தமிழ்நாடு அரசின் ஊரக வளர்ச்சித் துறைக்குச் சொந்தமான வங்கிக் கணக்குகளில் இருந்து மொத்தம் ரூ.22.10 கோடி ஆன்லைன் வாயிலாக மோசடி செய்யப்பட்டுள்ள சம்பவம் பெரும் அதிர்ச்சியை ஏற்படுத்தியுள்ளது. தமிழகம் முழுவதும் உள்ள பல்வேறு ஊராட்சி ஒன்றியங்களின் வங்கிக் கணக்குகளில் இருந்து அரசுத் திட்டங்களுக்காக ஒதுக்கப்பட்ட நிதி திருடப்பட்டிருப்பது தற்போது வெளிச்சத்திற்கு வந்துள்ளது. இதுதொடர்பாக சென்னை சைபர் கிரைம் காவல்துறையினர் வழக்குப் பதிவு செய்து தீவிர விசாரணை நடத்தி வருகின்றனர்.
முதற்கட்டத் தகவல்களின்படி, ராமநாதபுரம் மாவட்டம் மண்டபம் ஊராட்சி ஒன்றியத்தின் வங்கிக் கணக்கிலிருந்து ரூ.14 கோடியும், நாகப்பட்டினம் ஊராட்சி ஒன்றியக் கணக்கிலிருந்து ரூ.3.10 கோடியும் திருடப்பட்டுள்ளது. இதனைத் தொடர்ந்து, திருப்பூர் மாவட்டம் தாராபுரம் ஊராட்சி ஒன்றியத்தின் கணக்கிலிருந்து ரூ.5 கோடி மோசடி செய்யப்பட்டிருப்பதும் உறுதி செய்யப்பட்டுள்ளது. இவ்வாறு மூன்று ஊராட்சி ஒன்றியங்களின் கணக்குகளில் இருந்து மொத்தம் ரூ.22.10 கோடி அபேஸ் செய்யப்பட்டுள்ளது.
இந்தப் பணம் அனைத்தும் 15-ஆவது நிதிக்குழு மானியத்தின் கீழ், ஊரகப் பகுதிகளில் தலா ரூ.50 லட்சம் மதிப்பீட்டில் சுகாதார நல மையக் கட்டடங்கள் கட்டுவதற்காக ஒதுக்கப்பட்ட திட்ட நிதியாகும். தமிழகத்தின் பல்வேறு ஊராட்சிகளில் நடைபெறும் இந்தக் கட்டடப் பணிகளுக்கான நிதி ஒதுக்கீடு மற்றும் பரிவர்த்தனைகளைக் கண்காணிப்பதற்காக, ஊரக வளர்ச்சித் துறை சார்பில் சென்னையில் மாநில அளவிலான ஒற்றை மைய வங்கிக் கணக்கு (Single Nodal Account) பராமரிக்கப்பட்டு வருகிறது. இந்தப் பிரதான கணக்கு அமைப்பில் இணையவழியாக ஊடுருவியே மோசடி நடைபெற்றுள்ளதாகக் கூறப்படுகிறது.
பொதுவாக, மாவட்ட நிர்வாகம் பணிகள் நிறைவடைந்ததற்கான அறிக்கையைச் சமர்ப்பித்த பிறகே, வட்டார வளர்ச்சி அலுவலர்கள் (BDO) வாயிலாக ஒப்பந்ததாரர்களுக்குப் பணம் விடுவிக்கப்படும். ஆனால், இந்த மோசடிக் கும்பல் இணையவழிப் பணப் பரிவர்த்தனை அமைப்புக்குள் சட்டவிரோதமாக ஊடுருவி, போலியான பரிவர்த்தனைகளை மேற்கொண்டு அரசுப் பணத்தைப் பல்வேறு வங்கிக் கணக்குகளுக்கு மாற்றியுள்ளதாகத் தெரிகிறது.
