விஜய் டிவியின் ‘குக் வித் கோமாளி’ நிகழ்ச்சி மூலம் பிரபலமான நடிகர் புகழ், தனது மாமனாருக்காக, அதாவது மனைவி பென்சியின் அப்பாவுக்காக பகிர்ந்துள்ள உருக்கமான இன்ஸ்டாகிராம் பதிவுதான் தற்போது சமூக வலைதளங்களில் வைரலாகி வருகிறது. பலரும் இது புகழின் சொந்த திருமண நாள் பதிவு என்று தவறாகப் புரிந்துகொண்ட நிலையில், அவர் தனது மனைவியின் பெற்றோருக்காக எழுதியுள்ள இந்த உணர்வுப்பூர்வமான பதிவு பலரையும் நெகிழச் செய்துள்ளது.
புகழ் தனது பதிவில், “அப்பா இல்லாமல் வரும் உங்களுடைய முதல் திருமண நாள் இது… 60-வது கல்யாண நாள். ஒவ்வொரு வருடமும் இந்த நாளில் அப்பாவின் கையைப் பிடித்து சிரித்துக் கொண்டாடியிருப்பீர்கள். இன்று அந்தக் கை மட்டும் இல்லை…” என்று தனது மாமனாரின் மறைவை நினைத்து உருக்கமாகப் பதிவிட்டுள்ளார்.
மேலும், “அவர் விட்டுச் சென்ற அன்பும் நினைவுகளும் என்றும் உங்களுடன் இருக்கிறது. ❤️ அப்பா நம்மை விட்டு பிரிந்தாலும், அவர் அன்பு மட்டும் நம் வீட்டை விட்டு எங்கும் போகவில்லை…” என்று தனது மாமியாருக்கு ஆறுதல் கூறும் வகையிலும் புகழ் பதிவிட்டுள்ளார்.
‘குக் வித் கோமாளி’ நிகழ்ச்சி மூலம் பிரபலமான நடிகர் புகழ், கடந்த 2022-ஆம் ஆண்டு பென்சியைத் திருமணம் செய்துகொண்டார். புகழ் மற்றும் பென்சிக்கு கடந்த 2022-ஆம் ஆண்டு செப்டம்பர் மாதம் திருமணம் நடைபெற்றது. காதலித்து திருமணம் செய்துகொண்ட இந்தத் தம்பதியினருக்கு, கடந்த 2023-ஆம் ஆண்டு செப்டம்பர் மாதம் அழகான பெண் குழந்தை பிறந்தது என்பதும் குறிப்பிடத்தக்கது.
இதற்கிடையில், “நீங்க இல்லாம முதல் திருமண நாள்” என்ற தலைப்பை மட்டும் பார்த்த நெட்டிசன்கள் பலரும், புகழுக்கும் அவரது மனைவி பென்சிக்கும் ஏதேனும் பிரிவு அல்லது பிரச்சினை ஏற்பட்டுவிட்டதோ என்று தவறாக எண்ணி அதிர்ச்சியடைந்தனர். ஆனால், முழுப் பதிவையும் படித்த பின்னரே, அது அவரது மாமனாரின், அதாவது மனைவியின் அப்பாவின் மறைவு குறித்த உருக்கமான பதிவு என்பது பலருக்கும் புரிந்தது.
மேலும், புகழ் தனது பதிவில் “60-வது கல்யாண நாள்” என்று குறிப்பிட்டிருந்ததையும் சரியாகக் கவனிக்காத சில நெட்டிசன்கள், 2022-ஆம் ஆண்டுதான் திருமணம் செய்துகொண்ட புகழுக்கு எப்படி 60-வது திருமண நாள் வரும் என்று குழம்பினர். பின்னர்தான், அது புகழின் மாமனார் மற்றும் மாமியாரின் 60-வது திருமண நாள் என்பது பலருக்கும் புரிந்தது.
கடந்த செப்டம்பர் 1-ஆம் தேதிதான் புகழுக்கும் அவரது மனைவி பென்சிக்கும் 3-வது திருமண நாள் வந்தது. அந்த மகிழ்ச்சியான நாளில் தனது மனைவிக்காக உருகி உருகிக் காதலுடன் புகழ் பதிவிட்டிருந்தார். அதற்கு சரியாக ஒரு வாரம் கழித்து, செப்டம்பர் 8-ஆம் தேதி தனது மாமியாரின் 60-வது திருமண நாளையொட்டி இந்த சோகமான, உணர்வுப்பூர்வமான பதிவை எழுதியுள்ளார்.
தற்போது இந்தக் கடினமான சூழ்நிலையில், புகழ் தனது மாமியாரின் துக்கத்தைப் பகிர்ந்துகொண்டு, அவருக்கு ஒரு மகனாக நின்று ஆறுதல் கூறி வருவது பலரின் பாராட்டுகளையும் பெற்றுள்ளது. தனது மாமனாரை வெறும் மனைவியின் அப்பாவாக மட்டும் பார்க்காமல், தந்தையை இழந்து தவிக்கும் பென்சிக்கும் அவரது தாயாருக்கும் ஒரு மகனாகவும், குடும்பத்தின் தூணாகவும் நின்று இந்த இக்கட்டான சூழலைப் புகழ் கையாண்டு வருகிறார்.
புகழின் இந்த எமோஷனல் பதிவைக் கண்டு நெகிழ்ந்த ரசிகர்கள் மற்றும் திரைத்துறை நண்பர்கள் பலரும், “அப்பா எப்போதும் நம்முடன்தான் இருப்பார். அம்மாவுக்கு நீங்கள் துணையாக இருங்கள்” என்று கமெண்ட் பக்கத்தில் தங்களது ஆறுதல்களையும் பிரார்த்தனைகளையும் தெரிவித்து வருகின்றனர்.
எல்லோரையும் தனது நகைச்சுவையால் சிரிக்க வைக்கும் புகழுக்கு பின்னால் இப்படி ஒரு எமோஷனல் பக்கமும், குடும்பத்தின் மீது இவ்வளவு அக்கறையும் இருக்கிறதா என ரசிகர்கள் பலரும் கமெண்ட் செக்ஷனில் பாராட்டி வருகின்றனர்.