப்படும் இடைப்பட்ட நேரத்தில் கிடைக்கும் சிறிய இடைவெளியில் தூங்கிக்கொள்வேன்’ என்று தெரிவித்தார்.
இதைக் கேட்டதும் நான் மிகவும் மனவேதனை அடைந்தேன். ஆனால், உடனே அவர், ‘மேடம், என்னைப் பரிதாபமாகப் பார்க்காதீர்கள். நான் எனது மனைவிக்காக இதையெல்லாம் மகிழ்ச்சியுடன்தான் செய்துகொண்டிருக்கிறேன்’ என்றார்.
அவருக்கு ஏதாவது பண உதவி தேவைப்படுகிறதா என்று கேட்டபோது, ‘இல்லை மேடம். உங்கள் பிரார்த்தனையில் எனது மனைவியை நினைத்துக்கொள்ளுங்கள்’ என்று மட்டும் கேட்டுக்கொண்டார். பயணக் கட்டணத்தைத் தவிர ஒரு ரூபாய்கூடக் கூடுதலாகப் பெறாமல் என்னை இறக்கிவிட்டுச் சென்றார்.
ஆனால், அந்தச் சம்பவம் என் மனதைவிட்டு இன்னும் நீங்கவில்லை. மனைவியின் உடல்நிலை பாதிக்கப்பட்டிருக்கும்போது கணவர் அவரைக் கவனித்துக்கொள்வது இயல்பான விஷயம்தானே என்று சிலர் நினைக்கலாம். ஆனால், அவர் அதை ஒரு சுமையாகவோ கடமையாகவோ கருதாமல், மகிழ்ச்சியுடன் செய்துகொண்டிருக்கிறார் என்பதுதான் என்னை மிகவும் நெகிழச் செய்தது. சுமார் 28 வயதுதான் இருக்கும் அந்த இளைஞரிடம் இத்தகைய பக்குவமும் அன்பும் இருப்பது உண்மையிலேயே பெரிய விஷயம்.
இனிமேல் அவரது மனைவி விரைவில் பூரண குணமடைய வேண்டும் என்று மனதாரப் பிரார்த்திக்கிறேன்” என்று லதா ராவ் தெரிவித்துள்ளார்.
தீபாவளி நாளில் தனது குடும்பத்தினருடன் மகிழ்ச்சியாக இருக்க வேண்டிய நேரத்திலும், மனைவியின் சிகிச்சைக்காகப் பகலில் உழைத்து, இரவில் அவரைக் கவனித்துக்கொண்டு, குழந்தையையும் பொறுப்புடன் வளர்த்து வரும் அந்த இளம் கணவரின் அன்பும் அர்ப்பணிப்பும் பலரது மனங்களையும் தொட்டுள்ளது. நடிகை லதா ராவ் பகிர்ந்த இந்தச் சம்பவம் தற்போது சமூக வலைத்தளங்களில் பரவலாகப் பகிரப்பட்டு வருகிறது.