முதியவர்கள் மற்றும் பொதுமக்களின் வங்கிக் கணக்குகளைக் குறிவைத்து மோசடிகளில் ஈடுபட்டு வந்த நைஜீரிய இணையக் குற்றக் கும்பலுக்குத் (Nigerian Cyber Gang) தமிழக அரசின் நிதி மோசடியிலும் தொடர்பு இருக்கலாம் எனப் போலீசார் சந்தேகிக்கின்றனர்.
இந்தக் கும்பல் நேரடியாகச் செயல்பட்டதுடன், அவர்களுக்கு உதவுவதற்காகச் சென்னை, கோவை, திருப்பூர் உள்ளிட்ட பகுதிகளைச் சேர்ந்த சிலர் தங்களது வங்கிக் கணக்குகள் மற்றும் ஏடிஎம் அட்டைகளை கமிஷன் அடிப்படையில் பயன்படுத்த அனுமதித்திருப்பதும் விசாரணையில் தெரியவந்துள்ளதாகக் கூறப்படுகிறது.
குறிப்பாக, தினக்கூலிகள் மற்றும் ஏழை, எளிய மக்களுக்குத் தலா ரூ.5,000 முதல் ரூ.10,000 வரை கமிஷன் வழங்கி, அவர்களது வங்கிக் கணக்குகள், ஏடிஎம் அட்டைகள் மற்றும் வங்கிப் புத்தகங்களைப் பெற்றுள்ளனர். பின்னர், அந்தக் கணக்குகளைப் பணப் பரிவர்த்தனைக்கான இடைநிலைக் கணக்குகளாக (Mule Accounts) பயன்படுத்தி, அரசுப் பணத்தைப் பல நூறு போலி வங்கிக் கணக்குகளுக்கு உடனுக்குடன் மாற்றியுள்ளதாகச் சந்தேகிக்கப்படுகிறது. இதன் மூலம் பணத்தின் உண்மையான இருப்பிடத்தைக் கண்டறிவதில் சிக்கல் ஏற்படுத்தப்பட்டு, பின்னர் வெளிமாநில வங்கிக் கணக்குகளுக்குப் பணம் மாற்றப்பட்டிருக்கலாம் எனக் கூறப்படுகிறது.
மாவட்ட அளவில் வட்டார வளர்ச்சி அலுவலர்கள் மற்றும் கணக்காளர்கள் மட்டுமே அறிந்திருக்க வேண்டிய ஒற்றை மைய வங்கிக் கணக்கின் ரகசிய உள்நுழைவு அடையாள எண் (Login ID) மற்றும் கடவுச்சொற்கள் (Password) ஆகியவை மோசடிக் கும்பலின் கைகளுக்குச் சென்றது எப்படி என்பது குறித்தும் விசாரணை நடைபெற்று வருகிறது. மால்வேர் (Malware), ஃபிஷிங் (Phishing) போன்ற அதிநவீன இணையத் தாக்குதல்கள் மூலம் அதிகாரிகளின் உள்நுழைவு விவரங்கள் திருடப்பட்டிருக்கலாம் எனச் சைபர் நிபுணர்கள் சந்தேகிக்கின்றனர்.
பொதுவாக, அரசுப் பணப் பரிவர்த்தனைகளுக்கு வட்டார வளர்ச்சி அலுவலர் மற்றும் கணக்காளர் ஆகிய இருவரின் டிஜிட்டல் கையொப்பங்கள் அல்லது அங்கீகாரக் குறியீடுகள் (OTP) தேவைப்படும். ஆனால், இந்த மோசடிக் கும்பல் இரு அதிகாரிகளின் கணினிகளையும் ஒரே நேரத்தில் ஊடுருவி, அவர்கள் உள்நுழையாத நள்ளிரவு நேரங்களில் தங்களுக்குத் தேவையான ஒப்புதல்களை இணையவழியில் வழங்கி, பணத்தை வேறு கணக்குகளுக்கு மாற்றியிருக்கலாம் என்ற கோணத்திலும் விசாரணை நடைபெற்று வருகிறது.
