“இது ஒரு சிறந்த உறவு என்று நான் கருதுகிறேன்… இந்தியா மீது தாக்குதல் நடத்தப்பட்டால், அவர்களுக்கு உதவ நாங்கள் அங்கு இருப்போம்… அந்த மனிதர் (பிரதமர் மோடி) மீது யாராவது தாக்குதல் நடத்தினால், நாங்கள் அங்கு இருப்போம். அவர்கள் தாக்கப்பட்டால் மற்றும் அவர் (பிரதமர் மோடி) தலைவராக இருந்தால், உதவ நாங்கள் அங்கு இருப்போம்,” என்று பிரதமர் நரேந்திர மோடியுடன் செய்தியாளர்களைச் சந்திக்கும்போது டிரம்ப் கூறினார்.
மேற்கு ஆசியாவில் அமெரிக்கத் தாக்குதலில் 3 இந்திய மாலுமிகள் உயிரிழந்தது குறித்த கேள்விக்கு பதிலளித்த டிரம்ப், “இது ஒரு கடினமான பணி. நாங்கள் இதில் இணைந்து பணியாற்றுகிறோம். அவர்கள் அனைவரையும் நாங்கள் நேசிக்கிறோம்,” என்று கூறினார்.
தனது 2020-ஆம் ஆண்டு இந்தியப் பயணத்தை நினைவு கூர்ந்த டிரம்ப், கடந்த முறை இந்தியாவில் மேற்கொண்ட பயணம் மிகச் சிறப்பாக இருந்ததாகக் கூறினார். “நாங்கள் அந்தப் புதிய மைதானத்தைத் திறந்தபோது, அங்கு சுமார் 3,000 முதல் 4,000 பேர் இருந்ததாக நினைக்கிறேன். அந்த மைதானத்தில் சுமார் 1,50,000 பேர் அமரலாம். ஆனால் வெளியே 2,50,000 பேரும், புல்வெளியில் 1,00,000 பேரும் இருந்தனர். அந்தச் சாதனைகள் முறியடிக்கப்பட்டனவா என்று எனக்குத் தெரியவில்லை. ஆனால் இந்தியாவில் நான் மிகச் சிறந்த நேரத்தைக் கழித்தேன்,” என்று அவர் மேலும் கூறினார்.
பிரதமர் மோடியைப் புகழ்ந்துரைத்த டிரம்ப், அவரை மிகக் கடுமையான பேச்சுவார்த்தையாளர் என்று குறிப்பிட்டார். “இவரைப் பாருங்கள். நான் உங்களுக்கு ஒரு விஷயத்தைச் சொல்கிறேன். அவர் பார்ப்பதற்கு மிகச் சிறந்த தோற்றம் கொண்டவர். ஒரு தேவதையைப் போல அவர் மிகவும் அழகாகத் தெரிகிறார். ஆனால் உண்மையில், அவர் மிகவும் கடுமையானவர். பார்ப்பதற்கு மிக நன்றாக இருப்பதால், அவர் உங்களை ஆச்சரியத்தில் ஆழ்த்திவிடுவார். இது போன்ற சிலர் உள்ளனர். மக்கள் அவரை மிகவும் நல்லவர் என்று சொல்கிறார்கள்.
ஆனால் நான் அவர் மிகவும் கடுமையானவர் என்று கூறுகிறேன். அவர் வர்த்தகத்தில் கடுமையானவர். இந்திய மக்கள் மீது அன்பு கொண்டவர். அதே சமயம் அமெரிக்காவையும் நேசிப்பவர். ஹூஸ்டனில் ‘ஹவுடி மோடி’ நிகழ்ச்சி நடைபெற்றது. மைதானம் முழுவதும் நிரம்பியிருந்தது. எதிர்காலத்தில் நாங்கள் எப்போதாவது இந்தியாவுக்குச் செல்வோம்,” என்று அவர் கூறினார்.
டிரம்புடனான சந்திப்பின்போது, கடல்சார் போக்குவரத்திற்கான சுதந்திரம் உறுதி செய்யப்பட வேண்டும் என்று இந்தியா எப்போதும் வலியுறுத்தி வருவதாகவும், மாலுமிகளின் பாதுகாப்பிற்கு முன்னுரிமை அளிக்கப்படும் என்றும் பிரதமர் மோடி குறிப்பிட்டார்.
“கடல்சார் வர்த்தகத் துறையில், உலகின் பல்வேறு கடற்பகுதிகளில் லட்சக்கணக்கான இந்திய மாலுமிகள் பணியில் ஈடுபட்டுள்ளனர். அவர்களின் பாதுகாப்பும் சமமான முக்கியத்துவம் வாய்ந்தது என்று நான் நம்புகிறேன்… ஈரானுடனான அந்த ஒப்பந்தத்தில் மாலுமிகளின் பாதுகாப்பு உறுதி செய்யப்படும். அதற்கு முன்னுரிமை அளிக்கப்படும் என்று நான் உறுதியாக நம்புகிறேன்,” என்று அவர் கூறினார்.