வட மாநிலங்களில் காலியாக உள்ள மூன்று சட்டப்பேரவைத் தொகுதிகளுக்கு மட்டும் இந்திய தேர்தல் ஆணையம் இடைத்தேர்தலை அறிவித்துள்ளது. ஆனால், தமிழ்நாட்டில் தற்போது ஏழு சட்டப்பேரவைத் தொகுதிகள் காலியாக உள்ள நிலையில், அவற்றுக்கான இடைத்தேர்தல் குறித்து இதுவரை எந்த அறிவிப்பும் வெளியாகவில்லை.
பீகார், மத்தியப் பிரதேசம் மற்றும் குஜராத் மாநிலங்களில் காலியாக உள்ள தலா ஒரு சட்டப்பேரவைத் தொகுதிக்கு இடைத்தேர்தல் நடத்த தேர்தல் ஆணையம் அறிவித்துள்ளது. இதற்கான வாக்குப்பதிவு ஜூலை 30ஆம் தேதி நடைபெறவுள்ளது. வாக்கு எண்ணிக்கை ஆகஸ்ட் 2ஆம் தேதி நடைபெறும் என தேர்தல் ஆணையம் தெரிவித்துள்ளது.
இதற்கிடையில், தமிழ்நாட்டில் ஏழு சட்டப்பேரவைத் தொகுதிகள் காலியாக இருப்பதாக சட்டப்பேரவைச் செயலகம் ஏற்கனவே தேர்தல் ஆணையத்துக்கு அதிகாரப்பூர்வமாக தகவல் அனுப்பியுள்ளது. இருப்பினும், தமிழ்நாட்டுக்கான இடைத்தேர்தல் அறிவிப்பு வெளியாகாதது அரசியல் வட்டாரங்களில் பல்வேறு கேள்விகளை எழுப்பியுள்ளது.
“இந்திய தேர்தல் ஆணையத்தின் இந்த அறிவிப்பு முக்கியத்துவம் வாய்ந்ததாகக் கருதப்படுகிறது. பீகார், மத்தியப் பிரதேசம் மற்றும் குஜராத் மாநிலங்களில் காலியாக உள்ள மூன்று சட்டப்பேரவைத் தொகுதிகளுக்கான இடைத்தேர்தல் அறிவிக்கப்பட்டுள்ளது.
பீகாரின் பங்கிப்பூர் சட்டப்பேரவைத் தொகுதியின் உறுப்பினராக இருந்த நிதின் நவீன் மாநிலங்களவைக்கு தேர்ந்தெடுக்கப்பட்டதைத் தொடர்ந்து, தனது சட்டப்பேரவை உறுப்பினர் பதவியை ராஜினாமா செய்தார். இதனால் அந்தத் தொகுதி காலியானது.
மத்தியப் பிரதேசத்தின் ததியா சட்டப்பேரவைத் தொகுதியின் உறுப்பினராக இருந்த ராஜேந்திர பாரதி, வங்கி மோசடி வழக்கில் மூன்று ஆண்டுகள் சிறைத்தண்டனை பெற்றதைத் தொடர்ந்து, மக்கள் பிரதிநிதித்துவச் சட்டத்தின் கீழ் தகுதி நீக்கம் செய்யப்பட்டார். இதன் காரணமாக அந்தத் தொகுதியும் காலியானது.
குஜராத்தின் மஞ்சள்பூர் சட்டப்பேரவைத் தொகுதியின் உறுப்பினராக இருந்த யோகேஷ் படேல், உடல்நலக் குறைவால் காலமானதைத் தொடர்ந்து, அந்தத் தொகுதி காலியாக அறிவிக்கப்பட்டது.
அதாவது, இந்த மூன்று மாநிலங்களில் காலியிடங்கள் உருவாகக் காரணம் முறையே மாநிலங்களவைக்கு தேர்வு செய்யப்பட்டதைத் தொடர்ந்து அளிக்கப்பட்ட ராஜினாமா, தகுதி நீக்கம் மற்றும் உறுப்பினர் மரணம் ஆகும்.
ஆனால் தமிழ்நாட்டில் தற்போது காலியாக உள்ள ஏழு சட்டப்பேரவைத் தொகுதிகளும் உறுப்பினர்கள் ராஜினாமா செய்ததன் காரணமாகவே உருவானவை. இருப்பினும், அவற்றுக்கான இடைத்தேர்தல் இன்னும் அறிவிக்கப்படவில்லை.
தமிழ்நாடு சட்டப்பேரவைச் செயலகம் காலியிடங்கள் தொடர்பான அனைத்து விவரங்களையும் தேர்தல் ஆணையத்துக்கு ஏற்கனவே அனுப்பியுள்ளது. சபாநாயகர் ராஜினாமாக்களை ஏற்றுக்கொண்ட விவரங்களும் அதிகாரப்பூர்வமாக தேர்தல் ஆணையத்துக்கு தெரிவிக்கப்பட்டுள்ளன.
இந்த நிலையில், சில ராஜினாமாக்கள் தொடர்பான வழக்குகள் நீதிமன்றங்களில் நிலுவையில் இருப்பதாலா இடைத்தேர்தல் அறிவிக்கப்படவில்லை என்ற கேள்வி எழுகிறது. அல்லது மேலும் சில உறுப்பினர்கள் ராஜினாமா செய்யக்கூடும் என்ற எதிர்பார்ப்பில், அனைத்து காலித் தொகுதிகளுக்கும் ஒரே நேரத்தில் தேர்தல் நடத்த தேர்தல் ஆணையம் காத்திருக்கிறதா என்ற சந்தேகமும் அரசியல் வட்டாரங்களில் நிலவுகிறது.
எனினும், தேர்தல் ஆணையத்தின் விதிகளின்படி, ஒரு சட்டப்பேரவைத் தொகுதி காலியான நாளிலிருந்து ஆறு மாதங்களுக்குள் இடைத்தேர்தல் நடத்தப்பட வேண்டும். தற்போது அந்தக் காலக்கெடு நிறைவடைய இன்னும் பல மாதங்கள் இருப்பதால், தேர்தலை எப்போது நடத்துவது என்பது தேர்தல் ஆணையத்தின் அதிகார வரம்பிற்குள் உள்ள முடிவாகும்.
இருப்பினும், தமிழ்நாட்டின் ஏழு காலித் தொகுதிகளுக்கு இடைத்தேர்தல் அறிவிக்கப்படாததற்கான காரணம் என்ன என்பது முக்கியமான கேள்வியாகவே உள்ளது. இதற்கு தேர்தல் ஆணையம் என்ன விளக்கம் அளிக்கிறது என்பதைப் பொறுத்திருந்தே பார்க்க வேண்டியுள்ளது.