திருநெல்வேலி மாவட்டம் அம்பாசமுத்திரம் தொகுதியில் நாம் தமிழர் கட்சியின் தலைமை ஒருங்கிணைப்பாளர் சீமானை முன்னிறுத்தி ஒட்டப்பட்டுள்ள போஸ்டர்கள் அரசியல் வட்டாரத்தில் புதிய விவாதத்தை ஏற்படுத்தியுள்ளன. குறிப்பாக, “சீமானின் வெற்றி, தமிழ்நாட்டின் வெற்றி” என்ற வாசகத்துடன் தொகுதி முழுவதும் ஒட்டப்பட்டுள்ள இந்தப் போஸ்டர்கள், அம்பாசமுத்திரம் இடைத்தேர்தலில் சீமானை பொதுவேட்பாளராக முன்னிறுத்தும் முயற்சியா என்ற கேள்வியை எழுப்பியுள்ளன.
அம்பாசமுத்திரம், பாபநாசம், விக்கிரமசிங்கபுரம், டானா, சிவந்திபுரம் உள்ளிட்ட தொகுதியின் பல்வேறு பகுதிகளில் இந்தப் போஸ்டர்கள் ஒட்டப்பட்டுள்ளன. நாம் தமிழர் கட்சியினர் சார்பில் வெளியிடப்பட்டுள்ள இந்தப் போஸ்டர்கள் தற்போது அரசியல் கவனத்தைப் பெற்றுள்ளன.
இதற்கிடையே, தமிழக வெற்றிக் கழகத்தை வீழ்த்தும் நோக்கில், அம்பாசமுத்திரம் இடைத்தேர்தலில் திமுக மற்றும் அதிமுக ஆகிய இரு திராவிடக் கட்சிகளின் ஆதரவுடன் சீமானைப் பொதுவேட்பாளராக நிறுத்த வாய்ப்புள்ளதாக ஊடகங்களில் செய்திகள் வெளியாகின.
இந்த விவகாரம் தொடர்பாக, பசும்பொன் நிகழ்ச்சியின்போது செய்தியாளர்களிடம் பேசிய சீமான், இடைத்தேர்தலில் திமுக அல்லது அதிமுக தனக்கு ஆதரவு அளித்தால் அதை ஏன் மறுக்க வேண்டும் என்றும், அந்த ஆதரவை வரவேற்பதாகவும் தெரிவித்திருந்தார்.
மேலும், தனது நிலைப்பாட்டை விளக்கும் வகையில், “பசியில் இருக்கும்போது பிரியாணி கிடைத்தால் வேண்டாம் என்றா சொல்வேன்?” என்ற பொருள்பட அவர் தெரிவித்த கருத்தும் அரசியல் வட்டாரத்தில் பரபரப்பை ஏற்படுத்தியது.
திராவிடக் கட்சிகளைத் தொடர்ந்து கடுமையாக விமர்சித்து வந்த சீமான், தற்போது அதே கட்சிகளின் ஆதரவை ஏற்கத் தயாராக இருப்பதாகத் தெரிவித்திருப்பது அரசியல் விவாதங்களுக்கு வழிவகுத்துள்ளது.
இருப்பினும், திமுக அல்லது அதிமுக தலைமைகளுடன் இதுவரை எந்தவிதமான அதிகாரப்பூர்வ பேச்சுவார்த்தையும் நடைபெறவில்லை என்று நாம் தமிழர் கட்சியின் முக்கிய நிர்வாகிகள் தெரிவித்துள்ளதாகக் கூறப்படுகிறது. கட்சியின் அடுத்தகட்ட கலந்தாய்வுக் கூட்டத்தில் இந்த விவகாரம் குறித்து விவாதிக்கப்பட வாய்ப்புள்ளதாகவும் தகவல்கள் வெளியாகியுள்ளன.
இதற்கிடையே, விடுதலைச் சிறுத்தைகள் கட்சியின் நிர்வாகி வன்னியரசு, அம்பாசமுத்திரம் இடைத்தேர்தலில் போட்டியிடுவேன் என்று சீமான் கூறுவது அவர் செய்யும் நகைச்சுவைகளில் ஒன்று என விமர்சித்துள்ளார்.
மறுபுறம், பெரியார் மற்றும் முன்னாள் முதலமைச்சர் கருணாநிதி ஆகியோரைத் தொடர்ந்து விமர்சித்து வரும் சீமானுக்கு திமுக ஆதரவு அளித்தால், அது அக்கட்சியின் தொண்டர்கள் மத்தியில் அதிருப்தியையும் சோர்வையும் ஏற்படுத்தக்கூடும் என அரசியல் விமர்சகர்கள் கருத்து தெரிவிக்கின்றனர். அதேபோல், இந்த இடைத்தேர்தலில் மும்முனைப் போட்டி உருவானால் அது திமுகவுக்குச் சவாலாக அமையக்கூடும் என்றும் அரசியல் வட்டாரத்தில் பேசப்படுகிறது.
இந்த விவகாரம் குறித்து திமுக தலைவர் மு.க.ஸ்டாலினிடம் கேள்வி எழுப்பப்பட்டபோது, தேர்தல் தேதி அறிவிக்கட்டும்; அதன் பிறகு பார்க்கலாம் என்ற வகையில் பதிலளித்ததாகத் தெரிவிக்கப்பட்டுள்ளது.
இந்நிலையில், வரும் 14-ஆம் தேதி தமிழக முதலமைச்சர் விஜய் அம்பாசமுத்திரம் வருகை தர உள்ளதாகத் தகவல்கள் வெளியாகியுள்ளன. இந்தச் சூழலில், சீமானை முன்னிறுத்தி நாம் தமிழர் கட்சியினர் தொகுதி முழுவதும் ஒட்டியுள்ள போஸ்டர்கள் இடைத்தேர்தல் அரசியலில் கூடுதல் கவனத்தை ஈர்த்துள்ளன.
சீமானின் வெற்றி தமிழ்நாட்டின் வெற்றி என்ற வாசகத்துடன் வெளியாகியுள்ள இந்தப் போஸ்டர்கள், அவர் பொதுவேட்பாளராகக் களமிறங்குவாரா அல்லது நாம் தமிழர் கட்சி சார்பில் தனித்துப் போட்டியிடுவாரா என்ற எதிர்பார்ப்பையும் ஏற்படுத்தியுள்ளன.
திமுக, அதிமுக ஆதரவு குறித்த சீமானின் கருத்து, கட்சிகளின் அதிகாரப்பூர்வ நிலைப்பாடு, அம்பாசமுத்திரத்தில் ஒட்டப்பட்டுள்ள போஸ்டர்கள் என அடுத்தடுத்த அரசியல் நகர்வுகளால் இடைத்தேர்தல் களம் தற்போது சூடுபிடிக்கத் தொடங்கியுள்ளது.