அமெரிக்க அதிபர் டொனால்ட் டிரம்ப், வெனிசுலாவுடன் உலக வரலாற்றிலேயே மிகப்பெரிய எண்ணெய் ஒப்பந்தத்தை ஆகஸ்ட் 28 அன்று அறிவித்தார். இந்த ஒப்பந்தம், கச்சா எண்ணெய்க்கான அமெரிக்காவின் அணுகலை அதிகரிக்கும். விநியோகத்தை மேம்படுத்தும், மற்றும் இறுதியில் பெட்ரோல் விலையைக் குறைக்கும் என்று டிரம்ப் கூறினார். அரசாங்கத்திற்கும் தனியார் நிறுவனங்களுக்கும் இடையிலான ஒரு கூட்டாண்மை மூலம், வெனிசுலாவின் 65 பில்லியன் பேரல்களுக்கும் அதிகமான எண்ணெய் இருப்புகளின் மீது அமெரிக்கா பெரும்பான்மைக் கட்டுப்பாட்டைப் பெற்றுள்ளது என்று டிரம்ப் குறிப்பிட்டார்.
டிரம்ப் ‘ட்ரூத் சோஷியல்’ தளத்தில், “எனது வேண்டுகோளின் பேரில், வெளியுறவுத்துறை அமைச்சர் மார்கோ ரூபியோ மற்றும் போர்த்துறை அமைச்சர் பீட் ஹெக்ஸெத் ஆகியோர், வெனிசுலாவின் இடைக்கால அதிபர் டெல்சி ரோட்ரிக்ஸுடன் இணைந்து தனியார் நிறுவனங்களின் கூட்டாண்மையுடன், வெனிசுலாவில் உள்ள 65 பில்லியன் பேரல்களுக்கும் அதிகமான நிரூபிக்கப்பட்ட எண்ணெய் இருப்புகளின் மீது பெரும்பான்மைக் கட்டுப்பாட்டைப் பெற்றுள்ளனர். இதற்கு அமெரிக்க வரி செலுத்துவோருக்கு ஒரு பைசா கூட செலவாகவில்லை” என்று கறியுள்ளார்.
இந்த ஒப்பந்தம் அமெரிக்காவின் எரிசக்தி விநியோகத்திற்கு ஒரு பெரிய ஊக்கமாகும் என்றும், இது அமெரிக்காவின் எண்ணெய் இருப்பை “இரண்டு மடங்கிற்கும் மேலாக” அதிகரிக்கும் மற்றும் பெட்ரோல் விலையைக் குறைக்க உதவும் என்றும் டிரம்ப் கூறினார்.
வெனிசுலா இந்த ஒப்பந்தத்தை வரவேற்றது. வெனிசுலாவின் இடைக்கால ஜனாதிபதி டெல்சி ரோட்ரிக்ஸ் இந்த ஒப்பந்தத்தை வரவேற்று, இது நாட்டின் கருவூலத்திற்கு குறிப்பிடத்தக்க வருவாயை உருவாக்கும் என்று கூறினார். இந்த ஒப்பந்தம் வெனிசுலாவிற்கு குறிப்பிடத்தக்க முதலீடுகளை ஈர்க்கும் என்றும், குறிப்பாக எண்ணெய் தொழிலை வளர்க்கத் தேவையான உள்கட்டமைப்பை புனரமைப்பதிலும் மேம்படுத்துவதிலும் இது உதவும் என்றும் ரோட்ரிக்ஸ் கூறினார்.
“இந்த ஒப்பந்தம் தனியார் நிறுவனங்களின் உதவியுடன் எண்ணெய் உற்பத்தியை அதிகரிக்கும். மேலும், சுமார் 65 பில்லியன் பீப்பாய்கள் நிரூபிக்கப்பட்ட இருப்புக்களைக் கொண்ட 17 முக்கிய எண்ணெய் வயல்களின் மேம்பாட்டையும் இது உள்ளடக்கும். இந்தத் திட்டங்கள் வெனிசுலாவிற்கு 100 பில்லியன் டாலருக்கும் அதிகமான முதலீட்டையும், 209 பில்லியன் டாலருக்கும் அதிகமான வரி வருவாயையும் ஈட்டித் தரும் என்று எதிர்பார்க்கப்படுகிறது,” என்று அவர் கூறினார்.
வெனிசுலா தனது எண்ணெய் இருப்புக்களை இந்த நோக்கங்களுக்காகப் பயன்படுத்த விரும்புகிறது. ஒரு முக்கிய எரிசக்தி உற்பத்தியாளராக மாறுவதற்கும், வேலைவாய்ப்புகளை உருவாக்குவதற்கும், தொழிலாளர்களின் வருமானத்தை அதிகரிப்பதற்கும், வாழ்க்கைத்தரத்தை மேம்படுத்துவதற்கும் தனது பரந்த எண்ணெய் இருப்புக்களைப் பயன்படுத்த நாடு விரும்புவதாகவும் ரோட்ரிக்ஸ் கூறினார். “இந்த வழியில், வெனிசுலா தனது மக்களுக்கு மீட்சி, வளர்ச்சி, உற்பத்தி, பாதுகாப்பு மற்றும் செழிப்பு ஆகியவற்றின் ஒரு புதிய சகாப்தத்தை அறிமுகப்படுத்துகிறது,” என்றும் அவர் கூறினார்.