காரில் பொருத்தப்பட்டிருந்த சென்சார் அலாரம் அடிக்கடி சத்தமிட்டதால் ஆத்திரமடைந்த அண்டை வீட்டுக்காரர், பெண் வழக்கறிஞரின் காருக்கு பெட்ரோல் ஊற்றி தீ வைத்த சம்பவம் குஜராத் மாநிலம் மோர்பி பகுதியில் பெரும் பரபரப்பை ஏற்படுத்தியுள்ளது.
அதிர்ச்சியூட்டும் வகையில், கார் தீப்பற்றி எரிவதைக் குற்றம் சாட்டப்பட்ட நபர் தனது செல்போனில் வீடியோவாகவும் பதிவு செய்துள்ளார். இந்தச் சம்பவம் தொடர்பான சிசிடிவி காட்சிகள் தற்போது சமூக வலைத்தளங்களில் வெளியாகி கவனம் பெற்றுள்ளன.
குஜராத் மாநிலம் மோர்பியில் உள்ள வாக்ஸ்பரா (Waghpara) பகுதியில் இந்தச் சம்பவம் நடைபெற்றுள்ளது. 63 வயதான புஷ்பா பட் (Pushpa Bhatt) என்ற பெண் வழக்கறிஞரும், அவரது கணவர் கௌசிக் பட்டும் அந்தப் பகுதியில் வசித்து வருகின்றனர். இருவருமே மோர்பியில் வழக்கறிஞர்களாகப் பணியாற்றி வருகின்றனர். இவர்களுக்குச் சொந்தமான மாருதி ஸ்விப்ட் காரே தீ வைத்து எரிக்கப்பட்டுள்ளது.
புஷ்பா பட்டின் காரில் பொருத்தப்பட்டிருந்த சென்சார் அலாரம் மிகவும் உணர்திறன் கொண்டதாக இருந்துள்ளது. காரின் அருகே மனிதர்கள், தெரு நாய்கள் உள்ளிட்ட விலங்குகள் கடந்து சென்றாலோ அல்லது காரை லேசாகத் தொட்டாலோ உடனடியாக அதிக சத்தத்துடன் அலாரம் ஒலித்துள்ளது. இதனால் அப்பகுதியில் வசித்து வந்த அண்டை வீட்டுக்காரரான ஷிகர் கோஹெல் (Shikhar Gohel) என்பவர் கடும் எரிச்சலடைந்துள்ளார்.
இருப்பினும், இந்தச் சம்பவத்திற்குக் காரின் அலாரம் சத்தம் மட்டுமே காரணம் அல்ல என்றும், புஷ்பா பட் மற்றும் ஷிகர் கோஹெல் ஆகியோருக்கு இடையே நீண்ட நாட்களாக வாகனத்தை நிறுத்துவது தொடர்பாகப் பிரச்சினை இருந்து வந்ததாகவும் காவல் துறையின் முதற்கட்ட விசாரணையில் தெரியவந்துள்ளது. குற்றம் சாட்டப்பட்ட ஷிகரின் வீட்டின் அருகே அடிக்கடி கார் நிறுத்தப்பட்டதால் இருவருக்கும் இடையே ஏற்கெனவே கருத்து வேறுபாடு இருந்ததாகக் கூறப்படுகிறது.
சம்பவத்தன்று, அதாவது அக்டோபர் 28ஆம் தேதி மாலை, புஷ்பா பட் தனது காரை வீட்டில் நிறுத்தாமல், மளிகைப் பொருட்களை வாங்கிவிட்டு வந்த பின்னர், சக வழக்கறிஞரான மகிதர்பாய் தேவ் (Mahidhar Dave) என்பவரது வீட்டின் சுற்றுச்சுவரை ஒட்டி நிறுத்தியிருந்தார். அப்போது ஷிகர் கோஹெல் மற்றொரு காரில் சம்பவ இடத்திற்கு வந்துள்ளார்.
மாலை 4.39 மணியளவில் அங்கு வந்த ஷிகர், கையில் செல்போனுடன் புஷ்பா பட்டின் காரைச் சுற்றிப் பலமுறை நடந்து நோட்டமிட்டுள்ளார். பின்னர், மாலை 4.44 மணியளவில் பிளாஸ்டிக் பாட்டிலில் கொண்டு வந்த பெட்ரோலை காரின் மீது ஊற்றி, தீப்பெட்டிக் குச்சியால் தீ வைத்துள்ளார். இதனால் கார் மளமளவெனத் தீப்பற்றி எரியத் தொடங்கியுள்ளது.
