இந்தியத் தலைமைத் தேர்தல் ஆணையர் ஞானேஷ் குமார் தன்னிச்சையாகச் செயல்பட்டதாக, தேர்தல் ஆணையத்தின் மற்ற இரு ஆணையர்களான சுக்பீர் சிங் சாந்து மற்றும் விவேக் ஜோஷி அதிகாரப்பூர்வமாக ஆட்சேபனை தெரிவித்ததாக வெளியான தகவல், தேசிய அரசியலில் பெரும் பரபரப்பை ஏற்படுத்தியுள்ளது.
கடந்த 10 மாதங்களில் குறைந்தது 14 முறை, தங்களுக்குத் தெரியாமல் எடுக்கப்பட்ட முடிவுகள் மற்றும் பிறப்பிக்கப்பட்ட உத்தரவுகளுக்கு சுக்பீர் சிங் சாந்துவும் விவேக் ஜோஷியும் ஆட்சேபனை பதிவு செய்துள்ளனர். ஒரே நாளில் 4 முறை கூட ஆட்சேபனை தெரிவிக்கப்பட்டதாக அந்த அறிக்கை கூறுகிறது.
இந்த எதிர்ப்புகள் புதிய வாக்காளர்களைச் சேர்த்தல், வாக்காளர் பெயர்களை நீக்குதல் அல்லது மீண்டும் சேர்த்தல், SIR எனப்படும் சிறப்புத் தீவிர வாக்காளர் பட்டியல் திருத்தப் பணி, வாக்காளர் பட்டியல் தொடர்பான மேல்முறையீடுகள் மற்றும் வாக்காளர் தரவுத்தளத்தின் பாதுகாப்பு உள்ளிட்ட முக்கிய விவகாரங்களை உள்ளடக்கியதாக தெரிவிக்கப்பட்டுள்ளது.
இந்த சர்ச்சையின் முக்கிய மையமாக இருப்பது SIR பணிதான். பீகாரில் தொடங்கிய இந்தத் திருத்தப் பணி பின்னர் 30 மாநிலங்கள் மற்றும் யூனியன் பிரதேசங்களுக்கு விரிவுபடுத்தப்பட்டது. இதன் போது தயாரிக்கப்பட்ட வரைவு வாக்காளர் பட்டியல்களில் 13 கோடிக்கும் அதிகமான பெயர்கள் நீக்கப்பட்டதாக இந்தியன் எக்ஸ்பிரஸ் அறிக்கை தெரிவிக்கிறது. இந்தப் பணிகள் நடைபெறும் காலகட்டத்திலேயே, தேர்தல் ஆணையத்துக்குள் இருந்து இரு ஆணையர்கள் தொடர்ந்து ஆட்சேபனைகளை பதிவு செய்ததாக கூறப்படுகிறது.
புதிய வாக்காளர்களுக்கான படிவம் 6-ல் செய்யப்பட்ட மாற்றமும் சர்ச்சையை ஏற்படுத்தியுள்ளது. விண்ணப்பதாரர் அல்லது அவரது பெற்றோர், தாத்தா, பாட்டி ஆகியோரின் பெயர்கள் முந்தைய SIR வாக்காளர் பட்டியலில் இடம்பெற்றுள்ளதா என்ற கேள்வி புதிதாக சேர்க்கப்பட்டதாக கூறப்படுகிறது.
இந்தக் கேள்விக்கு பதில் அளிக்காமல் ஆன்லைன் விண்ணப்பத்தை சமர்ப்பிக்க முடியாத வகையில் மென்பொருள் இருந்ததாகவும், இந்த மாற்றம் உரிய விதிமுறை மாற்றமின்றி செய்யப்பட்டதாகவும் இரு ஆணையர்களும் எதிர்ப்பு தெரிவித்ததாக அறிக்கை கூறுகிறது.
மேலும், வாக்காளர் பட்டியல் தரவுத்தளத்தை டெல்லியில் மையப்படுத்துவது குறித்தும் சுக்பீர் சிங் சாந்துவும் விவேக் ஜோஷியும் கவலை தெரிவித்ததாக கூறப்படுகிறது. ஒவ்வொரு தொகுதியிலும் வாக்காளர் பட்டியலை நிர்வகிக்கும் தேர்தல் பதிவு அலுவலர்களுக்கு, ERONet உள்ளிட்ட அமைப்புகளில் முழுமையான அணுகல் கிடைக்கவில்லை என்றும், சட்டப்படி அதிகாரம் பெற்ற மாநில அளவிலான அதிகாரிகளின் தரவுத்தள அணுகல் கட்டுப்படுத்தப்படக் கூடாது என்றும் அவர்கள் கேள்வி எழுப்பியதாக தெரிவிக்கப்படுகிறது.
மேற்கு வங்கத்திலும் SIR தொடர்பான மேல்முறையீடுகள் குறித்து கேள்விகள் எழுந்துள்ளன. நீதித்துறை அதிகாரிகள் விசாரித்த சில வாக்காளர்களின் பெயர்கள் மீண்டும் சேர்க்கப்பட்ட நிலையில், அவர்களுக்கு எதிராக தேர்தல் ஆணையத்தின் சார்பில் மேல்முறையீடுகள் தாக்கல் செய்யப்பட்டதாக கூறப்படுகிறது. அந்த மேல்முறையீடுகளை யார், எந்த அதிகாரத்தின் அடிப்படையில் தாக்கல் செய்தனர் என்பது குறித்து சுக்பீர் சிங் சாந்து கேள்வி எழுப்பியதாக அறிக்கை தெரிவிக்கிறது.
