உலகின் புகழ்பெற்ற முதலீட்டாளரும், பெர்க்ஷயர் ஹாத்வே நிறுவனத்தின் தலைவருமான வாரன் பஃபெட், கடந்த 48 ஆண்டுகளுக்கும் மேலாகத் தண்ணீர் குடிப்பதையே தவிர்த்து வருவதாக அமெரிக்காவின் பிரபல ஹெட்ஜ் ஃபண்ட் மேலாளர் பில் அக்மேன் தெரிவித்துள்ளார். தினமும் குறைந்தது ஐந்து கேன் கோகோ கோலா குடிப்பதை வழக்கமாகக் கொண்டுள்ள பஃபெட்டின் இந்த வித்தியாசமான உணவுப் பழக்கம் தற்போது மீண்டும் பேசுபொருளாகியுள்ளது.
பில் அக்மேன் தனது வீட்டில் வாரன் பஃபெட்டுக்கு இரவு விருந்து அளித்தபோது இந்தத் தகவல் தெரியவந்துள்ளது. பஃபெட் வழக்கமாக செர்ரி கோக் குடிப்பார் என்பதை அறிந்த அக்மேன், அதனை முன்கூட்டியே வாங்கி வைத்திருந்தார். விருந்தின்போது பஃபெட்டிடம் சாதாரணத் தண்ணீர் அல்லது சோடா கலந்த தண்ணீர் வேண்டுமா என்று கேட்டுள்ளார்.
அதற்கு இரண்டுமே வேண்டாம் என்று மறுத்த பஃபெட், செர்ரி கோக் கேட்டுள்ளார். இதனால் ஆச்சரியமடைந்த அக்மேன், “நீங்கள் தண்ணீரே குடிப்பதில்லையா?” என்று கேட்டுள்ளார். அதற்குப் பதிலளித்த பஃபெட், “பில், நான் தண்ணீர் குடித்து 48 ஆண்டுகள் ஆகிவிட்டன” என்று தெரிவித்துள்ளார்.
ஒருகாலத்தில் பெப்சி பானத்தின் தீவிர ரசிகராக இருந்த பஃபெட், சிறுவயதில் அதனை அதிகம் விரும்பிக் குடித்ததால் நண்பர்களால் “பெப்சி வாரன்” என்று அழைக்கப்பட்டார். கிட்டத்தட்ட 50 ஆண்டுகளாக பெப்சி பிரியராக இருந்த அவர், 1986ஆம் ஆண்டு தனது பழைய அண்டை வீட்டாரின் தலையீட்டுக்குப் பிறகு பெப்சியிலிருந்து கோகோ கோலாவின் செர்ரி கோக்கிற்கு மாறினார். அதன்பிறகு, செர்ரி கோக் பெர்க்ஷயர் ஹாத்வே நிறுவனத்தின் கூட்டங்களிலும் இடம்பெறும் வழக்கமான பானமாக மாறியது.
2015ஆம் ஆண்டு ‘Fortune’ இதழுக்கு அளித்த பேட்டியில், தனது உணவுப் பழக்கம் குறித்து பஃபெட் வெளிப்படையாகப் பேசியிருந்தார். தினமும் சுமார் 2,700 கலோரிகளை எடுத்துக்கொள்வதாகவும், அதில் 25 சதவீதக் கலோரிகள் கோகோ கோலா போன்ற குளிர்பானங்கள் மூலமே கிடைப்பதாகவும் அவர் தெரிவித்திருந்தார். “என் உடலில் கால் பகுதி கோகோ கோலாதான்” என்று நகைச்சுவையாகவும் குறிப்பிட்டிருந்தார். தினமும் குறைந்தது ஐந்து கேன் கோக் குடிப்பது அவரது வழக்கமாக உள்ளது.
பஃபெட்டின் உணவுப் பழக்கத்தில் கோக் மட்டுமின்றி, மெக்டொனால்ட்ஸ் பர்கர், ஹாட் டாக், பிரெஞ்ச் பிரைஸ், ஐஸ்கிரீம் போன்ற துரித உணவுகளும் அதிகம் இடம்பெறுகின்றன. தனது உணவுப் பழக்கத்தைப் பற்றிக் கேட்கும்போது, “நான் ஆறு வயதுக் குழந்தையைப் போலச் சாப்பிடுகிறேன்” என்று அவர் நகைச்சுவையாகக் கூறுவார்.