ராமநாதபுரம் மாவட்டம் மண்டபம், நாகப்பட்டினம் மற்றும் திருப்பூர் மாவட்டம் தாராபுரம் ஆகிய மூன்று வெவ்வேறு மாவட்டங்களைச் சேர்ந்த ஊராட்சி ஒன்றியங்களின் கணக்குகள் சென்னையில் உள்ள ஒரே பிரதான சர்வர் (Main Server) மற்றும் ஒற்றை மைய வங்கிக் கணக்கு அமைப்புடன் இணைக்கப்பட்டிருந்தன.
இதனால், ஹேக்கர்கள் மாவட்ட வாரியாகத் தனித்தனியாகத் தாக்குதல் நடத்தாமல், சென்னையில் உள்ள பிரதான கணக்கு அமைப்பையே ஒட்டுமொத்தமாக ஊடுருவி மோசடி செய்திருக்கலாம் எனக் கண்டறியப்பட்டுள்ளது.
வங்கி ஊழியர்கள் மற்றும் அரசு அதிகாரிகளுக்குத் தொடர்ந்து விடுமுறை இருந்த தீபாவளிப் பண்டிகை நாட்களைக் குறிவைத்தே இந்த மோசடி அரங்கேற்றப்பட்டிருக்கலாம் எனச் சந்தேகிக்கப்படுகிறது. விடுமுறை நாட்களில் வங்கிப் பரிவர்த்தனைகளை அதிகாரிகள் உடனடியாகச் சரிபார்க்க மாட்டார்கள் என்பதைப் பயன்படுத்திக் கொண்டு, திட்டமிட்டு இந்தச் சம்பவத்தை அரங்கேற்றியிருக்கலாம் எனக் கூறப்படுகிறது.
மோசடி வெளிச்சத்திற்கு வந்ததும் மண்டபம் மற்றும் தாராபுரம் வட்டார வளர்ச்சி அலுவலர்கள் உடனடியாகத் தங்களது உள்ளூர் வங்கிக் கணக்குகளைச் சரிபார்த்துள்ளனர். அப்போது, தங்களுக்குத் தெரியாமலேயே சென்னையில் இருந்து இணையவழி ஒப்புதல்கள் வழங்கப்பட்டு நிதி வேறு கணக்குகளுக்கு மாற்றப்பட்டிருப்பதை ஆதாரங்களுடன் கண்டறிந்துள்ளனர். இதன் மூலம், இந்தப் பணப் பரிவர்த்தனைகள் உள்ளூர் அளவில் நடைபெறவில்லை என்பதையும் அதிகாரிகளின் கவனத்திற்குக் கொண்டு சென்றுள்ளனர்.
இதற்கிடையே, ஒரு அரசுக் கணக்கிலிருந்து மற்றொரு புதிய வங்கிக் கணக்கிற்குப் பெரிய தொகை மாற்றப்படும்போது, சம்பந்தப்பட்ட அதிகாரிகளின் மொபைல் எண்களுக்கு வங்கிகள் குறுஞ்செய்தி எச்சரிக்கைகளை (SMS Alert) அனுப்புவது வழக்கம். ஆனால், இந்த மோசடியில் பல கோடி ரூபாய் கைமாறிய பிறகும் அதிகாரிகளுக்கு எந்தவிதமான எச்சரிக்கைச் செய்தியும் வரவில்லை எனக் கூறப்படுகிறது.
மோசடிக் கும்பல் அதிகாரிகளின் மொபைல் எண்களை ஸ்பூஃபிங் (Spoofing) தொழில்நுட்பம் மூலம் முடக்கியிருக்கலாம் அல்லது எச்சரிக்கைச் செய்திகள் அவர்களைச் சென்றடையாத வகையில் செயல்பட்டிருக்கலாம் என்ற கோணத்திலும் விசாரணை நடைபெற்று வருகிறது. பல கோடி ரூபாய் கைமாறிய பிறகும் அதிகாரிகளுக்கு எந்தத் தகவலும் கிடைக்காதது இந்த வழக்கில் முக்கியத் திருப்பமாகப் பார்க்கப்படுகிறது.
