தமிழக வெற்றிக் கழகத்தின் (த.வெ.க.) தேர்தல் பிரசார மேலாண்மைப் பொதுச்செயலாளரும், வில்லிவாக்கம் தொகுதி அமைச்சருமான ஆதவ் அர்ஜுனா, தனது தாயைப் பிரிந்த சிறுவயது நினைவுகளைப் பகிர்ந்து மேடையில் கண்கலங்கிய சம்பவம் நெகிழ்ச்சியை ஏற்படுத்தியுள்ளது.
சென்னையில் ஒருங்கிணைந்த குழந்தைகள் வளர்ச்சிப் பணிகள் திட்டம் (ICDS) மற்றும் சமூக நலத்துறை சார்பில் நடைபெற்ற சமுதாய வளைகாப்பு நிகழ்ச்சியில் கலந்துகொண்டு பேசிய அவர், தனது ஐந்து வயதில் தாயைப் பிரிந்ததையும், அந்த இழப்பால் ஏற்பட்ட ஏக்கம் இன்றுவரை நீங்கவில்லை என்பதையும் உருக்கமாகப் பகிர்ந்துகொண்டார்.
நிகழ்ச்சியில் பேசிய ஆதவ் அர்ஜுனா, “எனக்கு ஐந்து வயதாக இருக்கும்போதே என் அம்மா இறந்துவிட்டார்கள். என்னுடைய அம்மா என்னை விட்டுப் போகவில்லை என்றால், என்னுடைய வாழ்க்கை எப்படி இருந்திருக்கும் என்று இன்றுவரை யோசித்துக்கொண்டே இருக்கிறேன்.
அம்மா இல்லை என்ற வருத்தம் எனக்குள் எப்போதும் இருந்து கொண்டே இருக்கிறது. அதன் பிறகு வாழ்க்கையில் எத்தனை பெரிய சாதனைகளைச் செய்தாலும், எத்தனை வெற்றிகளைப் பெற்றாலும், எனக்குள் எதையுமே முழுமையாகச் சாதித்துவிட்டது போன்ற உணர்வு ஏற்படுவதில்லை” என்று தனது மனதில் நீண்டகாலமாக இருக்கும் தாயின் மீதான ஏக்கத்தை வெளிப்படுத்தினார்.
அரசியல் மேடைகளில் ஆக்ரோஷமாகப் பேசும் ஆதவ் அர்ஜுனா, தனது தாயைப் பற்றிப் பேசும்போது உணர்ச்சிவசப்பட்டுக் கண்கலங்கியது அங்கிருந்தவர்களை நெகிழ்ச்சியில் ஆழ்த்தியது. இதுதொடர்பான வீடியோவும் தற்போது சமூக வலைத்தளங்களில் பலரது கவனத்தைப் பெற்று வருகிறது.
இந்த நிகழ்ச்சியில் வில்லிவாக்கம் பகுதியைச் சேர்ந்த 120 கர்ப்பிணிப் பெண்களுக்கு பாரம்பரிய முறைப்படி வளைகாப்பு நடத்தப்பட்டு, சீர்வரிசைப் பொருட்கள் வழங்கப்பட்டன. கர்ப்பிணிப் பெண்களின் உடல்நலம் மற்றும் மனநலனைப் பேணும் நோக்கில் ஒருங்கிணைந்த குழந்தைகள் வளர்ச்சிப் பணிகள் திட்டம் (ICDS) மற்றும் சமூக நலத்துறை சார்பில் இந்த விழா ஏற்பாடு செய்யப்பட்டிருந்தது. இதன் ஒரு பகுதியாக, சத்துமாவு உள்ளிட்ட ஊட்டச்சத்துப் பொருட்கள், பழங்கள், வளையல்கள் மற்றும் புடவைகள் அடங்கிய பாரம்பரிய வளைகாப்புத் தொகுப்புகள் பெண்களுக்கு வழங்கப்பட்டன.
விழாவில் பங்கேற்ற கர்ப்பிணிப் பெண்களுக்கு அமைச்சர் ஆதவ் அர்ஜுனா தனது கைகளாலேயே உணவு பரிமாறினார். தொடர்ந்து, அவர்களுடன் தரையில் அமர்ந்து ஒன்றாக மதிய உணவும் அருந்தினார். அமைச்சரின் இந்த எளிமையான அணுகுமுறை அங்கிருந்தவர்களிடையே மிகுந்த நெகிழ்ச்சியை ஏற்படுத்தியது.
