தமிழக அரசியல் களம் தேர்தல் முடிவுகளுக்குப் பிறகும் தணியாத நெருப்பாகக் கொதித்துக் கொண்டிருக்கிறது. ‘மாற்றத்தை’ நோக்கி மக்கள் அளித்த தீர்ப்பின் அடிப்படையில், தவெக தலைவர் விஜய் தலைமையில் புதிய அரசு அமைந்துள்ள சூழலில், அடுத்தடுத்து அரங்கேறும் கூட்டணிக் கணக்குகளும், பின்னணி மோதல்களும் தவெக ஆட்சிக்கே ஒரு தர்மசங்கடமான சவாலை உருவாக்கியுள்ளன.
விஜய்யின் ஆட்சிக்கு வெளியிலிருந்து ஆதரவு அளித்து வரும் இடதுசாரிகள், விசிக, தவெக-வின் தற்போதைய நகர்வுகளுக்குக் கடும் முட்டுக்கட்டைப் போட்டுள்ளன. குறிப்பாக, “அதிமுகவுடன் சேர்ந்து ஆட்சி அமைக்கும் முடிவுக்கு தவெக சென்றால், எங்கள் ஆதரவை மறுபரிசீலனை செய்வோம்” என மார்க்சிஸ்ட் கம்யூனிஸ்ட் கட்சியின் மாநிலச் செயலாளர் பெ. சண்முகம் விடுத்துள்ள எச்சரிக்கை, அதிர்ச்சியை ஏற்படுத்தியுள்ளது.
மக்களின் தீர்ப்புக்கு விரோதம்
தவெக ஆட்சிக்கு வெளியிலிருந்து ஆதரவு தரும் முடிவில் காங்கிரஸ் கட்சியைத் தவிர்த்து, இரு கம்யூனிஸ்டு கட்சிகள் (சிபிஐ, சிபிஎம்), இந்திய யூனியன் முஸ்லிம் லீக், விசிக ஆகிய கட்சிகள் உறுதியாக உள்ளன. இவர்கள் அனைவரும் அடிப்படையில் இன்னும் திமுக கூட்டணியில் நீடித்தபடிதான், வெளியில் இருந்து தவெக-வுக்கு ஆதரவு தந்து வருகின்றனர்.
இது குறித்து பெ. சண்முகம், “மக்கள் திமுக, அதிமுக ஆகிய இரண்டு திராவிடக் கட்சிகளுக்கும் எதிராகத்தான் இந்தத் தேர்தலில் வாக்களித்திருக்கிறார்கள். அத்தகைய சூழலில், மக்களின் தீர்ப்புக்கு முற்றிலும் மாறாக, அதிமுகவின் ஆதரவைப் பெற்று அவர்களை அமைச்சரவையில் சேர்த்துக்கொண்டு விஜய் நல்லாட்சி நடத்த நினைப்பது அரசியல் தார்மீகத்திற்கு எதிரானது. அதிமுகவைச் சேர்த்துக் கொண்டால், தாங்கள் தவெக-வுக்குத் தரும் ஆதரவை உடனடியாக விலக்கிக் கொள்ள நேரிடும்” என்று திட்டவட்டமாக தெரிவித்துள்ளார்.
திருமாவளவனின் செக்
மற்றொருபுறம், விசிக தலைவர் தொல். திருமாவளவன் தவெக-வுக்கு ‘செக்’ வைத்துள்ளார். “மக்கள் தவெகவுக்கு எதிராகத்தான் விசிகவுக்கு வாக்களித்து வெற்றி பெறச் செய்துள்ளார்கள். எனவே, தேர்தலுக்குப் பிந்தைய கூட்டணிகளை எப்போதும் நியாயப்படுத்த முடியாது” என்று அவர் சுட்டிக்காட்டியுள்ளார்.
திமுக கூட்டணியில் இருந்துகொண்டே தவெக ஆட்சிக்கு முட்டுக் கொடுக்கும் விசிக, இடதுசாரிகள், தங்களின் தனித்துவமான கொள்கை அடையாளத்தை இழக்க விரும்பவில்லை. இந்த தற்காலிகக் கூட்டணியில் ஏதேனும் ஒரு கட்சி தனது ஆதரவை விலக்கிக் கொண்டால் கூட, பெரும்பான்மையை இழந்து விஜய்யின் ஆட்சி உடனடியாக முடிவுக்கு வந்துவிடும் என்ற ஆபத்தான சூழலே நிலவுகிறது.
அதிமுகவின் எஸ்.பி.வி-சிவிஎஸ் டீம்
இடதுசாரிகள் மற்றும் விசிக-வின் இந்த பிடிவாதத்திற்குப் பின்னால் ஒரு மிகப்பெரிய அரசியல் பின்னணி நகர்வு ஒளிந்துள்ளது. அதிமுகவின் முக்கியப் புள்ளிகளான எஸ்.பி. வேலுமணி, சி.வி. சண்முகம் ஆகியோர் தலைமையிலான ஒரு ’25 சட்டமன்ற உறுப்பினர்கள்’ கொண்ட அதிருப்திப் பிரிவு, தவெக ஆட்சிக்கு ஆதரவளித்துள்ளது.