இதற்கு முன்பு புதுச்சேரி அரசுக்குச் சொந்தமான மகாத்மா காந்தி முதுநிலை பல் மருத்துவக் கல்லூரியின் வங்கிக் கணக்கிலிருந்து இதேபோன்று ரூ.8.85 கோடி டிஜிட்டல் முறையில் மோசடி செய்யப்பட்டிருந்தது குறிப்பிடத்தக்கது. அந்தச் சம்பவத்தில், தீபாவளி போனஸ் மற்றும் சம்பளத்திற்காக அரசுக் கருவூலத்திலிருந்து (Treasury) கல்லூரியின் வங்கிக் கணக்கிற்கு நிதி வரவு வைக்கப்பட்டுள்ளது.
அந்தப் பணம் கணக்கில் வரவு வைக்கப்பட்ட அடுத்த இரண்டு மணி நேரத்திற்குள் ஒட்டுமொத்தத் தொகையும் டிஜிட்டல் முறையில் அபேஸ் செய்யப்பட்டதாகக் கூறப்படுகிறது. அரசுப் பணம் வங்கிக் கணக்கிற்கு வரும் நேரத்தைக் கண்காணித்து, உடனடியாகப் பணத்தை மாற்றியிருப்பது அதிகாரிகளிடையே அதிர்ச்சியை ஏற்படுத்தியது.
தற்போது தமிழக அரசின் ஊரக வளர்ச்சித் துறையிலும் இதேபோன்ற மோசடி நடைபெற்றுள்ளதால், புதுச்சேரி அரசு பல் மருத்துவக் கல்லூரி மோசடிக்கும் இந்தச் சம்பவத்திற்கும் ஒரே இணையக் குற்றக் கும்பலுக்குத் தொடர்பு உள்ளதா என்ற கோணத்திலும் போலீசார் விசாரணை நடத்தி வருகின்றனர்.
இதற்கிடையே, மோசடி செய்யப்பட்ட ரூ.22.10 கோடி எந்தெந்த வங்கிக் கணக்குகளுக்கு மாற்றப்பட்டுள்ளது என்பதைக் கண்டறியும் பணியில் சென்னை சைபர் கிரைம் போலீசாரும் ஊரக வளர்ச்சித் துறை அதிகாரிகளும் தீவிரமாக ஈடுபட்டுள்ளனர்.
பணம் மாற்றப்பட்ட கணக்குகளைக் கண்டறிந்து அவற்றை முடக்கும் (Freeze) நடவடிக்கைகளும் மேற்கொள்ளப்பட்டு வருகின்றன. மோசடிப் பணம் வடமாநிலங்களில் உள்ள ஏடிஎம் மையங்கள் மூலம் ரொக்கமாக எடுக்கப்பட்டுள்ளதா அல்லது கிரிப்டோகரன்சியாக (Cryptocurrency) மாற்றப்பட்டு நைஜீரியாவுக்குக் கடத்தப்பட்டுள்ளதா என்பதையும் போலீசார் ஆராய்ந்து வருகின்றனர்.
அரசின் ஒற்றை மைய வங்கிக் கணக்கு அமைப்பின் பாதுகாப்பு, அதிகாரிகளின் டிஜிட்டல் அங்கீகார விவரங்கள், பணப் பரிவர்த்தனைகளுக்கான ஒப்புதல் நடைமுறைகள் ஆகியவற்றில் ஏதேனும் பாதுகாப்புக் குறைபாடுகள் இருந்தனவா என்பதையும் அதிகாரிகள் ஆய்வு செய்து வருகின்றனர்.
தமிழக அரசின் மக்கள் நலத் திட்டங்களுக்காக ஒதுக்கப்பட்ட ரூ.22.10 கோடி நிதி இணையவழியில் மோசடி செய்யப்பட்டுள்ள சம்பவம் பெரும் அதிர்ச்சியை ஏற்படுத்தியுள்ள நிலையில், இந்த மோசடிக்குப் பின்னால் செயல்பட்டவர்கள் யார், பணம் எங்கெங்கு மாற்றப்பட்டுள்ளது, வெளிநாட்டுக் கும்பலுக்குத் தொடர்பு உள்ளதா என்பதற்கான முழு விவரங்கள் போலீசாரின் விசாரணைக்குப் பிறகே தெரியவரும்.