மனித வரலாற்றில் மிகப்பெரிய தொழில்நுட்பப் புரட்சியாக உருவெடுத்துள்ள செயற்கை நுண்ணறிவு (AI), மருத்துவம், கல்வி, அறிவியல் உள்ளிட்ட பல்வேறு துறைகளில் மாற்றத்தை ஏற்படுத்தி வருகிறது. அதேநேரத்தில், போலித் தகவல்கள் (Deepfakes), சைபர் அச்சுறுத்தல்கள், வேலைவாய்ப்பு இழப்புகள் மற்றும் மனிதர்களின் கட்டுப்பாட்டை AI மீறக்கூடிய ஆபத்துகள் குறித்த கவலையும் அதிகரித்துள்ளது. இதனால், சர்வதேச அளவிலான ஒழுங்குமுறை அமைப்பையும், நெறிமுறை சார்ந்த AI பயன்பாட்டையும் உருவாக்க வேண்டிய அவசியம் வலியுறுத்தப்பட்டு வருகிறது.
இந்நிலையில், பிரபல OpenAI நிறுவனத்தின் தலைமை நிர்வாக அதிகாரி சாம் ஆல்ட்மேன் (Sam Altman), வரும் செப்டம்பர் 23, 2026 அன்று ஐநா பாதுகாப்பு கவுன்சிலில் AI பாதுகாப்பு குறித்து உரையாற்ற உள்ளதாகத் தெரிவிக்கப்பட்டுள்ளது. தொழில்நுட்பம் மனிதர்களின் கட்டுப்பாட்டை மீறிச் செல்வதும், அதன் அதிகாரம் ஒருசில நிறுவனங்கள் அல்லது நபர்களிடம் மட்டுமே குவிவதும் கொடூரமான சர்வாதிகாரத்திற்கு வழிவகுக்கக்கூடும் என அவர் எச்சரித்துள்ளார்.
ஐ.நா. பொதுச்செயலாளர் அந்தோனியோ குட்டெரெஸ் (António Guterres), AI பாதுகாப்பு விதிமுறைகளில் நாடுகள் தளர்வுகளை ஏற்படுத்தும் ‘Race to the bottom’ என்ற அடிமட்டப் போட்டியில் ஈடுபடக் கூடாது என வலியுறுத்தியுள்ளார். அமெரிக்கா, சீனா உள்ளிட்ட முன்னணி நாடுகள் இணைந்து பொதுவான சர்வதேச நெறிமுறைகளையும் சட்டபூர்வமான கட்டுப்பாடுகளையும் உருவாக்க வேண்டும் என்றும் அவர் தெரிவித்துள்ளார். நிறுவனங்கள் தாங்களாக முன்வந்து மேற்கொள்ளும் தற்காலிக நடவடிக்கைகள் மட்டுமே போதாது என்றும் குட்டெரெஸ் குறிப்பிட்டுள்ளார்.
AI வளர்ச்சியின் வேகத்தைச் சற்றே குறைத்து பாதுகாப்பை உறுதி செய்ய வேண்டும் என்ற கருத்தை Anthropic நிறுவனத்தின் CEO டேரியோ அமோடெய் (Dario Amodei) முன்வைத்துள்ளார். இதற்கு சாம் ஆல்ட்மேன் மற்றும் எலோன் மஸ்க் (Elon Musk) ஆகியோரும் ஆதரவு தெரிவித்துள்ளதாகக் கூறப்படுகிறது. AI மனித குலத்திற்கே அச்சுறுத்தலாக மாறிவிடக் கூடாது என்பதே இவர்களின் கவலையாக உள்ளது. மேலும், குழந்தைகளைப் பாதுகாக்க ‘AI Child Safety Pledge’ என்ற உறுதிமொழியையும் குட்டெரெஸ் முன்மொழிந்துள்ளார்.
AI-ன் ஆபத்துகள் மற்றும் வாய்ப்புகள் குறித்து அறிவியல் தரவுகளை வழங்குவதற்காக, ஐநா. பொதுச்சபை Independent International Scientific Panel on AI என்ற சுதந்திரமான சர்வதேச அறிவியல் குழுவை ஏற்கனவே அமைத்துள்ளது. இதனிடையே, Anthropic நிறுவனத்தின் மூத்த ஆராய்ச்சியாளர் ஒருவர் பதவி விலகியதாகவும், மற்றொரு பணியாளர் அடுத்த 10 ஆண்டுகளில் AI மனித குலத்தை அழிக்கும் வாய்ப்பு 10 சதவீதத்திற்கும் அதிகமாக இருக்கலாம் எனப் பொதுவெளியில் தெரிவித்ததாகவும் கூறப்படுகிறது.