கார் தீப்பற்றி எரிவதைக் கவனித்த அருகில் இருந்த வீட்டைச் சேர்ந்த பெண் ஒருவர் கூச்சலிட்டு எச்சரித்துள்ளார். ஆனால், அதைப் பொருட்படுத்தாத ஷிகர், அங்கிருந்து உடனடியாகத் தப்பிச் செல்லாமல் சுமார் நான்கு நிமிடங்கள் அங்கேயே நின்று கார் எரிவதைத் தனது செல்போனில் வீடியோ எடுத்துள்ளார். பின்னர், மாலை 4.48 மணியளவில் தான் வந்த மற்றொரு காரில் ஏறி அங்கிருந்து தப்பிச் சென்றுள்ளார்.
இந்தச் சம்பவத்தை முதலில் கவனித்த மகிதர்பாய் தேவ், உடனடியாக கார் உரிமையாளர் புஷ்பா பட்டுக்குத் தகவல் தெரிவித்துள்ளார். மேலும், அவரது வீட்டின் வாசலில் பொருத்தப்பட்டிருந்த சிசிடிவி கேமராவில் குற்றம் சாட்டப்பட்ட நபர் சம்பவ இடத்திற்கு வந்தது முதல் காருக்குத் தீ வைத்துவிட்டுத் தப்பிச் சென்றது வரையிலான அனைத்து நிகழ்வுகளும் தெளிவாகப் பதிவாகியுள்ளன. இந்தக் காட்சிகளே விசாரணையில் முக்கிய ஆதாரமாக அமைந்துள்ளன.
தகவலறிந்து மாலை 5 மணியளவில் சம்பவ இடத்திற்கு வந்த மோர்பி தலைமைத் தீயணைப்பு அதிகாரி தேவேந்திரசிங் ஜடேஜா தலைமையிலான தீயணைப்புப் படையினர், தண்ணீரைப் பீய்ச்சியடித்து தீயைக் கட்டுக்குள் கொண்டுவந்தனர். இருப்பினும், அதற்குள் காரின் பெரும்பாலான பகுதிகள் தீயில் கருகிச் சேதமடைந்துவிட்டன. குறிப்பாக, காரின் எஞ்சின் மற்றும் முன்பக்க உட்புறப் பகுதிகள் முற்றிலும் எரிந்து நாசமாகின. பின்புறப் பகுதியான பூட் ஸ்பேஸ் (Boot Space) மட்டுமே தீயிலிருந்து தப்பியதாகத் தெரிவிக்கப்பட்டுள்ளது.
இந்தத் தீ விபத்தால் காரின் முன்பகுதி உள்ளிட்ட பெரும்பாலான பகுதிகள் கடுமையாகச் சேதமடைந்துள்ளன. இதனால் சுமார் ரூ.3.5 லட்சம் வரை இழப்பு ஏற்பட்டுள்ளதாகக் கூறப்படுகிறது.
இதுதொடர்பாக மோர்பி சிட்டி ‘A’ பிரிவு காவல் துறையினர் வழக்குப் பதிவு செய்து விசாரணை மேற்கொண்டனர். சிசிடிவி காட்சிகள் மற்றும் பிற ஆதாரங்களின் அடிப்படையில், ஷிகர் ஜெயேஷ்பாய் கோஹெல் அடையாளம் காணப்பட்டு கைது செய்யப்பட்டார். சொத்துகளுக்குத் தீ வைத்து சேதப்படுத்துதல் உள்ளிட்ட குற்றச்சாட்டுகளின் கீழ் பாரதிய நியாய சன்ஹிதா (BNS) சட்டப்பிரிவுகள் 326(f) மற்றும் 324(4)-ன் கீழ் வழக்குப் பதிவு செய்யப்பட்டுள்ளதாகத் தெரிவிக்கப்பட்டுள்ளது.
காரின் சென்சார் அலாரம் சத்தம் மற்றும் வாகனத்தை நிறுத்துவது தொடர்பான நீண்டகாலப் பிரச்சினை காரணமாக அண்டை வீட்டுக்காரரே பெண் வழக்கறிஞரின் காருக்குத் திட்டமிட்டு பெட்ரோல் ஊற்றித் தீ வைத்த சம்பவம் மோர்பி பகுதியில் அதிர்ச்சியை ஏற்படுத்தியுள்ளது. குறிப்பாக, காரைத் தீ வைத்து எரித்ததோடு மட்டுமல்லாமல், அது எரிவதைச் செல்போனில் நின்று வீடியோ எடுத்த சம்பவம் அப்பகுதி மக்களிடையே பெரும் பரபரப்பை ஏற்படுத்தியுள்ளது.