எதிர்கால கணவருக்கான ஒரு பெண்ணின் தகுதிப் பட்டியல் சமூகவலை தளத்தில் வைரலாகி, விவாதங்களைத் தூண்டியுள்ளது. @Crushtology_ என்ற பயனர் பெயரைக் கொண்ட வேதிகா என்பவரால் இந்தப் பதிவு பகிரப்பட்டது.
தனது பதிவில், எதிர்கால கணவரிடம் தான் எதிர்பார்க்கும் விட்டுக்கொடுக்க முடியாத பல குணாதிசயங்களை அவர் பட்டியலிட்டிருந்தார். இறுதியில், அத்தனை தகுதிகளும் கொண்ட ஒருவரை எங்கே காண முடியும் என்றும் அவர் கேள்வி எழுப்பியிருந்தார்.
அந்தப் பதிவில், “நான் திருமணம் செய்துகொள்ளப்போகும் ஆண் பின்வரும் தகுதிகளைக் கொண்டிருக்க வேண்டும்: கன்னித் தன்மையுள்ளவர். மாதம் குறைந்தபட்சம் ரூ. 2 லட்சம் வருமானம் ஈட்டுபவர். இயற்கையாகவே அழகான தோற்றம் கொண்டவர். 6 அடி உயரம் கொண்டவர். சமையல் தெரிந்தவர். பெண்களை இழிவாகக் கருதாதவர். சமூக ஊடகங்களைப் பயன்படுத்தாதவர்.
பெண் நண்பர்கள் இல்லாதவர். எங்காவது செல்வதற்கு முன் அனுமதி கேட்பவர். 24 மணி நேரமும் தனது ‘லைவ் லொகேஷன்’ பகிர்ந்துகொள்பவர். என்னை வெளிநாட்டுப் பயணங்களுக்கு அழைத்துச் செல்பவர். அப்படிப்பட்ட ஒரு ஆணை நான் எங்கே கண்டுபிடிப்பது?”
இந்தப் பதிவு வைரலாகியது. ஆயிரக்கணக்கான பயனர்கள் அந்த நீண்ட எதிர்பார்ப்புப் பட்டியல் குறித்துத் தங்கள் கருத்துகளைத் தெரிவித்தனர். ஒரு பயனர் “யாசிப்பதற்குப் பதிலாக, முதலில் உங்கள் தகுதியையும் தகுதிகளையும் காட்டுங்கள். உங்களைப் போன்ற ஒரு பெண் யாருக்குத் தேவை? உங்கள் ஏக்கம், மனைவி என்ற முகமூடிக்குப் பின்னால் மறைந்திருக்கும் ஒரு ஒட்டுண்ணியைக் காட்டுகிறது. ஆண்களே, கவனமாக இருங்கள” எனக் கூறியுள்ளார்.
மற்றொருவர், “உங்களுக்கு ஒரு கணவன் தேவையில்லை. உங்களுக்கு ஒரு கன்னி ஏடிஎம், 6 அடி உயர மெய்க்காப்பாளர். தனிப்பட்ட சமையல்காரர், ஜிபிஎஸ் மூலம் கண்காணிக்கப்படும் வேலையாள். வெளிநாட்டுப் பயண ஆதரவாளர், சமூக வாழ்க்கையே இல்லாத ஒரு ஆண் வேண்டும். இவையெல்லாம் கேட்ட பிறகும், நீங்கள் இன்னும் கேட்கிறீர்கள். “அப்படிப்பட்ட ஒரு ஆணை நான் எங்கே கண்டுபிடிப்பேன்?” பதில் எங்கும் இல்லை. ஏனென்றால், சுயமரியாதையுள்ள ஆண்கள் திருமணம் என்ற போர்வையில் வரும் ஊதியம் இல்லாத அடிமைத்தனத்திற்கு விண்ணப்பிக்க மாட்டார்கள். திருமணம் என்பது ஒரு கூட்டுறவு. இது கட்டுப்படுத்தப்பட்ட, தனிமைப்படுத்தப்பட்ட, அதிக வருமானம் ஈட்டும் ஒரு பணயக்கைதிக்கான வேலை விவரம்” எனக் கூறியுள்ளார்.
மற்றொருவர், எதிர்பார்ப்புகள் பரஸ்பரமாக இருக்க வேண்டும் என்று கூறி “அதற்கு அந்தப் பெண்ணும் அதே போல இருக்க வேண்டும், நீங்கள் எதைக் கொடுக்கிறீர்களோ அதுவே உங்களுக்குக் கிடைக்கும்” என்று எழுதியுள்ளார்.
கோடீஸ்வரர் எலான் மஸ்க்கைக் குறிப்பிட்டு, மற்றொரு பயனர் கிண்டலாக, “@elonmusk, இவர் ஒரு வேற்றுக்கிரகவாசியை எதிர்பார்க்கிறார். செவ்வாய் கிரகத்தில் அப்படி யாரையாவது கண்டால் இவருக்கு ஒருவரை அழைத்து வாருங்கள்” என்று கூறியுள்ளார்.
ஆனாலும், அனைவரும் அந்தப் பெண்ணை விமர்சிக்கவில்லை. பதில்களில் உள்ள பாலினப் பாகுபாட்டைச் சுட்டிக்காட்டிய ஒருவர், “இரட்டை வேடம் அல்லது பாசாங்குத்தனம் எப்படி இருக்கும் என்பதைப் பார்க்க விரும்பினால், இந்தப் பதிவின் கீழ் கருத்து தெரிவிக்கும் ஆண்களைப் பாருங்கள். இதில் பாலினங்களை மாற்றி அமைத்துப் பார்த்தால் அதாவது ஆண்கள் இப்படி ஒரு பட்டியலைக் கேட்டால், அனைத்து ஆண்களும் அதை ஏற்றுக்கொள்வார்கள்” என்று கூறியுள்ளார்.