ஆனால், இதில் தவெக-வுக்குப் பெரும் சட்டச் சிக்கல் காத்திருக்கிறது. இந்திய அரசியலமைப்புச் சட்டத்தின் 10-வது அட்டவணையின் கட்சித் தாவல் தடைச் சட்டப் படி, அதிமுகவின் ஒட்டுமொத்த சட்டமன்ற உறுப்பினர்களில் 3-ல் 2 பங்கு உறுப்பினர்கள் பிரிந்தால் மட்டுமே தகுதிநீக்கத்தில் இருந்து தப்பிக்க முடியும். வெறும் 20 முதல் 25 உறுப்பினர்கள் மட்டும் தனியாகப் பிரிந்து வந்து தவெக-வை ஆதரித்தால், அவர்களின் எம்.எல்.ஏ பதவிகள் பறிபோகும் அபாயம் உள்ளது.
விஜய்க்கு முதல் வழி கொள்கை ரீதியாக முரண்பட்டாலும், தற்போதைக்கு வெளியில் இருந்து ஆதரவு தரும் கம்யூனிஸ்டுகள், விசிக-வை நம்பி ஆட்சியைத் தொடர்வது. ஆனால், இவர்கள் எப்பொழுது வேண்டுமானாலும் ஆதரவை வாபஸ் பெறலாம் என்ற கத்தி எப்போதும் தலைக்கு மேல் தொங்கும்.
விஜய்க்கு 2வது வழி இடதுசாரிகளை உதறிவிட்டு, வேலுமணி – சி.வி.சண்முகம் தரப்பை நம்புவது. ஆனால், கட்சித் தாவல் சட்டத்தால் அவர்களின் பதவி பறிபோனால், ஆட்சி கவிழ்ந்து மீண்டும் தேர்தலைச் சந்திக்க நேரிடும்.
அதிமுகவின் 25 எம்.எல்.ஏ-க்களை நம்பி விஜய் தடம் மாறினால், அது குறுகிய காலத்திற்கு ஆட்சியைத் தக்கவைக்க உதவலாம். ஆனால், நீண்ட கால நோக்கில் அது தவெக-வுக்குப் பெரும் பின்னடைவாக அமையும். அவர்கள் மீது கட்சித் தாவல் தடைச் சட்டம் பாயும். சபாநாயகர் அவர்களின் பதவியைப் பறித்தால், விஜய் அரசு உடனடியாகப் பெரும்பான்மையை இழந்துவிடும்.
ஊழலற்ற மாற்று அரசியல், திராவிடக் கட்சிகளுக்கு எதிர்ப்பு என்ற முழக்கங்களை முன்வைத்துத்தான் விஜய் ஆட்சிக்கு வந்தார். இப்போது அதே திராவிடக் கட்சியின் ஒரு பிரிவோடு கைகோர்த்தால், “விஜய்யும் மற்ற அரசியல்வாதிகளைப் போலத்தான், பதவிக்காக எதையும் செய்வார்” என்ற எதிர்மறை பிம்பம் மக்களிடம் உருவாகிவிடும்.
மறுபுறம், கம்யூனிஸ்டுகள் மற்றும் திருமாவளவனின் விசிக வைக்கும் ‘செக்’ விஜய்க்கு நெருக்கடியாகத் தோன்றினாலும், தார்மீக ரீதியாக அதுவே விஜய்க்குச் சாதகமான பாதை. மக்களின் தீர்ப்பை மதித்தல்: மக்கள் திமுக-வுக்கும் அதிமுக-வுக்கும் எதிராகத்தான் தவெக-வை ஆதரித்துள்ளனர். எனவே, பெ. சண்முகம் கூறுவது போல அதிமுகவை தள்ளி வைப்பதுதான் சிறந்தது.
கம்யூனிஸ்டுகளும் விசிக-வும் தற்போதைக்கு திமுக கூட்டணியில் நீடித்தபடிதான் தவெக-வுக்கு வெளியில் இருந்து ஆதரவு தருகின்றனர். இவர்களை விஜய் அரவணைத்துச் சென்றால், எதிர்காலத்தில் இவர்களை முழுமையாக திமுக கூட்டணியில் இருந்து பிரித்து, தவெக தலைமையிலான ஒரு வலுவான கூட்டணியை உருவாக்க இதுவே அடித்தளமாக அமையும்.
முதல்வர் விஜய் தனக்கு இருக்கும் சினிமா இமேஜை தாண்டி, ஒரு முதிர்ந்த அரசியல்வாதியாக நிரூபிக்க வேண்டிய தருணம் இது. 25 அதிமுக எம்.எல்.ஏ-க்களின் தற்காலிக ஆதரவை நம்பி, கட்சித் தாவல் சட்டச் சிக்கல்களிலும், கொள்கை சமரசங்களிலும் சிக்கிக் கொள்வதை விஜய் முற்றிலும் தவிர்க்க வேண்டும்.
மாறாக, இடதுசாரிகள், விசிக-வின் தார்மீக நிபந்தனைகளுக்குக் கட்டுப்பட்டு, அதிமுகவை அமைச்சரவையில் சேர்க்காமல், வெளியில் இருந்தே ஆட்சியை நகர்த்துவதே விஜய்க்கு நல்லது. ஒருவேளை இதனால் ஆட்சி கவிழ்ந்தால் கூட, “கொள்கைக்காக ஆட்சியை இழந்தார்” என்ற அனுதாப அலை, அடுத்த தேர்தலில் விஜய்யை அசைக்க முடியாத பெரும்பான்மையோடு மீண்டும் அரியணையில் அமர வைக்கும். தியாகம் எப்போதும் அரசியலில் பெரிய லாபத்தையே தரும்” என்கிறார்கள் அரசியல் விமர்சகர்கள்.