தொடர்ந்து மேடையில் பேசிய அவர், தாய்மார்கள் தங்களது குழந்தைகளை எப்போதும் மகிழ்ச்சியாக வளர்க்க வேண்டும் என்று கேட்டுக்கொண்டார். குழந்தைகளின் தனித்திறமைகளைக் கண்டறிந்து, சிறு வயதிலேயே விளையாட்டுப் பயிற்சிகளில் சேர்க்க வேண்டும் என்றும், புத்தகங்கள் வாசிக்கும் பழக்கத்தை அவர்களிடம் உருவாக்க வேண்டும் என்றும் அறிவுறுத்தினார்.
மேலும், முன்னாள் முதலமைச்சர் ஜெயலலிதா அவர்கள் வாழ்க்கையில் பல்வேறு சவால்களையும் வலிகளையும் கடந்து போராடி வெற்றி பெற்றதைப் பற்றிக் குழந்தைகளுக்குச் சொல்லிக் கொடுக்க வேண்டும் என்றார். அதேபோல், தமிழக வெற்றிக் கழகத் தலைவர் விஜய் பல்வேறு விமர்சனங்களையும் வசைகளையும் எதிர்கொண்டபோதும், அவற்றுக்குப் பதிலளிப்பதில் நேரத்தைச் செலவிடாமல் தனது உழைப்பால் மட்டுமே இந்த உயரத்தை அடைந்துள்ளதாகவும் குறிப்பிட்டார்.
வளைகாப்பு நிகழ்ச்சி முடிவடைந்த பின்னர், அங்கு வந்திருந்த சிறு குழந்தைகளைத் தனது கைகளில் தூக்கிக் கொஞ்சிய ஆதவ் அர்ஜுனா, அவர்களுக்குச் சாக்லேட் மற்றும் இனிப்புகளைத் தனது கைகளாலேயே ஊட்டினார். மேலும், குழந்தைகளுக்குப் பரிசுகளையும் வழங்கி மகிழ்ந்தார்.
அப்போது கர்ப்பிணித் தாய்மார்களிடம் பேசிய அவர், நிகழ்ச்சிக்குப் பின்னரும் ஏதேனும் குறைகள் அல்லது கோரிக்கைகள் இருந்தால் தாராளமாகத் தன்னை அணுகலாம் என்று தெரிவித்தார். “உங்கள் வீட்டுப் பிள்ளையாக, ஒரு அண்ணனாக அல்லது தம்பியாக நான் எப்போதும் உங்களுக்குத் துணையாக இருப்பேன்” என்று கூறி தொகுதி மக்களுக்கு நெகிழ்ச்சியான உறுதியையும் அளித்தார்.
இதனைத் தொடர்ந்து, அயனாவரம் பகுதியில் உள்ள மாநகராட்சி மருத்துவமனைக்குச் சென்ற ஆதவ் அர்ஜுனா, அங்கு புதிதாகப் பிறந்த குழந்தைகளையும் அவர்களது தாய்மார்களையும் சந்தித்தார். ஒரு தாய்மாமன் என்ற முறையில், தனது சொந்தச் செலவில் புதிதாகப் பிறந்த குழந்தைகளுக்குத் தங்க மோதிரங்களைப் பரிசாக வழங்கினார். அமைச்சரின் இந்த அன்பான செயல் அங்கிருந்த தாய்மார்களிடையே மகிழ்ச்சியையும் நெகிழ்ச்சியையும் ஏற்படுத்தியது.
அரசியல் களத்தில் தீவிரமாகச் செயல்பட்டு வரும் ஆதவ் அர்ஜுனா, ஒருபுறம் தனது சிறுவயதில் தாயைப் பிரிந்த வலியையும், தாயின் பாசம் கிடைக்காமல் போன ஏக்கத்தையும் பகிர்ந்து மேடையில் கண்கலங்கியதும், மறுபுறம் கர்ப்பிணித் தாய்மார்கள் மற்றும் பச்சிளம் குழந்தைகளிடம் அன்பு காட்டியதும் தற்போது பேசுபொருளாகியுள்ளது.