பிரான்சின் எவியான்-லெ-பென் (Évian-les-Bains) நகரில் நடைபெற்ற ஜி7 உச்சி மாநாட்டின் போது, இந்திய பிரதமர் நரேந்திர மோடி மற்றும் இத்தாலி பிரதமர் ஜார்ஜியா மெலோனி இடையே நடைபெற்ற சுவாரஸ்யமான உரையாடல் சமூக வலைதளங்களில் வேகமாக வைரலாகி வருகிறது.
மாநாட்டில் பங்கேற்ற உலகத் தலைவர்கள் அனைவரும் குழு புகைப்படம் எடுப்பதற்காக ஒன்றுகூடியிருந்தபோது, பிரதமர் மோடியை உற்சாகமாக வரவேற்ற ஜார்ஜியா மெலோனி, அவருடன் கைகுலுக்கி உரையாடினார்.
அப்போது அங்கிருந்த மைக்கில் தெளிவாக பதிவான அந்த உரையாடலில், மோடி “இன்ஸ்டாகிராம்…” என்று புன்னகையுடன் கூறத் தொடங்கியதும், அதற்கு பதிலளித்த மெலோனி, “ஆம், இன்ஸ்டாகிராமில் நாம்தான் உலகின் மிகவும் பிரபலமான ஜோடி” (We are the most famous couple on Instagram) என்று நகைச்சுவையாகக் கூறினார். இதைக் கேட்டு இரு தலைவர்களும் சிரித்துக்கொண்டனர்.
இந்த வீடியோ சமூக வலைதளங்களில் வெளியாகியதையடுத்து, எக்ஸ் (X) மற்றும் இன்ஸ்டாகிராம் தளங்களில் மில்லியன் கணக்கான பார்வைகளைப் பெற்று வேகமாகப் பரவி வருகிறது. ஏற்கனவே பிரதமர் மோடி மற்றும் ஜார்ஜியா மெலோனியின் பெயர்களை இணைத்து உருவான #Melodi என்ற ஹேஷ்டேக் உலகளவில் நீண்ட காலமாகவே டிரெண்டாகி வருகிறது.
கடந்த மாதம் பிரதமர் மோடி இத்தாலி சென்றபோது, இரு தலைவர்களும் பல்வேறு நிகழ்வுகளில் ஒன்றாகப் பங்கேற்ற புகைப்படங்கள் மற்றும் வீடியோக்கள் சமூக வலைதளங்களில் பெரும் வரவேற்பைப் பெற்றிருந்தன.
அப்போது இந்தியாவின் பிரபலமான ‘பார்லே மெலோடி’ மிட்டாயை ஜார்ஜியா மெலோனிக்கு பிரதமர் மோடி பரிசாக வழங்கியிருந்தார். “பிரதமர் மோடி எனக்கு ஒரு சிறந்த மிட்டாயை பரிசாக வழங்கியுள்ளார்” என்று மெலோனி தனது இன்ஸ்டாகிராம் பக்கத்தில் பகிர்ந்த வீடியோவும் இணையத்தில் பெரும் கவனத்தை ஈர்த்தது.
இந்நிலையில், ஜி7 மாநாட்டின் ஓரமாக நடைபெற்ற இருதரப்பு சந்திப்பில், இந்தியா – இத்தாலி உறவுகள், சர்வதேச விவகாரங்கள் மற்றும் பாதுகாப்பு ஒத்துழைப்பு உள்ளிட்ட முக்கிய அம்சங்கள் குறித்தும் இரு தலைவர்களும் விரிவாக ஆலோசனை நடத்தினர்.
அதிகாரப்பூர்வ பேச்சுவார்த்தைகளுக்கு மத்தியில் நிகழ்ந்த இந்த நகைச்சுவை தருணம், உலகம் முழுவதும் உள்ள இணையவாசிகளின் கவனத்தை ஈர்த்து, சமூக வலைதளங்களில் தொடர்ந்து பேசுபொருளாக மாறியுள்ளது.
மோடி மற்றும் மெலோனி சந்திக்கும் ஒவ்வொரு தருணமும் இணையத்தில் வைரலாகும் நிலையில், இந்த புதிய வீடியோவும் #Melodi ரசிகர்களிடையே பெரும் வரவேற்பைப் பெற்று வருகிறது.