பிக் பாஸ் பிரபலமும் நடிகையுமான வர்ஷினி வெங்கட், சென்னையில் 26 வயது இளைஞரை மிரட்டி பணம் பறித்ததாக எழுந்த புகாரில் கிண்டி போலீசாரால் கைது செய்யப்பட்டுள்ளார். குறும்படம் எடுக்க முதலீடு செய்யுமாறு கூறி, அந்த இளைஞரிடம் இருந்து ரூ.5 லட்சம் பெற்றதுடன், மேலும் ரூ.27 லட்சம் பணம் கேட்டு மிரட்டியதாகவும் வர்ஷினி மீது புகார் அளிக்கப்பட்டுள்ளது.
இந்த சம்பவம் தொடர்பாக வர்ஷினி வெங்கட் உட்பட 4 பேர் மீது 3 பிரிவுகளின் கீழ் கிண்டி போலீசார் வழக்குப்பதிவு செய்துள்ளனர். இந்த வழக்கில் கைது செய்யப்பட்டுள்ள வர்ஷினி மீது புகார் அளித்த 26 வயது இளைஞரின் பெயர் தருண் என்பது தெரியவந்துள்ளது.
தருணுக்கு குறும்படத்தில் நடிப்பதற்கான வாய்ப்பு வழங்குவதாகவும், அந்தப் படத்தை தயாரிக்க முதலீடு செய்யுமாறும் வர்ஷினி கூறியதாக தெரிகிறது. இதனை நம்பிய தருண், வர்ஷினியிடம் ரூ.5 லட்சம் பணம் கொடுத்துள்ளார். ஆனால், பின்னர் குறும்படம் எடுக்கப்படாததால், தான் கொடுத்த பணத்தைத் திரும்பத் தருமாறு தருண் கேட்டுள்ளார்.
இதையடுத்து, கிண்டியில் உள்ள ஒரு நட்சத்திர ஓட்டல் அறைக்கு தருணை வர்ஷினி வரவழைத்ததாக கூறப்படுகிறது. அங்கு குறும்படம் தொடர்பாக பேசிக்கொண்டிருந்தபோது, திடீரென வர்ஷினியும் அவரது கூட்டாளிகளும் சேர்ந்து தருணை மிரட்டியதாக போலீசார் தெரிவித்துள்ளனர்.
அப்போது தருணிடம் இருந்த ரூ.50 ஆயிரம் ரொக்கப் பணம் மற்றும் இரண்டு விலையுயர்ந்த செல்போன்களை வர்ஷினியும் அவரது கூட்டாளிகளும் பறித்துக் கொண்டதாக கூறப்படுகிறது. மேலும், தருணிடம் இருந்து ஏற்கனவே ரூ.5 லட்சம் பெற்றிருந்த நிலையில், மேலும் ரூ.27 லட்சம் பணம் கேட்டு அவருக்கு கொலை மிரட்டல் விடுத்ததாகவும் போலீசார் தரப்பில் தெரிவிக்கப்பட்டுள்ளது.
தருணிடம் இருந்து மீதிப் பணத்தைப் பெறுவதற்காகவே வர்ஷினி தனது கூட்டாளிகளை ஓட்டல் அறைக்கு வரவழைத்து, திட்டமிட்டு அவரை மிரட்டியதாக போலீசார் விசாரணையில் தெரிவித்துள்ளனர். இந்த சம்பவம் தொடர்பாக வர்ஷினி உட்பட 4 பேர் மீது வழக்குப்பதிவு செய்யப்பட்டுள்ள நிலையில், அவருக்கு உதவியாக செயல்பட்டதாகக் கூறப்படும் 3 பேர் தலைமறைவாக உள்ளனர்.
தலைமறைவாக உள்ள 3 பேரையும் கைது செய்வதற்காக கிண்டி போலீசார் தனிப்படை அமைத்து தீவிரமாக தேடி வருகின்றனர். அதேநேரத்தில், இந்த சம்பவம் தொடர்பாக வர்ஷினியிடம் போலீசார் தீவிர விசாரணை நடத்தினர்.
விசாரணைக்குப் பின்னர் வர்ஷினி நீதிமன்றத்தில் ஆஜர்படுத்தப்பட்ட நிலையில், அவருக்கு நீதிமன்றக் காவல் விதிக்கப்பட்டுள்ளது. இதையடுத்து, அவர் சென்னை புழல் சிறையில் அடைக்கப்பட்டுள்ளார்.
வர்ஷினி வெங்கட், பிக் பாஸ் தமிழ் சீசன் 8 நிகழ்ச்சியில் வைல்டு கார்டு போட்டியாளராகப் பங்கேற்றவர். மேலும், ‘லாரா’, ‘ஸ்ருதி’, ‘சொட்ட சொட்ட நனையுது’ உள்ளிட்ட திரைப்படங்களிலும் நடித்துள்ளார். பிக் பாஸ் நிகழ்ச்சியில் வைல்டு கார்டு என்ட்ரியாக நுழைந்த அவர், சில வாரங்களிலேயே நிகழ்ச்சியில் இருந்து வெளியேறினார்.
பிக் பாஸ் நிகழ்ச்சியில் இருந்து வெளியேறிய சில காலத்திலேயே, மிரட்டல் மற்றும் பணம் பறிப்பு புகாரில் வர்ஷினி வெங்கட் கைது செய்யப்பட்டு புழல் சிறையில் அடைக்கப்பட்டிருப்பது சமூக வலைத்தளங்களில் பெரும் விவாதத்தை ஏற்படுத்தியுள்ளது. குறுகிய காலத்திற்குள் அவர் இத்தகைய கடுமையான குற்றச்சாட்டில் சிக்கியிருப்பது அவரது ரசிகர்கள் மத்தியில் அதிர்ச்சியை ஏற்படுத்தியுள்ளது.
இந்த வழக்கில் வர்ஷினி வெங்கட் மீதான குற்றச்சாட்டுகள் தொடர்பாக கிண்டி போலீசார் தொடர்ந்து விசாரணை நடத்தி வருகின்றனர். தலைமறைவாக உள்ள அவரது கூட்டாளிகள் 3 பேரையும் பிடிப்பதற்கான நடவடிக்கைகளும் தீவிரப்படுத்தப்பட்டுள்ளன.