தமிழக முதலமைச்சர் சி. ஜோசப் விஜய் மற்றும் முன்னணி நடிகை த்ரிஷா ஆகிய இருவரும் சென்னையில் நடைபெற்ற பிரம்மாண்ட திருமண வரவேற்பு நிகழ்ச்சியில் ஒன்றாகக் கலந்துகொண்ட வீடியோக்கள் மற்றும் புகைப்படங்கள் சமூக வலைத்தளங்களில் வெளியாகி பெரும் வைரலாகி வருகின்றன. ஒரே நிகழ்ச்சியில் இருவரும் ஒன்றாகத் தோன்றிய காட்சிகள் ரசிகர்கள் மத்தியிலும், அரசியல் மற்றும் திரையுலக வட்டாரங்களிலும் பேசுபொருளாக மாறியுள்ளன.
ஆந்திரப் பிரதேச முன்னாள் முதலமைச்சரும், ஒய்எஸ்ஆர் காங்கிரஸ் கட்சியின் தலைவருமான ஜெகன்மோகன் ரெட்டியின் உறவினரான ஒய்.எஸ். அனில் ரெட்டியின் மகள் திருமண வரவேற்பு நிகழ்ச்சி சென்னையில் உள்ள பிரபல நட்சத்திர விடுதியான தி லீலா பேலஸில் (The Leela Palace) நடைபெற்றது.
இந்த விழாவில் தமிழக முதலமைச்சர் விஜய், நடிகை த்ரிஷா, ஆந்திர முன்னாள் முதலமைச்சர் ஜெகன்மோகன் ரெட்டி உள்ளிட்ட பல்வேறு முக்கியப் பிரமுகர்கள் கலந்துகொண்டனர்.
இந்த நிகழ்ச்சிக்கு முதலமைச்சர் விஜய் அடர் பழுப்பு நிற (Brown) சூட் அணிந்து வந்திருந்தார். நடிகை த்ரிஷா அழகான இளஞ்சிவப்பு நிறப் புடவையில் வருகை தந்திருந்தார். விஜய்யுடன் அவரது தாயார் ஷோபா சந்திரசேகரும் உடனிருந்தார். இருவரும் ஒரே நேரத்தில் நிகழ்ச்சிக்கு வருகை தந்த காட்சிகள் அங்கிருந்தவர்களின் கவனத்தை ஈர்த்ததுடன், தற்போது இணையத்திலும் வேகமாகப் பரவி வருகின்றன.
தொடர்ந்து, முதலமைச்சர் விஜய், நடிகை த்ரிஷா மற்றும் விஜய்யின் தாயார் ஷோபா சந்திரசேகர் ஆகியோர் ஒன்றாக மேடைக்குச் சென்று மணமக்களை நேரில் சந்தித்து மலர்க்கொத்து வழங்கி வாழ்த்துத் தெரிவித்தனர். அப்போது மணமக்களுடன் இணைந்து புகைப்படங்களும் எடுத்துக்கொண்டனர்.
மேலும், முதலமைச்சர் விஜய் ஆந்திர முன்னாள் முதலமைச்சர் ஜெகன்மோகன் ரெட்டியுடன் சிறிது நேரம் சிநேகப்பூர்வமாகக் கலந்துரையாடியதுடன், அவருடனும் புகைப்படம் எடுத்துக்கொண்டார்.
இந்தத் திருமண வரவேற்பு நிகழ்ச்சியில் பிரபல தொழிலதிபர் கௌதம் அதானி, ஆந்திர முன்னாள் முதலமைச்சர் ஜெகன்மோகன் ரெட்டி மட்டுமின்றி, தெலங்கானாவின் பாரத ராஷ்டிர சமிதி (BRS) கட்சியின் செயல் தலைவரும் முன்னாள் அமைச்சருமான கே.டி. ராமராவ் (KTR) மற்றும் அவரது மனைவி ஷைலிமா ஆகியோரும் கலந்துகொண்டு மணமக்களை வாழ்த்தினர்.
குறிப்பாக, விஜய், த்ரிஷா, ஜெகன்மோகன் ரெட்டி, கௌதம் அதானி மற்றும் கே.டி. ராமராவ் உள்ளிட்ட முக்கியப் பிரமுகர்கள் ஒரே நிகழ்ச்சியில் பங்கேற்றது அரசியல் மற்றும் தொழில்துறை வட்டாரங்களின் கவனத்தை ஈர்த்துள்ளது.
மேலும், முதலமைச்சர் விஜய்யின் மேலாளரும், ‘தி ரூட்’ (The Route) நிறுவனத்தின் நிறுவனருமான ஜெகதீஷ் பழனிசாமியும் இந்த நிகழ்ச்சியில் உடனிருந்தார். விஜய், த்ரிஷா உள்ளிட்டோர் மேடையை நோக்கி ஒன்றாக நடந்து வரும் காட்சிகள் தற்போது எக்ஸ் (X), இன்ஸ்டாகிராம் உள்ளிட்ட சமூக வலைத்தளங்களில் அதிகம் பகிரப்பட்டு வருகின்றன.
கடந்த மே மாதம் நடைபெற்ற தமிழக முதலமைச்சர் விஜய்யின் பதவியேற்பு விழாவிலும் நடிகை த்ரிஷா கலந்துகொண்டிருந்தார். அப்போது விஜய்யின் தாயார் ஷோபா சந்திரசேகருடன் விஐபி வரிசையில் அமர்ந்து விழாவைக் கண்டுகளித்தார்.
அதனைத் தொடர்ந்து, கடந்த ஆகஸ்ட் 15ஆம் தேதி நடைபெற்ற சுதந்திர தின விழாவிலும் த்ரிஷா பங்கேற்றிருந்தார். அப்போது விஜய்யின் பெற்றோருடன் அவர் அமர்ந்திருந்த காட்சிகளும் கவனம் பெற்றன.
இந்நிலையில், தற்போது ஜெகன்மோகன் ரெட்டியின் உறவினர் இல்லத் திருமண வரவேற்பு நிகழ்ச்சியிலும் விஜய் மற்றும் த்ரிஷா ஒன்றாகப் பங்கேற்றிருப்பது மீண்டும் சமூக வலைத்தளங்களில் விவாதத்தை ஏற்படுத்தியுள்ளது. இருவரும் ஒரே மேடையில் தோன்றி மணமக்களை வாழ்த்திய வீடியோக்கள் ரசிகர்களிடையே பெரும் வரவேற்பைப் பெற்று வருகின்றன. குறிப்பாக, சினிமா வட்டாரத்தைத் தாண்டி அரசியல் பொதுநிகழ்ச்சிகளிலும் இருவரும் தொடர்ந்து ஒரே நேரத்தில் பங்கேற்பது இணையவாசிகளின் கவனத்தை ஈர்த்துள்ளது.