மேலும், தினமும் காலை உணவுக்காக மெக்டொனால்ட்ஸ் உணவகத்தில் குறிப்பிட்ட தொகையை மட்டுமே செலவிடுவதாகவும் தகவல்கள் தெரிவிக்கின்றன. உடற்பயிற்சிக் கூடங்களுக்குச் செல்வதையும் அவர் வழக்கமாகக் கொண்டிருக்கவில்லை. உணவில் அதிகளவு உப்புச் சேர்த்துக்கொள்ளும் பழக்கமும் அவருக்கு இருப்பதாகக் கூறப்படுகிறது.
கோகோ கோலா மீதான பஃபெட்டின் விருப்பம் தனிப்பட்ட பழக்கமாக மட்டுமல்லாமல், அவரது முதலீட்டு வரலாற்றுடனும் நெருங்கிய தொடர்புடையது. 1988ஆம் ஆண்டு பிளாக் மண்டே சந்தை வீழ்ச்சிக்குப் பிறகு, பெர்க்ஷயர் ஹாத்வே நிறுவனம் கோகோ கோலா நிறுவனத்தின் பங்குகளை வாங்கத் தொடங்கியது. மொத்தம் சுமார் 1.3 பில்லியன் டாலர் மதிப்பில் 400 மில்லியன் பங்குகள் வாங்கப்பட்டன.
இது அந்நிறுவனத்தில் சுமார் 9.3 சதவீதப் பங்கு உரிமையைப் பெற்றுத் தந்தது. இந்த முதலீடு காலப்போக்கில் பெரும் மதிப்பை எட்டியதுடன், பங்குகளின் மூலம் கிடைக்கும் ஈவுத்தொகையாக (Dividend) ஆண்டுக்கு சுமார் 848 மில்லியன் டாலர் வருமானத்தையும் பெர்க்ஷயர் ஹாத்வே பெறுவதாகக் கூறப்படுகிறது. கோகோ கோலா நிறுவனத்தின் பங்குகளை பஃபெட் இதுவரை விற்றதில்லை என்றும் தகவல்கள் தெரிவிக்கின்றன.
கோகோ கோலா நிறுவனத்துடனான பஃபெட்டின் நெருக்கம் வணிக ரீதியாகவும் வெளிப்பட்டுள்ளது. 2017ஆம் ஆண்டு சீனாவில் செர்ரி கோக் அறிமுகப்படுத்தப்பட்டபோது, பஃபெட்டின் உருவப்படம் அச்சிடப்பட்ட சிறப்புப் பதிப்பு கேன்கள் மற்றும் பாட்டில்கள் விற்பனைக்கு வந்தன. இதன் மூலம், அவர் விரும்பிப் பருகும் பானம் அவரது முதலீட்டின் அடையாளமாகவும், விளம்பரப் பிரபலமாகவும் மாறியது.
தற்போது 96 வயதாகும் வாரன் பஃபெட்டின் உணவுப் பழக்கம் பலருக்கும் ஆச்சரியத்தை ஏற்படுத்தினாலும், அதனை ஆரோக்கியமான வாழ்க்கை முறையாகக் கருத முடியாது. அதிக சர்க்கரை கொண்ட குளிர்பானங்களைத் தொடர்ந்து பருகுவது உடல் பருமன், டைப் 2 நீரிழிவு நோய் மற்றும் இதய நோய்கள் ஏற்படும் அபாயத்தை அதிகரிக்கும் என்று மருத்துவ நிபுணர்கள் எச்சரிக்கின்றனர். இருப்பினும், பஃபெட் தனது வயதிலும் தொடர்ந்து சுறுசுறுப்பாகச் செயல்பட்டு வருவது பலரது கவனத்தையும் ஈர்த்துள்ளது.
முதலீட்டுச் சந்தையில் நிதானமான, தீர்க்கமான முடிவுகளுக்குப் பெயர் பெற்ற வாரன் பஃபெட்டின் வாழ்க்கையில் செர்ரி கோக்கும் துரித உணவுகளும் நீண்டகால அங்கமாகிவிட்டன. ஆனால், அவரது நீண்ட ஆயுளுக்கும் உடல்நிலைக்கும் இந்த உணவுப் பழக்கங்களே காரணம் என்று முடிவுக்கு வர முடியாது. அவரது உணவுத் தேர்வுகள் தனிப்பட்ட விருப்பங்களாகவே பார்க்கப்பட வேண்டும்.