நடிகர் விஜய் தேவரகொண்டா தனது வரவிருக்கும் திரைப்படமான ‘ரணபாலி’ (Ranabaali) படப்பிடிப்பில் 6 கேரவன்கள் மற்றும் 50 உதவியாளர்கள் கேட்டதாக பரவிய தகவல் முற்றிலும் பொய்யானது என்று அவரது தரப்பு அதிகாரப்பூர்வமாக மறுத்துள்ளது.
பிரபல தெலுங்கு சினிமா செய்தி இணையதளமான ‘123Telugu’ பெயரும் லோகோவும் பயன்படுத்தி, யாரோ ஒருவர் போலியான ஸ்கிரீன்ஷாட்டை உருவாக்கி எக்ஸ் (X) தளத்தில் பகிர்ந்ததாக தெரிவிக்கப்பட்டுள்ளது.
அந்த போலி பதிவில், விஜய் தேவரகொண்டா சொகுசு கேரவன்கள் மற்றும் அதிக அளவிலான தனிப்பட்ட உதவியாளர்கள் கேட்டதாகவும், இதனால் தயாரிப்பு நிறுவனம் மைத்ரி மூவி மேக்கர்ஸ் (Mythri Movie Makers) நஷ்டமடைந்து தயாரிப்பாளர் சங்கத்தை அணுகியதாகவும் கூறப்பட்டிருந்தது.
இதுகுறித்து விளக்கம் அளித்த விஜய் தேவரகொண்டாவின் PR குழு, இது அவரது நற்பெயருக்கு களங்கம் ஏற்படுத்தும் வகையில் திட்டமிட்டு பரப்பப்படும் தவறான தகவல் பிரச்சாரம் என்று தெரிவித்துள்ளது.
இந்தக் குற்றச்சாட்டு முற்றிலும் ஆதாரமற்றது என்றும், ரசிகர்கள் இதுபோன்ற வதந்திகளை நம்பவோ அல்லது பகிரவோ வேண்டாம் என்றும் கேட்டுக்கொண்டுள்ளது.
அதேபோல், படத்தின் தயாரிப்பாளர் ஒய். ரவிசங்கர் (Y. Ravi Shankar) இந்த வதந்திகளை திட்டவட்டமாக மறுத்துள்ளார். விஜய் தேவரகொண்டா படப்பிடிப்பில் மிகவும் ஒழுக்கமாகவும், முழுமையான அர்ப்பணிப்புடனும் செயல்படுகிறார் என்றும் அவர் பாராட்டியுள்ளார்.
மேலும், தங்களது பெயர் தவறாக பயன்படுத்தப்பட்டு போலியான ஸ்கிரீன்ஷாட் பரப்பப்பட்டுள்ளதாக ‘123Telugu’ இணையதள நிர்வாகமும் தெரிவித்துள்ளது. அந்தச் செய்திக்கும் தங்களுக்கும் எந்தத் தொடர்பும் இல்லை என்றும், சம்பந்தப்பட்டவர்கள் மீது சட்ட நடவடிக்கை எடுக்கப்படும் என்றும் எச்சரித்துள்ளது.
இதற்கிடையில், ‘ரணபாலி’ திரைப்படம் வரலாற்றுப் பின்னணி கொண்ட அதிரடி பீரியட் ஆக்ஷன் டிராமா (Period Action Drama) ஆக உருவாகி வருகிறது. இப்படத்தை, நானி நடித்த ‘சியாம் சிங்கா ராய்’ (Shyam Singha Roy) திரைப்படத்தை இயக்கிய பிரபல இயக்குநர் ராகுல் சங்கிருத்யன் (Rahul Sankrityan) இயக்கி வருகிறார்.
இதுபோன்ற பல சிறப்பம்சங்கள் கொண்ட பெரிய படமாக ‘ரணபாலி’ உருவாகி வருவதால், திட்டமிட்டு படத்தின் பெயரைக் கெடுக்க இதுபோன்ற வதந்திகள் பரப்பப்படுவதாக சினிமா வட்டாரங்கள் தெரிவிக்கின்றன.
இந்த வதந்தி பரவியுள்ள ‘ரணபாலி’ திரைப்படம், விஜய் தேவரகொண்டா மற்றும் ராஷ்மிகா மந்தனா திருமணத்திற்குப் பிறகு இருவரும் இணைந்து நடிக்கும் முதல் திரைப்படமாகும் எனவும் கூறப்படுகிறது.
முன்னதாகவும் விஜய் தேவரகொண்டா இதுபோன்ற போலி செய்திகளால் பாதிக்கப்பட்டுள்ளார். 2020ஆம் ஆண்டு கொரோனா ஊரடங்கின் போது அவர் செய்த உதவிகள் தவறாக சித்தரிக்கப்பட்டு வதந்திகள் பரவின.
அதனைத் தொடர்ந்து அவர் “Kill Fake News” என்ற பிரச்சாரத்தைத் தொடங்கினார். அந்த முயற்சிக்கு சிரஞ்சீவி, மகேஷ் பாபு உள்ளிட்ட முன்னணி நடிகர்கள் ஆதரவு தெரிவித்தனர்.