இதேபோல், கோவாவில் தகுதியான 97 வாக்காளர்களை இறுதி பட்டியலில் சேர்க்க தேர்தல் பதிவு அலுவலர்கள் எடுத்த முடிவை மென்பொருளில் பதிவு செய்ய முடியாத நிலை ஏற்பட்டதாகவும் தெரிவிக்கப்பட்டுள்ளது.
SIR மென்பொருளில் ஏற்பட்ட தரவுக் குளறுபடிகளால் தேர்தல் ஆணையர் சுக்பீர் சிங் சாந்துவின் பெயரிலும் முரண்பாடு காட்டப்பட்டதாகவும், அவர் வாக்காளர் பட்டியலில் தொடர தகுதியானவர் என்பதை விளக்குமாறு நோட்டீஸ் அனுப்பப்பட்டதாகவும் தகவல் வெளியாகியுள்ளது.
இதேபோல் பல மூத்த மற்றும் ஓய்வுபெற்ற ஐ.ஏ.எஸ். அதிகாரிகளுக்கும் SIR தொடர்பான நோட்டீஸ்கள் அனுப்பப்பட்டுள்ளன. சாந்துவின் பெயர் தொடர்பான முரண்பாடு பின்னர் சரிபார்க்கப்பட்டதாக செய்தி தெரிவித்துள்ளது.
தேர்தல் ஆணையத்துக்குள் தங்களது ஆட்சேபனைகள் உரிய முறையில் கவனிக்கப்படவில்லை எனக் கூறி, இரு ஆணையர்களும் மத்திய அமைச்சரவைச் செயலாளரிடம் புகார் தெரிவித்ததாகவும் தகவல் வெளியாகியுள்ளது. செப்டம்பர் 9-ம் தேதி மூன்று ஆணையர்களும் முழுமையாக சந்தித்ததாகவும், நான்கு மாதங்களுக்குப் பிறகு நடைபெற்ற முதல் முழுமையான கூட்டம் அது என்றும் அறிக்கை கூறுகிறது.
இந்த விவகாரம் அரசியல் ரீதியாகவும் எதிரொலித்துள்ளது. காங்கிரஸ், திமுக உள்ளிட்ட எதிர்க்கட்சிகள் ஞானேஷ் குமாருக்கு எதிராக நடவடிக்கை எடுக்க வேண்டும் எனக் கோரியுள்ளன. அவரை பதவி நீக்கக் கோரி நாடாளுமன்றத்தில் தீர்மானத்துக்கான நோட்டீஸ் அளிக்கப்பட்டுள்ளதாகவும் தகவல்கள் வெளியாகியுள்ளன.
எதிர்க்கட்சிகள் முன்வைக்கும் குற்றச்சாட்டுகளில் தேர்தல் முறைகேடு புகார்களை புறக்கணித்தது, SIR பணிகளை தன்னிச்சையாக மேற்கொண்டது, குறிப்பிட்ட அரசியல் கட்சிக்கு சாதகமாக செயல்பட்டதாகக் கூறப்படுவது மற்றும் வாக்காளர்களின் உரிமை பாதிக்கப்பட்டதாகக் கூறப்படுவது உள்ளிட்ட அம்சங்கள் இடம்பெற்றுள்ளன.
இதற்கிடையே, இந்தக் குற்றச்சாட்டுகளை தேர்தல் ஆணையம் மறுத்துள்ளது. SIR உள்ளிட்ட அனைத்து முக்கிய முடிவுகளும் மூன்று ஆணையர்களின் ஒப்புதலுடனும் ஒருமனதாகவே எடுக்கப்பட்டதாக தேர்தல் ஆணைய வட்டாரங்கள் தெரிவித்துள்ளன. ஆணையர்களுக்குள் மாறுபட்ட கருத்துகள் தெரிவிப்பது ஜனநாயக உள்விவாதத்தின் ஒரு பகுதிதான் என்றும் விளக்கம் அளிக்கப்பட்டுள்ளது.
சட்ட ரீதியாகவும் இந்த விவகாரம் முக்கியத்துவம் பெறுகிறது. அரசியலமைப்புச் சட்டத்தின் 324-வது பிரிவின் கீழ் தேர்தல் ஆணையம் தலைமைத் தேர்தல் ஆணையர் மற்றும் இரு தேர்தல் ஆணையர்களைக் கொண்ட அமைப்பாக செயல்படுகிறது. 2023-ம் ஆண்டு சட்டத்தின் கீழ், முடிந்தவரை அனைத்து நடவடிக்கைகளும் ஒருமனதாக எடுக்கப்பட வேண்டும்; கருத்து வேறுபாடு ஏற்பட்டால் பெரும்பான்மை கருத்தின் அடிப்படையில் முடிவு எடுக்கலாம் என விதிகள் உள்ளன.
இவ்வாறு SIR மூலம் 13 கோடிக்கும் அதிகமான பெயர்கள் நீக்கப்பட்ட விவகாரம், படிவம் 6-ல் செய்யப்பட்ட மாற்றம், வாக்காளர் தரவுத்தளத்தின் மையப்படுத்தல், மேற்கு வங்க மேல்முறையீடுகள், கோவாவில் 97 தகுதியான வாக்காளர்களை மென்பொருள் மூலம் சேர்க்க முடியாத நிலை, இரு ஆணையர்களின் 14 ஆட்சேபனைகள் மற்றும் தேர்தல் ஆணையத்தின் மறுப்பு ஆகியவை, தற்போது இந்திய தேர்தல் ஆணையத்தின் செயல்பாடு குறித்த தேசிய அளவிலான விவாதமாக மாறியுள்ளன.