AI தொழில்நுட்பத்தின் தந்தை என அழைக்கப்படும் நோபல் பரிசு பெற்ற விஞ்ஞானி ஜெஃப்ரி ஹிண்டன் (Geoffrey Hinton), CNN பேட்டியில் AI-ஐ நிறுத்துவதற்கான ‘கில் ஸ்விட்ச்’ நீண்ட காலத்திற்கு பயனளிக்காமல் போகலாம் என எச்சரித்துள்ளார். மனிதர்களைவிட அதிக அறிவாற்றல் கொண்ட AI, அந்தச் சுவிட்சை இயக்க வேண்டாம் என மனிதர்களையே ஏமாற்றவோ, மூளைச்சலவை செய்யவோ வாய்ப்புள்ளதாக அவர் தெரிவித்துள்ளார்.
ஐநா. பாதுகாப்பு கவுன்சிலின் சுழற்சி முறைத் தலைமைப் பொறுப்பை வகிக்கும் பிரான்ஸ், இக்கூட்டத்தை நடத்துவதில் முக்கியப் பங்காற்றுகிறது. பிரான்ஸ் வெளியுறவு அமைச்சர் ஜீன்-நோயல் பரோட் (Jean-Noël Barrot) கூட்டத்திற்குத் தலைமை தாங்க உள்ளதாகக் கூறப்படுகிறது. பாதுகாப்பு கவுன்சிலின் ‘அமைதி மற்றும் பாதுகாப்பு’ அறைக்குள் தனியார் தொழில்நுட்ப நிறுவனத்தின் தலைவர் நேரடியாக உரையாற்றுவது அரிதான நிகழ்வாகப் பார்க்கப்படுகிறது.
சாம் ஆல்ட்மேன் AI குறித்த அச்சங்களை தற்போது மட்டுமே வெளிப்படுத்தவில்லை. 2015-ஆம் ஆண்டு அவர் எழுதிய ‘Machine Intelligence – Part 1’ கட்டுரையில், மனிதர்களைவிட அதிக புத்திசாலித்தனம் கொண்ட கணினிகளின் வளர்ச்சி மனித இனத்தின் அழிவிற்கே மிகப்பெரிய அச்சுறுத்தலாக மாறக்கூடும் எனக் குறிப்பிட்டிருந்ததாகத் தெரிவிக்கப்பட்டுள்ளது.
இந்தக் கூட்டத்தில் Anthropic நிறுவனத்தின் உயர் அதிகாரிகளும் பங்கேற்க வாய்ப்புள்ளதாக ராஜதந்திர வட்டாரத் தகவல்கள் தெரிவிக்கின்றன. இதற்கு முன்பு 2023-ஆம் ஆண்டு நடைபெற்ற AI கூட்டத்தில், சீனா AI-ஐ ‘கட்டுப்பாடற்ற குதிரை’ (Runaway Horse) என ஒப்பிட்டு எச்சரித்ததாகவும், AI-ஐப் பயன்படுத்தி மக்களைக் கண்காணிக்கவோ ஒடுக்கவோ கூடாது என அமெரிக்கா தெரிவித்ததாகவும் கூறப்படுகிறது.
தற்போது, அமெரிக்கா மற்றும் சீனா தங்களது புவிசார் அரசியல் முரண்பாடுகளைத் தாண்டி AI பாதுகாப்பில் இணைந்து செயல்படுமா என்ற எதிர்பார்ப்பு எழுந்துள்ளது. பிரான்ஸ் வெளியிட்டதாகக் கூறப்படும் Concept Note-ல், AI மீதான கட்டுப்பாட்டை மனிதர்கள் முழுமையாக இழந்தால், அது உலக அமைதி மற்றும் பாதுகாப்புக்கு பேரழிவை ஏற்படுத்தும் என எச்சரிக்கப்பட்டுள்ளதாகத் தெரிவிக்கப்பட்டுள்ளது. இதனால், மனித குலத்தின் பாதுகாப்பை உறுதி செய்ய உலக நாடுகள் ஒன்றிணைந்து AI தொழில்நுட்பத்தைக் கட்டுப்படுத்த வேண்டிய அவசியம் மீண்டும் வலியுறுத்தப்பட்டுள்ளது.